Ağaməmməd Abdullayev

Ağaməmməd Abdullayev
Abdullayev Ağaməmməd Səməd oğlu
Doğum tarixi	1909
Doğum yeri	Novxanı, Bakı qəzası, Bakı quberniyası, Rusiya imperiyası
Vəfat tarixi	1976
Vəfat yeri	Bakı, Azərbaycan SSR, SSRİ
Elmi adı	professor (1960)
İş yerləri	Azərbaycan Müəllimlər İnstitutu, Azərbaycan Dövlət Pedaqoji Universiteti, Azərbaycan Dillər Universiteti
Təhsili	Azərbaycan Dövlət Universiteti (1926–)

Abdullayev Ağaməmməd Səməd oğlu (1909, Novxanı, Bakı qəzası – 1976, Bakı) — dilçi alim, pedaqoq, pedaqoji elmlər doktoru (1958), professor (1960).

Həyatı

Ağaməmməd Abdullayev 1909-cu ildə Bakının Novxanı kəndində dəmirçi ailəsində dünyaya gəlib. A. Abdullayev 1926-cı ildə Azərbaycan Dövlət Universitetinin Azərbaycan dili və ədəbiyyatı fakültəsinə daxil olmuşdur. Təhsil almaqla bərabər orta məktəbdə Azərbaycan dili müəllimi kimi fəaliyyət göstərmişdir. Alim 1941–1942-ci illərdə M. F. Axundov adına Müəllimlər İnstitutunun direktoru vəzifəsində çalışmışdır. 1942–1949-cu illərdə Azərbaycan Dövlət Qiyabi Pedaqoji İnstitutunda Azərbaycan dili kafedrasına rəhbərlik etmiş, 1942-ci ildə pedaqoji elmlər namizədi, 1958-ci ildə pedaqoji elmlər doktoru alimlik dərəcələrini almışdır.

1966–1970-ci illərdə M. F. Axundov adına Xarici Dillər İnstitutunun rektoru olmuşdur.

Fəaliyyəti

Azərbaycan dilinin tədrisi tarixi və metodikasına dair dərslik və monoqrafiyaların müəllifidir. "Azərbaycan dilinin tədrisi tarixindən" (1966) monoqrafiyasında Üzeyir Hacıbəyovun pedaqoji və publisistik fəaliyyətini, onun "Türki-rusi və rusi-türki lüğəti"ni (1907) ətraflı təhlil etmişdir. "Nitq mədəniyyəti və natiqlik məharəti haqqında" kitabının müəllifidir.

Kitabları

• Azərbaycan dilinin tədrisi tarixinə dair. Bakı: Azərnəşr, 1958.
• Üslubiyyat məşğələlərinin metodikası. Bakı: Azərtədrisnəşr, 1961.
• İbtidai məktəbdə Azərbaycan dili tədrisinin metodikası. Bakı: Azərtədrisnəşr, 1962.
• Əlifba (yaşlılar üçün). Bakı: Azərtədrisnəşr, 1963 (F. Ə. Əbdürrəhimov ilə birgə).
• Orta məktəbdə Azərbaycan dili tədrisinin metodikası. Bakı: Azərtədrisnəşr, 1964.
• Ana dili (yaşlılar üçün). Bakı: Azərtədrisnəşr, 1964 (Ə. H. Rəcəbov ilə birgə).
• Azərbaycan dilinin tədrisi tarixindən. Bakı: Maarif, 1966.
• Müəllimin nitq mədəniyyəti haqqında. Bakı: Maarif, 1966.
• Nitq mədəniyyəti və natiqlik məharəti haqqında. Bakı: Azərnəşr, 1968.
• İbtidai siniflərdə ana dili tədrisinin metodikası. Bakı: Maarif, 1968.
• Orta məktəbdə Azərbaycan dili tədrisinin metodikası. Bakı: Maarif, 1968.
• Orta məktəbdə Azərbaycan dilinin tədrisi metodikası. Bakı: Maarif, 1978.

Mənbə

• Nazilə Yusifova. Professor Ağaməmməd Abdullayev və Azərbaycan dilinin tədrisi metodikasının formalaşması. Bakı: Elm və təhsil. 2011.