Beynəlxalq İnformasiya Texnologiyaları Universiteti

Vikipediya, azad ensiklopediya
Naviqasiyaya keçin Axtarışa keçin
Beynəlxalq İnformasiya Texnologiyaları Universiteti
Xəritə
43°14′06″ şm. e. 76°54′32″ ş. u.
Əsası qoyulub 2009
Tip dövlət universiteti
Ölkə
Ünvan Qazaxıstan, Almatı şəhəri
Sayt iitu.kz

Beynəlxalq İnformasiya Texnologiyaları UniversitetiQazaxıstanda universitet; İKT üzrə ixtisaslaşmış müasir ali məktəblərdən biri.

Tarixi və fəaliyyəti[redaktə | mənbəni redaktə et]

Beynəlxalq İnformasiya Texnologiyaları Universiteti 2009-cu ilin aprelində Qazaxıstan Prezidentinin tapşırığı ilə ölkənin sənaye-innovasiya potensialının formalaşması məqsədilə yaradılıb. Hazırda bu ali təhsil ocağı Mərkəzi Asiya regionunda aparıcı təhsil müəssisəsidir. Beynəlxalq İT universitet regionun informasiya texnologiyası sənayesi üçün beynəlxalq tələblərə cavab verən mütəxəssislərin hazırlığı işində lider mövqedə durur.

Qazaxıstanın ilk İT universitetinin təsisçisi qismində "Zerde" Milli infokommunikasiya şirkəti, "Nursultan Nazarbayev Təhsil Fondu" və Beynəlxalq Biznes Universiteti (UIB) çıxış edirlər.

Beynəlxalq İnformasiya Texnologiyaları Universitetində yüksək texniki təchizata xüsusi diqqət ayrılır. Ali məktəbdə maarifləndirici proses ən müasir kompüterlərlə və lisenziyalı proqramlarla təmin edilib. Beynəlxalq İT Universitet yeni nəsil mütəxəssisləri təkcə sahə üzrə texnologiyalar, qabaqcıl idarəetmə, iqtisadiyyat, ünsiyyət bacarıqları və ingilis dili bilikləri əsasında formalaşdırmır. Universitet eyni zamanda tələbələrin şəxsi keyfiyyətlərinin, liderlik bacarıqlarının və yaradıcılıq qabiliyyətlərinin inkişafına böyük önəm verir.

Universitetdə tədris prosesi informasiya texnologiyaları sahəsində böyük intellektual potensiala malik olan yüksək ixtisaslı professor-müəllim heyəti tərəfindən həyata keçirilir.

Bakalavriatura ixtisasları: informasiya sistemləri, hesablama texnikası və proqram təminatı, informatika, İT idarəetmə, İT-də maliyyə, elektron jurnalistika, radiotexnika, elektronika və telekommunikasiya, riyazi və kompüter modelləşdirməsi.

Magistratura ixtisasları: informasiya sistemləri, hesablama texnikası və proqram təminatı, layihələri idarə etmə, riyazi və kompüter modelləşdirməsi, radiotexnika, elektronika və telekommunikasiya.

Universitetin zəngin kitabxana fonduna qazax, rus və ingilis dillərində ənənəvi və elektron daşıyıcılarda olan tədris, tədris metodik və elmi ədəbiyyatı əhatə edən 180 mindən artıq nəşr daxildir. Kitabxana proseslərinin avtomatlaşdırması KABİS (Qazaxıstan Avtomatlaşdırılmış Kitabxana-İnformasiya sistemi) kitabxana proqramı üzrə həyata keçirilir.

Birinci ildən başlayaraq universitetdə Tələbə hökuməti fəaliyyət göstərir. Tələbə hökuməti tələbələrin maarifləndirici və sosial sferada qarşılaşdığı çoxsaylı problemləri həll edir, bir növ tələbələr və administrasiya arasında körpü rolunu oynayır.

Dünya lideri ilə əməkdaşlıq[redaktə | mənbəni redaktə et]

2009-cu ilin mayında ABŞ-nin Karnegi Mellon Universitetinin kompüter elmləri sahəsində dünya lideri olan iCarnegie struktur bölməsi ilə memorandum və lisenziya müqaviləsi imzalanıb. Bu sənədlərə uyğun olaraq universitetin tələbələri ingilis dilində dövlət standartı proqramları və Amerika ixtisaslaşdırılmış modulları üzrə təhsil alırlar. Təlimin sonunda məzunlara Qazaxıstan diplomları və iCarnegie sertifikatları təqdim edilir. Bu sertifikatlar sertifikatlar bütün dünyada tanınır, onlar tələbələrin nailiyyətlərini əks etdirirlər və onlara istənilən ölkədə mütəxəssis kimi çalışmaq imkanını verir.

Məlumat üçün bildirək ki, Karnegi Mellon Universiteti alqoritmlər, kompüter şəbəkələri, proqramlaşdırma dilləri, robot texnikası, kompüter linqvistikası və proqram təminatının hazırlanması üzrə ixtisaslaşan ali məktəbdir.

ICarnegie kursları çərçivəsində informasiya texnologiyalarına giriş, kompüter texnologiyalarına giriş, obyekt yönümlü dizayn və proqramlaşdırma, istifadəçiyə yönəldilmiş dizayn və yoxlama, alqoritmlər və verilənlərin strukturları, sistem proqramlaşdırması, verilənlərin baza sistemləri, şəbəkələr və paylanmış hesablamalar, proqram təminatının spesifikasiyası, yoxlama və dəstək, proqram təminatının hazırlanmasının təşkili və layihəni idarə etmə modulları üzrə təlimlər keçirilir.

Müasir laboratoriyalar[redaktə | mənbəni redaktə et]

Universitetdə 9 avqust 2011-ci il tarixində açıq sistemlər və bulud hesablamalar üzrə elmi-tədqiqat laboratoriyası açılıb. Laboratoriyanın əsas fəaliyyəti "bulud hesablamalar" və Open Source texnologiyasının tətbiqi ilə "açıq sistemlər" istiqamətləri üzrə elmi-tədqiqat işlərinin həyata keçirilməsini əhatə edir.

Bununla yanaşı, universitetdə "Apple" laboratoriyası fəaliyyət göstərir. iOS Application Development mobil qurğular üçün əlavələrin hazırlanması kursu Objective C proqramlaşdırma dili və iOS əsasında mobil qurğular üçün proqramların hazırlanması prosesi ilə tələbələri tanış edir. Kursu bitirən tələbələr müstəqil şəkildə iPhone, iPad və başqa iOS-qurğular üçün Objective C-də əlavələri və proqramları hazırlaya, həmçinin XCode hazırlamaları mühitdə işləyə bilirlər.

Tələbələrin müsabiqələrdəki uğuru[redaktə | mənbəni redaktə et]

Hər il universitetin tələbələri ACM proqramlaşdırılması üzrə ən nüfuzlu tələbə yarışında iştirak edirlər. Ali məktəbin komandası 3 dəfə ACM-də iştirak edib. Tələbələr yaxşı nəticələr göstərir və onluqda yer alırlar.

Universitetin tələbələri həmçinin bir sıra tələbə olimpiadalarda, innovasiya sərgilərində iştirak edirlər və mükafatlara layiq görülürlər.

Universitet "Lomonosov 2012" Beynəlxalq elmi konfransının "Riyazi modelləşdirmə və informasiya texnologiyaları" seksiyasında Qazaxıstan üzrə 2-ci yeri tutub.

Hər il ali məktəbdə məktəblilər və tələbələr arasında riyaziyyat, informatika və proqramlaşdırma üzrə distant olimpiadalar keçirilir.

Universitetdə həmçinin idmana xüsusi diqqət ayrılır. Universitetin yığmaları basketbol, futbol, stolüstü tennis, şahmat üzrə müxtəlif şəhər yarışlarında iştirak edir və mükafatlar əldə edirlər.

Beynəlxalq İT Universitet davamlı olaraq istedadlı gənc proqramçılara dəstək verir. Təsadüfi deyil ki, universitet hər il bütün dünyada keçirilən HackDay ideyalarının innovasiya festivalının əsas təşkilatçısı olub. HackDay - proqramçıların öz istedadlarının reallaşdırması üçün əsas meydançadır.

Həmçinin bax[redaktə | mənbəni redaktə et]

Mənbə[redaktə | mənbəni redaktə et]