Françeska Mikyelin

Vikipediya, azad ensiklopediya
Jump to navigation Jump to search
Françeska Mikyelin
it. Francesca Michielin
ESC2016 - Italy Meet & Greet 13 (cropped).jpg
Françeska Mikyelin 2016-cı ildə
Sənətçi məlumatları
Doğum adı Françeska Mikyelin
it. Francesca Michielin
Doğum tarixi 25 fevral 1995 (1995-02-25) (24 yaş)
Doğum yeri Bassano-del-Qrappa, Viçentsa, İtaliya
Vətəndaşlığı İtaliya İtaliya
Peşələri müğənni, bəstəkar

Üslub pop, rok
Musiqi aləti vokal, piano, bass
Fəaliyyət illəri 2011–h.h.
Albom şirkəti Sony Music
francescamichielin.it
Commons-logo.svg Vikianbarda əlaqəli mediafayllar

Françeska Mikyelin (it. Francesca Michielin; d. 25 fevral 1995, Bassano-del-Qrappa, Viçentsa, İtaliya) — İtaliya müğənnisi və bəstəkarı. O, İtaliyanın X Factor musiqi yarışmasındakı qalibiyyətindən sonra şöhrət qazanmışdır. Onun debüt sinqlı "Distratto" İtaliya hit paradlarında zirvədə yer almışdır. Mikyelinin Riflessi di me adlı debüt albomu 2012-ci ilin oktyabr ayında işıq üzü görmüşdür.

O, eyni zamanda İtaliyanın tanınmış reperlərindən olan Fedez ilə əməkdaşlıq etmiş və onlar "Cigno nero" və "Magnifico" mahnılarını birlikdə duet şəklində ifa etmişdirlər. Hər iki mahnı İtaliyada hitə çevrilmişdir. Mikyelinin ikinci Top-10 sinqlı isə 2015-ci ildə buraxılan "L'amore esiste" olmuşdur.

2016-cı ildə Mikyelin İtaliyanın əsas musiqi hadisələrindən hesab olunan Sanremo musiqi festivalında iştirak etmiş və ifa etdiyi "Nessun grado di separazione" mahnısı ilə festivalda ikinci yerə layiq görülmüşdür. Həmin mahnının qısaldılmış versiyası ilə ifaçı İtaliyanı 2016 Avroviziya Mahnı Müsabiqəsində təmsil etmişdir.

Həyatı[redaktə | əsas redaktə]

Françeska Mikyelin 25 fevral 1995-ci ildə İtaliyanın Viçentsa əyalətində yerləşən Bassano-del-Qrappa şəhərində anadan olmuşdur. Anası Vanna Moro, atasə isə Titsiano Mikyelindir. Filippo adlı böyük qardaşı var. Françeska yeniyetmə yaşlarında piano və bass dərsləri almağa başlamışdır. 14 yaşında isə o, yaşadığı şəhərin qospel xorunda ifa etməyə başlamışdır. Qardaşının sayəsində Françeskada daha sonra rok musiqisinə də həvəs oyanmışdır. Adelin 19 adlı studiya albomunu dinlədikdən sonra Mikyelin də öz mahnılarını yazmağa başlamışdır.

Musiqi karyerası[redaktə | əsas redaktə]

2011–2012: X FactorRiflessi di me albomu[redaktə | əsas redaktə]

2011-ci ildə Françeska Mikyelin İtaliyanın X Factor musiqi yarışmasının dinləmələrinə qatılmışdır. Mikyelin dinləmələrdə Led Zeppelin qrupunun "Whole Lotta Love" mahnısı ilə çıxış etmiş və münsiflərdən əsasən müsbət rəylər qazanaraq, növbəti mərhələyə adlamışdır. Yarışmada Simona Venturanın komandasında yer alan ifaçı yarışmada iştirakı boyunca Adel, The Doors qrupu və Stivi Uanderin mahnıları ilə çıxış etmişdir.

2011-ci ilin dekabr ayında keçirilən X Factor yarışmasının yarımfinal mərhələsində Mikyelin özünə aid olan "Distratto" mahnısını ilk dəfə ifa etmişdir. 2012-ci ilin yanvar ayında keçirilən final mərhələsində Mikyelin yarışmanın qalibi elan olunmuşdur. İfaçının hədiyyəsi isə 300,000 avro və Sony Music albom şirkəti ilə uzun müddətli müqavilə olmuşdur.

2012-ci ilin yanvar ayında Mikyelinin debüt sinqlı "Distratto" satışa buraxılmışdır. Mahnı İtaliya hit paradlarında zirvədə yer almışdır. Həmin ayda eyni zamanda ifaçının debüt sinqlının adını verdiyi mini-albomu da işıq üzü görmüşdür. Albomda Mikyelinin X Factor yarışmasında ifa etdiyi mahnılar yer almışdır. Fevral ayında ifaçı İtaliyanın əsas musiqi hadisələrindən hesab olunan 62-ci Sanremo musiqi festivalında qonaq olaraq iştirak etmişdir. O, festivalda iştirakçılardan biri Kyara Çivelli ilə duet şəklində "Al posto del mondo" mahnısını ifa etmişdir.

2012-ci ilin avqust ayında Mikyelinin ikinci sinqlı olan "Sola" təqdim olunmuşdur. Həmin ilin oktyabr ayında isə ifaçının "Sola" mahnısını da əlavə etdiyi Riflessi di me adlı debüt albomu işıq üzü görmüşdür. Ümumilikdə 13 mahnının yer aldığı albomda eyni zamanda Mikyelinin ilk sinqlı olan "Distratto" da daxil edilmişdir.

2013–2014: Əməkdaşlıqlar və "Amazing" sinqlı[redaktə | əsas redaktə]

2013-cü ilin mart ayında Françeska Mikyelin italyan reper Fedez ilə duet şəklində "Cigno nero" mahnısını ifa etmişdir. Mikyelinin bəstələdiyi mahnı Fedezin Sig albomunda yer almışdır.

2014-cü ilin yanvar ayında ifaçı Bolonya teatrında keçirilən La ragazza con l'orecchino di perla musiqili tamaşasında rol almışdır. Həmin ilin mart ayında Mikyelinin "Amazing" sinqlı təqdim olunmuşdur. İngilis dilində səsləndirilən mahnı Mikyelinin özü tərəfindən yazılmışdır. Daha sonra mahnının eyni zamanda italyan dilində səslənən versiyası da təqdim olunmuşdur.

2014-cü ildə Mikyelin yenidən Fedez ilə əməkdaşlıq etmiş və nəticədə reperin Pop-Hoolista albomunda yer alan "Magnifico" sinqlı ərsəyə gəlmişdir. Mahnı İtaliyada hitə çevrilmişdir.

2015–2016: Sanremo musiqi festivalı və Avroviziya Mahnı Müsabiqəsi[redaktə | əsas redaktə]

Françeska Mikyelin Avroviziya 2016 səhnəsində

2015-ci ilin mart ayında Mikyelinin "L'amore esiste" sinqlı satışa buraxılmışdır. "L'amore esiste" ifaçının İtaliyada ikinci Top-10 sinqlı olmuşdur. Mahnı həmin ilin may ayında "Lunezia Pop Award" mükafatına layiq görülmüşdür. Mikyelinin ikinci albomuna daxil etməyi planlaşdırdığı daha iki sinql, "Battito di ciglia" 2015-ci ilin iyul ayında və "Lontano" isə sentyabr ayında təqdim olunmuşdur. Albomun buraxılmasından dörd gün öncə Mikyelin Milanda konsert proqramı ilə çıxış etmişdir. Oktyabr ayının 23-də ifaçının di20 adlı ikinci studiya albomu işıq üzü görmüşdür.

2016-cı ilin yanvar ayında Mikyelin Nice to Meet You adlandırdığı ilk turunu həyata keçirmişdir. Növbəti ayda isə ifaçı İtaliyanın əsas musiqi hadisələrindən hesab olunan Sanremo musiqi festivalında iştirak etmiş və ifa etdiyi "Nessun grado di separazione" mahnısı ilə festivalda ikinci yerə layiq görülmüşdür. Həmin mahnının qısaldılmış və eyni zamanda müəyyən ingilis dilli mətnin əlavə edildiyi "No Degree of Separation" adlı versiyası ilə ifaçı İtaliyanı İsveçin paytaxtı Stokholmda keçirilən 2016 Avroviziya Mahnı Müsabiqəsində təmsil etmişdir.[1] İtaliyanın "Böyük Beşlik" ölkələrindən biri olması səbəbi ilə Françeska birbaşa olaraq müsabiqənin final mərhələsindən mübarizəyə qoşulmuşdur. 26 ölkə təmsilçisinin mübarizə apardığı final şousunda ifaçı "No Degree of Separation" mahnısı ilə 124 xal toplayaraq, 16-cı yerə layiq görülmüşdür.

2017-hal-hazırda: 2640 albomu[redaktə | əsas redaktə]

2017-ci ilin yanvar ayında Françeska Mikyelinin 2640 adlı üçüncü studiya albomu təqdim olunmuşdur.[2][3]

Diskoqrafiya[redaktə | əsas redaktə]

Albomlar[redaktə | əsas redaktə]

Albom adı İl
Riflessi di me 2012
di20 2015
2640 2018

Sinqllar[redaktə | əsas redaktə]

Mahnı adı İl
"Distratto" 2012
"Sola"
"Tutto quello che ho"
"Se cadrai" 2013
"Cigno nero"
(Fedez ilə duet)
"Amazing" 2014
"Magnifico"
(Fedez ilə duet)
"L'amore esiste" 2015
"Battito di ciglia"
"Lontano"
"Nessun grado di separazione" 2016
"Un cuore in due"
"Vulcano" 2017
"Io non abito al mare"

İstinadlar[redaktə | əsas redaktə]

  1. "Francesca Michielin all'Eurovision Song Contest" (İtalyanca). 15 fevral 2016. 16 fevral 2016 tarixində orijinalından arxivləşdirilib. İstifadə tarixi: 16 Fevral 2016. Check date values in: |accessdate=, |date=, |archivedate= (kömək)
  2. "Francesca Michielin inizia i lavori sul nuovo album: sono felice" (italyanca). Radio Italia Solo Musica Italiana. 28 yanvar 2017. Check date values in: |date= (kömək)
  3. "12 Gennaio 2018: Esce Il Nuovo ALbum Di Francesca Michielin". Radio Gelosa (italyanca). 5 dekabr 2017. Check date values in: |date= (kömək)
Əvvəlki:
Il Volo
"Grande Amore"
İtaliya Avroviziya Mahnı Müsabiqəsində
EuroItalia.svg

2016
Sonrakı:
Françesko Qabbani
"Occidentali's Karma"

Xarici keçidlər[redaktə | əsas redaktə]