Hacı Hacıyev

Hacı Hacıyev
Hacı Əliheydər oğlu Hacıyev
Doğum tarixi:	18 fevral 1925(1925-02-18)
Doğum yeri:	Bakı Azərbaycan SSR
Vəfat tarixi:	23 fevral 2008 (83 yaşında)
Vətəndaşlıq:	SSRİ Azərbaycan
Peşəsi:	jurnalist
Milliyyəti:	azərbaycanlı
Təltifləri:	Əməkdar Jurnalist

Hacıyev Hacı Əliheydər oğlu — tərcüməçi, publisist, Azərbaycan Jurnalistlər Birliyinin sədri (1989-2006), Azərbaycanın əməkdar jurnalisti (1985).

Həyatı

Hacı Hacıyev 1925-ci il fevralın 18-də Bakı şəhərində kommersant ailəsində anadan olmuşdur. Burada şəhər məktəbində orta təhsilini başa vurmuşdur (1943). Bakıda emal sexində hesablayıcı işləmişdir (1942). Ordu sıralarında xidmət etmişdir (-1950). Tərxis olunandan sonra ADU-nun filologiya fakültəsində qiyabi təhsil almışdır (1950-1957). "Azərbaycan gəncləri" qəzetində ədəbı işçi, şöbə müdiri (1950-1953), Azərbaycan radiosunda məsul redaktor və baş redaktor (1953-1959), Azərbaycan Uşaq və Gənclər Ədəbiyyatı nəşriyyatında redaktor (1959-1961), “Ekran” Yaradıcılıq Birliyinin sədri (1968-1970) ,Azərbaycan Jurnalistlər İttifaqının orqanı olan "Müxbir" jurnalında baş redaktor (1970-1974) vəzifələrində çalışmışdır. Azərbaycan Jurnalistlər İttifaqı İdarə Heyətinin katibi (1974-1989) seçilmişdir. Azərbaycan Jurnalistlər Birliyinin sədri olmuşdur (1989-2006). 2006-cı ildən qurumun fəxri sədri seçilib.

Ədəbi yaradıcılığında bədii tərcümə və publisistika xüsusi yer tutur. Dünya ədəbiyyatından Azərbaycan dilinə çevirdiyi əsərləri vaxtaşırı nəşr etdirmiş, rəğbətlə qarşılanmışdır. A.Çexovun "Gecikmiş güllər" povesti, Misir ədiblərinin hekayələri onun tərcüməsində ayrı-ayrı kitablarda nəşr olunmuşdur. M.Qorkidən Azərbaycan dilinə çevirdiyi "Qoca" pyesi mavi ekranda və efirdə verilmişdir. Türkiyənin "Yeni forum" və "Tanıtım" jurnallarında, eləcə də bir sıra xarici mətbuatda siyasi publisistik məqalələri dərc edilmişdir. Türkiyənin Kayseri şəhərində Ümumdünya Azərbaycan konqresində (1990), Bodrumda "Türk millətlərinin siyasi və iqtisadi gələcəyi" simpoziumunda (1991) Azərbaycanda milli istiqlal hərəkatı və siyasi vəziyyət probleminə dair məruzə ilə çıxış etmişdir.

Hacı Hacıyevın təşəbbüsü ilə Həsən bəy Zərdabi mükafatı təsis olunub

23 fevral 2008-ci ildə vəfat etmişdir.

Əsərləri

1. Hekayələr. Bakı: Uşaqgəncnəşr, 1961, 48 səh.
2. İstiqlalın əzablı yolu (Azərbaycan Demokratik Respublikası tarixinin bəzi səhifələri). Bakı: Azərbaycan Jurnalistlər İttifaqının nəşri, 1991, 32 səh.
3. Xatirələr və ya Çəmbərəkənddən başlayan həyat, Bakı, 2005, 119 səh.

Tərcümələri

1. Vasili Yan. Çingiz xan. Bakı: Uşaqgəncnəşr, 1960, 389 səh. (təkrar nəşr: 1983, 344 səh.).Oxu
2. Ernest Heminquey. Əlvida, silah. Bakı: Uşaqgəncnəşr, 1961, 345 səh. (təkrar nəşr: 1986, 264 səh.).
3. Mövlud Məmmeri. Ədalət yuxuda ikən. Bakı: Azərnəşr, 1963, 166 səh.
4. Karnaval (Polşa hekayələri və novellaları). Bakı: Gənclik, 1973, 248 səh.
5. Sergey Antonov. Cırılmış manat (povestlər). Bakı: Gənclik, 1971, 220 səh.
6. Manuel Tiaqu. Sabahacan, yoldaşlar! Bakı: Gənclik, 1983, 316 səh.
7. Ernest Heminquey. Əcəl zəngi. Bakı: Yazıçı, 1986, 472 səh.Oxu
8. Anatoli Rıbakov. Arbat övladları. Bakı: Yazıçı, 1989, 512 səh.

Filmoqrafiya

1. Mənim Mingəçevirim (film, 1967)
2. Üçüncü simfoniya (film, 1968)
3. Bu, Səttar Bəhlulzadədir (film, 1969)
4. Axtarış həvəsi (film, 1970)

Mənbə

• Azərbaycanın qocaman jurnalisti Hacı Hacıyev vəfat edib