Janghwa Hongryeon jeon
Canqva Honqryon Con (hərfi mənada Canqva və Honqryon hekayəsi) – Coseon dövrünə aid Koreya xalq nağılı.
Məzmun[redaktə | mənbəni redaktə et]
Bir zamanlar Muryonq adlı bir adam var idi, bir gün arvadı yuxusunda bir mələyin ona gözəl bir çiçək verdiyini gördü. On aydan sonra o, cütlüyün "Canqva" ("Qızılgül çiçəyi") adını verdiyi gözəl bir qız uşağı dünyaya gəldi. İki il sonra onların başqa bir gözəl qızı oldu və ona "Honqryon" ("Qırmızı Lotus") adını verdilər. Təəssüf ki, ana Honqryon 5 yaşında olanda vəfat etdi və tezliklə ata yenidən evləndi. Yeni ögey ana həm çirkin, həm də qəddar idi. O, ögey qızlarına nifrət edirdi, lakin bu hissləri gizlədib, yalnız üç oğlu ard-arda dünyaya gələndən sonra əsl üzünü göstərdi. Tezliklə o, ögey qızlarına zülm etməyə başladı. Lakin Canqva və Honqryon heç vaxt atalarına bu barədə heç nə deməmişdilər.
Canqva yetkinlik yaşına çatıb nişanlandıqdan sonra ata ikinci həyat yoldaşına Canqvaya toy mərasimi planlaşdırmağa kömək etməsini söylədi. Ögey ana qəzəbləndi, "ailəsinin pulundan" və ya "övladlarının gələcək sərvətindən" bir qəpik də olsa Canqvaya xərcləmək istəmədi. Beləliklə, o, çirkli bir plan hazırladı: Bir gecə Canqva yatarkən, ögey ana böyük oğluna Canqvanın yatağına ölü dərili bir siçovul qoydurdu. Ertəsi gün səhər tezdən o, böyük ögey qızı haqqında pis yuxu gördüyünü söyləyərək atasını Canqhvanın otağına gətirdi. O, Canqvanın çarpayısındakı yorğanı geri çəkəndə təzə doğulub ölmüş uşağa bənzəyən qanlı bir şey otaqdakı hər kəsi şoka saldı. Ögey ana Canqvanı nikahdankənar uşaq dünyaya gətirməkdə günahlandırdı. Ata buna inandı. Nə edəcəyini bilməyən Canqva evdən qaçaraq yaxınlıqdakı meşədəki kiçik bir gölməçəyə getdi. Ögey ana böyük oğluna Canqvanın ardınca getməyi və onu gölməçəyə itələməyi əmr etdi. Canqva boğularkən qəfildən nəhəng bir pələng gəldi və o, ögey ananın böyük oğluna hücum edərək, bir ayağını və bir qolunu ondan aldı.
Ögey ana istədiyini aldı — Canqvanın ölümü — ancaq öz oğlunun sağlamlığı bahasına. O, qəzəbini Honqryona çevirdi, bu qalan ögey qızına həmişəkindən çox nifrət etdi və onu təhqir edirdi. Sevimli bacısının itkisinə dözə bilməyən Honqryon tezliklə Canqvanın ardınca getdi: onun cəsədi Canqvanın boğulduğu gölməçədə tapıldı.
Bundan sonra kəndə nə vaxt yeni bələdiyyə sədri gəlsə, gələndən bir gün sonra onu ölü tapırdılar. Bu davam etdikcə kəndə müəmmalı söz-söhbətlər yayıldı, lakin heç kim kişilərin başına nə gəldiyini və hansı səbəbdən baş verdiyini dəqiq bilmirdi.
Kəndə yeni bələdiyyə sədri kimi cəsur bir gənc gəlmişdi. O, sələflərinin ölümlərindən xəbərdar idi, lakin öz həyatı üçün qorxmurdu. Gecə olduqda o, otağında oturmuşdu ki, şamı qəfil söndü və ətrafı dəhşətli səslər bürüdü. Qapı açıldıqda əvvəlcə heç kim görünməsə də, lakin sonra yeni vali iki gənc qadın ruhu gördü. Onlardan kim olduqlarını və əvvəlki bələdiyyə sədrlərini niyə öldürdüyünü soruşdu. Böyük bacı ağlaya-ağlaya başa saldı ki, istədikləri həqiqəti insanlara çatdırmaqdır: utanc içində intihar edən böyük bacı əxlaqsız qız olmayıb. O, ögey anası tərəfindən ittiham edilmiş və böyük ögey qardaşı tərəfindən öldürülmüşdü. Bələdiyyə sədri Canqvanın ruhundan bunun sübutunu istədi. Canqva ona ögey anasının kəndlilərə göstərdiyi düşük dölü araşdırmağı tapşırdı.
Ertəsi gün səhər yeni vali bacıların ruhlarının ondan tələb etdiklərini etdi. O, atanı, ögey ananı və böyük oğlunu çağırdı və ögey ananın israrla Canqvanın bədənindən gəldiyini iddia etdiyi dölü yoxladı. Onu bıçaqla parçalayanda onun siçovul olduğu üzə çıxdı. Ögey ana və onun böyük oğlu ölümə məhkum edildi. Ata isə azadlığa buraxıldı, çünki vali atanın ögey ananın şər planı barədə heç nə bilmədiyini və əslində başqa bir qurban olduğunu başa düşdü.
İllər sonra ata yenidən evləndi. Ata özünün üçüncü toyunun gecəsində yuxuda iki qızını görür. Qızlar atalarına hər şey yaxçı olduğunu və onun yanına qayıtmaq istədiklərini dedilər. Doqquz aydan sonra atanın üçüncü həyat yoldaşı əkiz qızları dünyaya gətirdi. Ata bu əkizlərə Canqva və Honqryon adını verib və onları çox sevdi. Yeni ailə bundan sonra da xoşbəxt yaşadı.
Adaptasiyalar[redaktə | mənbəni redaktə et]
- Janghwa Hongryeon jeon (1924), rejissoru Park Jun-hyun
- Janghwa Hongryeon jeon (1936), rejissoru Honq Qae-myeonq
- Janghwa Heungryeon jeon (1956), rejissoru Jeong Chang-hwa
- Dae Jang-hwa Hong-ryeon jeon (1962), rejissoru Jeong Chang-hwa
- Janghwa Hongryeon jeon (1972), rejissor Li Yu-seob
- "İki bacının nağılı" (2003), rejissoru Kim Jee-woon
- The Unvited (2009), rejissoru Qard qardaşları.