Kuniyoşi Obara
| Kuniyoşi Obara | |
|---|---|
| yap. 小原 國芳 yap. 鰺坂 國芳 | |
 | |
| Doğum tarixi | 8 aprel 1887[1][2][…] |
| Doğum yeri | |
| Vəfat tarixi | 13 dekabr 1977 (90 yaşında) |
| Təhsili | |
| Fəaliyyəti | müəllim |
 Vikianbarda əlaqəli mediafayllar | |
Kuniyoşi Obara (小原 國芳, Obara Kuniyoşi?, 8 aprel 1887[1][2][…], Kuşi[d] – 13 dekabr 1977) – Yaponiya pedaqoqu, təhsil reformisti və nəşrçisi. Zencin təhsil nəzəriyyəsinin əsasını qoymuş, Yaponiyada Yeni təhsil hərəkatının liderlərindən biri olmuşdur. 1929-cu ildə Tamaqava Qakuenin qurucu üzvü olmuş və 1932–1934-cü illərdə Yaponiyada uşaqlar üçün ilk ensiklopediyanı tərtib etmişdir.
İlk illəri
[redaktə | mənbəni redaktə et]Kuniyoşi Obara 8 aprel 1887-ci ildə Kaqoşima prefekturasının Kuşi kəndində doğulmuşdur. Ailəsi samuray nəslinə mənsub idi. Kuniyoşinin babası Terakoyada pedaqoq kimi işləmiş, rəssamlıq, xəttatlıq və musiqi sahələri üzrə usta olmuşdur. Obara uşaq olanda valideynləri ölmüş və Acisaka ailəsi tərəfindən övladlığa götürülmüşdür.[3]
Fəaliyyəti
[redaktə | mənbəni redaktə et]Pedaqoji
[redaktə | mənbəni redaktə et]Yeniyetmə olanda Kaqoşima Sualtı Teleqraf Mərkəzində teleqraf operatoru kimi işləmişdir. Əvvəlcə Kaqoşima Normal Məktəbində, daha sonra Hiroşima Ali Normal Məktəbində təhsil almışdır. Kaqoşima Normal Məktəbində təhsil alarkən amerikalı pedaqoq Leroy Lansinq Ceyns ilə tanış olmuşdur. Lansinqin Bibliya dərslərindən təsirlənən Obara xristianlığı qəbul etmişdir.[3]
Obara pedaqoji fəaliyyətinə Kaqava Normal Məktəbində ingilis dili və psixologiya müəllimi kimi başlamışdır. Pedaqoq olmaqla yanaşı qayıq klubunun rəhbəri və yataqxana nəzarətçisi olmuşdur. 1915-ci idə Kioto Universitetinin fəlsəfə kafedrasına daxil olmuşdur. Kiotoda Kitaro Nişida, Sancuro Tomonaqa, Yasukazu Fukada, Seyiçi Hatano və Şiqenao Konişi kimi şəxslərin rəhbərliyi altında fəlsəfə və pedaqogika təhsili almışdır. 1918-ci ildə "Təhsilin din vasitəsilə qurtuluşu" adlı bakalavr dissertasiyasını hazırlamışdır. Dissertasiya həmin il "Din təhsilin fundamental problemi kimi" adı ilə nəşr olunmuşdur. Bu, Obaranın nəşr olunmuş ilk kitabı olmuşdur. Obara ömrünün axırına qədər bütün pedaqoji fəaliyyətlərin bünövrəsində dini təhsilin olmalı olduğunu müdafiə etmişdir.[3]
Kioto Universitetindən məzun olduqdan sonra Hiroşima Ali Normal İbtidai Məktəbinə dəvət olunmuşdur. Burada ibtidai təhsilin həlledici rolu haqqında nəzəri və praktiki marağını inkişaf etdirmişdir. Məktəblər üçün "məktəb pyesi" janrını yaratmışdır. 1919-cu ildə Seycyo İbtidai Məktəbinin direktoru olmuşdur. Həmin dövrdə bu məktəb Yaponiyada Yeni təhsil hərəkatının mərkəzi idi.[3] Obara bu hərəkatın liderlərindən birinə çevrilmişdir.[4] O, 1922-ci ildə orta məktəb, 1925-ci ildə bağça, 1926-cı ildə lisey qurmuşdur.[3]
Obara 1929-cu ildə Tamaqava Qakuenin əsasını qoymuşdur. Həyatının qalan hissəsini həsr etdiyi və Zencin təhsil idealını tətbiq etdiyi bu təhsil kompleksi ibtidai məktəblə fəaliyyətinə başlamış, daha sonra bağça, orta məktəb, lisey və universitet əlavə olunmuşdur. Obara Los-Anceles (1930), Kuqenuma (1933), Kuşi (1948) və Kanadada (1976) filiallar açmışdır.[3]
Naşirlik
[redaktə | mənbəni redaktə et]Obara 1923-cü ildə "Idea Shoin Press" nəşriyyatını yaratmışdır. Nəşriyyat təhsil nəzəriyyəsi, təhsil materialları, uşaqlar üçün ədəbi əsərlər, müəllim və valideynlər üçün təlimat kitabları, ensiklopediyalar və jurnallar nəşr etmişdir.[3]
Obara nəşriyyatı pedaqogika üçün əhəmiyyətli ünsür hesab etmişdir. 1932–1934-cü illərdə 30 cildlik "Uşaq ensiklopediyası"nı tamamlamışdır. Bu, Yaponiyada uşaqlar üçün nəzərdə tutulmuş ilk ensiklopediya idi. Obara növbəti illərdə başqa ensiklopediya seriyaları hazırlamışdır. Bütün əsərləri 48 cilddə nəşr olunmuşdur.[3]
Xatirəsi
[redaktə | mənbəni redaktə et]Obaranın Tamaqava Qakuendəki iqamətgahı ölümündən sonra Obara Memorial Muzeyinə çevrilmişdir.[3]
İstinadlar
[redaktə | mənbəni redaktə et]- ↑ 1 2 Swartz A. Kuniyoshi Obara // Open Library (ing.). 2007.
- ↑ 1 2 Kuniyoshi Obara // Faceted Application of Subject Terminology.
- ↑ 1 2 3 4 5 6 7 8 9 Kobayashi, Makoto. "Kuniyoshi Obara" (PDF). (UNESCO, International Bureau of Education (ingiliscə). 2 iyun 2004. 24 sentyabr 2015 tarixində arxivləşdirilib (PDF). İstifadə tarixi: 6 iyun 2024.
- ↑ Kodansha Encyclopedia of Japan. səh. 49
Ədəbiyyat
[redaktə | mənbəni redaktə et]- Kodansha Encyclopedia of Japan (ingiliscə). VI cild (Niju–Saka). Tokio: Kodansha. 1983. səh. 49. ISBN 0-87011-626-6. İstifadə tarixi: 6 iyun 2024.
| ||||
