Padan ovalığı

Padan düzənliyindən keçən Po çayını göstərən xəritə

Padan ovalığı (digər adları: Po ovalığı və ya Po düzənliyi, it. Pianura Padana və ya Val Padana) — İtaliyanın şimalında yerləşən geniş ovalıq olub onun əsas coğrafi strukturlarından biridir. Alp dağlarından başlayan çayların gətirdiyi allüvial çöküntülərin toplanması və çökdürülməsi nəticəsində yaranmışdır. Ovalıq qərbdən şərqə doğru 650 km məsafədə uzanır. Ovalığın eni müxtəlif yerlərdə 70–200 km arasında dəyişir. Ovalığın ümumi sahəsi Po çayı hövzəsinə daxil olmayan Venesiya ovalığı ilə birlikdə 46 000 km² təşkil edir. Ovalıq şimaldan Alp dağları, qərbdən Monferrato təpəlikləri, cənubdan Apenin dağları, şərqdən isə Adriatik dənizi ilə əhatə olunmuşdur. Ovalığın ərazisindən keçən ən böyük çay olan Po çayı Adriatik dənizinə töküldüyü yerdə böyük delta əmələ gətirmişdir. Ovalıq İtaliyanın ən məhsuldar ərazilərindən biri olmaqla əhalinin yüksək sıxlığı ilə seçilir.

İqlimi

Ovalığın iqlimi bəzi yerlərdə mülayim kontinental, əksər yerlərdə isə rütubətli subtropikdir. Qış uzun sürmür, lakin dumanlı, rütubətli və sərin keçir. Ərazisinə bəzən qəfil Sibir antisiklonlarının daxil olması şaxtalara səbəb olur. Şəhər istilik effekti daxil olan antisiklonun daha az dumanlı və soyuq olmasına şərait yaradır. Əvvəllər qar yağması adi hal olsa da, hazırda bu azalmışdır. Artan qış quraqlıqları torpağın daha az rütubət almasına səbəb olur. Yaz və payız fəsilləri mülayim və xoş keçir.