Rəna Mirzəzadə

Rəna Mirzəzadə
Rəna Rza qızı Mirzəzadə
Doğum tarixi	8 aprel 1954
Doğum yeri	Azərbaycan SSR, Şirvan şəhəri
Vətəndaşlığı	1992-ci ilə qədər SSRİ, 1992-ci ildən sonra Azərbaycan Respublikası
Elm sahələri	fəlsəfə, sosiologiya
Elmi dərəcələri	Fəlsəfə elmləri doktoru, professor
İş yerləri	AMEA Fəlsəfə və Hüquq İnstitutunun Politologiya və siyasi sosiologiya şöbəsinin müdiri
Mükafatları

Rəna Mirzəzadə — fəlsəfə elmləri doktoru, siyasi elmlər üzrə professor, "Tərəqqi" medalı laureatı,3-cü dərəcəli "Əmək" ordeni laureatı

Həyatı

Mirzəzadə Rəna Rza qızı 1954-cü il, 8 apreldə Şirvanda anadan olmuş, 1971-ci ildə həmin şəhərin 1 saylı orta məktəbini, 1976-cı ildə BDU-nun əyani tarix fakültəsini bitirmişdir.

1978-ci ildən AMEA Fəlsəfə və Hüquq İnstitutunda, (hazırda Fəlsəfə və Sosiologiya İnstitutunda) işləyir. 1998–1999-cu illərdə İnstitut "Gender tədqiqatı" qrupunun rəhbəri, 2008–2011-ci illərdə "Qloballaşma və informasiya cəmiyyətinin fəlsəfi problemləri" şöbəsinin müdiri, 2011–2016-cı illər "Politologiya və siyasi sosiologiya" "Siyasi nəzəriyyə" şöbəsinin müdiri, hazırda isə " Siyasətin fəlsəfəsi və sosiologiyası" şöbəsinin müdiridir. 1998–2016-cı illər İnsititut Həmkarlar Komitəsinin sədri olmuşdur. İnsititut Elmi Şurasının və Fəlsəfə Cəmiyyətinin, Problem Şurasının, Dissertasiya Şurasının üzvüdür. 1989-cu ildə elmi kommunizm (indiki politologiya) ixtisası üzrə namizədlik elmi dərəcəsi almışdır. 2004-cü ildə respublikada ilk dəfə olaraq, "Gender: fəlsəfi, tarixi və siyasi-hüquqi istiqamətlər" mövzusunda doktorluq dissertasiyası müdafiə etmiş, 2005-ci ildə fəlsəfə elmləri doktoru elmi dərəcəsi almış, "Siyasi nəzəriyyələr" ixtisası üzrə professordur. 15-dək elmi kitabın, 150-dən çox məqalənin müəllifidir.

1993–1994-cü illərdə müstəqil ictimai-fəlsəfi "İdrak" qəzetinin baş redaktoru, 1999–2001-ci illərdə "Genderşünaslıq" beynəlxalq elmi-populyar jurnalının Baş redaktoru olmuşdur.

Respublika KİV-də mütəmadi olaraq siyasət, dövlətçilik, azərbaycançılıq ideologiyası, Qarabağ problemi, gender və qadın problemi, multikulturalizm, insan hüququ, vətəndaş cəmiyyəti, informasiya, qloballaşma üzrə məqalələrlə çıxış edir, müsahibələr verir, televiziyalarda ekspert kimi çıxışlar edir. Ölkədə fəaliyyət göstərən QHT-lər və Ailə, Qadın və Uşaq problemləri üzrə Dövlət Komitəsi, Ombudsman Aparatı ilə fəal işləyən tətqiqatçı və ictimaiyyətçidir. Nəinki respublikada, hətta onun sərhədlərindən kənarda da müxtəlif mövzularda çıxış etmişdir. Beynəlxalq Türk Qadınları Həmrəyliyi Assosasiyasının İdarə Heyətinin üzvü, Rusiya-Azərbaycan QHT-ləri əməkdaşlıq komissiyasının üzvü olmuşdur. Bakı şəhərində və respublikanın müxtəlif regionlarında, o cümlədən Naxçıvan MR-da ardıcıl olaraq mühazirələrlə çıxışlar etmişdir.

2008-ci il 16 mart və 2012-ci il mart Azərbaycan Respublikası Prezidenti İlham Əliyevin sərəncamı ilə AR Prezidenti yanında QHT-lərə Dövlət Dəstəyi Şurasının ("Ailə, Qadın və Uşaq istiqaməti") üzvü olmuşdur. Azərbaycan Qadınlarının 1998, 2003, 2008 və 2013 və 2018-ci illər Qurultaylarında məruzəçi olmuşdur.

2008-ci il Prezident seçkiləri ərəfəsində respublikanın 40-dək rayonunda "Qadın və seçki" mövzusu ilə çıxış etmişdir. 2009-cu il mart Referendiumunda "Zəka" təbliğat qrupunun rəsmi vəkili olmuşdur. 2010 və 2015-ci il parlament seçkilərində YAP namizədinin rəsmi vəkili olmuş və YAP tərəfindən fərmanla təltif olunmuşdur. 2016-cı il sentyabr Referendiumunda rəsmi vəkil olmuşdur.

2011-ci il 3 mart Azərbaycan Respublikasının Prezidenti İlham Əliyevin sərəncamı ilə Respublikada elmin və təhsilin inkişafında göstərdiyi fəaliyyətə görə "Tərəqqi" medalı ilə təltif edilmişdir.

2013-cü ildə Azərbaycan Həmkarlar Komitəsinin 20 illik yubiley medalı ilə təltif olunmuşdur. 2014-cü il apreldə Ailə, Qadın və Uşaq Problemləri üzrə Dövlət Komitəsinin "Səmərəli fəaliyyətinə görə" medalı ilə təltif olunmuşdur. 

Prezident İlham Əliyevin sərəncamı ilə 11 iyul 2019-cu il tarixdə "Azərbaycan Xalq Cümhuriyyətinin 100 illiyi" (1918–2018) yubiley medalı ilə təltif olunmuşdur.

6 mart 2021-ci ildə Azərbaycanın Prezidenti İlham Əliyevin sərəncamı ilə respublikanın ictimai heyətinin fəaliyyətinə görə üçüncü dərəcəli Əmək Ordeni ilə təltif olunmuşdur.

Ailə, Qadın, və Uşaq Problemləri üzrə Dövlət Komitəsi yanında İctimai Şuranın 2017–2020-ci il sədri olmuşdur, Dini İşlər üzrə Dövlət Komitəsi Yanında ictimai Şuranın 2017–2020-ci ildə üzvü olmuşdur. Ombudsman Aparatı Ekspertlər Şurasının üzvüdür.

2018-ci ildən AMEA Qadınlar Şurasının sədridir.

Elmi fəaliyyəti

1978-ci ilin avqustunda Azərbaycan Respublikası Elmlər Akademiyasının Fəlsəfə və Hüquq İnstitutuna baş laborant vəzifəsinə işə qəbul edilmişdir.

1989-cu ildə siyasi elmlər namizədi dərəcəsi almışdır. 1999-cu ildə müstəqil "Genderşünaslıq" elmi-populyar jurnalının baş redaktoru olmuşdur. Respublika Fəlsəfə cəmiyyətinin üzvüdür. "Qadın hüquqları", "Qadın və siyasət", "Qadın və məhbus" məcmuələrinin, "Gender tədqiqatları" dərsliyinin (həmmüəllif), "Kişi və qadın münasibətləri" (Azərbaycan və ingilis dillərində) və "Siyasi partiyaların gender təhlili" (Azərbaycan, rus və ingilis dillərində) kitablarının müəllifidir.

1997-ci ildə qeyri-hökumət təşkilatı olan "Gender və İnsan Hüququ" Araşdırma Birliyi tədqiqat mərkəzini təsis etmişdir. Təşkilat 2000-ci ilin mart ayında qeydiyyatdan keçmişdir.

Rəna Mirzəzadə Respublikada ilk dəfə gender siyasəti üzrə kitabların müəllifi, "Gender siyasəti və Gender bərabərliyi" problemlərinin ilk elmi tədqiqatçısı və gender üzrə respublikada ilk elmlər doktorudur.

Rəna Mirzəzadə gender və insan hüququ haqqında onlarla məqalənin, iki monoqrafiyanın və "Qadın hüquqları", "Qadın-kişi münasibətləri", "Qadın və siyasət, "Qadın və məhbus", "Gender tədqiqatları", "Siyasi partiyaların gender təhlili" kitablarının müəllifi və "Genderşünaslıq" beynəlxalq elmi-kütləvi jurnalının baş redaktorudur.

2011-ci ildə Azərbaycan Respublikasında elmin inkişafındakı xidmətlərinə görə "Tərəqqi" medalı ilə təltif edilib

2011-ci il 3 mart Azərbaycan Respublikasının Prezidenti İlham Əliyevin sərəncamı ilə Respublikada elmin və təhsilin inkişafında göstərdiyi fəaliyyətə görə "Tərəqqi" medalı ilə təltif edilmişdir.

2021-ci ildə Azərbaycan Respublikasının ictimai həyatında səmərəli fəaliyyətlərinə görə 3-cü dərəcəli "Əmək" ordeni ilə təltif olunub. 27 mart 2023-cü il Elmin populyarlaşmasında xidmətlərinə görə Fəxri Diplom ilə təltif edilmişdir.

Əsas elmi əsərləri

• "Gender: siyasi-hüquqi təhlil" (Azərbaycan-ingilis dilində),
• "Siyasət. İnsan hüququ. Cəmiyyət. Gender",
• "Dövlətçilik. Modernləşmə. Gender",
• "Gender xəritəsi" (Azərbaycan-ingilis dilində),
• "Din və Gender: Şərq və Qərb mədəni müxtəlifliyi"

Mənbə

• GENDER VƏ İNSAN HÜQUQU ARAŞDIRMA BİRLİYİ