Rasim Şərifov

Vikipediya, azad ensiklopediya
Jump to navigation Jump to search

thumb

Rasim Şərifov
bayraqİsmayıllı Rayon İcra Hakimiyyətinin başçısıbayraq
27 may 1992 — 20 avqust 1993
Sələfi Məhəmmədəli Süleymanov[1]
Xələfi Vaqif Rəhimov[2]
Şəxsi məlumatlar
Doğum tarixi 10 noyabr 1955(1955-11-10)
Doğum yeri İsmayıllı, Hacıhətəmli
Vəfat tarixi 12 yanvar 2018 (62 yaşında)
Atası Cəfər Şərifov

Rasim Şərifov (tam adı: Rasim Cəfər oğlu Şərifov; d. 10 noyabr 1955, Hacıhətəmli, İsmayıllı, Azərbaycan SSR, SSRİ – ö. 12 yanvar 2018, Hacıhətəmli, İsmayıllı, Azərbaycan) — İsmayıllı rayonu İcra hakimiyyətinin başçısı (1992[1]-1993[2])

Həyatı[redaktə | əsas redaktə]

Əslən haputlu olan Rasim Şərifov 1955-ci il noyabrın 10-da İsmayıllı rayonunun Hacıhətəmli kəndində anadan olmuşdur.

1973-cü ildə Hacıhətəmli kənd orta məktəbini əla qiymətlərlə, 1977-ci ildə H.Zərdabi adına Gəncə Dövlət Pedaqoji İnstitutunun Filologiya fakültəsini fərqlənmə diplomu ilə bitirmişdir.

İlk əmək fəaliyyətinə doğma kənd məktəbində dil-ədəbiyyat müəllimi kimi başlamış, 1980-1984-cü illərdə həmin kənddəki Kuybışev adına sovxoz komsomol komitəsinin katibi seçilib. İşgüzarlığı, gənclərlə işləmək qabiliyyətini nəzərə alaraq ona etimad göstərilmiş, 1984-cü ilin may ayında İsmayıllı rayon komsomol komitəsinin ikinci katibi seçilmişdir. 1986-cı ildə o, rayon partiya komitəsinin təşkilat komitəsinin təlimatçısı vəzifəsinə irəli çəkilib. 1988-ci ilin avqust ayında Hacıhətəmli kənd orta məktəbinin direktoru təyin edilmişdir.

1980-ci illərin sonlarından başlayaraq Qarabağda ermənilərin separatçılığına, Moskvanın, Mixail Qorbaçovun ermənipərəst mövqeyinə etiraz əlaməti olaraq kütləvi xalq azadlıq hərəkatı başlayanda R.Şərifov da ona ilk qoşulanlardan biri olmuşdur. İsmayıllı rayonunun mərkəzi meydanında xalqın etiraz mitinqləri milli şüurun oyanmasında, müstəqillik meyllərinin güclənməsində mühüm rol oynamışdır. İsmayıllı rayon Xalq Cəbhəsinin rəhbəri kimi R.Şərifov etiraz aksiyalarının qanun çərçivəsində aparılması, qarşıdurma və kütləvi iğtişaşların baş verməməsi, ekstremal vəziyyətdə rayon rəhbərliyi, ağsaqqal və ziyalılarla məsləhətləşmə və dialoqların alınması üçün böyük səy göstərmiş, siyasi ayıqlığı və böyük təcrübəsi sayəsində buna nail olmuşdur. Ermənistandan qovulmuş soydaşların yerləşdirilməsi, ermənilərin rayondan çıxarılması, Qarabağ ətrafında baş verən hadisələrlə bağlı yaranan gərgin vəziyyətdə zəngin etnik və dini tərkibi olan İsmayıllıda bütün qüvvələr arasında qarşılıqlı anlaşmanın, konsensusun, prinsipial məsələlərdə optimal çıxış yollarının tapılmasında onun böyük rolu olmuşdur.

Rasim Şərifov 27 may 1992-ci ildə İsmayıllı rayonu İcra hakimiyyətinin başçısı təyin edilmiş[1], 20 avqust 1993-cü ildə isə həmin vəzifədən azad edilmişdir[2].

1993-1998-ci illərdə ictimai-siyası fəaliyyətlə məşğul olmuşdur. 1998-ci ilin mart ayından "Olaylar" ekoloji araşdırmalar mərkəzinin direktoru, 2004-cü ildən "Ulu Xudafərin" jurnalının baş redaktoru işləmişdir. Milli Vəhdət Partiyasının üzvü, partiyanın icra aparatının rəhbəri olmuşdur. 1995, 2000 və 2005-ci illərdə Milli Məclisə seçkilərdə deputatlığa namizəd olmuşdur.

Rasim Şərifov uzun sürən xəstəlikdən sonra 12 yanvar 2018-ci ildə vəfat etmişdir[3].

Ailəsi[redaktə | əsas redaktə]

Ailəlidir, 3 övladı var. Övladları ali təhsil almışdır.

İstinadlar[redaktə | əsas redaktə]

  1. 1 2 3 "Şərifovun İsmayıllı rayonu İcra hakimiyyətinin başçısı təyin edilməsi və M. B. Süleymanovun həmin vəzifədən azad edilməsi haqqında" Azərbaycan Respublikası Prezidentinin 27 may 1992-ci il tarixli, 791 nömrəli Fərmanı. e-qanun.az  (azərb.)
  2. 1 2 3 "V. N. Rəhimovun İsmayıllı rayonu İcra hakimiyyətinin başçısı təyin edilməsi və R. C. Şərifovun həmin vəzifədən azad edilməsi haqqında" Azərbaycan Respublikası Prezidentinin 20 avqust 1993-cü il tarixli, 727 nömrəli Fərmanı. e-qanun.az  (azərb.)
  3. İsmayıllının sabiq icra başçısı vəfat edib. report.az, 12.01.2018  (azərb.)