Sportinq Futbol Akademiyası

"Sportinq" futbol akademiyası (port. Academia Sporting) — "Sportinq" (Lissabon) FK-ya aid təlim mərkəzi^[1]. Lissabon yaxınlığındakı Alkoşeti qəsəbəsində yerləşir^[1].

Bu akademiyanın tikintisinə 1999-cu ildə start verilib və 2002-ci ildə başa çatıb. Ancaq "Sportinq"in akademiyası Alkoşetidəki bazadan öncə də fəaliyyət göstərib. Klub Kriştiano Ronaldo, Luiş Fiqu kimi istedadları dünya futboluna bəxş edəndə, Alkoşetidəki baza hələ tikilməmişdi^[1].

Bu bazanın tikilməsiylə birlikdə isə daha çox oyunçunun yetişdirilməsinə şərait yarandı. Akademiyanın ərazisi 250 min kv. metrdir. Burada möhtəşəm təlim-məşq bazası, 4-ü təbii, 3-ü süni örtüklü olmaqla 7 meydança mövcuddur. Akademiyanın ərazisində uşaqların qalması üçün hər cür şərait vardır. Buradan bir saatlıq yoldan artıq məsafədə yaşayan uşaqlar məhz akademiyada qalırlar^[1].

Akademiya iki hissədən ibarətdir: gənclər və peşəkarlar üçün. Hər iki hissədə tibbi mərkəz, idman zalı, cakkuzi və yataq otaqları var. Gənclər üçün olan hissədə isə əlavə olaraq, dərs keçmək üçün otaqlar və qapıçıların məşq etməsi üçün xüsusi meydança da var. AÇ-2004 zamanı Portuqaliya millisi məhz bu akademiyada məskunlaşmışdı^[1].

Akademiyanın skautları bura yeni oyunçular cəlb etmək üçün daim axtarışdadılar. Bu axtarışlar əsasən, Portuqaliyanı əhatə edir. Akademiyada 100-ə yaxın skaut çalışır. Onlar 7 yaş və yaşı yuxarı olan istedadları kəşf edib, akademiyaya cəlb etmək üçün daim axtarışda olurlar. İstedadlar akademiyaya daxil edildikdən sonra "Sportinq"in əsas komandası üçün yetişdirilirlər^[1]. Məhz akademiyanın həyata keçirdiyi layihə nəticəsində Portuqaliyada 6 minə yaxın uşaq futbolun sirlərinə yiyələnir^[1].

Akademiyada hər yaş qrupu üçün fərqli məşq sistemindən istifadə edilir. 7–13 yaş aralığında olan uşaqlara əsasən, futbolun ilkin elementləri öyrədilir. Onlar futbolun ilkin prinsipləriylə tanış olur, texniki qabiliyyətin artırılmasıyla bağlı məşqlər keçir, oyun tərzi və fiziki hazırlığın qaydaya salınması təmin edilir. Bütün bu təlimlər uşaqlara əyləncəli yolla aşılanır. Yəni uşaqlar bu təlimləri keçərkən, həm də, bu oyundan zövq alır, futbola qarşı sevgisi bir az da artır. Bütün bu təlimlər növbəti mərhələ üçün keçid rolunu oynayır^[1].

Akademiyanın 15–17 yaş arası qrupları isə bir qədər fərqli məşq keçirlər. Belə ki, bu yaş qrupunda çıxış edən yeniyetmələr əsasən, taktiki, fiziki və psixoloji plan üzrə hazırlanırlar^[1].

Son mərhələyə isə oyunçuların psixoloji cəhətdən tam hazır vəziyyətə gətirilməsi, fiziki hazırlığın mükəmməl həddə çatdırılması və oyunçuların əsl peşəkar kimi formalaşdırılması daxildi^[1].

Akademiya təkcə milli komadalar üçün oyunçu yetişdirmir, yetişdirdiyi oyunçulardan həm də yaxşı qazanır. Məsələn, "Mançester Yunayted" klubu 2003-cü ildə "Sportinq"in yetirməsi Kriştiano Ronaldonun transferi üçün bu kluba 17,5 milyon avro haqq ödəmişdi. Klub digər yetirmələrinə görə Kriştianonun transferində olduğu kimi çox qazanmasa da, hər halda, bu oyunçuların transferinə görə ildə bir neçə milyon avro irəli düşür. Üstəlik, həmin oyunçuların yeni klublarından başqa komandalara transferi zamanı da, həmin futbolçunun yetişməsində əsas pay sahibi kimi "Sportinq" müəyyən pay alır^[1].

"Sportinq"in futbol akademiyası 2016-cı ildə Fransada təşkil edilən Avropa çempionatından sonra bir az da diqqət mərkəzinə düşmüşdür. Belə ki, AÇ-2016-nı qalib kimi başa vuran Portuqaliya millisinin üzvlərinin əksəriyyəti məhz bu futbol akademiyasının yetirməsi idi. Final qarşılaşmasında Portuqaliya yığmasının heyətində meydana çıxan 14 futbolçudan 10-u "Sportinq"in futbol akademiyasında təhsil almışdır^[1].