Uça Caparidze

Uça Caparidze
gürc. უჩა ჯაფარიძე
Doğum adı	Uça İlya Malakiyeviç Caparidze
Doğum tarixi	17 avqust 1906
Doğum yeri	Qari, Kutaisi quberniyası, Rusiya imperiyası
Vəfat tarixi	6 iyun 1988 (81 yaşında)
Vəfat yeri	Tbilisi, Gürcüstan SSR, SSRİ
Dəfn yeri	Saburtalo panteonu[d]
Milliyyəti	gürcü
Vətəndaşlığı	Rusiya İmperiyası SSRİ Gürcüstan SSR
Fəaliyyəti	rəssam
Təhsili	Tbilisi rəssamlıq studiyası və Rəssamlıq Akademiyası
Stil	sosialist realizmi
Tələbəsi	Georgi Totibadze
Üzvlüyü	SSRİ Rəssamlar İttifaqı
Mükafatları
Vikianbarda əlaqəli mediafayllar

Uça İlya Malakiyeviç Caparidze (gürc. უჩა ჯაფარიძე; 4 (17) avqust 1906 – 6 iyul 1988, Tbilisi) — gürcü boyakarı və qrafiki, SSRİ Rəssamlıq Akademiyasının həqiqi üzvü (1958). SSRİ xalq rəssamı (1963), Azərbaycan SSR əməkdar incəsənət xadimi (1981).

Həyat və yaradıcılığı

Uça Caparidze 17 avqust 1906-cı ildə Kutaisi quberniyasının Qari kəndində anadan olub. 1922–1924-cü illərdə Tbilisidə M.Toidzenin Xalq rəssamlıq studiyasında, 1924–1925 və 1928–1931-ci illərdə isə Rəssamlıq Akademiyasında təhsil almışdır. Erkən yaradıcılığa L. Qudiaşvilinin təsiri (rənglərin ifadəliliyi, kompozisiyanın dekorativliyi) olmuşdur. 1932–1936-cı illərdə Moskvada yaşamışdır. Uça Caparidze tarixi tabloların ("1901-ci ildə Tiflisdə 1 may nümayişi", 1939–1941), məişət rəsmlərinin ("Ananın düşüncələri", 1945, "Babanın fəxri" 1954, "Kolxoz bazarı", 1960), portretlərin (bəstəkar Z.P. Paliaşvili, 1940, şair Q.V. Tabidze, 1943, aktrisa V.İ.Ancaparidze, (1956) və b.), mənzərələrin, kitab illüstrasiyalarının (Q.V. Tabidze, İ.Q. Çavçavadze və başqalarının kitablarına) müəllifidir. "Xeyir-dua" (1957) əsərinə görə 1958-ci ildə Ümumdünya sərgisinin gümüş medalını almışdır. 1936-cı ildən Tbilisi Rəssamlıq Akademiyasında dərs demişdir. 1944-cü ildən professor, 1942–1948-ci illərdə direktor olmuşdur. Azərbaycan rəssam kadrlarının hazırlanmasında xidməti olmuşdur. Uça Caparidze 1988-ci ildə Tbilisidə vəfat etmişdir.

Mənbə

• Azərbaycan Milli Ensiklopediyası (25 cilddə). 5-ci cild: Brüssel – Çimli-podzol torpaqlar (25 000 nüs.). Bakı: "Azərbaycan Milli Ensiklopediyası" Elmi Mərkəzi. 2014. səh. 189. ISBN 978-9952-441-10-9.