Əli İnsanov

Əli İnsanov
Azərbaycan Respublikasının səhiyyə naziri
9 noyabr 1993 – 20 oktyabr 2005
Əvvəlki	Rahim Hüseynov
Sonrakı	Oqtay Şirəliyev
Şəxsi məlumatlar
Doğum tarixi	22 mart 1946 (1946-03-22)
Doğum yeri	Ləmbəli, Loru mahalı, Ermənistan
Partiya	Yeni Azərbaycan Partiyası (1995–2005), Haqq Ədalət Partiyası (2020–)
Təhsili	Azərbaycan Tibb Universiteti
Fəaliyyəti	həkim
Elmi fəaliyyəti
Elmi dərəcəsi	tibb elmləri doktoru
Elmi adı	professor[d]
Vikianbarda əlaqəli mediafayllar

İnsanov Əli Binnət oğlu — həkim, Azərbaycanın keçmiş səhiyyə naziri.

Həyatı

Əli İnsanov 1946-cı il martın 22-də Ermənistan SSR-in (keçmiş Dağ Borçalısı bölgəsinin) Ləmbəli kəndində anadan olmuşdur. 1965-ci ildə orta məktəbi qızıl medalla bitirmiş, Azərbaycan Dövlət Tibb İnstitutunun (indiki ATU-nun) müalicə-profilaktika fakültəsinə daxil olmuşdur. 1972-ci ildə isə həmin fakültədə təhsilini başa vurmuşdur.

Əmək fəaliyyətinə Azərbaycan Elmi-Tədqiqat Vərəm İnstitutunda həkim-ordinator kimi başlayan Əli İnsanov kiçik və böyük elmi işçi, elmi işlər üzrə şöbə müdiri, elmi işlər üzrə direktor müavini vəzifələrində çalışmış və 1985-ci ildə həmin institutun direktoru vəzifəsinə təyin olunmuşdur. 1977-ci ildə Moskva şəhərində namizədlik, 1985-ci ildə isə doktorluq dissertasiyası müdafiə etmişdir. Həmin ildən Azərbaycan Tibb Universitetinin vərəm kafedrasında müəllimliyə başlayan Əli İnsanov 1991-ci ildən həmin kafedraya rəhbərlik etmişdir. O, 1992-ci ildən professordur. 1993-cü ildə Azərbaycan Respublikasının səhiyyə naziri vəzifəsinə təyin edilmişdir.

Əli İnsanov respublikamızda ftiziatriya və pulmonologiya üzrə elmi məktəb yaratmışdır. Onun rəhbərliyi altında 25 namizədlik və 8 doktorluq dissertasiyası müdafiə edilmişdir. Əli İnsanov 4 kitabın, 200-dən çox elmi məqalənin müəllifidir. Bu əsərlərin 50-si xarici ölkələrdə çap edilmişdir. 1981-ci ildən başlayaraq bu günədək onun elmi mə’ruzələri 30-dan artıq ölkədə, o cümlədən ABŞ, İngiltərə, Fransa, Çin, Kanada, Almaniya, Türkiyə, İran, Hindistan, Yaponiya, İsrail, İsveçrə, Kuba, İndoneziya, Belçika və Pakistanda maraqla dinlənmişdir.

O, Ümumdünya Biotexnoloqlar Elmi Cəmiyyətinin vitse-prezidenti, Vərəm əleyhinə Beynəlxalq İttifaqın, Avropa Respirator Cəmiyyətinin, Nyu-York Elmlər Akademiyasının, Rusiya Federasiyasının Təbiət Elmləri Akademiyasının, "Problemı tuberkuleza" jurnalının, "Azərbaycan Tibb Jurnalı"nın redaksiya heyətinin üzvüdür. 1998-ci ildə Ümumdünya Səhiyyə Təşkilatının Baş Assambleyasının vitse-prezidenti seçilmişdir.

1995-ci ildə Azərbaycan Respublikası Milli Məclisinə deputat seçilmişdir. Əməkdar elm xadimidir.

Əli İnsanov Azərbaycanın ilk dərman preparatı "İnsanovin"in və yerli təbii dərman bitkilərindən hazırlanmış "İnsanov bronxolitini"in müəllifidir.

1998-ci ildə Sankt-Peterburqda səhiyyədə islahatlara həsr olunmuş Beynəlxalq Konfransın qızıl medalına layiq görülmüşdür.

Əli İnsanov 2001-ci ilin iyulunda Azərbaycan Milli Elmlər Akademiyasının həqiqi üzvü seçilmişdir. 2005-ci ilin oktyabrında hakimiyyəti zorla ələ keçirmə ittihamı ilə həbs ediləndən sonra sadalanan bir çox titulları, o cümlədən akademik fəxri adı ondan alınmışdır.