İbrahim Qurbanov

Vikipediya, açıq ensiklopediya
Keçid et: naviqasiya, axtar

Sosialist Əməyi Qəhrəmanı İbrahim Musa oğlu Qurbanov 1925-ci ilin mart ayının 22-də Qərbi Azərbaycanın Dərələyəz mahalında dünyaya göz açıb. Əmək fəaliyyətinə hələ 15 yaşında olarkən kənd sovetinin katibi vəzifəsində başlayıb. Sonralar mühasib, məktəb direktoru kimi vəzifələrdə çalışıb. Bu isə onun hələ gənc yaşlarından yaşadığı cəmiyyətin, ictimai həyatın hər sahəsinə bələd olduğunu göstərir ki, məhz bu təcrübə onun gələcəkdə səriştəli təsərrüfatçı, bacarıqlı rəhbər kimi formalaşmasında başlıca rol oynayıb. İlk əmək fəaliyyətindəki bu məsuliyyətli işlər İbrahim Qurbanovu ictimai xadim kimi uzun və şərəfli yolun yolçusu edib. 1944-cü ildə o vaxtki Əzizbəyov Rayon Komsomol Komitəsinin ikinci katibi seçilib. Əslində isə bu onun taleyi idi, o anadan böyük işlər üçün - qurub-yaratmaq, xalqımıza xidmət etmək üçün doğulmuşdu və bu fədakar əmək onu bir yola - el adamı olmaq kimi şərəfli bir yola aparırdı. Ali məqsədə çatmaq üçün həyat yolunun əvvəlində bir sıra mərhələləri keçməli, özünü təsdiqləməli, həyatın sınaqlarından çıxmalı idi. İndi "Ermənistan" adlandırılan dədə-baba torpağında 1947-ci ildə tutduğu KP Əzizbəyov Rayon Komitəsinin təlimatçısı vəzifəsi onun rəhbər iş üçün doğulduğunu bir daha təsdiq etdi. İbrahim Qurbanovun bilik və bacarığı onu təhsil almaq üçün Azərbaycan Kommunist Partiyası Mərkəzi Komitəsi yanında respublika Partiya Məktəbinə apardı. Təhsilini başa vurduqdan sonra Azərbaycan KP Əli-Bayramlı Rayon Komitəsində kənd təsərrüfatı şöbəsinin müdiri təyin edildi. Beləcə həyatını təsərrüfatla bağlayan İbrahim Qurbanov sonralar Əli-Bayramlı rayonunda bir sıra məsul vəzifələrdə çalışdı və bu illərdə təsərrüfatçılıq təcrübəsini, peşəkar vərdişlərini daha təkmilləşdirdi. Sonra kənd təsərrüfatı təhsilinin zəruri olduğunu bilib, Azərbaycan Kənd Təsərrüfatı İnstitutunu da bitirdi.

Qəlbi qurub–yaratmaq eşqi ilə döyünən, Vətənini, yurdunu dərin məhəbbətlə sevən bu insan sonralar Əli Bayramlı rayonundakı Vladimirsk MTS partiya təşkilatının katibi, Əli Bayramlı Rayon Partiya Komitəsinin katibi vəzifəsinə təyin olunmuşdur. Xalqın etimadını qazanan, Azərbaycanın iqtisadiyyatının yüksəldilməsinə tükənməz enerji sərf edən, yüksək təşkilatçılıq bacarığı olan İ.Qurbanov 1957–ci ildən 1961–ci ilədək Bakı Ali Partiya Məktəbinin dinləyicisi olmuş, məktəbi bitirdikdən sonra Əli Bayramlı rayonundakı 6 nömrəli sovxozun istehsalat idarəsinin rəisi, Salyan rayonundakı SSRİ–nin 50 illiyi adına 1 nömrəli pambıqçılıq sovxozunun direktoru vəzifələrində çalışmış, S.Ağamalıoğlu adına Azərbaycan Kənd Təsərrüfatı İnstitutunda təhsilini davam etdirmişdir.

Respublika ictimaiyyəti arasında dərin nüfuz qazanmış İbrahim Qurbanov 1973–cü ildə Salyan Rayon XDS İcraiyyə Komitəsinin sədri vəzifəsinə irəli çəkilmiş, 1977–ci ildən Azərbaycan KP Neftçala Rayon Partiya Komitəsinin birinci katibi olmuş, 1980–ci ildə isə Azərbaycan KP Cəlilabad Rayon Partiya Komitəsinin birinci katibi vəzifəsinə təyin olunmuşdur.

İbrahim Qurbanov Neftçala rayonunda birinci katib kimi təyin olunanda Azərbaycanın Xəzərə söykənmiş bu ucqar qəsəbəsinə heç şəhər də demirdilər. Qısa müddətdə bu yerlər yaraşıqlı, gözəl, romantik mənzərəyə malik olan bir diyara çevrildi. Kürün üstündə Bankə qəsəbəsi ilə Neftçala şəhərini birləşdirən, xalqın “İbrahim körpüsü” adlandırdığı körpünün də müəllifi İbrahim Qurbanovdur.

İ.M.Qurbanov Azərbaycan KP MK–nın üzvü, doqquzuncu, onuncu və on birinci çağırış respublika Ali Sovetinin deputatı kimi fəal ictimai–siyasi iş aparmışdır.

Dəyərli ziyalı, kamil insan, İbrahim Qurbanovun fədakar əməyi, xidmətləri Sosialist Əməyi Qəhrəmanının “Qızıl Ulduz”u, Lenin ordeni, üç Qırmızı Əmək Bayrağı ordeni və medallarla qiymətləndirilmişdir. İbrahim Qurbanov Cəlilabadda Rayon Partiya Komitəsinin katibi işlədiyi illərdə burada abadlıq–quruculuq işləri geniş vüsət almışdı. Əhalinin həyat səviyyəsi yüksək idi. Cəlilabad az müddətdə respublikanın ən böyük üzümçülük rayonuna çevrilmişdi. Üzüm istehsalı 60 min tondan 261 min tona çatmışdı. Mərkəzi mətbuatda, mavi ekranlarda Cəlilabadın qəhrəman üzümçülərinin misilsiz qələbəsinə geniş yer ayrılırdı. “Pravda” qəzetində Cəlilabad üzümçülərinin rekord göstəricilərindən bəhs edən “Temp” sərlövhəli irihəcmli məqalə dərc olunmuşdu.

İbrahim Qurbanov Cəlilabadda birinci katib işlədiyi dövrdə rayonda rəhbər vəzifələrdə çalışanların çoxunun səriştəli kadr kimi yetişməsində böyük zəhmət çəkib. Tələbkarlığı da vardı, qayğıkeşliyi də, sözü ilə əməli düz idi. İnsanlara böyük qayğı ilə yanaşırdı. Xalq şairi Məmməd Araz respublikanın dinamik inkişafında İbrahim Qurbanovun böyük zəhməti olduğunu belə qiymətləndirmişdir: “Azərbaycan xalqı öz tarixi ərzində çox böyük şəxsiyyətlər yetirib. Onların hər birinin öz yeri, özünəməxsus xidmətləri var. İbrahim Qurbanov da ötən əsrin ən parlaq simalarından biri idi. O, üç inkişaf etmiş Azərbaycan şəhərinin abadlaşmasında, yenidən tikilməsində əvəzsiz rol oynayıb…”

Sosialist Əməyi Qəhrəmanı İbrahim Qurbanovu rəhbər vəzifəyə ümummilli liderimiz, dahi şəxsiyyət Heydər Əliyev irəli çəkmişdi. İ.Qurbanov dahi insan, dünya şöhrətli siyasətçi Heydər Əliyevi, onun xalqımız qarşısındakı xidmətlərini həmişə yüksək qiymətləndirirdi. Çalışırdı ki, bu dahi insanın etimadını ləyaqətlə doğrultsun. Deyirdi ki, Heydər Əliyev bizim fəxrimizdir, onun nuru Türk dünyasını işıqlandırır. Ulu Tanrı onu bu xalqa xilaskar göndərib.

İbrahim Qurbanov səmimi, etibarlı olduğuna görə onun çoxlu dostları vardı. O, SSRİ Nazirlər Sovetinin sədri A.H. Kosıginlə də dost idi: Danışırdı ki, bir dəfə Şimali Qafqazda—kurort şəhəri kimi dünyada tanınan Kislovodskidə Sov. İKP MK–nın işçiləri üçün tikilən “Qırmızı daş” müalicə ocağında dincəlirdim. Səhər–səhər gəzintiyə çıxmışdım, cığırla gedirdim. Bir də baxdım ki, bir nəfər qoluma girdi. Dedi ki, ona dəyməyin. Tanış olduq. Öyrəndim ki, SSRİ–nin yüngül sənaye naziri A.N.Kosıgindir. Mən də adımı, Salyanda sovxoz direktoru işlədiyimi bildirdim. Sən demə bizim təsərrüfat pambıq planını Azərbaycanda birinci yerinə yetirdiyinə görə Kosıgin sovxozumuz barədə yetərincə məlumatlı imiş.

Xeyli söhbət etdik, at mindik. Axşam məni şam yeməyinə çağırdı. Birlikdə çörək kəsdik, aramızda mehriban münasibətlər yarandı. Aradan bir az keçmiş o, SSRİ Nazirlər Sovetinin sədri vəzifəsinə irəli çəkildi. Yadından çıxmamışdım. Moskvada Heydər Əliyevlə görüşəndə məni soruşub haqqımda xoş sözlər söyləyib.

Xarici keçidlər[redaktə | əsas redaktə]