Şakir Yaqubov

Vikipediya, açıq ensiklopediya
Jump to navigation Jump to search
Şakir Yaqubov
Şakir Yaqubov.jpg
Doğum tarixi 25 fevral 1951 (1951-02-25) (68 yaş)
Doğum yeri Bala Şahağac, Astara rayonu, Azərbaycan SSR, SSRİ
Peşəsi jurnalist
Milliyyəti azərbaycanlı
Təhsili
Fəaliyyəti jurnalist

Yaqubov Şakir Hənifə oğlu — jurnalist, iki dəfə Azərbaycanın əməkdar mədəniyyət işçisi, Ali Media mükafatı, "Qızıl qələm" və Həsənbəy Zərdabi mükafatları laureatı, Azərbaycan Respublikasının fəxri auditoru (2011)[1].

Həyatı[redaktə | əsas redaktə]

Şakir Yaqubov 1951-ci il fevralın 25-də Astaranın Bala Şahağac kəndində anadan olub. Azərbaycan Dövlət Universitetinin (indi Bakı Dövlət Universiteti) kitabxanaçılıq fakültəsini, Azərbaycan Jurnalist Sənətkarlığı İnstitutunu və Azərbaycan KP MK yanında Marksizm-Leninizm Universitetini fərqlənmə diplomu ilə bitirib. Leytenant rütbəsində iki il keçmiş Almaniya Demokratik Respublikasında hərbi xidmətdə olub.

1974-2000-ci illərdə "Azərbaycan gəncləri", "Kommunist" (indiki "Xalq qəzeti"), "Həyat" (indiki "Azərbaycan"), "Sirdaş", "Səhər" və "AFFA news", "Panorama" qəzetlərində müqaviləli xüsusi müxbirlikdən baş redaktorun birinci müavini və baş redaktoracan ən müxtəlif vəzifələrdə, sonrakı 10 ildə isə Azərbaycan Respublikası Auditorlar Palatasının redaksiya-nəşriyyat şöbəsinin müdiri, "İqtisadiyyat və audit" elmi-praktik jurnalının məsul redaktoru vəzifəsində çalışıb. Hazırda 2-ci qrup əlil kimi pensiyadadır, işləmir.

"Mən şahidəm ki...", "Qətiyyətin təntənəsi", "Hakim mərkəzi göstərər", "Bizim səfər haçandı?!", "Banişevski olduğu kimi", "Taleyimdən keçənlər", "Yaddaşımın küncündən..." və "Bir az da futbol(umuz)dan" kitablarının müəllifi, "Vətən bizim şöhrətimiz...", "Bizim müasirimiz", "On ikinci şeyxülislam" və "Qanlı Yanvar dialoqu" kitablarının həmmüəllifi, məşhur islamşünas alim Q.E. fon Qrünebaumun "Klassik islam" monoqrafiyasının, Y.Boqatın "Onlar belə sevirdilər" (Ə.Ağalarov və E.Cabbarovla birgə) kitabının və dövri mətbuatda çap olunmuş onlarca digər dəyərli əsərin tərcüməçisi, Vasif Səmədov, Bəxtiyar Sadıqov, Müsəllim Həsənov, Adil Qaçayoğlu və digər qələm sahiblərinin publisistik kitablarının, habelə auditə dair 35-dən çox elmi-kütləvi nəşrin redaktorudur. Müxtəlif janrlı yazıları ayrı-ayrı toplulara, o cümlədən əxlaq mövzusunda "Sevirsə, qayıdacaq..." adlı oçerki IX siniflər üçün "Ailə həyatının etika və psixologiyası üzrə müntəxabat"a (Bakı, 1989-cu il) daxil edilib.

İki dəfə – sovet dövründə (1989-cu il) və müstəqillik illərində (2005-ci il) "Əməkdar mədəniyyət işçisi" fəxri adına,2014-cü ildə Azərbaycan mətbuatının inkişafındakı xidmətlərinə görə Azərbaycan Mətbuat Şurasının Ali Media Mükafatına, habelə "Qızıl qələm" və Həsən bəy Zərdabi mükafatlarına, 10-dək yaradıcılıq müsabiqəsinin mükafatlarına layiq görülüb. "Azərbaycan Respublikasının fəxri auditoru" adını almış ilk və yeganə peşəkar jurnalistdir.

İki övladı, üç nəvəsi var.

Mükafatları[redaktə | əsas redaktə]

2014-cü ildə [Ali Media Mükafatı] ilə təltif edilmişdir[2].

İstinadlar[redaktə | əsas redaktə]

  1. Jurnalist Şakir Yaqubov... auditor oldu
  2. "Ali Media Mükafatını kimlər aldı?" (azərb.). KASPİ. kaspi.az (23.07.2014 - 13:28:00).

Xarici keçidlər[redaktə | əsas redaktə]