Bakı Xoreoqrafiya Akademiyası

Vikipediya, azad ensiklopediya
Jump to navigation Jump to search
Bakı Xoreoqrafiya Akademiyası
BXA bina.jpeg
Əsası qoyulub 1929, 1936, 2014
Ölkə

Bakı Xoreoqrafiya Akademiyası — Azərbaycan Respublikasında xoreoqrafiya sahəsində ümumi, orta ixtisas və ali təhsil proqramlarını həyata keçirən xüsusi ali məktəb.

Tarixi[redaktə | əsas redaktə]

Bakıda ilk balet studiyası 1923-cü ildə yaranıb və 1929-cu ildə Opera Teatrının nəzdində Dövlət Balet Studiyasına çevrilib. 1936-cı ildən isə məktəbin adı dəyişdirilərək Bakı Xoreoqrafiya Məktəbi adlandırılıb: "Azərbaycanın bu gün tanınmış əməkdar artistləri, balerinaları, rəqqasları bu məktəbin məzunlarıdır. İlk azərbaycanlı balerina, görkəmli sənətkar Qəmər Almaszadə ilk təhsilini burada alıb, milli xoreoqrafiya məktəbinin parlaq simalarından olan Leyla Vəkilova, Konstantin Bataşov, Xumar Zülfüqarova, Rəfiqə Axundova, Maqsud Məmmədov, Vladimir Pletnyov, Çimnaz Babayeva, Vitali Axundov, Afaq Məlikova, Mədinə Əliyeva, Təranə Muradova və onlarla tanınmış rəqqas bu məktəbdə sənətin sirlərinə yiyələniblər.

Ümumi məlumat[redaktə | əsas redaktə]

30 aprel 2014-cü il tarixində Azərbaycan Respublikasının Prezidenti İlham Əliyevin sərəncamı ilə yaradılıb[1]. Akademiya Bakı Xoreoqrafiya Məktəbinin bazasında yaradılıb.

BXA Azərbaycan Respublikasında xoreoqrafiya sənəti ənənələrinin qorunması və inkişaf etdirilməsi zərurətini nəzərə alaraq, bu sahə üzrə yüksəkixtisaslı kadrların hazırlanmasını təmin etmək məqsədi ilə yaradılıb.

Bakı Xoreoqrafiya Məktəbində iki bölmə fəaliyyət göstərir: klassik bölmə və xalq bölməsi. Klassik bölməyə 5-ci sinifdən, xalq bölməsinə 8-ci sinifdən şagirdlər qəbul olunur. 1–4-cü siniflər hazırlıq mərhələsidir. Həmin siniflərdə xoreoqrafiya sənətinin ibtidai, təməl elementləri şagirdlərə aşılanır. 4-cü sinifdən sonra isə şagirdlərdən kimlərsə professional mərhələyə başlama imkanı əldə edir, kimlərsə məktəblə vidalaşmalı olur. 5-ci sinifdən artıq professional xoreoqrafiya sənətinin tədrisinə başlanılır".

Məktəbdə təhsil iki pilləlidir. I–IX sinif və sonra daha 3 illik təhsil. Məktəb dərsləri ilə yanaşı, qrim sənəti, duet, tarixi-məişət rəqsləri, nəfəs dərsi, xalq-səhnə və Azərbaycan rəqsləri fənləri yüksək səviyyədə tədris olunur. Hətta burada şagirdlərə aktyorluq sənəti də öyrədilir. Klassik rəqs dərsləri isə bütün siniflərdə keçilir. Bundan başqa, balet dili fransız dili olduğu üçün birinci sinifdən məktəbi bitirənə qədər fransız dili fənni tədris edilir. Üstəlik, professional müəllim heyəti tərəfindən yetişdirilən məzunlar ABŞ, Almaniya, Çin, İsrail, Latviya, Rusiya, Türkiyə, Ukrayna, Yunanıstan və s. ölkələrin nüfuzlu teatrlarında və təhsil ocaqlarında çalışaraq Azərbaycan xoreoqrafiya sənətini uğurla təmsil edirlər.

Qeyd: Bakı Xoreoqrafiya Məktəbinin 80 ildən çox yaşı vardır. Bu məktəb haqqında 2005-ci ildə film çəkilmişdir. Bakı Xoreoqrafiya Məktəbi 2005 (film, 2005) filmi həmin məktəbin tarixini və fəaliyyətini əhatə edir. Həmçinin çəkiliş qrupu məktəbin iş, dərs və imtahan rejimini də lentə almışdır.

İstinadlar[redaktə | əsas redaktə]