Elektrik sahəsi

Elektrik sahəsi — elektromaqnit sahəsinin xüsusi halı; elektrik yükünün hərəkət sürətindən asılı olmayan qüvvənin (sahə tərəfindən) yükə təsirini müəyyən edir. Elektrik sahəsi haqqında anlayış 19-cu əsrin 30-cu illərində M. Faradey tərəfindən daxil edilmişdir. Faradeyə görə, sükunətdə olan hər bir yük onu əhatə edən fəzada elektrik sahəsi yaradır. Bir yükün sahəsi digər yükə təsir edir və əksinə; yüklərin qarşılıqlı təsiri (yaxınatəsir konsepsiyası) belə həyata keçirilir. Elektrik sahəsinin əsas kəmiyyət xarakteristikası – elektrik sahəsinin intensivliyidir ($\mathbf {E}$); fəzanın verilən nöqtəsində elektrik sahəsinin intensivliyi bu nöqtədə yerləşən yükə

($q$) təsir edən $\mathbf {F}$ qüvvəsinin həmin yükə olan nisbətinə bərabərdir:

$\mathbf {E} ={\mathbf {F} \over q}$

Mühitdə elektrik sahəsi intensivliklə yanaşı, elektrik induksiyası vektoru ($\mathbf {D}$) ilə də xarakterizə olunur. Fəzada elektrik sahəsinin paylanmasını elektrik sahəsi intensivliyinin qüvvə xətlərinin köməyi ilə təsvir etmək olar. Elektrik yüklərinin doğurduğu qüvvə xətləri müsbət yüklərdə başlayır və mənfi yüklərdə qurtarır (və ya sonsuzluğa gedir). Dəyişən maqnit sahəsinin yaratdığı burulğanlı qüvvə xətləri qapalıdır.

Həmçinin bax

• Videman-Frans qanunu

Mənbə

Azərbaycan Milli Ensiklopediyası (25 cilddə). Bakı: "Azərbaycan Milli Ensiklopediyası" Elmi Mərkəzi. ISBN 978-9952-441-00-0.