Futbol marşı
"Futbol marşı" — sovet bəstəkarı Matvey Blanterin 1938-ci ildə yazdığı marş. Ənənəvi olaraq SSRİ-də futbol matçları zamanı səsləndirilirdi. Hazırda Rusiya çempionatının birinci, ikinci və üçüncü divizionlarının oyunlarında, eləcə də keçmiş SSRİ ərazisindəki bəzi digər futbol turnirlərində səsləndirilir. Marş, həmçinin, keçmiş SSRİ komandalarının iştirakı ilə keçirilən yoldaşlıq və avrokubok görüşlərində də bəzən eşidilir.
Blanter, marşı məşhur idman radio şərhçisi Vadim Sinyavskinin xahişi ilə yazmışdır. Melodiyanı ilk eşidənlər bəstəkar Dmitri Şostakoviç və onun oğlu, gələcək pianoçu və dirijor Maksim olub.[1]
Ümumi davamiyyəti 1 dəqiqə olan kompozisiya, mi-bemol major tonallığında yazılmışdır. SSRİ-də adətən iki variantda səsləndirilirdi: "çağırış sədaları" olan variant — futbolçuların meydana dəvət olunduğu zaman, "çağırış sədaları" olmadan və dəyişdirilmiş sonluqla — oyun başa çatdıqdan sonra.
2009-cu ildə Rusiya Müəlliflər Cəmiyyəti Rusiya Premyer Liqasından oyunlardan əvvəl "Futbol marşı"ndan istifadə etdiklərinə görə hər matçın bilet satışından əldə edilən məbləğin 0,2%-ni tələb edib. RPL ittihamları absurd hesab edib və məbləği ödəməkdən imtina edib. Matvey Blanterin nəvəsi və varisi Tatyana Brodskaya rəsmi nümayəndəsi vasitəsilə marşın futbol ictimaiyyətinə hədiyyə olaraq yazıldığını və buna görə də onun RPL matçlarında istifadəsinin pulsuz olduğunu bildirib.[2][3]
İstinadlar[redaktə | mənbəni redaktə et]
- ↑ "У болельщиков отобрали «Футбольный марш»". 2014-05-17 tarixində arxivləşdirilib. İstifadə tarixi: 2013-03-14.
- ↑ "Внучка Матвея Блантера разрешила бесплатное звучание «Футбольного марша» СовСпорт.ru". 2021-10-06 tarixində arxivləşdirilib. İstifadə tarixi: 2019-06-13.
- ↑ "Кто придумал футбольный марш?". Sportmaster.ru. İstifadə tarixi: 2024-03-13.