Həsənağa Salayev

Vikipediya, azad ensiklopediya
Jump to navigation Jump to search
Həsənağa Salayev
Həsənağa Salayev.JPG
Doğum tarixi 5 dekabr 1921(1921-12-05)
Doğum yeri Bakı, Azərbaycan SSR
Vəfat tarixi 2 oktyabr 1981 (59 yaşında)
Vətəndaşlığı SSRİ SSRİ
Peşəsi Aktyor
Mükafatları "Azərbaycan SSR xalq artisti" fəxri adı
IMDb ID 3742712

Həsənağa Salayev (5 dekabr 1921(1921-12-05), Bakı2 oktyabr 1981(1981-10-02)) — aktyor, Azərbaycan SSR xalq artisti,[1] film səsləndirən, arxiv kadrlarda iştirak edən.[2]

Həyatı[redaktə | əsas redaktə]

Romantik və realist aktyor məktəblərinin estetik prinsiplərini öz yaradıcılığında cazibəli ahəngdarlıqla ehtiva edən Həsənağa Dərya oğlu Salayev 5 dekabr 1921-ci ildə Bakıda qulluqçu ailəsində doğulub. Atası Dərya kişi oğlu yeddi yaşına çatanda onu Bakıdakı 6-cı Şura məktəbinə qoyub. Həsənağa 1937-ci ildə oranın doqquzuncu sinifini yüksək qiymətlərlə bitirib. Elə həmin il Bakı Teatr Texnikumuna daxil olub. Tələbə ikən 1938-ci ildə Akademik Milli Dram Teatrının aktyor heyətinə qəbul edilib. 1941-ci ildə təhsilini başa vurduğu günlərdə müharibəyə gedib və doğma teatra 1946-cı ildə qayıdıb.

Qısa müddətdə Həsənağa Salayev teatrın repertuarında yer tutan və təzə hazırlanan tamaşalarında maraqlı rollar oynayıb. Müxtəlif illərdə Səməd Vurğunun "Xanlar" (Mamulya), "Fərhad və Şirin" (Fərhad), "Vaqif" (Eldar, Qacar və Vaqif), Zeynal Xəlilin "Qatır Məmməd" (Əziz), Ənvər Məmmədxanlının "Şərqin səhəri" (Mustafa), Vilyam Şekspirin "Otello" (Montano), "Antoni və Kleopatra" (Sezar), "Qış nağılı" (Florizel və Leont), Nazim Hikmətin "Türkiyədə" (Hüseyn Həlim), Mirzə İbrahimovun "Həyat" (Abbas), Mehdi Hüseynin "Cavanşir" (Qartal və Söhrab), "Alov" (Əmin Bəxtiyarov), Lope de Veqanın "Sevilya ulduzu" (Tavera), Şıxəli Qurbanovun "Sənsiz" (Fərhad), Süleyman Rüstəmin "Qaçaq Nəbi" (Vəli), Cəfər Cabbarlının "Solğun çiçəklər" (Bəhram), "Od gəlini" (Qorxmaz), "Almaz" (İbad), "Oqtay Eloğlu" (Oqtay), Pavel Malyarevskinin "Daş qartal" (Maksİm), Yuri Osnos və Vladimir Vinnikovun "Hind gözəli" (Çarudatta), Mirzə Fətəli Axundzadənin "Hacı Qara" (Heydər bəy), Bernard Şounun "Şeytanın şagirdi" (Riçard Daycen), Bəxtiyar Vahabzadənin "İkinci səs" (Rəşad), Nazim Hikmətin "Şöhrət və ya unudulan adam" (Doktor), Fridrix Şillerin "Orlean qızı" (Dünua), Hüseyn Cavidin "Səyavuş" (Keykavus) əsərlərinin tamaşalarında xarakterik səhnə surətləri yaradıb.

Aktyor eyni zamanda "Azərbaycanfilm" kinostudiyasının istehsal etdiyi "Fətəli xan", "Görüş", "O olmasın, bu olsun", "Onu bağışlamaq olarını?", "Koroğlu", "İstintaq davam edir" bədii və "Aygün" televiziya filmlərində Süleyman, Musa, Əzim Əzimzadə, Qüdrət, Eyvaz, Mayor Rüstəmov, Əmirxan rollarına çəkilib.

Həsənağa Salayev aktyorluq sənətində qazandığı qələbələrə görə 10 iyun 1959-cu ildə Azərbaycan Respublikasının əməkdar artisti, 1974-cü ildə isə xalq artisti fəxri adları ilə təltif edilib. Yaradıcılığının ən müdrik çağında, 54 yaşında Həsənağa Salayev qəfildən iflic xəstəliyinə düçar olub. Bir daha səhnəyə çıxmayan aktyor 2 oktyabr 1981-ci ildə dünyasını dəyişib. Həsənağa Salayev çılğın ehtirası, vüqarlı görünüşü, sərbəst səhnə davranışı, əzəmətli boybuxunu, tamaşada yöndaşlarına diqqəti ilə seçilirdi. Gurultulu və cingiltili səsini məharətlə tənzimləyən aktyor romantik rollarla realist personajları, mürəkkəb psixoloji dönüşlü dramatik obrazları eyni məharətlə oynaya bilirdi.

O, klassik və tərcümə əsərlərində ifa etdiyi obrazları çağdaş dövrün ictimai-sosial, mənəvi-əxlaqi problemləri ilə ustalıqla əlaqələndirirdi.

Həsənağa Salayev ruhən, emosiya coşğunluğu, səs diapazonu, ehtiraslarının çılğınlığı ilə romantik aktyor idi, ancaq lirik, dramatik və psixoloji rolları da məharətlə oynayıb.

Teatr səhnəsində rolları[redaktə | əsas redaktə]

Tavera (Sevilya ulduzu, Lope de Veqa)

Fərhad (Fərhad və Şirin, S.Vurğun)

Sezar (Antoni və Kleopatra, V.Şekspir)

Oqtay (Oqtay eloğlu, C.Cabbarlı)

Doktor (Unudulan adam, N.Hikmət)

Filmoqrafiya[redaktə | əsas redaktə]

  1. Aygün (film, 1960)
  2. Cazibə qüvvəsi (film, 1964)(film, kinoalmanax)
  3. Doğma xalqıma (film, 1954)
  4. Fətəli xan (film, 1947)
  5. Görüş (film, 1955)
  6. İstintaq davam edir (film, 1966)
  7. Körpə (film, 1962)
  8. Qara daşlar (film, 1956)
  9. O olmasın, bu olsun (film, 1956)
  10. Onu bağışlamaq olarmı? (film, 1959)
  11. Onun böyük ürəyi (film, 1958)
  12. Səhər (film, 1960)
  13. Üzeyir ömrü (film, 1981)

İstinadlar[redaktə | əsas redaktə]

  1. Abbaslı, T. “Nə bağırırsan, xalq?!”: Varındır - ver, yoxundur - sus, öl!..”: [Xalq artisti Həsənağa Salayevin yaradıcılığı haqqında] //Mədəniyyət.- 2014.- 5 dekabr.- S.11.
  2. Ərşadoğlu A. Romantizm səhnəsinin Həsənağa Salayevi: [Teatr və kino aktyoru haqqında] //Yeni mədəni-maarif jurnalı.- 2008.- № 8.- S. 21-24.

Mənbə[redaktə | əsas redaktə]

  • Azərbaycan Respublikası Mədəniyyət Nazirliyi. C.Cabbarlı adına "Azərbaycanfilm" kinostudiyası. Aydın Kazımzadə. Bizim "Azərbaycanfilm". 1923-2003-cü illər. Bakı: Mütərcim, 2004.- səh. 53.

Xarici keçidlər[redaktə | əsas redaktə]