Ləki–Qəbələ dəmiryol xətti

Ləki–Qəbələ dəmiryol xətti

Ləki-Qəbələ dəmiryolu — Ləki ilə Qəbələ arasında 2018–2021-ci illər ərzində salınmış bir xətli dəmiryol. Dəmiryol sərnişin daşımada istifadə olunur.

Tarixi

Qəbələnin turizm əhəmiyyətinin artması səbəbindən şəhərə gedişi asanlaşdırmaq məqsədilə Bakı–Tbilisi dəmiryolunun Ləki stansiyasına bitişəcək xəttin tikinti işlərinə 2018-ci ildə başlanılır. Dəmir yolunun iki məntəqə arasında bir başa uzunluğu 42,3 km, yan yollarla birlikdə isə 44,5 km təşkil edir. Dəmiryolun bir hissəsi çətin relyef ərazisindən keçdiyindən ümumilikdə 122 süni mühəndis qurğusunu inşa edilmişdir. Xəttboyu Ağdaş dəmiryol dayanacağı, Qəbələ Dəmiryol Vağzalı və stansiyası, Qəbələ dartı yarımstansiyası tikilmiş, həmçinin Hacıalı yarımstansiyasıda təmir işləri yerinə yetirilmişdir. 2021-ci il mayın 15-də Ləki-Qəbələ birxətli dəmiryolun və Qəbələ Dəmir Yolu Vağzalının açılışı olub. Bu xətt Qəbələdən paytaxta və digər yerlərə gedən sakinlərin rahat və təhlükəsiz şəkildə mənzil başına çatmasına imkan verir.

Həmçinin bax

• Qəbələ Dəmir Yolu Vağzalı
• “Azərbaycan Dəmir Yolları” Qapalı Səhmdar Cəmiyyəti