Lipetsk Dövlət Texniki Universiteti

Lipetsk Dövlət Texniki Universiteti
52°36′06″ şm. e. 39°30′16″ ş. u.
Əsası qoyulub	1956
Tip	dövlət universiteti
Ölkə	Rusiya
Ünvan	Rusiya, Lipetsk şəhəri
Sayt	stu.lipetsk.ru
Vikianbarda əlaqəli mediafayllar

Lipetsk Dövlət Texniki Universiteti (rus. Федеральное государственное бюджетное образовательное учреждение высшего профессионального образования «Липецкий государственный технический университет» (ФГБОУ ВПО «ЛГТУ»)) — Rusiyada universitet; Rusiyanın texniki sahə üzrə ixtisaslaşan nüfuzlu ali təhsil müəssisələrindən biri.

Tarixi və fəaliyyəti

Emblemi

Lipetsk Dövlət Texniki Universitetinin əsası Tula Mexanika İnstitutunun axşam fakultəsi kimi 1956-cı ildə qoyulub. Həmin dövrdə Lipetsk ərazisində ilk və tək texniki ali məktəb idi. Fakültədə ilk vaxtlar iki ixtisas mövcud idi: maşınqayırma, metalkəsən dəzgahlar və alətlər texnologiyası; maşınlar və tökmə istehsalı texnologiyası.

Sonradan fakültənin əsasında ali riyaziyyat, fizika və kimya kafedraları təşkil edilmişdi.

1973-cü ildə Lipetsk Politexnik İnstitutu kimi fəaliyyət başlayır. Tədris laboratoriya bazasının yaradılması, tədris prosesinin metodik və proqram təminatı üzrə işlər aparılır. 1994-cü ildə institut dövlət texniki universiteti statusunu alır. 2009-cu ildə R İSO 9001-2008 dövlət standartının tələbləri üzrə təhsil fəaliyyətinə uyğun olaraq keyfiyyətli idarəetmə sistemi sertifikatına layiq görülür.

Hazırda Lipetsk Dövlət Texniki Universiteti beynəlxalq, ümumrusiya, regional müsabiqələrin, konfransların təşkilatçısı və iştirakçısı qismində çıxış edir. Universitetin alimləri müxtəlif istiqamətlər, xüsusilə də informasiya texnologiyaları üzrə elmi araşdırmalar aparırlar. Universitetin fəaliyyətinin əsasında təhsilin proqressiv metodlarından istifadə, aparıcı yerli ali məktəblərin təcrübəsi, qabaqcıl elm və texnologiya nailiyyətləri dayanır. Maarifləndirici proses geniş profilli mütəxəssislərinin hazırlığına yönəldilib.

Fəaliyyətinin prioritet istiqamətləri

Son zamanlar ali təhsil sistemi idarə etməsində ölkənin ictimai-iqtisadi sferasında dəyişikliklərlə bağlı əhəmiyyətli dəyişikliklər olub. Bu dəyişikliklər təhsil müəssisələrinin fəaliyyətinin prioritetlərini müəyyən edir. Bu prioritetlər sırasında İKT-nin tədris prosesində tətbiqi xüsusi önəm kəsb edir.

Beynəlxalq əməkdaşlıq Lipetsk Dövlət Texniki Universitetinin prioritet fəaliyyət istiqamətlərindən biridir və keyfiyyətli təhsil təmin olunmasında və beynəlxalq standartlara uyğunlaşdırılmasında mühüm rol oynayır.

Universitetin əsas fəaliyyət istiqamətlərindən birinə sosial sfera daxildir: ali məktəbdə yataqxanalar, idman kompleksləri, yeməkxanalar, hovuzlar inşa olunur. İctimai təşkilatlar, Tələbə Həmkarlar İttifaqı Komitəsi, universitet muzeyi uğurla fəaliyyət göstərir, ali məktəbin qəzeti çıxarılır. Tələbə klubu tərkibində son illərdə 6 yaradıcılıq kollektivi yaradılıb. Tələbə klubunun nəzdində kino və konsert zalı, məşq yerləri mövcuddur.

Bütün bunlar Lipetsk Dövlət Texniki Universitetinin missiyalarını və əsas məqsədlərini nəzərə alaraq hazırlanmış strateji inkişaf proqramının əsasını təşkil edir.

Tədris sistemi

Hazırda Lipetsk Dövlət Texniki Universitetində avtomatlaşdırma və informatika, fizika texnologiya, nəqliyyat mühəndisliyi, inşaat mühəndisliyi, iqtisadiyyat, humanitar-sosial, əyani-qiyabi və qiyabi bölmə fakültələri, metallurgiya, maşınqayırma institutları fəaliyyət göstərir.

Avtomatlaşdırma və informatika fakültəsində avtomatlaşdırılmış idarəetmə sistemləri, informatika, tətbiqi riyaziyyat, elektrik avadanlıqları, elektrik ötürücüsü istiqamətləri üzrə tədris həyata keçirilir. 2012-ci ilin nəticələrinə görə avtomatlaşdırma və informatika fakültəsi universitet fakültələri reytinqində ilk yeri tutub.

Fizika texnologiya fakültəsində 15 nəfəri professor, 50 nəfəri dosent olmaqla 130 nəfərdən ibarət müəllim heyəti əsas pedaqoji və elmi fəaliyyəti həyata keçirirlər. Fakültə metallurgiya, materialşünaslıq və material texnologiyaları, biotexniki sistemlər və texnologiyalar və istilik texnikası və istilik energetikası, həmçinin metalşünaslıq və metalların termik emalı, metalların fizikası, sənaye istilik energetikası, tibbi-bioloji təcrübədə mühəndislik işi ixtisasları tədris olunur.

Nəqliyyat mühəndisliyi fakültəsi nəqliyyat kompleksi sahəsində bakalavrların, magistrlərin və mütəxəssislərin hazırlığını təşkil edir. Təlim əyani forma üzrə aparılır. Fakültə rəqabətə davamlı maşınların hazırlanması, yerüstü nəqliyyatın istismarı sahəsində idarə fəaliyyətinin təşkili və yol hərəkəti təhlükəsizliyinin təmin edilməsi sahələri üzrə peşəkar kadrları ilə tanınır.

İnşaat mühəndisliyi fakültəsində sənaye və mülki tikinti, tikinti materiallarının, məmulatların və konstruksiyaların istehsalı, şəhər tikintisi və təsərrüfat, istilik qaz təchizatı və ventilyasiya, binaların planlaşdırılması kafedraları yaradılıb. Fakültədə informasiya texnologiyalarının inşaat sahəsində tətbiqi məsələlərinin tədrisinə xüsusi önəm verilir.

İqtisadiyyat yüksək ixtisaslı iqtisadçıların və menecerlərin hazırlıq mərkəzidir. Abituriyentlər bu fakültədə idarəetmə, iqtisadiyyat, biznes-informatika, dövlət və bələdiyyə idarə etməsi, ticarət işi ixtisasları üzrə təhsil ala bilərlər.

Humanitar-sosial fakültədə personalı idarə etmə, sosiologiya, hüquq elmi, ictimaiyyətlə əlaqələr və reklam tədris proqramları təqdim olunur.

Maşınqayırma institutunda bu gün maşınqayırma texnologiyaları, maşınlar və metalların təzyiqlə emalı texnologiyaları, materialların dizayn və bədii emalı istiqamətləri tədris olunur.

Metallurgiya fakültəsinin yaradılmasında əsas məqsəd ali peşə təhsili proqramları üzrə metallurgiya və texniki mühəndislik profilinin yüksək ixtisaslı mütəxəssislərinin hazırlığından ibarətdir. Fakültənin tərkibində metallurgiya, kimya texnologiyası, texnologiya maşınları və avadanlıqlar, kimya, fundamental və tətbiqi kimya kafedraları fəaliyyət göstərir.

Elmi-tədqiqat fəaliyyəti

Ali təhsil müəssisəsində tədqiqat işlərinin aparılmasına böyük vəsait ayrılır. Elmi-tədqiqat işləri əsasən informasiya-kommunikasiya texnologiyaları (İKT), humanitar elmlər, mühəndislik, fizika, biotexnologiya, sosial elmlər, idarəetmə və iqtisadiyyat, materialşünaslıq və s. sahələr üzrə həyata keçirilir. İKT çərçivəsində tədqiqatlar yerli və beynəlxalq səviyyədə yerinə yetirilir. Sözügedən sahədə strategiya qabaqcıl yaradıcılıq axtarışları metodlarına uyğun olaraq təşkil edilib. İKT qrupunda informasiya və hesablama sistemlərinin nəzəriyyəsi, elektronika və telekommunikasiya və digər bölmələr fəaliyyət göstərir.

Kompüter İnnovasiyaları Mərkəzi

Universitetdə Kompüter İnnovasiyaları Mərkəzi yaradılıb. Mərkəz yeni informasiya texnologiyalarının tətbiqi, proqram təminatına dəstəyi, tədris və inzibati-idarəetmə proseslərinə innovasiya hesablama texnikasının tətbiqi, telekommunikasiya sistemləri tərəfindən universitetin təminatı, laboratoriya praktikumunun kompüterləşdirməsini həyata keçirir.

Mənbə

• Cahangir Atakişiyev. "Rabitə dünyası" qəzeti.  (az.)