Menyer xəstəliyi

Vikipediya, açıq ensiklopediya
Jump to navigation Jump to search

Padalekmiksiya (Menyer sindromu) — daxili qulaqda yaranan və daxili qulaq boşluğunda maye (endolimfa) miqdarının artması ilə müşayiət olunan xəstəlik. Maye bədənin fəzada oriyentasiyasını və müvazinətin qorunmasını tənzimləyən hüceyrələrə təzyiq göstərir. Bu xəstəlik ilk dəfə fransız həkimi Prosper Menyer (1799-1862) tərəfindən araşdırılıb. Nadir xəstəliklər sırasına aid edilir və müxtəlif müəlliflərin qiymətləndirməsinə görə xəstələnənlərin sayı əhalinin hər 100 min nəfərinə 20-200 nəfər arasında dəyişir. Çox vaxt səhvən, qayıdan başgicəllənmə hallarında Menyer xəstəliyi diaqnozu qoyulur[1].

Xəstəliyin səbəbləri[redaktə | əsas redaktə]

Səbəblər tam öyrənilməsə də, çox vaxt aşağıdakı səbəblər göstərilir:

  • Damar xəstəlikləri;
  • Baş və qulaq travmaları;
  • Daxili qulağın iltihabi xəstəlikləri;
  • İnfeksion proseslər.

Xəstəliyin simptomları[redaktə | əsas redaktə]

  • Müntəzəm başgicəllənmə tutmaları;
  • Müvazinət pozulmaları (xəstə gəzə, dayana və otura bilmir);
  • Ürək bulanma, qusma;
  • Güclü tərləmə;
  • Arterial təzyiqin düşməsi, nadir hallarda qalxması, dəri örtüyünün solğunlaşması;
  • Qulaqlarda küy;
  • Koordinasiya pozğunluğu.

Xəstəliyin gedişi[redaktə | əsas redaktə]

Labirint disfunksiyası: sağ, sol və d.

Adətən Menyer xəstəliyinin gedişini əvvəlcədən proqnozlaşdırmaq mümkün deyil. Belə ki, xəstəliyin simptomları arta, yaxud nisbətən azala və ya dəyişməz qala bilər.

Menyer xəstəliyindən əziyyət çəkənlərdə vaxt keçdikcə başqa əlamətlər də ortaya çıxa bilər. Başgicəllənmə tutmaları müntəzəm olaraq ağırlaşa və arta bilər ki, nəticədə xəstə əmək qabiliyyətini itirir, avtomobili normal sürə və başqa fiziki işlə məşğul ola bilmir. Xəstələr məcburən evdə oturmalı olurlar. Eşitmə pozğunluğu daimi hal alır, bəzi xəstələrdə zədələnmiş qulaqda karlıq yarana bilir. Tinnitus əlamətləri də vaxt keçdikcə arta bilir. Həmçinin, patoloji prosesin bir qulaqdan digərinə keçməsi də mümkündür ki, bu halda tam karlıq da yarana bilər.

Xəstəliyin müalicəsi[redaktə | əsas redaktə]

Menyer xəstəliyinin tam müalicəsi mümkün olmasa da, müalicə ilə xəstəliyin əlamətlərini yüngülləşirmək və tezliyini azaltmaq mümkündür. Xəstəliyin ağırlaşma hallarında dərman müalicəsi qəfil başgicəllənmə təzahürlərini aradan qaldırmaqla ürəkbulanmaqusmanı dayandırır.

Təəssüf ki, xəstəliyin müalicəsi eşitmə dərəcəsinin müntəzəm azalmasını aradan qaldırmır.

Müalicə, əsasən tutmaların azalmasına və onların ağırlıq dərəcəsinin azalmasına yönəlməklə, aşağıdakıları da əhatə edir:

  • Daxili qulaqda artıq maye (endolimfa) toplanmasının qarşısını almaq üçün sidikqovucu (diuretik) vasitələrin istifadəsi.
  • Alkoqol və tütün məhsullarının, kofein tərkibli ərzaqların istifadəsini məhdudlaşdırmaq, həmçinin tutmalara səbəb olan stress və gərgin situasiyalardan uzaq olmaq. 
  • Daxili qulağı sakitləşdirmək üçün vestibulyar aparatı sakitləşdirən preparatların (antihistamin və ya sedativ) qəbulu.
  • Daxili qulaqda maye miqdarını azaltmaq üçün duzdan istifadəni azaltmaq.

Xəstəliyin profilaktikası[redaktə | əsas redaktə]

Bir çox hallarda Menyer xəstəliyinin profilaktikası mümkün deyil. Lakin bəzi hallarda Menyer xəstəliyi kəllə-beyin travmasının nəticəsi olduğuna görə, velosiped və motosikletlə hərəkət edərkən, idmanla məşğul olarkən şlem taxmaq məsləhət görülür.

İstinadlar[redaktə | əsas redaktə]

Xarici keçidlər[redaktə | əsas redaktə]