Miatsum

Azərbaycan torpaqları hesabına “birləşmiş” erməni dövlətinin yaradılması ideyası. Bu ideyanı ortaya atan erməni millətçiləri buna Miatsum (ermənicə birləşmə) adı vermişdilər.

Miatsum ideyasına əsasən Qarabağ Ermənistana birləşdirilməli, Ermənistan və Qarabağda yaşayan azərbaycanlılar isə öz ata baba torpaqlarından qovulmalı idilər.

Yenidənqurma (Perestroyka) dövründə bu ideya erməni cəmiyyətində özünə geniş dəstək tapır, erməni cəmiyyətinin böyük hissəsi bu təcavüzkar ideyanın tərəfdarına çevrilir.

Bu ideyanın dalınca düşən erməni millətçilərinin fəaliyyəti nəticəsində hər iki tərəfdən on minlərlə insan həlak olmuş və ömürlük şikəst qalmışdır.

Azərbaycan Respublikasının 20 faiz ərazisi işğal olunmuş, bir milyona yaxın vətəndaşı qaçqın düşmüşdür. Bu gün erməni hakim dairələri törətdikləri cinayətə hüquqi don geyindirmək qayəsindədirlər, onlar xalqların öz müqəddəratını təyin etmək prinsipini təhrif edib, bu prinsipi işğal olunmuş Azərbaycan torpaqlarına tətbiq etməyə çalışırlar.