Mirzə Fərzalı bəy Fətəlibəyov

Mirzə Fərzalı bəy Fətəlibəyov
Mirzə Fərzalı bəy Əli bəy oğlu Fətəlibəyov
Şəxsi məlumatlar
Doğum tarixi	1824
Doğum yeri	Ətyeməzli, Ağdam
Vəfat tarixi	9 may 1887
Vəfat yeri	Şuşa, Şuşa qəzası, Yelizavetpol quberniyası, Rusiya imperiyası
Həyat yoldaşı	Səlbinaz xanım Əsəd bəy qızı
Uşaqları	Ağalar bəy, Mahtəban xanım, Balaxanım xanım, Əziz xanım

Mirzə Fərzalı bəy Fətəlibəyov (1824-1887) — məmur, çar ordusunun zabiti, Tiflis Aleksandr Müəllimlər institutunun məzunu.

Həyatı

Mirzə Fərzalı bəy Əli bəy oğlu 1824-cü ildə Otuziki mahalının Ətyeməzli obasında (indiki Ağdamın Ətyeməzli kəndi) anadan olmuşdu. Ibtidai təhsilini molla yanında almışdı. Sonra mükəmməl mədrəsə təhsili görmüşdü. Savadlı olduğundan dolayı mirzə ünvanı daşıyırdı.

Mirzə Fərzalı bəy Şuşa Qəza məktəbində oxumuşdu. Burada o, türk, rus və fars dillərini öyrənmişdi. Sonra Tiflis Aleksandr Müəllimlər Institutunu bitirmişdi. Mirzə Fərzalı bəy 19 may 1843-cü ildə II dərəcəli dəftərxana xidmətçisi kimi Şuşa qəza polis şöbəsində xidmətə başlamışdı. 10 noyabr 1848-ci ildə könüllü kimi Qafqaz Atlı alayında xidmət etmişdi. 1849-cu ildə Macarıstan və Transilvaniya qiyamının yatırılmasının iştirakçısı olmuşdu. 1851-ci ildə vəkil rütbəsi almışdı. 1853-1856-cı illər Rusiya-Osmanlı savaşına qatılmışdı. Naib rütbəsinə yüksəlmişdi.

Yalta şəhərində teleqraf işçisi olmuşdu.

Mirzə Fərzalı bəy 1855-ci ildən praporşik rütbəsini daşıyırdı. Mirzə Fərzalı bəy bir çox döyüş medalları ilə təltif edilmişdi.

Mirzə Fərzalı bəy 9 may 1887-ci ildə öldürülmüşdü.

Ailəsi

Mirzə Fərzalı bəy Səlbinaz xanım Əsəd bəy qızı (1840-1900) ailə qurmuşdu. Ağalar bəy adlı oğlu, Mahtəban xanım, Balaxanım xanım, Əziz xanım adlı qızları vardı.

Mənbə

• Ənvər Çingizoğlu, Surxay Əlibəyov, Qəlbin harayı (Ətyeməzli obası). Bakı, 2009, səh.53-54.