Rizvan Piriyev

Rizvan Piriyev
Rizvan Piriyev
	Rizvan Xanəmi oğlu Piriyev
Doğum tarixi	10 aprel 1924
Doğum yeri	Sulut, Şamaxı qəzası, Azərbaycan SSR, ZSFSR, SSRİ;
Vəfat tarixi	1 iyul 1989 (65 yaşında)
Vəfat yeri	Bakı, Azərbaycan SSR, SSRİ;
Vətəndaşlığı	SSRİ
Elm sahələri	geodeziya, kartoqrafiya
Elmi dərəcəsi	coğrafiya elmləri doktoru (1969);
Elmi adı	professor (1972);
İş yeri	Bakı Dövlət Universiteti;
Təhsili	Bakı Dövlət Universitetinin Coğrafiya fakültəsi;
Mükafatları

Rizvan Xanəmi oğlu Piriyev (10 aprel 1924, Sulut, Şamaxı qəzası – 1 iyul 1989, Bakı) — Azərbaycan coğrafiyaşünası, kartoqraf, coğrafiya elmləri doktoru (1969), professor (1972).^[1]

Həyatı

Rizvan Piriyev 1924-cü ildə Şamaxı rayonunun Sulut kəndində anadan olub.^[1]^[2] 1941-ci ildə Şamaxı Pedaqoji Texnikumunu əla qiymətlərlə bitirib. 1942-ci ildə ordu sıralarına çağırılıb və Leninqrad cəbhəsində döyüşüb. 1944-cü ildə şikəst olaraq ordu sıralarından tərxis edilib. Böyük Vətən müharibəsindəki xidmətlərinə görə III dərəcəli "Şöhrət ordeni", beş medal və Leninqradın müdafiəsi ilə əlaqədar iki döş nişanı ilə təltif edilib.^[1]

1946-cı ildə Azərbaycan Dövlət Universitetinin geologiya-coğrafiya fakültəsinin coğrafiya şöbəsinə daxil olub və 1951-ci ildə fakültəni fiziki coğrafiya ixtisası üzrə fərqlənmə diplomu ilə bitirib. 1954-cü ildən fiziki-coğrafiya kafedrasında geodeziya və kartoqrafiya fənlərindən mühazirə və məşğələ dərsləri aparmağa başlayıb. 1958-ci ildə "Şimal-Şərqi Azərbaycan çaylarının morfometrik xarakteristikası" mövzusunda namizədlik, 1969-cu ildə isə "Azərbaycan Respublikası relyefinin morfometrik təhlili" mövzusunda doktorluq dissertasiyası müdafiə edib. 1972-ci ildə professor adına layiq görülüb. 1967-1971-ci illərdə BDU-nun Coğrafiya fakültəsinin dekanı, 1972-1988-ci illərdə geodeziya və kartoqrafiya kafedrasının müdiri vəzifəsində işləyib. AMEA Coğrafiya İnstitutunun müdafiə şurasının üzvü olub. 100-ə qədər məqalənin, elmi əsərin, dərslik və monoqrafiyanın müəllifidir. Universitetlərin coğrafiya fakültələri üçün ilk və dəyərli "Kartoqrafiya" (1975), "Geodeziyanın əsasları və topoqrafiya" (1994) dərsliklərini yazıb. Onun rəhbərliyi ilə 10 nəfər namizədlik dissertasiyası müdafiə edib.^[1]

Piriyev Rizvan Xanəmi oğlu 1989-cu il iyul ayının 1-də həyatının 66-cı ilində vəfat etmişdir.^[2]

Kitabları

Kartoqrafiya (universitet tələbələri üçün dərslik). Bakı: Azərtədrisnəşr, 1964.
Kartoqrafiya (ali məktəblər üçün dərslik). Bakı: Maarif, 1975.
Məktəb coğrafiya kursunda kartoqrafik biliklərin əsasları. Bakı: Maarif, 1981.
Geodeziyanın əsasları və topoqrafiya. Bakı: Bakı Universiteti, 1994.
Kartoqrafiya (ali məktəblər üçün dərslik). Bakı: Mütərcim, 2015.

İstinadlar

1 2 3 4 Azərbaycanın coğrafiyaçı alimləri. Bakı: Elm. 2013. 75–76. 20 aprel 2025 tarixində arxivləşdirilib. İstifadə tarixi: 15 avqust 2025.
1 2 Hüseynov, Miryavər. "Yüksəliş yolu: Rizvan Xanəmi oğlu Piriyev". İsmayıllı xəbərləri. 15 aprel 2015. İstifadə tarixi: 15 avqust 2025.

Mənbə

A. M. Məhərrəmov. Çətin və şərəfli ömür // Professor R. X. Piriyevin anadan olmasının 90 illiyinə həsr olunmuş "Müasir coğrafiya elminin tətbiqi istiqamətləri" mövzusunda elmi-praktik konfransın materialları. Bakı. 2014.
Piriyev Rizvan Xanəmi oğlu // Şamaxı ensiklopediyası Arxivləşdirilib 2016-08-03 at the Wayback Machine

[:0-1] 1 2 3 4 Azərbaycanın coğrafiyaçı alimləri. Bakı: Elm. 2013. 75–76. 20 aprel 2025 tarixində arxivləşdirilib. İstifadə tarixi: 15 avqust 2025.

[:1-2] 1 2 Hüseynov, Miryavər. "Yüksəliş yolu: Rizvan Xanəmi oğlu Piriyev". İsmayıllı xəbərləri. 15 aprel 2015. İstifadə tarixi: 15 avqust 2025.

[1]

[2]