Seymur Sərxoşov

Seymur Sərxoşov
Seymur Ramiz oğlu Sərxoşov
Şəxsi məlumatlar
Doğum tarixi	28 yanvar 1987
Doğum yeri	Qızıldaş, Bakı
Vəfat tarixi	14 oktyabr 2020 (33 yaşında)
Vəfat yeri	Qubadlı rayonu
Vəfat səbəbi	Şəhid
Dəfn yeri	Qızıldaş
Vətəndaşlığı	SSRİ→ Azərbaycan
Hərbi fəaliyyəti
Mənsubiyyəti	A.R. Silahlı Qüvvələri
Qoşun növü	Quru qoşunları
Xidmət illəri	2008-2009, 2020
Rütbə	Əsgər
Döyüşlər	İkinci Qarabağ müharibəsi
Təltifləri

Seymur Sərxoşov (tam adı: Seymur Ramiz oğlu Sərxoşov; 28 yanvar 1987, Qızıldaş – 14 oktyabr 2020, Qubadlı rayonu) — Azərbaycan Respublikasının Şəhidi.

Həyatı

Erkən illəri

Seymur Sərxoşov 1987-ci il yanvarın 28-də Bakı şəhəri, Qaradağ rayonu, Qızıldaş qəsəbəsində dünyaya göz açmışdır. İbtidai təhsilinə 1993-cü ildə şəhid Azər Namazovun adını daşıyan 180 saylı orta məktəbdə başlamışdır.

Yeniyetmə illəri

2004-cü ildə orta məktəbi bitirdikdən sonra "Nəqliyyat servisi (avtomobil nəqliyyatı üzrə)" ixtisası üzrə Azərbaycan Texniki Universitetinə qəbul olunmuşdur. Ali təhsilini başa vuran Seymur 2008-ci ildə hərbi xidmətə yollanmışdır. Qazax rayonunda xidmət etmişdir. İxtisasca sürücü olmuşdur. 2009-cu ildə hərbi xidmətdən qayıtdıqdan sonra ixtisası üzrə nəqliyyat sahəsində çalışmağa başlamışdır.

Şəhadəti

Azərbaycan 2020-ci il 27 sentyabr tarixində ərazi bütövlüyünü bərpa etmək üçün düşmən təxribatlarına cavab olaraq vətəni müdafiəyə başladı. Döyüşlər başlayar-başlamaz Seymur da vətənin dar günündə ona dayaq olmaq üçün ordu sıralarına qayıtdı. Döyüşlərə qatıldığı gündən daima ön cəhbədə şücaətlə xidmət etdi. Füzulidə könüllü hərbi batalyona qoşulan Seymur 14 oktyabra qədər Qubadlı rayonuna qədər gəlib çıxa bilmişdi. Elə həmin gün Qubadlının işğaldan azad olunması uğrunda gedən döyüşlərdə mənfur düşmənin ağır artilleriyadan açdığı mərmi atəşi nəticəsində Seymur qəhrəmancasına şəhid oldu. Şəhidimizin nəşi oktyabrın 18-də valideynləri ilə birgə yaşadığı Qızıldaş qəsəbəsinə gətirildi. Seymurun cənazəsi döyüşə yollandığı qəsəbədə böyük izdihamla qarşılandı. Şəhid növbəti gün, 19 oktyabr yaşadığı Qızıldaş qəsəbəsi Şəhidliyində rayon rəhbərliyinin iştirakı ilə təntənəli surətdə torpağa tapşırıldı. Vida mərasimində Milli Məclisin deputatı, YAP Qaradağ rayon təşkilatının sədri Aydın Hüseynov, Qaradağ rayon İcra Hakimiyyətinin başçısı Süleyman Mikayılov, VHP Mərkəzi İcra Aparatının rəhbəri Samir Əsədli, Qızıldaş bələdiyyəsinin sədri İdris Alışanov, sədr müavini Fərid Tağıyev iştirak edib.

Şəxsi həyatı

Subay idi.

Dövlət təltifləri

• • (15.12.2020) — "Vətən uğrunda" medalı — Azərbaycan Respublikasının Prezidentinin Sərəncamı ilə təltif olunmuşdur.
  • (25.12.2020) — "Xocavəndin azad olunmasına görə" medalı — Azərbaycan Respublikasının Prezidentinin Sərəncamı ilə təltif olunmuşdur.

Həmçinin bax

• Qızıldaş qəsəbəsi