Tamamura Kozaburo

Vikipediya, azad ensiklopediya
Naviqasiyaya keç Axtarışa keç
Tamamura Kozaburo
yap. 玉村康三郎
Doğum tarixi 1856[1][2][…]
Doğum yeri
Vəfat tarixi 1923[3]
Fəaliyyəti fotoqraf
Vikianbarın loqosu Vikianbarda əlaqəli mediafayllar

Tamamura Kozaburo (玉村 康三郎?, 1856[1][2][…], Edo[d] – 1923[3]) – Yaponiya fotoqrafı. 1890-cı illərdə Yokohamanın ən uğurlu kommersiya fotoqraflarından biri olmuşdur.

İlk illəri

[redaktə | mənbəni redaktə et]

Tamamura Kozaburo 1856-cı ildə Edo şəhərində doğulmuşdur. Nikko şəhərində yerləşən Rinno məbədinə rəhbərlik edən klana xidmət edən ailənin ən böyük övladı idi.[4]

Fotoqrafiya

[redaktə | mənbəni redaktə et]

Tamamura 1867-ci ildə Edonun Asakusa rayonunda məskunlaşmış fotoqraf Kanamura Qenzonun şagirdi olmuşdur.[4] 1874-cü ildə ondan ayrılıb Asakusanın Okuyama bölgəsində ilk fotostudiyasını açmışdır. 1883-cü ildə Yokohamanın Bentendori küçəsində yeni fotostudiya açmışdır. 1899-cu ildə Kobe şəhərinin Motomaçi küçəsində fotostudiyanın filialı açılmışdır.[5] Onun fotostudiyası 1909-cu ildə Yaponiyada ən çox vergi ödəyən fotostudiya idi.[4]

Tamamuranın müştərilərinin çoxunu Yaponiyaya gələn əcnəbilər və turistlər təşkil etmişdir. O, həmin dövrün ən uğurlu kommersiya fotoqraflarından biri olmuşdur. Yokohamadakı əsas rəqibləri Adolfo Farsari və Kusakabe Kimbey kimi o da əcnəbilər üçün peyzaj və kostyum fotolarından ibarət suvenir albomları satmaqla məşğul olmuşdur, xaricə fənər slaydları göndərmişdir. O, albomların üzlüklərini Fuci dağı, cinrikişa, geyşa kimi motivlərlə bəzədirdi. Bahalı sifarişlər üçün fil dişi, qızıl vərəq, mirvari kimi materiallardan istifadə etmişdir.[5] 1882-ci ildə bir Yaponiya çay şirkətinin sifarişi ilə Yaponiyanın çayçılıq sənayesini əks etdirən fotolar seriyası hazırlamışdır. İşi uğurlu olduğu üçün ipəkçilik sənayesi üçün də bənzər fotolar seriyası çəkmişdir. Onun məşhur fotolar seriyasından biri "Nikko məbədinin interyeri" adlanır. Tamamura Çikaqo və Kembric universitetlərindən sifarişlər qəbul etmiş, xaricə səyahət edərək fotoqrafiya tapşırıqları yerinə yetirmişdir. O, xarici və milli sərgilərdə mükafatlar qazanmışdır.[6] 1906-cı ildə Amerika Dostluq Assosiasiyasının sifarişi ilə Kurihamada Metyu Perriyə həsr olunmuş daş memorialın fotolarını çəkmişdir. Bu fotoların bəziləri İmperator Meyciyə təqdim olunmuşdur.[7]

1896-cı ildə Frensis Brinklinin "Yaponiya: Yaponlar tərəfindən təsvir olunmuş və illüstrasiya olunmuş" əsəri üçün Bostonun "J. B. Millet" nəşriyyatı üçün 40.000-dən çox foto göndərmişdir. Bu, 1 milyon fotodan ibarət sifarişin ilk hissəsini təşkil edirdi. Tamamura sifarişi çatdırmaq üçün bir neçə ay ərzində 350 köməkçisi ilə birlikdə işləmişdir.[8] Tamamura 1916-cı ildə fotoqrafiya biznesini oğlu Kiheyə ötürmüşdür. Onların fotostudiyası 1925-ci ilə qədər fəaliyyət göstərmişdir. 1923-cü ildə baş vermiş Böyük Kanto zəlzələsi fotostudiyasının bağlanmasına səbəb kimi göstərilir.[5]

Qalereya

[redaktə | mənbəni redaktə et]
Tamamura Kozaburonun işləri

İstinadlar

[redaktə | mənbəni redaktə et]
  1. ↑ 1 2 RKDartists (nid.).
  2. ↑ 1 2 Tamamura KOZABURO // National Gallery of Victoria. 1861.
  3. ↑ 1 2 Tamamura Kozaburo // (unspecified title).
  4. ↑ 1 2 3 Bennett, 2006. səh. 198
  5. ↑ 1 2 3 Bennett, 2006. səh. 199
  6. ↑ Bennett, 2006. səh. 200
  7. ↑ Bennet, 1996. səh. 54
  8. ↑ Bennett, 2006. səh. 202

Ədəbiyyat

[redaktə | mənbəni redaktə et]
  • Bennett, Terry. Photography in Japan: 1853–1912 (ingiliscə). Tuttle Publishing. 2006. 198–202. ISBN 0-8048-3633-7. İstifadə tarixi: 10 dekabr 2024.
  • Bennett, Terry. Early Japanese Images (ingiliscə). Kodansha International. 1996. 51–52. ISBN 9780804820332. İstifadə tarixi: 10 dekabr 2024.
Mənbə — "https://az.wikipedia.org/w/index.php?title=Tamamura_Kozaburo&oldid=7888324"