Vilayət Zahirov

Vilayət Zahirov
Azərbaycan Respublikasının ədliyyə nazirinin müavini
2004 – 9 sentyabr 2024
Nazir	Fikrət Məmmədov (2012–2024) Fərid Əhmədov (2024–)
Şəxsi məlumatlar
Doğum tarixi	2 yanvar 1958(1958-01-02) (66 yaş)
Doğum yeri	Yengicə, Noraşen rayonu, Naxçıvan MSSR, Azərbaycan SSR, SSRİ
Təltifləri

Vilayət Həsən oğlu Zahirov (2 yanvar 1958, Yengicə, Noraşen rayonu) — Azərbaycan Respublikası ədliyyə nazirinin sabiq müavini, II dərəcəli dövlət ədliyyə müşaviri.

Həyatı

Vilayət Zahirov 1958-ci ildə Naxçıvan Muxtar Respublikasının Şərur rayonunda anadan olmuşdur.

O, 1984-cü ildə Bakı Dövlət Universitetinin hüquq fakültəsini bitirmişdir. Universiteti bitirdikdən sonra prokurorluq orqanlarına işə qəbul olunaraq Bakı şəhər prokurorluğunda böyük müstəntiq vəzifəsi üzrə stajor olmuş, Şəki rayon prokurorluğunun böyük müstəntiqi, respublika Baş prokuroru yanında, sonradan respublika prokurorluğu İstintaq idarəsində xüsusilə mühüm işlər üzrə müstəntiq vəzifələrində işləmişdir.

1995–2004-cü illərdə V. Zahirov Şəki rayon və Gəncə şəhər prokuroru vəzifələrində çalışmışdır. 2004-cü ilin iyun ayında Azərbaycan Respublikası ədliyyə nazirinin müavini təyin edilmişdir.

II dərəcəli dövlət ədliyyə müşaviri ali xüsusi rütbəsindədir.

Azərbaycan Respulikasının Konstitusiya dövlət quruluşunun qorunmasında, xüsusi təhlükəli dövləti cinayətlər üzrə istintaqın aparılmasında, qanunçuluğun və hüquq qaydasının möhkəmləndirilməsi sahəsində xidmətlərinə görə Azərbaycan Respublikası Prezidentinin 26 dekabr 1995-ci il tarixli Fərmanı ilə "İgidliyə görə" medal ilə, ədliyyə orqanlarında qulluq keçərkən fərqləndiyinə və cəza-icra siyasətinin həyata keçirilməsində fəal iştirakına görə respublika Prezidentinin 21 noyabr 2008-ci il tarixli Sərəncamı ilə 3-cü dərəcəli "Vətənə xidmətə görə" ordeni, 20 noyabr 2015-ci il tarixli Sərəncamı ilə 2-ci dərəcəli "Vətənə xidmətə görə" ordeni ilə təltif edilmişdir.

Hüquq mühafizə orqanlarında uzunmüddətli səmərəli fəaliyyətinə, ədliyyə sisteminin inkişafına layiqli töhfələr verərək qulluqda xüsusi fərqləndiyinə görə "Ədliyyə sahəsində fərqlənməyə görə" Azərbaycan Respublikasının medalı və bir sıra digər medallarla təltif edilmişdir.

Azərbaycan Respublikası Prezidentinin 20 noyabr 2018-ci il tarixli Sərəncamı ilə Azərbaycan Respublikasının "Əməkdar hüquqşunası" fəxri adına layiq görülmüşdür.

Azərbaycan Respublikası Ədliyyə Nazirliyi üzrə 22 noyabr 2021-ci il tarixli əmrlə "Fəxri ədliyyə işçisi" adı verilmişdir. O, həmçinin, Azərbaycan Respublikası Prokurorluğunun Fəxri işçisidir.

Ədliyyə Nazirliyi Apellyasiya Şurasının sədridir.

Azərbaycan Respublikasının milli təhlükəsizlik siyasəti sahəsində, həmçinin, qanunvericilik hakimiyyəti ilə işin təşkili üzrə işçi qruplarının, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının, Azərbaycan Respublikasının hərbi əməliyyatlar nəticəsində işgal olunmuş və bununla əlaqədar zərər çəkmiş ərazilərinin bərpası və yenidən qurulması üzrə Dövlət Komissiyasının, Beynəlxalq Humanitar Yardım üzrə Respublika Komissiyasının, Səfərbərlik və dövlət ehtiyatlarının idarə edilməsinin təkmilləşdirilməsi haqqında, Mülki müdafiə planının hazırlanması üzrə və bir sıra digər komissiyaların üzvüdür.

O, 9 sentyabr 2024-cü ildə Ədliyyə nazirinin müavini vəzifəsindən azad edilmişdir.

O, həmçinin, Beynəlxalq Prokurorlar Assosiasiyasının üzvü, hüquqi mövzuda bir sıra məqalələrin müəllifidir.

Evlidir, 5 övladı var.