Altay Göyüşov

Altay Göyüşov
Altay Göyüşov Azad Fikir Universitetində mühazirə deyərkən.
Doğum tarixi	4 oktyabr 1965
Doğum yeri	Bakı, Azərbaycan SSR, SSRİ
Vətəndaşlığı	SSRİ→ Azərbaycan
Elm sahəsi	Tarix
Alma-mater	Bakı Dövlət Universiteti
Təhsili	Azərbaycan Dövlət Pedaqoji Universiteti
Vikianbarda əlaqəli mediafayllar

Altay Göyüşov (d. 4 oktyabr 1965) — Tarix elmləri namizədi; BDU-da Türk və Qafqaz xalqları tarixi kafedrasının dosenti.

Həyatı

1965-ci ildə Bakı şəhərində anadan olub. Azərbaycan arxeoloqu, tarix elmləri doktoru, professor Rəşid Göyüşovun oğludur.

1984—1986-cı illərdə Sovet ordusunda (Gürcüstan və Ukraynada) hərbi xidmətdə olmuşdur.

Təhsili, elmi dərəcə və elmi adları

1982—1989-cu illərdə V.İ.Lenin adına Azərbaycan Dövlət Pedaqoji İnstitutunun Tarix fakültəsinin tələbəsi olub.

1993-cü ildə "İttihadi-İslam firqəsinin yaranması və fəaliyyəti" mövzusunda namizədlik dissertasiyasını müdafiə edib. 1994-cü ildə AAK tərəfindən elmi dərəcəsi təsdiq olunub.

"1917—1920-ci illərdə Şimali Qafqaz dağlılarının azadlıq uğrunda mübarizəsi" adlı doktorluq dissertasiyası 2000-ci il (28 aprel 2000-ci il, protokol №7) və 2001-ci illərdə (26 aprel 2001-ci il tarixli №5 protokol) müzakirə edilərək müdafiə təqdim olunmuşdur.

Əmək fəaliyyəti

• 1984—1986 Sovet ordusunda (Gürcüstan və Ukraynada) hərbi xidmətdə olmuşdur.
• 1986—1989 Şirvanşahlar sarayı Dövlət Tarixi Qoruq Muzeyi.
• 1989-cu ildən hal-hazıra qədər Bakı Dövlət Universitetinin Tarix fakültəsində çalışır.
• 1994-cü ildən "Türk və Qafqaz xalqları tarixi kafedrası"nda baş laborant və saathesabı müəllim.
• 1995-cı ildən "Türk və Qafqaz xalqları tarixi kafedrası"nda müəllim
• 1996-cı ildən "Türk və Qafqaz xalqları tarixi kafedrası"nda baş müəllim
• 2001-ci ildən Türk və Qafqaz xalqları tarixi kafedrasının dosenti

Bakalavr və magistratura təhsil pillələrində dərslər aparır.

Fakültədə çalışdığı müddət ərzində Tarix fakültəsində "Türk xalqları tarixi" və "Türkiyə tarixi", Beynəlxalq münasibətlər, Coğrafiya, Filologiya fakültələrində "Türk xalqları tarixi" fənnindən dərs aparmışdır. O, həmçinin təhsilin magistratura pilləsində kurs aparır.

Hazırda Tarix fakültəsinin bakalavr təhsil pilləsində azərbaycan bölməsində "Türk xalqları tarixi" fənnini (müasir dövr); magistratura təhsil pilləsində "Türk dünyası" ixtisası üzrə "1917—1920-ci illərdə Rusiya imperiyası ərazisində yaşayan türk-müsəlman xalqlarının milli-azadlıq hərəkatı" mövzusunu; «Regionşünaslıq — Qafqazşünaslıq» ixtisası üzrə "Qafqaz xalqlarının azadlıq hərəkatında İslam amili" mövzusunu tədris edir. 2001—2004-cü illərdə A.R.Göyüşov Almaniyanın Boxum Universitetinin doktorantı Kristina Hanner Kreyserin elmi məsləhətçisi olmuşdur.

Həmin illərdə Boxum Universitetinin Şərqşünaslıq İnstitutu tərəfindən həyata keçirilən "SSRİ və MDB-də İslam maarifçiliyi tarixi" adlı proqramın Azərbaycan üzrə tədqiqat qrupunun rəhbəri, 2005—2007-ci illərdə Fransız Anadolu Araşdırmalar Mərkəzinin Azərbaycan üzrə tədqiqatçısı olmuşdur. 2007-ci ilin birinci yarısında Fransa Sosial Elmlər Məktəbinin dəvəti ilə Parisdə olmuş və burada mühazirələr oxumuşdur.

2007—2008-ci tədris ilində ABŞ Dövlət Departamentinin Fulbright proqramında iştirak üçün müsabiqədən keçmiş və Vaşinqton şəhərində Corctaun Universitinə dəvət olunmuşdur.

Həmin dövrdə Corctaun Universiteti ilə yanaşı Princeton Universitetində, həmçinin ABŞ Dövlət Departamentində mühazirələr oxumuşdur. Hal-hazırda (2008—2009-cu tədris ilində) Kaliforniya ştatının Los-Anceles Universitetinin (UCLA) dəvəti ilə ABŞ-a ezam olunmuşdur və burada "Qonaq Professor" vəzifəsində çalışaraq "Azərbaycan dili, ədəbiyyatı, tarixi" və həmçinin "Türk xalqlarının müasir dövr tarixi" fənlərindən mühazirələr oxuyur.

4 proqram, 1 metodik vəsait, 2 monoqrafiyanın müəllifidir.

Fransanın Milli Elmi Tədqiqatlar Mərkəzi (CNRS) və Fransa Xarici İşlər Nazirliyinin Parisdə ingilis dilində nəşr etdirdiyi "Mərkəzi Avrasiya Xrestomatiyası" adlı tənqidi biblioqrafiya və epistomologiya jurnalının Redaksiya Komitəsinin üzvüdür. Jurnalın baş redaktoru məşhur fransız alimi Stefan Dudoignondur.

Tədqiqat sahəsi

Türk və Şimali Qafqaz xalqları tarixinin yeni və müasir dövr tarixi, həmçinin Sosial-Siyasi İslam, İslam təhsili problemləri ilə bağlı tədqiqatlar aparır.

Beynəlxalq konfranslarda, simpoziumlarda, seminarlarda iştirakı

• Mart 2008 — Princeton Universiteti (ABŞ)
• Fevral 2008 — Corctaun Universiteti (ABŞ)
• Mart 2007 — Fransa Elmi Tədqiqatlar Milli Mərkəzi (Fransa)
• Fevral 2007 — Sosial Elmlər Məktəbi (Fransa)
• İyun 2006 — Fray Universiteti (Almaniya)
• Noyabr 2005 — Sosial Elmlər Məktəbi (Fransa)
• May 2004 — Qalatasaray Universiteti (Türkiyə)
• May 2004 — Boxum Universiteti (Almaniya)
• İyun-iyul 2003 — ABŞ Dövlət Departamentinin Beynəlxalq Qonaq Proqramında iştirak (Corctaun və Corciya Dövlət Universitetləri)
• İyun 1998 — Tehran Universteti (İran)

Seçilmiş əsərləri

• Sovet Azərbaycanında və Azərbaycan Respublikasında İslam təhsili — Sovet İttifaqında və onun varis dövlətlərində İslam təhsili. London, Routlec, 2009.
• Azərbaycanda İslam Dirçəlişi — İslam ideologiyasında müasir cərəyanlar. 7-ci cild. Hadson İnstitutu (Vaşinqton), 2008, s.66-82.
• Qafqaz İslam Ordusunun 1918-ci il əməliyyatları — Azərbaycan Demokratik Respublikası və Qafqaz İslam Ordusu. Bakı, Nurlar, 2008
• Sovetləşmədən əvvəl Azərbaycan intellektualları və İslam təhsili — Post-sovet dövründə Qafqazda din və siyasət. Paris, 2007.
• XX əsrin birinci rübündə Şimali Qafqaz dağlılarının azadlıq mübarizəsinin bəzi xüsusiyyətlərinin müqayisəli təhlili. Bakı Dövlət Universiteti Xəbərləri, №3, 2006
• XX əsrin əvvəllərində Şimali Qafqaz Dağlılarının siyasi həyatının bəzi xüsusiyyətləri — Tarix və onun problemləri, 2005, №4, s.32—47.
• Türk xalqları tarixi (qədim dövrlərdən müasir dövrə qədər). Tarix fakültəsində tədris edilmək üçün tərtib edilmiş Vahid proqram. Bakı, 2004. Həmmüəllif.
• Rusiyada monarxiyanın süqutundan SSRİ-nin yaranmasına qədər olan dövrdə türk-müsəlman xalqlarının milli-azadlıq mübarizəsi. Bakı, 2002. Metodik vəsait.

Kitablar

• Azərbaycanda ittihadçılıq. Bakı, İrşad, 1997.
• 1917—1920-ci illərdə Şimali Qafqaz Dağlılarının azadlıq uğrunda mübarizəsi. Bakı, Araz, 2000.

Dövlət və beynəlxaq qrantlar

• 2001—2004 — "SSRİ və MDB-də İslam təhsili" adlı beynəlxalq tədqiqat layihəsi. Volkswagen fondu. Boxum Universiteti
• 2003 — ABŞ — Dövlət Departamenti Beynəlxalq Qonaq Proqramı
• 2007—2008 — ABŞ Dövlət Departamenti Fulbright Proqramı
• 2007—2009 — Avrasiya Fondunun Demokratik Azərbaycanda İslam proqramı

Mənbə

• Bakı Dövlət Universitetinin Tarix fakültəsinin saytında Göyüşov Altay Rəşid oğlu

Xarici keçidlər

• Altay Göyüşovun Facebook profili
• Şəxsi bloqu