Azərbaycan Tələbə Gənclər Təşkilatları İttifaqı

Azərbaycan Tələbə Gənclər Təşkilatları İttifaqı
ATGTİ
Yaranma tarixi	20 noyabr 2009
Qeydiyyat tarixi	31 mart 2010
Rəsmi dili	Azərbaycan dili
Mərkəzi	Bakı
Sədri	Şahin İsmayılov
Rəsmi saytı	http://www.atgti.az/

Azərbaycan Tələbə Gənclər Təşkilatları İttifaqı (ATGTİ və ya İttifaq) (İngilis dili: Azerbaijan Student Youth Organizations' Union, ASYOU) Azərbaycanın 39 özəl və dövlət ali təhsil müəssisəsini özündə birləşdirən ən böyük tələbə təşkilatlarından biridir.

ATGTİ qeyri-kommersiya və qeyri hökümət təşkilatıdır. İttifaqın əsası noyabrın 20-si 2009-cu ildə qoyulmuşdur, 2010-cu ilin mart ayında isə Azərbaycan Respublikasının Ədliyyə Nazirliyində dövlət qeydiyyatına alınmışdır. İttifaqın məqsədi ali məktəblərdə təhsilin inkişafına kömək göstərmək, tələbələrin maraqlarını təmsil və müdafiə etmək, respublikanın ictimai-siyasi, mədəni və sosial-iqtisadi həyatında onların fəal iştirakını təmin etməkdir.

ATGTİ mütəmadi olaraq yerli təlimlər, seminarlar, konfranslar, milli və beynəlxalq Yay Düşərgələri, tələbə mübadilələri və digər bu kimi fəaliyyətlər təşkil edir.

Tarix

ATGTİ-nin tarixi Azərbaycan Respublikası Prezidentinin İcra Aparatı Rəhbəri Akademik Ramiz Mehdiyevin 2005-ci il 15 fevral tarixli 41№li Sərəncamına əsasən Azərbaycan Respublikasında gənclər və tələbələrlə işin təkmilləşdirilməsinə dair tədbirlər planının təsdiq olunması ilə başlanmışdır. Bununla bağlı Təhsil Nazirliyi tərəfindən 28 fevral 2005-ci il tarixli 89 saylı əmr hazırlanmış və Respublikanın bütün ali və orta ixtisas təhsili müəssisələrinə göndərilmişdir. Tələbə Gənclər Təşkilatlarının fəaliyyətlərinin tənzimlənməsini təmin etmək məqsədilə 2005-ci ilin may ayında Gənclər, İdman və Turizm Nazirliyi (indiki Azərbaycan Gənclər və İdman Nazirliyi) və Təhsil Nazirliyi "Ali və orta ixtisas təhsili müəssisələrində fəaliyyət göstərən Tələbə-Gənclər Təşkilatlarının Əsasnaməsi"ni təsdiq etmişlər. Beləliklə,TGT-lərin yaradılmasında Azərbaycan Respublikası Gənclər və İdman Nazirliyi və Təhsil Nazirliyi yaxından iştirak etmişdir. 2007-ci ildə isə Əsasnamə yenidən işlənərək hər iki nazirlik tərəfindən təsdiq olunmuş ali və orta ixtisas təhsili müəssisələrinə paylanılmışdır. 2009-cu il may ayının 1-dən iyunun 4-dək dövlət və özəl ali təhsil müəssisələrində fəaliyyət göstərən tələbə gənclər təşkilatlarının hesabat-seçki konfransları keçirilmişdir. Bu konfranslarda ötən müddət ərzində təşkilatın gördüyü işlər barəsində hesabatlar dinlənilmiş, onların fəaliyyətlərinə qiymət verilmiş, sədr və sədr müavinləri seçilmiş, yeni tərkibdə İdarəetmə Şurası, Nəzarət-Təftiş Komissiyası formalaşdırılmışdır. Hesabat-seçki konfranslarında Azərbaycan Tələbə Gənclər Təşkilatları İttifaqı təsis qurultayında iştirak etmək üçün 40 ali təhsil müəssisəsi və onların filiallarından 300 nəfər nümayəndə seçilmişdir. 2009-cu il noyabrın 20-də 2009-cu il tarixdə 26-sı dövlət, 14-ü özəl 40 ali təhsil müəssisəsinin Tələbə Gənclər Təşkilatı birləşərək Bakı şəhərində Azərbaycan Respublikası Milli Təhlükəsizlik Nazirliyinin Mədəniyyət Mərkəzində Azərbaycan Tələbə Gənclər Təşkilatları İttifaqını təsis etmişdir. Təsis qurultayının açılışında prezident İlham Əliyevin qurultay iştirakçılarına təbrik məktubu oxunmuşdur. Məktubu Prezident Administrasiyasının humanitar siyasət məsələləri şöbəsinin müdiri Fatma Abdullazadə təqdim etmişdir. Məktubda ATGTİ-nin vətəndaş cəmiyyətinin mühüm üzvlərindən birinə çevriləcəyinə əminlik ifadə olunurdu . Qurultayda Prezident Aparatının (PA) rəhbəri Ramiz Mehdiyev çıxış edərək, bildirmişdir ki, bu gün Azərbaycan gənclərinin həyatında tarixi bir gündür, 200 minlik tələbə ordusu vahid qurum şəklində fəaliyyətə başlayır: "Bu təşəbbüs bizim üzərimizə böyük öhdəliklər qoyur".

Struktur

ATGTİ-nin ali orqanı Qurultaydır. Qurultay 2 ildən bir çağırılır və burada İttifaqın Sədri və Əlaqələndirmə Şurasının üzvləri seçilir. Əlaqələndirmə Şurası İttifaqın qərararverici orqanı olub Tələbə Gənclər Təşkilatının 39 sədri və 20 sədr müavinini özündə birləşdirir. Ələqələndirmə Şurasının səlahiyyətləri sırasına İdarə Heyətinin üzvlərinin və ATGTİ sədrinin təqdimatına əsasən sədr müavinlərinin seçimi aiddir. İdarə heyəti 19 nəfərdən təşkil olunur. İttifaqın sədri eyni zamanda İdarə Heyətinin sədri, sədr müavinləri İdarə heyətinin sədr müavinləridir. İdarə Heyəti qərarverici orqandır. ATGTİ-nin sədri Qərarverici orqan olan İdarə Heyəti və İcraçı orqana ümumi rəhbərliyi həyata keçirir. İttifaqın İcraçı orqanları Deparamentlərdir. İcraçı strukturun fəaliyyətinə İcraçı Direktor rəhbərlik edir. Departement Direktorları öz profilləri üzrə işlərin icrasına rəhbərlik edirlər.

Beynəlxalq əlaqələr Departamenti İttifaqın Beynəlxalq qurumlar, xarici tələbə təşkilatlarıyla əlaqələrinin qurulmasını, beynəlxalq tədbirlərin təşkilini həyata keçirir. İctimaiyyətlə əlaqələr Departamenti İttifaqın keçirdiyi tədbirlər, layihələr barədə ictimaiyyətin məlumatlandırlmasını təmin edir. Layihələr Departamenti ATGTİ-nin müxtəlif istiqamətli layihələrinin hazırlanması və İdarə olunmasını həyata keçirir, İşçi Qrupların (İQ) işini koordinasiya edir, fand-reyzinq (maliyyə vəsaitinin toplanması) fəaliyyətini təmin edir. İnsan Resursları Departamenti Tələbə Gənclər Təşkilatlarına üzvlük məsələləri, İttifaqın qərarverici və icraçı orqanlarının heyət üzvlərinin uçotu, ATGTİ-nin İnsan resurslarının idarə olunmasını həyata keçirir. Elm və Təhsil Departamenti formal, qeyri-formal təhsil, olimpiadalar, müxtəlif mövzularda seminarlar, dəyirmi masalar, elmi proqramların, tədbirlərin hazırlanması və reallaşdırılmasını həyata keçirir. Mədəniyyət və Kütləvi tədbirlər Departamenti mədəniyyət, incəsənət sahələrində tədbirlərin hazırlanmasını və kütləvi tədbirlərin təşkilini təmin edir. İnformasiya Texnologiyaları Departamenti İttifaqın saytının işlənməsi və İT sahəsində proqramların həyata keçiriliməsini təmin edir. İdman və Səhiyyə Departamenti sağlam həyat tərzinin tələbələr arasında təbliği, idman yarışlarının təşkilini həyata keçirir.

Digər icra orqanlarına aşağıdakılar daxildir:

Mühasibat tədbirlərə maliyyə vəsaitinin ayrılması, işçilərin əmək haqqlarının ödənməsini həyata keçirir. Ofis meneceri ATGTİ-nin ofisinin bütün vəsaitlərlə təmini, ofisin idarə olunmasını təmin edir. ATGTİ-nin tərkibində müxtəlif profilli İşçi Qrupları fəaliyyət göstərir. İQ-ların hər biri öz profili üzrə tədbirlər təşkil edir. İşçi Qrupların fəaliyyəti ATGTİ-nin nizamnaməsi və İşçi Qrupların öz əsasnamələri ilə nizamlanır.

Nəzarət-Təftiş Komissiyası (NTK) 5 nəfərdən ibarətdir və Əlaqələndirmə Şurası üzvləri arasından seçilir. İttifaqın orqanlarının işinə nəzarət edir və hesabatları dinləyir. NTK-ya Komissiya Sədri rəhbərlik edir.

Üzv Universitetlər

1. Azərbaycan Dövlət Dəniz Akademiyası
2. Azərbaycan Dövlət Neft Akademiyası
3. Azərbaycan Texniki Universiteti
4. Milli Aviasiya Akademiyası
5. Bakı Dövlət Universiteti
6. Azərbaycan Dillər Universiteti
7. Bakı Slavyan Universiteti
8. Azərbaycan Dövlət Aqrar Universiteti
9. Azərbaycan Dövlət Bədən Tərbiyəsi və İdman Akademiyası
10. Azərbaycan Dövlət İqtisad Universiteti
11. Azərbaycan Dövlət Mədəniyyət və İncəsənət Universiteti
12. Azərbaycan Dövlət Pedaqoji Universiteti
13. Azərbaycan Dövlət Rəssamlıq Akademiyası
14. Azərbaycan İctimai-Siyasi Universiteti
15. Azərbaycan Kooperasiya Universiteti
16. Azərbaycan Memarlıq və İnşaat Universiteti
17. Azərbaycan Milli Konservatoriyası
18. Azərbaycan Müəllimlər İnstitutu
19. Azərbaycan Respublikasının Prezidenti yanında Dövlət İdarəçilik Akademiyası
20. Azərbaycan Texnologiya Universiteti
21. Azərbaycan Tibb Universiteti
22. Azərbaycan Turizm İnstitutu
23. Azərbaycan Universiteti
24. Bakı Asiya Universiteti
25. Bakı Avrasiya Universiteti
26. Bakı Biznes Universiteti
27. Bakı Musiqi Akademiyası
28. Bakı Qızlar Universiteti
29. Elm və Təhsil Mərkəzi Təfəkkür Universiteti
30. Əmək və Sosial Münasibətlər Akademiyası
31. Gəncə Dövlət Universiteti
32. Lənkəran Dövlət Universiteti
33. Mingəçevir Politexnik İnstitutu
34. Naxçıvan Dövlət Universiteti
35. Naxçıvan Müəllimlər İnstitutu
36. Odlar Yurdu Universiteti
37. Qərb Universiteti
38. Sumqayıt Dövlət Universiteti
39. Xəzər Universiteti

Azərbaycan Beynəlxalq Universiteti ATGTİ-ni təsis edən 40 universitetdən biri olmuşdur, lakin 2010-cu ildə ABU-nun fəaliyyətinə Təhsil Nazirliyinin qərarı ilə xitam verildikdən sonra İttifaqdakı üzvlüyü də dayandırlmışdır.

2011-ci il müddətində Bakı İslam Universiteti, Lomonosov adına Moskva Dövlət Universitetinin Bakı filialı və Qafqaz Universitetində də Tələbə Gənclər Təşkilatlarının yaradılması və onların da müvafiq qaydada İttifaqa üzvlüyü gözlənilir. Eyni zamanda Bakıda və Azərbaycanın digər bölgələrində fəaliyyət göstərən kolleclərin və Azərbaycan Müəllimlər İnstitutunun filiallarının da İttifaqa üzv qəbul edilməsi istiqamətində işlərin görülməsinə başlanılmışdır.

Fəaliyyət Sahələri

ATGTİ aşağıdakı fəaliyyət növlərini həyata keçirir:

1. Təhsil müəssisələrinin sosial həyatında tələbələrin fəaliyyətinin artırılması;
2. Tələbələr arasında universal dəyərlər haqqında maarifləndirilmə, vətəndaş cəmiyyətinin inkişafında onların iştirakını təmin etmək;
3. Tələbələrin asudə vaxtlarının səmərəli təşkili üçün yardım;
4. Əhalinin müxtəlif qrupları arasında təhsil sosioloji sorğular, seminarlar, sosial sorğu və konfransların keçirilməsi.

Liderlik Məktəbi

Liderlik Məktəbi

Layihənin icra müddəti: 15 may-29 oktyabr 2010-cu il

Layihənin donoru: Azərbaycan Gənclər və İdman Nazirliyi

Layihənin əsas məqsədi: Cəmiyyətdəki gənc liderlərin aşkar olunması və vətəndaş cəmiyyətinin inkişafına onların töhfəsi

28 iyun-4 avqust 2010-cu il tarixlərində Azərbaycan Respublikasının Gənclər və İdman Nazirliyinin dəstəyi ilə Azərbaycan Tələbə Gənclər Təşkilatları İttifaqı tərəfindən (ATGTİ) I və II kurs tələbələri üçün "Liderlik Məkətəbi" layihəsinə start verilmişdir. Layihədə 130 nəfər tələbə iştirak etmiş və layihə çərçivəsində iştirakçılar millət vəkilləri, ictimai xadimlər və dövlət işçiləri ilə görüşmüşdürlər. Eyni zamanda tələbələrə liderlik, layihələrin yazılması və idarə olunması, əlavə maliyyə vəsaitinin toplanılması və ictimaiyyətlə mövzusunda təlimlər keçirilmişdir. Layihə çərçivəsində iştirakçılara liderlik xüsusiyyətləri, idarəetmə qaydaları, press-reliz və mətbuat konfranslarının keçirilmə incəlikləri izah olunmuşdur. Layihə çərçivəsində iştirakçılar Hirkan qoruğuna və Palıdlı Sahil istirahət kompleksinə də səyahət etmişlər.

Xarici Keçidlər

• www.atgti.az - Azərbaycan Tələbə Gənclər Təşkilatları İttifaqının rəsmi saytı (ATGTİ)
• APA - Azərbaycan Tələbə Gənclər Təşkilatları İttifaqı İctimai Birliyinin təsis qurultayı keçirilib
• MODERN.AZ - Azərbaycan tələbələri Prezidentə müraciət qəbul etdilər
• Gənclər və İdman Nazirliyi - Azərbaycan Tələbə Gənclər Təşkilatları İttifaqının təsis qurultayı keçiriləcək