Fatih Gültəkin

Fatih Gültəkin
Loğman Həkim Universitetinin rektoru
Vəzifədədir
2022-ci ildən
Şəxsi məlumatlar
Doğum tarixi	1966
Doğum yeri	Konya, Konya ili, Türkiyə
Təhsili	Səlcuq Universiteti
Fəaliyyəti	tədqiqatçı, həkim
Elmi fəaliyyəti
Elmi adı	professor

Fatih Gültəkin (1966, Konya) — Türk alim, professor, həkim, Loğman Həkim Universitetinin rektoru.

Həyatı və fəaliyyəti

Fatih Gültəkin 1966-cı ildə Konyada anadan olub. 1990-cı ildə Səlcuq Universitetinin Tibb fakültəsini bitirdikdən sonra Konya xəstəxanasının təcili yardım şöbəsində çalışıb. Bu müddət ərzində o, həmin universitetdə təhsilini davam etdirərək 1996-cı ildə alkoqol qəbul edənlərdə plazma, eritrosit və leykosit lipid peroksidləşməsinin və antioksidant fermentlərin fəaliyyətinin tədqiqi üzrə dissertasiyasını müdafiə edərək biokimya üzrə doktorluq dərəcəsini bitirib. 1997-ci ildə İsparta Süleyman Dəmirəl Universiteti Tibb Fakültəsinin Biokimya kafedrasında assistent, 2002-ci ildə isə dosenti olub. 2007-ci ildə professor elmi adını alıb.

2015-ci ildə Alanya Ələddin Keykubat Universitetinin Tibb fakültəsinin təsisçi dekanı vəzifəsinə təyin edilib. Dekan olduğu müddətdə o, eyni zamanda prorektor vəzifəsində də çalışıb. Tibb fakültəsinin yaradılması prosesi müvəffəqiyyətlə başa çatdıqdan sonra 2017-ci ildə Səhiyyə Elmləri Universitetinə keçib.

2022-ci ildə Loğman Həkim Universitetinin rektoru təyin olunub.

Evlidir, 4 övladı var.

Elmi fəaliyyəti

Fatih Gültəkin dosent kimi çalışdığı illərdə Fulbright təqaüdü qazanıb və tədqiqat aparmaq məqsədilə ABŞ-yə gedib. O, melatonin hormonu ilə bağlı tədqiqatlar aparıb və San Antoniodakı Texas Universitetinin Tibb Elmləri Mərkəzində qida əlavələri ilə bağlı seminarlar verib. 2012-ci ildə Türkiyə Elmlər Akademiyasının (TÜBA) həqiqi üzvü seçilib.

Beynəlxalq Sağlamlıq və Qidalanma Jurnalının baş redaktorudur. Onun milli və beynəlxalq jurnallarda dərc edilmiş və konqreslərdə təqdim olunmuş yüzdən çox tədqiqatı var. Qida əlavələri onun əsas tədqiqat sahəsidir və onun bu mövzuda 4 kitabı var.