Elşad Abdullayev

Vikipediya, azad ensiklopediya
Firuza (müzakirə | töhfələr) (Kateqoriya:Azərbaycandan Fransaya mühacirət edənlər əlavə olundu HotCat ilə) tərəfindən edilmiş 14:52, 24 dekabr 2019 tarixli redaktə
Naviqasiyaya keç Axtarışa keç
Elşad Abdullayev
Doğum tarixi 25 sentyabr 1954(1954-09-25) (69 yaş)
Doğum yeri
Elm sahəsi hüquq
Elmi dərəcəsi
  • hüquq elmləri doktoru[d]
Elmi adı
İş yeri
Təhsili

Elşad İslam oğlu Abdullayev (25 sentyabr 1954, Kürdəmir rayonu) — Hüquq elmləri doktoru, professor.

Həyatı

Abdullayev Elşad İslam oğlu 1954-cü il sentyabrın 25-də Kürdəmir rayonunda anadan olub. 1961-ci ildə 1 saylı orta ümumtəhsil məktəbinə getmiş, 1971-ci ildə həmin məktəbi bitirmişdir.

1974-cü ildə BDU-nun Hüquq fakültəsinə qəbul olub, 1979-cu ildə isə həmin fakültəni fərqlənmə ilə bitirmişdir. 1985-ci ildə Moskvada namizədlik dissertasiyasını müdafiə etmişdir. 1995-ci ildən BDU-nun “Konstitusiya hüququ” kafedrasının dosenti olmuşdur. 2000-ci ildə Moskvada doktorluq dissertasiyasını müdafiə etmişdir. 2004-cü ildən BDU-nun “Konstitusiya hüququ” kafedrasının professoru olmuşdur.

23 aprel 2004-cü ildə RTA-nın ümumi iclasında Rusiya Dövlət Təhsil Akademiyasının üzvü seçilmişdir. 2005-ci ildə AR Təhsil Nazirinin sərəncamı ilə “Qabaqcıl Təhsil işçisi” döş nişanı ilə təltif olunmuşdur. 2006-cı ildə Moskvadakı Pedaqoji və Sosial Elmlər Akademiyasının akademiki seçilmişdir. 2007-ci ildə Vyana Beynəlxalq Universitetinin professoru seçilmişdir. 2007-ci ildə Avropa Rektorlar Klubuna üzv seçilmişdir. 2007-ci ildə Sokrat adına Beynəlxalq mükafata layiq görülmüşdür. 4 dekabr 2008-ci ildə Rusiya Hüquq Elmləri Akademiyasının həqiqi üzvü, akademiki seçilmişdir. 2009-cu ildə AR Prezidenti Yanında Ali Attestasiya Komissiyasının Hüquq Ekspert Şurasının sədri seçilmişdir.

Yeni Azərbaycan Partiyasının I, II, III qurultaylarının nümayəndəsi olmuşdur.

Ailəlidir, 3 övladı var.

Gülər Əhmədova olayı

border=none Əsas məqalə: Gülər Əhmədova olayı

Elşad Abdullayevin yayımladığı ilk video çəkiliş Azərbaycan Respublikası Milli Məclisinin deputatı Gülər Əhmədova ilə bağlı olmuşdur.

Gizli video çəkilişlər

Elşad Abdullayev 25 sentyabr 2012-ci il tarixdən etibarən Azərbaycan Respublikasının müxtəlif vəzifəli şəxslərlə görüşlərində gizli yolla çəkilmiş videoları internetdə yayımlamağa başladı. Həmin videoların bəziləri üzrə cinayət işləri açılmış, müxtəlif şəxslər həbs edilmiş və ya tutduğu vəzifədən azad edilmişdir.

Cinayət işi başlanması

28 sentyabr 2012-ci ildə videoçəkilişlərdə əks olunan məlumatlar Bakı şəhər prokurorluğunda araşdırılmışdır. Qeyd edilən audio və videoyazılarda dələduzluğun, yəni etibardan sui-istifadə etmə yolu ilə özgə əmlakını ələ keçirmənin əlamətləri olduğundan həmin məlumatların hərtərəfli, tam və obyektiv araşdırılmasını təmin etmək məqsədilə çoxsaylı təxirəsalınmaz istintaq və istintaq-əməliyyat tədbirlərinin keçirilməsinin zəruriliyini nəzərə alaraq toplanmış material üzrə Cinayət Məcəlləsinin 178.3.2-ci (etibardan sui-istifadə etməklə özgənin külli miqdarda əmlakını ələ keçirmə) maddəsi[1] ilə cinayət işi başlanmışdır[2].

Deputat mandatından imtina

Elə həmin gün Gülər Əhmədova deputat mandatının ləğv olunması üçün Azərbaycan Respublikası Milli Məclisinin rəhbərliyinə müraciət edir[3][4]. 3 oktyabr 2012-ci il tarixində Azərbaycan Respublikasının Mərkəzi Seçki Komissiyasının bu məsələyə dair keçirilmiş iclasında 34 saylı Xətai ikinci seçki dairəsindən Azərbaycan Respublikası Milli Məclisinə deputat seçilmiş Gülər Mikayıl qızı Əhmədovanın mandatından imtina barədə verdiyi ərizəyə baxılmış, onun mandatının ləğv olunması barədə qərar çıxarılmışdır[5][6].

Yeni Azərbaycan Partiyasının münasibəti

Həm Elşad Abdullayevin, həm də Gülər Əhmədovanın iqtidarda olan Yeni Azərbaycan Partiyasının üzvü olması, olayın əsas diqqətçəkən məqamlarından biridir. Yeni Azərbaycan Partiyasının Sədr müavini - İcra katibi, millət vəkili Əli Əhmədov baş verən hadisə ilə bağlı belə demişdir:

"Gülər Əhmədova Yeni Azərbaycan Partiyasını Milli Məclisdə təmsil etməyə mənəvi haqqını itirib. Yeni Azərbaycan Partiyasının hər bir üzvünün mövqeyi, məhz, belədir."[7]

Müxalifətin münasibəti

Baş verənlərlə bağlı olaraq İctimai Palata oktyabrın 13-də Bakının keçmiş Əzizbəyov heykəlinin qarşısından Parlament prospekti ilə Milli Məclisin qarşısınadək yürüş keçirilməsi məqsədilə paytaxt meriyasına müraciət etmiş, lakin Bakı Şəhər İcra Hakimiyyəti onlara 20-ci sahədə mitinq keçirmək üçün razılıq vermişdir. İctimai Palata Bakı Şəhər İcra Hakimiyyətinin təklifini qəbul etməmiş və müxaliflər oktyabrın 20-si saat 15-də Fəvvarələr Meydanında "Parlament buraxılsın" şüarı ilə mitinq keçirməyi qərara almışdır[8].

İstinadlar

  1. ↑ Azərbaycan Respublikasının Cinayət Məcəlləsi
  2. ↑ Azərbaycan Respublikası Baş Prokurorluğunun Mətbuat xidmətinin 28 sentyabr 2012-ci il tarixli məlumatı. genprosecutor.gov.az  (az.)
  3. ↑ Gülər Əhmədova deputat mandatından imtina edir... azadliq.org
  4. ↑ DEPUTAT MİLLİ MƏCLİSİN SƏDRİNƏ MÜRACİƏT ÜNVANLAMIŞDIR. meclis.gov.az  (az.)
  5. ↑ Gülər Əhmədovanın mandatı alındı. musavat.com
  6. ↑ "Azərbaycan Respublikası IV çağırış Milli Məclisin deputatı Gülər Mikayıl qızı Əhmədovanın deputat mandatından məhrum edilməsi barədə" Azərbaycan Respublikası Mərkəzi Seçki Komissiyasının 3 oktyabr 2012-ci il tarixli, 4/13 nömrəli Qərarı. e-qanun.az  (az.)
  7. ↑ YAP-ın Sədr müavini: "Gülər Əhmədova Yeni Azərbaycan Partiyasını Milli Məclisdə təmsil etməyə mənəvi haqqını itirib". yeniazerbaycan.com  (az.)
  8. ↑ İctimai Tədbir: Parlament buraxılsın

Xarici keçidlər

Mənbə — "https://az.wikipedia.org/w/index.php?title=Elşad_Abdullayev&oldid=4978385"