Cəlil Bağdadbəyov
Cəlil Bağdadbəyov | |
---|---|
Doğum tarixi | 1887 |
Doğum yeri | |
Vəfat tarixi | 21 aprel 1951 |
Vəfat yeri | |
Vətəndaşlığı | |
Fəaliyyəti | teatr aktyoru, teatr rejissoru, tərcüməçi, sənətşünas, etnoqraf |
Fəaliyyət illəri | 1907-ci ildən |
Teatr | |
Mükafatları |
Cəlil bəy Əmrah bəy oğlu Bağdadbəyov (1887, Şuşa – 21 aprel 1951, Bakı) — Azərbaycan aktyoru, teatr rejissoru və təşkilatçısı, tərcüməçi, Azərbaycan SSR əməkdar artisti (1943).
Həyatı
Cəlil Bağdadbəyov 1887-ci ildə Şuşada anadan olmuşdur. O, ilk təhsilini buradakı mütərəqqi məktəbdə və Peterburq gimnaziyasında almış, 1904-cü ildə Bakıya qayıdıqdan sonra müxtəlif neft mədənlərində dəftərxana işlərində çalışmışdır. 1907-ci ildə "Nicat" cəmiyyətinin teatr truppasına aktyor götürülmüş, burada, həmçinin "Səfa" Teatr truppalarında, Hüseynqulu Sarabskinin rəhbərlik etdiyi "Müsəlman opera artistləri" dəstəsində, "Zülfüqar bəy və Üzeyir bəy Hacıbəyli qardaşlarının müdiriyyəti"ndə aktyorluq fəaliyyəti göstərmişdir.
1920-ci ildə Milli Dram Teatrının truppasına götürülən aktyor 1922-ci ilin sentyabrından 1924-cü ilin axırlarına qədər Bakı Türk Azad Tənqid və Təbliğ Teatrında da işləmişdir. 1938–1948-ci illərdə Şamaxı, Şuşa, Salyan, Ağdaş, Zaqatala, Qaryagin, Ağdam, Şəmkir, Naxçıvan, Ordubad şəhərlərinin dram dərnəklərinə və dövlət teatrlarına yaradıcılıq fəaliyyəti göstərmişdir. O, oralarda həm aktyor, həm də rejissor kimi çıxış etmiş, tamaşalar hazırlamış, rollar oynamışdır.
Teatr sənətini təşkil və inkişaf etdirmək məqsədilə Azərbaycan SSR Xalq Komissarları Sovetinin qərarı ilə 1920-ci illərin ikinci yarısından 1930-cu ilin ortalarına qədər Tacikistana ezam olunmuşdur. Tacik dilində təbliğat xarakterli "Tacik qızı", "Komsomol və nişan" dramlarını yazmışdır.[1]
Cəlil Bağdadbəyov Bakı Teatr Məktəbində dərs demişdir. O, 21 aprel 1951-ci ildə Bakıda vəfat etmişdir.[1]
Mükafatları
- "Azərbaycan SSR əməkdar artisti" fəxri adı — 17 iyun 1943
İfa etdiyi əsas rollar
- Müxtəlif truppalarda və dövlət teatrında oynadığı əsas rollar[1]
Tamaşa | Müəllif | Rol |
---|---|---|
Yağışdan çıxdıq, yağmura düşdük | Nəcəf bəy Vəzirov | Hacı Qənbər |
Keçmişdə qaçaqlar | Nəcəf bəy Vəzirov | Camal bəy |
Pəri cadu | Əbdürrəhim bəy Haqverdiyev | Dərviş |
Dağılan tifaq | Əbdürrəhim bəy Haqverdiyev | Nəcəf bəy |
Zorən təbib | Jan Batist Molyer | Təbib |
Qaçaqlar | Fridrix Şiller | Rotsman |
Vətən | Namiq Kamal | Çavuş Abdulla |
Otello | Uilyam Şekspir | Rodriqo |
Kral Lir | Uilyam Şekspir | Qraf Kent |
Əl Mənsur | Henrix Heyne | Don Dieqo |
Dəmirçi Gavə | Şəmsəddin Sami | Təhmas |
Nel qülləsinin sirri | Aleksandr Düma | Kral Lüdoviq |
İki yetimə | Adolf D'Enneri və Kermon | Qraf |
Dəhşətli röya | Herhart Hauptman | Rıtsar |