Şahmar Hüseynov
 | Bu səhifədə iş davam etməkdədir. |
| Şahmar Hüseynov | |
|---|---|
| Doğum tarixi | 31 iyul 1939 |
| Doğum yeri | |
| Vəfat tarixi | 1 yanvar 1988 (48 yaşında) |
| Vəfat yeri | |
| Vəfat səbəbi | ürək tutması |
| Dəfn yeri | |
| Həyat yoldaşı | |
| Təhsili | |
| Fəaliyyət illəri | 1977-ci ildən |
| Janr | hekayə |
| Mükafatları | Mirzə Fətəli Axundov adına ədəbi mükafat |
Şahmar Hüseynov (azərb. Şahmar Həsən oğlu Hüseynov) - Azərbaycanlı yazıçı, aktyor, rejissor köməkçisi və teatr xadimi.
Həyatı
Şahmar Hüseynov 1939-cu ilin 31 iyul tarixində Xanlar rayonunun Nərimanov kəndində anadan olmuşdur. Ailəsi Gəncəyə köçəndə Şahmar Hüseynov ilk təhsilini də burda alır. Məktəbi bitirdikdən sonra Bakıya gələn Ş. Hüseynov hərbi xidməti keçir (3 il) və leytenant rütbəsi qazanır. Sənədlərini əvvəlcə Tibb İnstitutuna verən Şahmar Hüseynov I kursu başa vurmadan oranı tərk edir və M.A.Əliyev adına Dövlət İncəsənət İnstitutunun dram və aktyor fakültəsinə qəbul olunur.
Şahmar Hüseynovun kurs rəhbəri məşhur Azərbaycan rejissor və aktyoru Adil İskəndərov olub, ona sənətin incəliklərini öyrədib. Təhsilini bitirdikdən sonra Şahmar Hüseynovu A.Şaiq adına Kukla teatrına təyin ediblər. 1966-ci ildən Şahmar Hüseynov Kukla teatrında aktyor, daha sonra rejissor köməkçisi kimi fəaliyyət göstərib. Şahmar Hüseynov əllidən çox tamaşada oynamış və hər tamaşada fərqli obrazlar yaratmışdır. O, "Məşədi İbad" tamaşasında Qoçu Əsgər, "Zəncirlənmiş pəri" əsərində Rəhman rolunun, Eldar Baxışın "Məlikməmməd" pyesində Aşıq və sairə obrazların ifaçısı olub.
Uşaq vaxtından kiçik hekayələr yazan Şahmar Hüseynov aktyor fəaliyyəti ilə yanaşı yazıçılıqla da məşğul olub. Şahmar imzası ilə mətbuatda hekayələri işıq üzü görüb. Onun "Bir balaca səhv" adlı ilk hekayəsi 1977-ci ildə "Ulduz" jurnalında çap edilib. Bir-birindən maraqlı hekayələri ilə ədəbi mühitə səs salan Şahmar təkcə aktyor kimi deyil, həm də yazıçı kimi də peşəkarlaşıb. Şahmarın hekayələrində kənd cazibəsi, yaşadıqları ilə yanaşı teatr aləmi, şəhər həyatı, xüsusilə, aktyorların həyatı öz əksini tapıb.
70-ci illərdə Şahmarın "Sehrli güzgü" adlı pyesi çalışdığı Kukla teatrında səhnələşdirilib və tamaşaçılar tərəfindən rəğbətlə qarşılanıb.
Şahmar Hüseynov 1970-ci ildə Kukla teatrında çalışan aktrisa Elmira Hüseynova ilə ailə həyatı qurub. Ayxan və Həsən adında iki oğlu var.
1988-ci ilin yanvarın 9-da Bakıda, yaşadığı mənzildə Şahmar Hüseynov infarktdan dünyasını dəyişir. Valideynlərinin istəyi ilə dəfni doğma yurdu Gəncədə baş tutur.
1986-cı ildə "Elçilik" adlı bir hekayələr kitabı çap olunub. Ölümündən sonra, 1989-cu ildə isə yazıçının "İtki" kitabı çapdan çıxır və bu kitaba görə Mirzə Fətəli Axundov adına ədəbi mükafata layiq görülür.
Onun haqqında bir çox tanınmış yazıçılar öz fikirlərini bildirib.
Xalq yazıçısı Anar:
"Kukla teatrı "Qaravəlli" əsərimi tamaşaya qoyanda Şahmarı bir aktyor kimi tanımışam. Az sonra ədəbi jurnallarda çap olunan maraqlı, gözəl hekayələrini oxudum. İncə duyğu, yüksək hissiyyatla yanaşı, böyük səmimiyyəti Şahmarın hekayələrində də gördüm".
Xalq yazıçısı Mövlud Süleymanlı:
"Azərbaycan ədəbiyyatında öyrənmək istədiyim yazıçı çox az olub. Onlardan biri Şahmardı. Şahmar böyük yazıçıdır. Hər şeydən əvvəl ona görə ki, demək istədiyini bəzəksiz-düzəksiz deməyi bacarıb. Bütün səmimiyyətimlə bir də təkrar eləyim ki, həmişə Şahmar kimi sakit, səssiz-küysüz, qışqırıqsız, boyalar işlətmədən, obrazlı ifadələr axtarmadan yazmaq istəmişəm. Bunu onun özünə də deyirdim. Uşaq kimiydi, inanmırdı".
Tanınmış yazıçı Saday Budaqlı:
"Şahmar öz qəhrəmanlarına oxşayan yazıçıdır".
http://www.adalet.az/mobil/117160.html
https://edebiyyatqazeti.az/news/incesenet/3055-kursu-layihesinin-qonagi