Eynulla Fətullayev
Bu məqalədəki məlumatların yoxlanılabilər olması üçün əlavə mənbələrə ehtiyac var. |
Eynulla Fətullayev | |
---|---|
azərb. Eynulla Emin oğlu Fətullayev | |
Doğum tarixi | |
Doğum yeri | Bakı, Azərbaycan SSR |
Fəaliyyəti | jurnalist |
Vikianbarda əlaqəli mediafayllar |
Fətullayev Eynulla Emin oğlu — tanınmış azərbaycanlı jurnalist, "haqqın.az"[1] və "virtualaz.org" saytlarının baş redaktoru,"Gündəlik Azərbaycan" qəzetinin (2005-2007) baş redaktoru. Tənqidi yazılarına görə Azərbaycan hökuməti tərəfindən təqib olunmuşdur.
Həyatı
Eynulla Fətullayev 1976-cı il sentyabrın 25-də Bakıda anadan olub. Jurnalistikaya gənc sosial demokrat, "İstiqlal" qəzetinin yazarı kimi gəlmişdir. 1990-cı illərin ortalarında Yeni Azərbaycan Partiyasına üzv olub, bir müddət əmək və əhalinin sosial müdafiəsi nazirinin köməkçisi işləyib. YAP-dan istefa verəndən sonra müstəqil yazarlığa başlayıb. Azərbaycan Silahlı Qüvvələrində xidmət edənədək bir müddət ANS televiziyasında analitik proqramların aparıcısı olan E.Fətullayev sonradan Elmar Hüseynovun nəşr etdiyi "Monitor" jurnalında çalışıb.
2005-ci ildə E.Hüseynovun qətlindən sonra "Monitor" bağlananda E.Fətullayev "Realnı Azerbaydjan", "Gündəlik Azərbaycan" qəzetlərini və "Azerbaydjan v mire" jurnallarını yaradıb. 2006-cı ilin oktyabrında o, davamlı təzyiqləri əsas gətirərək nəşrlərini bağladığını elan edib. Ancaq iki ay sonra "Realnı Azerbaydjan", "Gündəlik Azərbaycan" qəzetlərini yenidən buraxmağa başlayıb.
Həbsi
E.Fətullayev 2007-ci il aprelin 20-də Yasamal Rayon Məhkəməsinin qərarı ilə məhkəmə zalında həbs edilib. Bu həbsə Qaçqın və Məcburi Köçkünlərin Hüquqlarını Müdafiə Birliyinin sədri Tatyana Çaladzenin iddiası səbəb olub. Jurnalist 2005-ci ildə qələmə aldığı "Qarabağ gündəliyi" adlı silsilə yazılarında xocalıları təhqir etməkdə günahlandırılıb və ona 2 il 6 ay həbs cəzası verilib.
Tutulandan bir ay sonra Azərbaycan Milli Təhlükəsizlik Nazirliyinin Baş İstintaq İdarəsində E.Fətullayevin rəhbərlik etdiyi KİV-də getmiş məlumatlarla əlaqədar cinayət işi başlanıb. Söhbət "Realnı Azerbaydjan" qəzetində yerləşdirilən, ABŞ-ın İrana hərbi təcavüzü ilə bağlı ehtimalların səsləndirildiyi məlumatlardan gedir. Bu məlumatların Azərbaycanda işləyən xarici ölkə vətəndaşları və beynəlxalq qurumlarda təşviş yaratdığı iddia olunub.
MTN-də başlanan istintaqla əlaqədar E.Fətullayev Bayıldakı istintaq təcridxanasından MTN-in təcridxanasına köçürülüb. Burada ona qarşı Cinayət Məcəlləsinin 214.1-ci (terrorçuluqla hədələmə) və 283.2.2-ci (qulluq mövqeyindən istifadə etməklə milli, irqi, sosial və ya dini nifrət və düşmənçiliyin salınması) maddələri ilə ittiham irəli sürülüb. Sonradan istintaq E.Fətullayevi külli miqdarda vergidən yayınmada (213.2.2-ci maddə) da ittiham edib.
2007-ci il oktyabrın 30-da Ağır Cinayətlərə Dair İşlər üzrə Məhkəmə E.Fətullayevi 8 il 6 ay müddətinə azadlıqdan məhrum etmişdir. O, 12 saylı Cəzaçəkmə Müəssisəsində saxlanılmışdır.
E.Fətullayev tutulandan az sonra onun nəşrləri fəaliyyətini dayandırmağa məcbur olub.
11 noyabr 2010-cu ildə AR Cinayət Məcəlləsinin 147.1 və 147.2-ci maddələri ilə üzərinə qoyulan məhkumiyyətdən bəraət almışdır[2].
Eynulla Fətullayev 26 may 2011-ci ildə Azərbaycan Respublikasının prezidenti İlham Əliyevin əfv sərəncamı ilə azadlığa buraxılmışdır.[3][4]
Mükafatları
2014-cü ildə Ali Media Mükafatının 2-ci dərəcəsi ilə təltif edilmişdir[5].
İstinadlar
- ↑ https://haqqin.az/about
- ↑ Eynulla Fətullayev bəraət aldı
- ↑ Eynulla Fətullayev əfv edilib-SİYAHI
- ↑ "Bu_mənim_üçün_möcüzəli_bir_hadisədir" Eynulla Fətullayev: "Bu mənim üçün möcüzəli bir hadisədir"
- ↑ "Ali Media Mükafatını kimlər aldı?". KASPİ (az.). kaspi.az. 23.07.2014 - 13:28:00. İstifadə tarixi: 2014-07-24.
Xarici keçidlər
- Amnesty İnternational təşkilatının E.Fətullayevın azadlığa buraxılması ilə əlaqədar Prezident İlham Əliyevə ünvanlanmış xahişi(ingilis dilində)
- Eynulla Fətullayev. YouTube
- Eynulla Fətullayev
Şablon:YUNESKO-nun Gilyermo Kano adına Dünya Mətbuat Azadlığı Mükafatının laureatları