Siyavuş Qarayev
Siyavuş Qarayev | |
---|---|
Siyavuş Fərhad oğlu Qarayev | |
Fayl:Siyavuş Qarayev.jpg | |
Doğum tarixi | |
Doğum yeri | Samux rayonu, Azərbaycan SSR, SSRİ |
Vəfat tarixi | (72 yaşında) |
Vəfat yeri | Bakı, Azərbaycan |
Vətəndaşlığı |
SSRİ Azərbaycan |
Elm sahəsi | üzvi kimya |
Elmi dərəcələri | kimya elmləri doktoru, |
Elmi adı | professor |
İş yeri | ADNA-nın rektoru (1997-2014) |
Təhsili | |
Mükafatları | |
Siyavuş Fərhad oğlu Qarayev (d, 30 aprel 1942-сi il, Samux, Azərbaycan SSR, SSRİ - 1 yanvar 2015-ci il, Bakı, Azərbaycan) — Azərbaycan Dövlət Neft Akademiyasının (indiki Azərbaycan Dövlət Neft və Sənaye Universiteti) rektoru, üzvi kimya sahəsində görkəmli alim, Azərbaycan Milli Elmlər Akademiyasının həqiqi üzvü, kimya elmləri doktoru, professor.
Həyatı
S.Qarayev 30 aprel 1942-ci ildə Azərbaycanın Samux rayonunda anadan olmuşdur. O, 1959-cu ildə Gəncə şəhərində orta məktəbi bitirmiş və həmin ildə Azərbaycan Dövlət Universitetinin (indiki Bakı Dövlət Universiteti ) kimya fakültəsinə daxil olmuşdur. 1964-cü ildə «kimyaçı» ixtisası alaraq universiteti bitirmiş, təyinat üzrə Ümumittifaq Elmitədqiqat Olefinlər İnstitutunda mühəndis, sonra isə Azərbaycan Elmlər Akademiyasının Y.Məmmədəliyev adına Neft-kimya Prosesləri İnstitutunun Sumqayıt filialında kiçik elmi işçi işləmişdir. 1967-ci ildə M.Əzizbəyov adına Azərbaycan Neft və Kimya İnstitutunun (indiki ADNSU) aspiranturasına daxil olmuş, 1970-ci ildə namizədlik, 1981-ci ildə isə M.Lomonosov adına Moskva Zərif Kimya Texnologiyası İnstitutunda doktorluq dissertasiyasını müdafiə etmişdir.
1970–1982-ci illərdə Azərbaycan Neft və Kimya İnstitutunda kiçik, sonra böyük elmi işçi, elmi-tədqiqat şöbəsinin kimya bölməsinin rəhbəri, «Üzvi kimya» kafedrasının dosenti və elmi işlər üzrə prorektorun müavini vəzifələrində çalışmışdır. 1982-ci ildən «Üzvi kimya» kafedrasının müdiri, 1988 – 1997-ci illərdə kimya-texnologiya fakültəsinin dekanı, 1997-ci ildən Azərbaycan Dövlət Neft Akademiyasının rektorudur.
S.F.Qarayev Beynəlxalq Elmlər Akademiyasının və Beynəlxalq Ekoenergetika Akademiyasının akademiki, Nyu-York Elmlər Akademiyasının, Beynəlxalq Mühəndislik Akademiyasının və Azərbaycan Mühəndislik Akademiyasının həqiqi üzvü, Çin Neft Universitetinin fəxri professorudur.
Onun geniş elmi maraq dairəsi doymamış heteroatomlu üzvi birləşmələrin fundamental və tətbiqi kimyası sahəsini əhatə edir. S. Qarayev 550-ə yaxın elmi əsərlərin müəllifidir, 70-dən çox beynəlxalq və regional elmi konfrans və simpoziumlarda məruzə etmişdir.
Akademik S. Qarayev «Üzvi kimya» ixtisası üzrə doktorluq alimlik dərəcəsi verən İxtisaslaşdırılmış Şuraların üzvü və namizədlik alimlik dərəcəsi verən Dissertasiya Şuralarının sədri olmuşdur. Onun elmi rəhbərliyi ilə 23 elmlər namizədi hazırlanmışdır.
O, «Azərbaycan ali texniki məktəblərinin xəbərləri» elmi jurnalın baş redaktoru, bir neçə nüfuzlu elmi jurnalların, «Qoşa ulduz» ictimai-siyasi-beynəlxalq jurnalın və «Vışka» qəzetinin redaksiya heyətlərinin üzvüdür.
O, Azərbaycan Respublikası Təhsil Nazirliyi kollegiyasının üzvü olmuşdur.
O, zərif üzvi sintez və kataliz üzrə Bakıda vaxtaşırı keçirilən beynəlxalq elmi konfransların təşkilatçısı və təşkilat komitələrinin dəyişilməz sədridir.
Akademik S.Qarayev SSRİ Neft-Kimya və Neftayırma Sənayesi Əlaçısı, SSRİ-nin Fəxri kimyaçısı, Azərbaycan Respublikasının Əməkdar Elm Xadimi adlarına layiq görülmüşdür.
1 yanvar 2015-ci ildə Bakı şəhərində vəfat etmişdir.[1]
İstinadlar
- ↑ "ADNA-nın rektoru vəfat edib" (az.). Lent.az. 1 yanvar 2015. İstifadə tarixi: 1 yanvar 2015.
Xarici keçidlər
- 30 apreldə doğulanlar
- 1942-ci ildə doğulanlar
- 72 yaşında vəfat edənlər
- 1 yanvarda vəfat edənlər
- 2015-ci ildə vəfat edənlər
- Bakı Dövlət Universitetinin Kimya fakültəsinin məzunları
- Azərbaycan Respublikasının əməkdar elm xadimləri
- "Şöhrət" ordeni ilə təltif edilənlər
- Əlifba sırasına görə alimlər
- Bakı Dövlət Universitetinin məzunları
- Azərbaycan Dövlət Neft və Sənaye Universitetinin rektorları
- Samuxda doğulanlar
- Azərbaycan Dövlət Neft və Sənaye Universitetinin professorları
- Şəmsizadələr
- II Fəxri Xiyabanda dəfn olunanlar
- AMEA-nın həqiqi üzvləri