Azərbaycan camışı

Vikipediya, azad ensiklopediya
Jump to navigation Jump to search
Azərbaycan camışı (Qafqaz camışı)
Azerbaijani water buffalo 2.jpg
Adı Azərbaycan camışı cinsi
Əcdadı Asiya camışı
Cinsin istiqaməti Ətlik-südlük
Yetişdirildiyi yer Azərbaycan, Ermənistan, GürcüstanDağıstan
Arealı Cənubi Qafqaz
Xalq seleksiyası
Ağaxan Ağabəyli

Azərbaycan camışı[1][2] və ya Qafqaz camışı[3][4][5]Cənubi Qafqazda olan camışların 70 faizi Azərbaycanda saxlanılır. GürcüstandaErmənistanda ərazisində camışlar olduqca azlıq təşkil edir. Sovet dönəmində Cənubi Qafqaz camışları müstəqil cins kimi qəbul edilərək “Qafqaz camış cinsi” adlandırmışlar. Camışların çox hissəsinin Azərbaycan Respublikasında olduğunu nəzərə alaraq Azərbaycan alimləri Cənubi Qafqazda olan bütün camışları “Azərbaycan camış cinsi” adlandırmışlar. Bu 1992-ci ildə Azərbaycan Respublikası Nazirlər Kabinetinin qərarı ilə təstiqlənmişdir.[6]

Azərbaycanda camışçılığın tarixi uzaq keçmişlərə gedib çıxır. Ölkənin təbii iqlim şəraiti heyvandarlığın bu sahəsinin intensiv inkişafı üçün olduqca əlverişlidir. Xüsusi ilə Kür, Araz qırağı, Qazax-Qarabağ düzlərində yetişdirilmişdir. Bu canlıların yemə az tələbkar olması və düzənin isti, subasar əraziləri camışların yetişdirilməsinə imkan verir. Xüsusi ilə qamışlarla qidalanırlar. Bu isə onun saxlanılmasını asanlaşdırır.

Xüsusiyyətləri[redaktə | əsas redaktə]

Azərbaycan camışları qara rəngə malik olurlar. Bu isə günəş şüalarının onlara ciddi təsir göstərməsinə, bədəninin qızdırmasına imkan verir. İsti günlərdə nohurlar, bataqlıq, durğun sular, gölməçələr və ya yaxud çay yataqlarında uzanmağı sevirlər. Suda olduqda camışın ancaq başı kənarda qalır, bu da onun suda yaşamaq adəti ilə əlaqədardır.

Bu cins camışlar arasında nadir hallarda ağ rəngli camışlar doğulur. Bu heyvanları “albinos” camışlar adlandırırlar. Albinos camışlar çox yaşamır və nəsil vermirlər.

Orta köklükdə olan camışlarda diri çəkinin 0,5 faizini dil, 0,86 faizini piylə birlikdə böyrək, 0,25 faizini beyin, 4,34 faizini içalat, 1,12 faizini baş əti, 5,2 faizini işgənbə və torcuq təşkil edir.

İnəklərdən fərqli olaraq şaxtaya dözümsüzdürlər. İnəklər -20 °C şaxtaya dözdükləri halda, camışlar -1 °C şaxtada artıq əziyyət çəkirlər. Səbəb isə camış orqanizimində piyin az olması ilə izah edilir. Camışlar inəklərə nisbətən az süd verir. Azərbaycan camışı gün ərzində 3-4 kq süd verir. Azərbaycanda südünün orta yağlığı 8,16 % olur. Cənubi Qafqaz bölgəsində 6-12 % arasında dəyişir. Bol su içdikdə südlərini 8-10 % artıra bilirlər. Bu cins camışlar təsərrüfatda 20-21 yaşınadək saxlamaq olur. 8-9 yaşından etibarən qocalma əlamətləri meydana gəlir. Getdikcə südlərini azaldırlar. Azərbaycanda orta yararlılıq müddəti 16 ildir. Dişilərin damazlıq fermalarda maksimal çəkisi 686 kq, erkəklərdə isə 720 kiloqrama çatır. Bəziləri vardır ki, 900-1000 kq çəki ala bilir[7].

Boğazlıq dövrü 305 gün davam edir. Balalar yenicə doğularkən 30 - 35 kq çəkiyə sahib olur[7]

Azərbaycanda camışçılıq[redaktə | əsas redaktə]

Camışçılıq Azərbaycanda südlük və ətlik istiqaməli olmuşdur. Südündən yerli əhalinin çox sevdiyi əla keyfiyyətli qatıq və süzmə, qaymaq, ayran və şor hazırlanır. Camış qatığı inək və qoyun qatığından qatı və yağlılığı ilə seçilir. Bu səbəbdən qiymətli hesab edilir. Qatıq və ayranının profilaktik əhəmiyyəti vardır. Azərbaycanda camış südünün standart yağlılığı orta hesabla 7,6 % olur. Nadir hallarda yüksək olma ehtimalı vardır. Sovet dönəmində camışlar 300 günlük sağım dövründə yemləmə və saxlama şəraitindən asılı olaraq 700-1500 kq və daha çox süd verirdilər. Son zamanlar aparılan damazlıq işləri ilə əlaqədar Azərbaycan camışlarının 2000-3000 kq süd verməsi müəyyən edilmişdir.

1991-ci ildə Bolqarıstanın Varna şəhərində Ümumdünya Camışılıq Konqresinın prezidenti, BMT FAO (Kənd Təsərrüfatı) təkilatının məruzəçisi, Misirdən olan Şalaşı öz çıxışında Qafqazda ilk əhəlləşdirilmiş məhsul verən canlının camış olması fikirini irəli sürmüşdür[8].

Yerli üsul ilə nehrə çalxalamaqla 11-12 kq süddən 1 kq yağ əldə edilir. Halbuki, 1 kq yağ əldə etmək məqsədi ilə 22-24 kq inək südü tələb olunur.

Azərbsycanda camışın balası Balaq adlanır. Erkəklərinə isə Kəl deyilir.

1991-ci il məlumatına əsasən keçmiş SSRİ ərazisində 550 000 baş camış olmuşdur ki, onunda 85 % Azərbaycan SSR payına düşürdü. Üstəlik Qafqazda olan (xüsusi ilə Gürcüstan, ErmənistanDağıstan) camışların böyük qismi azərbaycanlıların həyətlərində saxlanılırdı[8].

Azərbaycanda müstəqillik illərində camışçılığa maraq olduqca azalmışdır[9]. 2015-cı ildə 249.1 min, 2016-cı ildə 239.2 min, 2017-ci ildə 211.4 min, 2018-ci ildə isə 193.6 min başa qədər azlmışdır[10]. Azərbaycanda illərə görə camışların sayı:

İllər Camışların sayı (min) Ana camışların sayı (min)
1968 425,8 161,5
1969 403,8 154,1
2004 308,6 147,9
2005 302,8 145,9
2006 298,9 142,4
2007 298,7 142,6
2008 288,4 137,0
2009 282,7 133,7
2010 277,1 131,3
2011 269,4 128,3
2012 265,9 126,6
2013 260,9 123,9
2014 256,7 120,2

İri camışçılıq rayonlarında camışların baş sayının azalması davam edir. Bunula belə 2001-ci ildə camışçılığın inkişafı məqsədi ilə Azərbaycan Camışçılıq Cəmiyyəti yaradılmışdır. Azərbaycanda 2005-ci ilə olan məlumata əsasən Yevlax rayonunda 28037 baş, Ağcabədi rayonunda 13166 baş, Bərdə rayonunda 16196 baş, Ağsu rayonunda 10015 baş, Beyləqan rayonunda 5109 baş, 2000-ci ilə görə isə Goranboy rayonunda 3487 baş, Şəmkir rayonunda 2860 baş, Kürdəmir rayonunda 14370 baş camış olmuşdur.

Əhəmiyyəti[redaktə | əsas redaktə]

Azərbaycanda tarixən camış kəlləri vasitəsilə xırmanlarda taxıl döyülür və yer şumlanırdı. Bu işlər hətta 1940-cı illərin sonlarına kəllərin köməyi ilə həyata keçirilirdi. Camış dərisi qalın və dözümlü olduğundan müxtəlif dəri məmulatları hazırlanırdı. Hətta camış gönündən möhkəm və yüksək keyfiyyətli keyfiyyətli Şatrı adlı çarıq hazırlanırdı.

Hazırda camış qatığı, qaymağı və yağı digər ev heyvanlarının eyni adı məhsullarından qiymətli hesab edilir. Ətinə gəldikdə isə əsasən balaq əti yeyilir. Hazırda balaq ətinin 1 kiloqramı 8 manata satılır.

Camışçılığın inkişafında rolu olan alimlər[redaktə | əsas redaktə]

Azərbaycanda camışçılığın inkişafında böyük rolu olan alimlərdən Ağaxan Ağabəylini, Zülfüqar Verdiyevi, Cahangir Axundovu, Turan Turabovu, Fikrət Abdinovu və s. adını çəkmək olar.

Maraqlı fakt[redaktə | əsas redaktə]

  • 1960-cı illərdə Şəki rayonun Daşüz camışçılıq təsərrüfatında "Bülbül" ləqəbli camışın südündə yağlılıq səviyyəsi 14 % olmuşdur. Bu isə camışçılıqda olduqca nadir hadisədir.
  • Azərbaycan SSR Ali Sovetinin deputatı olan Zümrüd Namazova camışların maşınla sağılması üzrə keçirilən ümumittifaq yarışının qalibi olmuşdur. O, hər camışdan 1647 kq süd sağaraq respublika birincisi olmuşdur.

İstinadlar[redaktə | əsas redaktə]

  1. Azərbaycan Milli Ensiklopediyası: Azərbaycan/ Kənd Təsərrüfatı Elmləri. Heyvandarlıq. səh 596.
  2. Azərbaycan su camışı
  3. Qafqaz camışı
  4. [1] Sovet Ensiklopediyası. Camışlar
  5. Azərbaycan Milli Ensiklopediyası/ II CİLD // Azərbaycan camışı. səh 487.
  6. Azərbaycan Nazirlır Kabineti <<Azərbaycan camışına keçmiş İttifaq Kənd Təsərrüfatı Nazirliyi tərəfindən “Qafqaz” camışı” adı verilməsi əsassız hesab edilməklə onun “Azərbaycan camışı” adı bərpa edilsin.>>
  7. 1 2 Azərbaycan camışı, ev heyvanı.
  8. 1 2 Qafqazın ilk əhəlləşdirilmiş məhsul verən canlısı
  9. Azərbaycanda camışçılıqla bağlu son vəziyyət
  10. "The State Statistical Committee of the Republic of Azerbaijan". www.azstat.org. İstifadə tarixi: 2019-01-25.