Həmid Həmidli

Həmid Həmidli
Şəxsi məlumatlar
Doğum tarixi	28 iyul 1996(1996-07-28)
Doğum yeri	Milabad, Beyləqan rayonu, Azərbaycan
Vəfat tarixi	19 sentyabr 2023(2023-09-19) (27 yaşında)
Vəfat yeri	Xocavənd rayonu, Azərbaycan
Vəfat səbəbi	Şəhid
Dəfn yeri	Milabad
Həyat yoldaşı	Günay Həmidli
Uşaqları	Könül Həmidli, Əli Həmidli
Atası	Əlisahib İsgəndərov
Anası	Könül Vəliyeva
Hərbi fəaliyyəti
Mənsubiyyəti	Azərbaycan Ordusu
Qoşun növü	Quru Qoşunları
Hərbi hissə	N saylı
Xidmət illəri	2017–2023
Rütbəsi	Kapitan
Vəzifəsi	Tabor komandiri
Döyüşlər	Tovuz döyüşləri (2020), İkinci Qarabağ müharibəsi, Qarabağda döyüşlər
Təltifləri

Həmidli Həmid Əlisahib oğlu (28 iyul 1996, Milabad, Beyləqan rayonu – 19 sentyabr 2023, Xocavənd rayonu) — şəhid.

Həyatı

Həmidli Həmid Əlisahib oğlu 28 iyul 1996-cı ildə Beyləqan rayonunun, Milabad kəndində anadan olmuşdur. Atası İsgəndərov Əlisahib Həmid oğlu Beyləqan rayonunda yaşayır, işsizdir. Anası Vəliyeva Könül Təbriz qızı Beyləqan rayonu, V. Cəfərov adına Milabad qəsəbə tam orta məktəbində ingilis dili müəlliməsi işləyir. Həmid Həmidli, 2002–2010-cu illərdə Cəbrayıl rayonu 21 saylı ümumi orta məktəbdə, 2010–2013-cü illərdə Cəmşid Naxçıvanski adına hərbi liseydə, 2013–2017-ci illərdə isə Heydər Əliyev adına Azərbaycan Ali Hərbi Məktəbində ali hərbi təhsil alıb.

Ailəlidir, iki övladı var.

Ailəsi

Həmid Həmidli 22.12.2017-ci il tarixdə Günay Cəfərzadə ilə ailə həyatı qurmuşdur. Əli adında oğlu, Könül adında isə qızı var.

Hərbi xidməti

2017-ci ildə leytenant rütbəsi alaraq təyinatı üzrə N saylı hərbi hissədə tank taqım komandiri vəzifəsinə, 6 ay sonra xidmətdə fərqləndiyinə görə tank bölüyünün komandiri vəzifəsinə təyin olunub. 2019-cu ildə Azərbaycan Ordusunda "Ən yaxşı tank bölüyü" adı uğrunda keçirilən yarışda bölüyü ilə birlikdə l yer qazanıb. 2020-ci ilin 12 iyul tarixindən etibarən Ermənistan—Azərbaycan dövlət sərhədinin Tavuş mərzi və Tovuz rayonu əraziləri boyunca başlayan döyüşlərdə iştirak edib. İkinci Qarabağ müharibəsi zamanı Fizuli rayonunun, Cəbrayıl rayonunun, Qubadlı və Xocavənd rayonlarının azadlığı uğrunda gedən döyüşlərdə fəal iştirak etmişdir. Həmid Həmidli 8 oktyabr 2020-ci ildə Hadrut rayonu uğrunda gedən döyüşlərdə "Hər iki ətrafın, gövdənin ön səthinin ikinci dərəcəli yanıq xəsarəti və partlayış travması, sol budunun qəlpə yaralanması xəsarəti almışdır. Azərbaycan Respublikasının müdafiəsi zamanı aldığı hərbi travmaya, xəstəliklər cədvəlinin 86-cı maddəsinin III qrafasına və ƏTC-yə (Azərbaycan Respublikasının Nazirlər kabinetinin 2008-ci il 29 fevral tarixli 59 nömrəli qərarı ilə təsdiq edilmiş "Hərbi-həkim ekspertizası haqqında Əsasnaməyə qoşma) əsasən xəstəliyə görə məzuniyyət verilmişdir. Məzuniyyət müddəti başa çatdıqdan sonra yenidən xidmətə başlamışdır.

Təltifləri

Azərbaycan Respublikası Silahlı Qüvvələrinin hərbi qulluqçularının "Füzulinin azad olunmasına görə" medalı ilə təltif edilməsi haqqında Azərbaycan Respublikası Prezidentinin Sərəncamı 25 dekabr 2020-ci il.

Azərbaycan Respublikası Silahlı Qüvvələrinin hərbi qulluqçularının "Xocavəndin azad olunmasına görə" medalı ilə təltif edilməsi haqqında Azərbaycan Respublikası Prezidentinin Sərəncamı 25 dekabr 2020-ci il.

Azərbaycan Respublikası Silahlı Qüvvələrinin hərbi qulluqçularının "Şücaətə görə" medalı ilə təltif edilməsi haqqında Azərbaycan Respublikası Prezidentinin Sərəncamı 30 dekabr 2020-ci il.

Azərbaycan Respublikası Silahlı Qüvvələrinin hərbi qulluqçularının "İgidliyə görə" medalı ilə təltif edilməsi haqqında Azərbaycan Respublikası Prezidentinin Sərəncamı 24 iyun 2021-ci il.

Azərbaycan Respublikası Nazirlər kabinetinin 21 aprel 2022-ci il tarixli 250 nömrəli sərəncamına əsasən "Vətən müharibəsi iştirakçısı" medalı.

Azərbaycan Respublikası Silahlı Qüvvələrinin hərbi qulluqçularının "Azərbaycan bayrağı" ordeni ilə təltif edilməsi haqqında Azərbaycan Respublikası Prezidentinin Sərəncamı 7 noyabr 2023-cü il. (ölümündən sonra)

Azərbaycan Respublikası Silahlı Qüvvələrinin hərbi qulluqçularının "Vətən uğrunda" medalı ilə təltif edilməsi haqqında Azərbaycan Respublikası Prezidentinin Sərəncamı 7 noyabr 2023-cü il. (ölümündən sonra)

"Azərbaycan Bayrağı" ordeni Şəhid Həmid Həmidlinin ailə üzvlərinə təqdim olunub

Sentyabrın 19–20-də Qarabağda keçirilən anti-terror əməliyyatları zamanı şəhidlik zirvəsinə ucalan qəhrəman şəhidlərimizdən Həmid Həmidli göstərdiyi şücaətə görə ölümündən sonra "Azərbaycan Bayrağı" ordeni ilə təltif olunub.

29 dekabr 2023-cü ildə Gənclər Mərkəzində tarixdə şəhidin xatirəsinə həsr olunmuş tədbir keçirilib, ordeni onun ailə üzvlərinə təqdim olunub.

Tədbirdə Rayon İcra Hakimiyyətinin başçısı və aparatın əməkdaşları, Səfərbərlik və Hərbi Xidmətə Çağırış üzrə Dövlət Xidmətinin Beyləqan Rayon Şöbəsinin rəisi, şəhid Həmid Həmidlinin xidmət göstərdiyi Hərbi Hissənin komandiri və şəxsi heyəti, şəhidin ailə üzvləri, yaxınları, hərbçi yoldaşları, qazilər, müəssisə və idarə əməkdaşları iştirak edib.

Dövlət Himni ilə tədbir açıq elan olunub və Şəhid Həmid Həmidlinin və Azərbaycan xalqının suverenliyi uğrunda şəhid olan həmvətənlərimizin əziz xatirəsi 1 dəqiqəlik sükutla yad edilib.

Şəhid Həmid Həmidlinin ailə və döyüş həyatını, döyüş xatirələrini özündə əksr etdirən videoçarxlar nümayiş olunmuş, şəhidin qısa amma şərəfli həyatı haqqında tədbir iştirakçılarına məlumat verilmişdir.

Rayon İcra Hakimiyyətinin başçısı Asif Ağayev tədbiri giriş nitqi ilə açaraq 44 günlük Vətən müharibəsində Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi altında müzəffər Azərbaycan Ordusunun işğal altındakı torpaqlarımızı azad etdiyini vurğulayaraq, bu möhtəşəm Qələbənin şəhidlərimizin qanı, canı bahasına əldə edildiyini, ölkəmizin ərazi bütövlüyü uğrunda gedən döyüşlərdə şəhid olmuş qəhrəman Vətən övladlarının xatirəsinin həmişə uca tutulduğunu bildirib.

Hərbi Hissə komandirləri, qazilər, Milabad kənd tam orta məktəbin müəllimi çıxış edərək şəhid Həmid Həmidliylə olan xatirələrindən, onun necə vətənpərvər bir insan olduğundan danışaraq torpaqlarımızın azadlığının onun üçün ən böyük arzu olduğunu və şərəfli yolda heç vaxt geri çəkilmədiyini tədbir iştirakçılarının diqqətinə çatdırıblar.

Daha sonra şəhid Həmid Həmidlinin "Azərbaycan Bayrağı" ordeni ondan yadigar qalan övladına təqdim olunub.

Tədbirin sonunda şəhidin valideynləri Könül xanım və Əlisahib İsgəndərov çıxış edərək qəhrəman övladları ilə fəxr etdiklərini, torpaqlarımızın azad olunmasında göstərdiyi şüacətə görə onunla hər daim fəxr edəcəklərini deyiblər.

Qeyd edək ki, Azərbaycanın hərb tarixinə qızıl hərflərlə yazılan, Qələbəmizin qazanılmasında böyük payı olan igid oğullarımızdan biri də Həmidli Həmiddir. Həmidli Həmid Azərbaycanın ərazi bütövlüyünün bərpa olunması üçün başlanan Vətən müharibəsi zamanı düşmənə qarşı aparılan hərbi əməliyyatlarda iştirak edib əsl igidlik nümunəsinə çevrildi. Ömrünü, gününü və nəhayət canını torpağımızın, vətənimizin azadlığı uğrunda fəda edən, döyüşlərdə bir an belə geri çəkilməyən igidimiz İkinci Qarabağ Müharibəsindən qələbə ilə ayrıldı. Döyüşlərdə ağır yaralanmasına baxmayaraq sağalıb yenə vətənə olan borcunu ödəmək üçün hərb sahəsinə geri dönən qəhrəmanımız sentyabrın 19–20-də Qarabağda keçirilən anti-terror əməliyyatları zamanı şəhidlik zirvəsinə ucaldı.

O, dəfələrlə döyüş tapşırıqlarının yerinə yetirilməsində və xidmətdə fərqlənməsinə görə Azərbaycan Ordusunda "Ən yaxşı tank bölüyü"adı uğrunda keçirilən yarışlarda, Vətən müharibəsi dövründə göstərdiyi şücaətlərinə görə hərbi hissə komandirləri və baş qərargah rəisi tərəfindən dəfələrlə medal və Fəxri fərmanlarla tərtif edilib.

44 günlük müharibə zamanı isə Cəbrayıl, Füzuli, Xocavəndin azad olunmasına görə medallarla təltif edilib. Həmçinin "İgidliyə görə", "Şücaətə görə", "Vətən Müharibəsi İştirakçısı" və "Cəsur döyüşçü" medallarına da layiq görülüb.

2019-cu ildə Azərbaycan Silahlı Qüvvələrinin ən yaxşı tank bölüyü komandiri seçilən baş leytenant Həmid Həmidli Vətən müharibəsi zamanı Füzuli uğrunda gedən döyüşlərdə idarə etdiyi tankla gecədən səhərədək düşmənin yüzlərlə canlı qüvvəsini, 1 hərbi yük maşınını, 1 tank və 1 PDMi məhv edib.

Düşmənin raket zərbəsi ilə vurduğu tankın içərisindən özünü və 3 yoldaşını sağ çıxarıb. Həmid həm də onlarla yaralı əsgərlərimizi döyüş meydanından çıxarıb. Ağır yanıq xəsarətləri alsa da, sağalıb və yenidən hərbiyə yollanıb.