Kasia Mos

Vikipediya, açıq ensiklopediya
Jump to navigation Jump to search
Kasia Mos
pol. Kasia Moś
Kasia Moś Red Carpet 2017.jpg
Kasia Mos 2017-ci ildə Kiyevdə
Sənətçi məlumatları
Doğum adı Katarjina Mos
pol. Katarzyna Moś
Doğum tarixi 3 mart 1987 (1987-03-03) (32 yaş)
Doğum yeri Ruda Slyoska, Polşa
Vətəndaşlığı Polşa Polşa
Peşələri müğənni, bəstəkar, rəqqasə

Üslub
Ləqəbi Kasia Mos
Musiqi aləti violonçel, piano
Fəaliyyət illəri 2002–h.h.
Albom şirkəti Fonografika
Əlaqələri The Pussycat Dolls
kasiamos.pl
Commons-logo.svg Vikianbarda əlaqəli mediafayllar

Katarjina "Kasia" Mos (pol. Katarzyna "Kasia" Moś, d. 3 mart 1987, Ruda Slyoska, Polşa) — Polşa müğənnisi, bəstəkarı və rəqqasəsi. O, 2011-ci ildə Amerikanın məşhur The Pussycat Dolls qrupunun üzvü olmuşdur. 2012-ci ildə Kasia Polşanın Must Be the Music musiqi yarışmasında iştirak edərək, üçüncü yeri qazanmışdır. Müğənni "Flashlight" mahnısı ilə Polşanı 2017 Avroviziya Mahnı Müsabiqəsində təmsil etmişdir.

Həyatı[redaktə | əsas redaktə]

Kasia Mos 3 mart 1987-ci ildə Polşanın Ruda Slyoska şəhərində, Aukso orkestrinin dirijoru Marek Mosun ailəsində dünyaya göz açmışdır. Erkən yaşlarından musiqi ilə maraqlanan Kasia Polşanın Bıtom şəhərində yerləşən Frederik Şopen adına musiqi məktəbində təhsil almış və orada violonçelpianoda ifa etməyi öyrənmişdir. O eyni zamanda Katovitse şəhərində yerləşən Karol Şımanovski adına musiqi akademiyasında caz və müasir musiqi janrında təhsil almışdır. Musiqi karyerasına başlamazdan öncə Kasia 15 yaşında ikən vokal dərsləri almağa başlamışdır.

Musiqi karyerası[redaktə | əsas redaktə]

Musiqi karyerasının ilk illərində Kasia Mos bir neçə ansambl ilə birlikdə çıxışlar etmişdir. O eyni zamanda Katovitse musiqi akademiyasının caz bölməsində fəaliyyət göstərən müəllim və tələbələrdən təşkil olunmuş The Fire qrupunun üzvü olaraq çalışmışdır.

2002-ci ildə Kasia özünün ilk demosunu yazdırmışdır. 2005-ci ildə müğənninin "I Wanna Know" adlı mahnısı dinləyicilərə təqdim edilmişdir. Həmin mahnı ilə Kasia Polşanın TVP telekanalının 2006 Avroviziya Mahnı Müsabiqəsi üçün təşkil etdiyi Piosenka dla Europy 2006 adlı milli seçim turunda iştirak etmişdir. Yarışmada onuncu yeri tutaraq, Avroviziyada iştirak hüququnu əldə edə bilməmişdir. 2008-ci ildən 2009-cu ilə kimi Kasia Polşa musiqili teatrlarında İuda obrazında çıxış etmişdir.

Kasia Mos Avroviziya 2017-nin açılış mərasimində

2011-ci ildə Kasia ABŞ-ın Las-Veqas ştatına səyahətə yollanmış və orada məşhur The Pussycat Dolls qrupunu yaradan prodüser Robin Antin ilə görüşmüşdür. Polşaya geri döndükdə müğənni bir neçə demo yazdıraraq Robin Antinə göndərmişdir. Həmin ilin sonlarında o yenidən Amerikaya səyahət etmiş və Robinin istəyi ilə The Pussycat Dolls qrupuna üzv seçilmişdir. Bir illik anlaşma müddətində Kasia bir neçə tanınmış Amerika sənətçiləri ilə əməkdaşlıq etmişdir.

2012-ci ildə müğənni Polşanın Must Be the Music musiqi yarışmasının dinləmələrinə qatılmışdır. Dinləmələrdə Areta Franklinin "(You Make Me Feel Like) A Natural Woman" mahnısını ifa edən Kasia yarışmanın yarımfinal mərhələsinə vəsiqə qazanmağa nail olmuşdur. Yarımfinal mərhələsində göstərdiyi yüksək səviyyəli ifa sayəsində müğənni finala yüksələ bilmişdir. Finalda isə Kasia üçüncü yerdə qərarlaşmışdır.

2015-ci ilin oktyabr ayında Kasia Mosun Inspination adlı ilk studio albomu işıq üzü görmüşdür. Albomda yer alan mahnılardan "Addiction" ilə Kasia Polşanın TVP telekanalının 2016 Avroviziya Mahnı Müsabiqəsi üçün təşkil etdiyi Krajowe Eliminacje 2016 adlı milli seçim turuna qatılmışdır. 2016-cı ilin mart ayında baş tutan milli seçim turunda Kasia "Addiction" mahnısı ilə altıncı yeri tutmuş və növbəti dəfə Avroviziyada ölkəsini təmsil etmək fürsətini əldən vermişdir.

2017-ci ilin fevral ayında Kasia ikinci studio albomuna daxil edəcəyi "Flashlight" mahnısını dinləyicilərə təqdim etmişdir. Həmin mahnı ilə növbəti dəfə Polşanın Avroviziya üçün təşkil etdiyi milli seçim turuna qatılan Kasia bu dəfə yarışmada qalib gələrək, Polşanı Ukraynanın paytaxtı Kiyevdə keçirilən 2017 Avroviziya Mahnı Müsabiqəsində təmsil etmək hüququnu qazanmışdır.[1] Kasia Mos 9 may tarixində baş tutan yarımfinal mərhələsində 11-ci nömrə altında çıxış etmişdir. Nəticədə 119 xalla 9-cu yerdə qərarlaşaraq, final mərhələsinə vəsiqə qazanmışdır. Müsabiqənin finalında bir daha öz mahnısını ifa edən Kasia 26 ölkə təmsilçisinin mübarizə apardığı şouda 64 xal toplayaraq, 22-ci yerdə qərarlaşmışdır.

Diskoqrafiya[redaktə | əsas redaktə]

Albomlar[redaktə | əsas redaktə]

  • Inspination (2015)

Sinqllar[redaktə | əsas redaktə]

  • "I Wanna Know" (2006)
  • "Pryzmat" (2015)
  • "Addiction" (2016)
  • "Flashlight" (2017)

İstinadlar[redaktə | əsas redaktə]

  1. "Poland: Kasia Mos to Represent Poland at Eurovision 2017". Eurovoix (18 fevral 2017).
Əvvəlki:
Mixal Şpak
"Color of Your Life"
Polşa Avroviziya Mahnı Müsabiqəsində
EuroPolonia.svg

2017
Sonrakı:
GromeeLukas Meyer
"Light Me Up"

Xarici keçidlər[redaktə | əsas redaktə]