Namiq Həsənov (siyasətçi)

Namiq Həsənov
Namiq Həsən oğlu Həsənov
Naxçıvan Muxtar Respublikası Ali Məclisinin sədri
Aprel 1994 – iyul 1995
Əvvəlki	Heydər Əliyev
Sonrakı	Vasif Talıbov
Şəxsi məlumatlar
Doğum tarixi	17 iyul 1944
Doğum yeri	Cəhri, Babək rayonu, Naxçıvan MSSR
Vəfat tarixi	8 sentyabr 2020 (76 yaşında)

Namiq Həsən oğlu Həsənov (17 iyul 1944, Naxçıvan rayonu – 8 sentyabr 2020) — Naxçıvan MR Ali Məclisinin sabiq sədri.

Həyatı

17 iyul 1944-cü ildə Naxçıvan Muxtar Respublikasındakı Babək rayonunun Cəhri kəndində müəllim ailəsində anadan olmuşdur.

1966-cı ildə Azərbaycan Dövlət Pedaqoji İnstitutunun fizika-riyaziyyat fakültəsini, 1981-ci illərdə Bakı Ali Partiya məktəbini bitirmişdir.

2020-ci ilin 8 sentyabr tarixində vəfat edib.

Əmək fəaliyyəti

Əmək fəaliyyətinə 1961–62-ci illərdə Bakı şəhərindəki "Bakı fəhləsi" adına zavodda tornaçı kimi başlamışdır.

Azərbaycan Dövlət Pedaqoji İnstitutunun fizika-riyaziyyat fakültəsində əyani təhsilini başa vurduqdan sonra 1966–69-cu illərdə Cəhri kənd orta məktəbində, sonra ısə Naxçıvan şəhər 1 nömrəli orta məktəbində, 4 nömrəli gecə məktəbində və Naxçıvan sovxoz texnikumunda fizika müəllimi olmuşdur.

1969–73-cü illərdə Naxçıvan şəhər komsomol komitəsində məktəbli gənclər şöbəsinin müdiri, Vilayət Komsomol Komitəsində mühazirəçilər qrupunun rəhbəri, təşkilat və komsomol işi şöbəsinin müdiri vəzifələrində işləmişdir.

1973–79-cu illərdə Naxçıvan şəhər Komsomol Komitəsinin birinci katibi olmuşdur.

Sonrakı illərdə Naxçıvan Vilayət Partiya Komitəsində təbliğat-təşviqat şöbəsinin təlimatçısı (1977–79) və şöbə müdirinin müavini (1981–83) işləmişdir. 1979–81-ci illərdə Bakı Ali Partiya məktəbində siyasi təhsil almışdır.

1983–92-ci illərdə Naxçıvan MR Daxili İşlər Nazirliyində siyasi şöbə rəisi, nazir müavini vəzifələrində olmuşdur. Erməni təcavüzünün başladığı ağır illərdə düşmən hücumlarının qarşısının alınmasında, bu sahədə polisin qüvvə və səylərinin səfərbər edilməsində, sərhədlərdəki davamlı müdafiə və əməliyyat tədbirlərinin həyata keçirilməsində xüsusi xidmətlər göstərmişdir. Sədərək, Şərur, Günnüt, Kərməçətaq, Buzqov, Şada və digər döyüş bölgələrində erməni terrorçularına qarşı aparılan döyüşlərin əsas təşkilatçılarından biri olmuşdur.

Bəzi məqsədli siyasi qüvvələrin Naxçıvanın idarəolunmasını, stabilliyini pozmaq, inzibati orqanlarla, xüsusilə Daxili İşlər Nazirliyi ilə Ali Məclisin rəhbərliyi arasında inamsızlıq yaradıb dövlət çevrilişi etmək cəhdlərinin qarşısının alınmasında N. Həsənov hər an H. Əliyevin yanında olmuşdur. Həmin illərin digər gərgin və mürəkkəb ictimai-siyasi proseslərində də aydın mövqeyi, bacarığı və nüfuzu ilə seçilib fərqlənmişdir.

Ehtiyatda olan polis polkovnikidir, Silahlı qüvvələr və müharibə veteranıdır.

yanvar 1993-cü ildə Naxçıvan MR Ali Məclisinin dövlət quruculuğu, yerli dövlət hakimiyyəti orqanları şöbəsinin müdiri vəzifəsinə kecmişdir.

aprel 1994-cü ildə ölkə prezidenti H. Əliyevin tövsiyəsi ilə Naxçıvan MR Ali Məclisinin Sədri vəzifəsinə seçilmiş, 1995-ci ilin iyul ayınadək Muxtar Respublikaya rəhbərlik etmişdir.

Ali Məclisin sədri işlədiyi illərdə Ulu öndərin 1990-cı ildən başlayaraq Naxçıvanda həyata keçirdiyi dəsti-xəttə sadiq olmuş, bölgədəki çətin, gərgin durumu aradan qaldırmaq, müdafiə qabiliyyətini möhkəmləndirmək, yaşanan çox ağır iqtisadi- sosial problemlərin həlli yollarının tapılması sahəsində mühüm və yaddaqalan işlər görmüşdür.

iyul 1995-ci ildə Azərbaycan Respublikası Əmək və Əhalinin Sosial Müdafiəsi nazirinin müavini vəzifəsinə təyin edilmiş, yanvar 2000-ci ilədək bu vəzifədə bacarıqla, yaddaqalan səmərəli iş üslubu ilə işləmişdir.

İctimai fəaliyyəti

Naxçıvan şəhər Partiya Komitəsinin plenum və büro üzvü, Azərbaycan Komsomolu Mərkəzi Komitəsinin, Naxçıvan Vilayət Partiya Komitəsinin plenum üzvü (1973–90), Naxçıvan MR Ali Məclisinin deputatı (1990–95), Azərbaycanın yeni Konstitusiyasını hazırlayan Dövlət Komissiyasının üzvü (1995);

Əmək və Əhalinin Sosial Müdafiəsi Nazirliyində "Pensiya islahatı" komissiyasının rəhbəri,

Səhiyyə Nazirliyində "Səhiyyə İslahatı Dövlət Komissiyasının" və Dövlət Antiinhisar Siyasəti Komitəsinin nəzdində "Sahibkarlığa Kömək Milli Fondunun" üzvü, Nazirlər Kabineti nəzdində "Qaçqın və məcburi köçkünlərin sosial inkişafı Fondu" üzrə hökumət komissiyasının üzvü (1996–1999) olmuşdur.

Heç bir siyasi partiyada təmsil olunmur.

Beynəlxalq tədbirlərdə iştirakı

Brüssel şəhərində keçirilən "Həyyat səviyyəsinin yaxşılaşdırılması" problemləri üzrə konfrans (1995-ci ilin dekabrı);

Cenevrə şəhərində Beynəlxalq Əmək Təşkilatının 83-cü konfransı (1996-cı ilin iyunu);

Tehran şəhərində İslam Ölkələri İqtisadi Əməkdaşlıq Təşkilatının (EKO) xətti ilə keçirilən, İİR prezidenti H. Rəfsəncani tərəfindən sədirlik edilən konfrans (1996-cı ilin oktyabrı);

Dublində (İrlandiya) Beynəlxalq Əmək Təşkilatının xətti ilə "Sosial əməkdaşlıq" mövzusunda beynəlxalq simpozium (1997-ci ilin noyabrı);

Ankarada hökumət səviyyəsində keçirilən "İşçi sağlığı və işçi güvənliyi həftəsi" (1994-cü ilin may ayı).

Həmin tədbirlərin hər birində Respublikamızın təcrübəsi və problemlərinə dair çıxışlar edib.