Afiyəddin Cəlilov

Afiyəddin Cəlilov
Azərbaycan Respublikası Ali Sovetinin Sədr müavini 1992 — 1994
Naxçıvan Muxtar Respublikasının Ali Məclisinin Sədri noyabr 1990 — aprel 1991
Sələfi	vəzifə təsis olunub
Xələfi	Əkbər Əliyev
Naxçıvan Muxtar Respublikası Ali Sovetinin Prezidiumunun Sədri aprel 1990 — noyabr 1991
Sələfi	Səkinə Əliyeva
Xələfi	vəzifə ləğv olunub
Naxçıvan Muxtar Respublikasının Partiya Komitəsinin Birinci katibi yanvar 1990 — aprel 1991
Sələfi	Heydər İsayev
Xələfi	Əkbər Əliyev
Naxçıvan Muxtar Respublikasının Nazirlər Sovetinin sədri 1989 — yanvar 1990
Sələfi	Heydər İsayev
Xələfi	Mirismayıl Əliyev
Doğum tarixi	8 yanvar 1946(1946-01-08)
Doğum yeri	Naxçıvan şəhəri, Azərbaycan SSR, SSRİ
Vəfat tarixi	29 sentyabr 1994 (48 yaşında)
Vəfat yeri	Bakı, Azərbaycan
Dəfn yeri	Fəxri Xiyaban
Atası	Cəlil Cəlilov
Uşaqları	Nihad Cəlilov

Afiyəddin Cəlilov (tam adı: Afiyəddin Cəlil oğlu Cəlilov; d. 8 yanvar 1946, Naxçıvan şəhəri, Azərbaycan SSR, SSRİ – ö. 29 sentyabr 1994, Bakı, Azərbaycan) — Azərbaycanın dövlət və siyasi xadimi. Bir sıra yüksək dövlət vəzifələrində, o cümlədən Naxçıvan Muxtar Respublikasının Ali Məclisinin sədri, Azərbaycan Respublikası Ali Sovetinin sədr müavini, Azərbaycan Respublikası Prezidentinin müşaviri vəzifələrində çalışmışdır.

Həyatı

Bakıda Afiyəddin Cəlilovun xatirə lövhəsi

Erkən illəri

Afiyəddin Cəlilov 1946-cı il yanvarın 8-də Naxçıvan şəhərində anadan olmuşdur. 1969-cu ildə Leninqrad Dağ-Mədən İnstitutunu və 1981-ci ildə Moskvada İKP MK yanında İctimai EA-nı bitirmişdir.

1969-1973-cü illərdə Naxçıvan duz mədənlərində mühəndis-mexanik işləmişdir. Sonralar 1973-1979-cu illərdə məsul komsomol, partiya və dövlət işində çalışmış, Naxçıvan Vilayət Komsomol Komitəsinin 1-ci katibi və Azərbaycan LKGİ Milli Komitəsinin katibi işləmişdir. O, 1979-1981-ci illərdə Azərbaycan Kommunist Partiyası Milli Komitəsinin təlimatçısı işləmişdir. 1981-1989-cu illərdə Bakı şəhəri Nəsimi rayonu partiya komitəsinin 1-ci katibi işləmişdir.

İctimai-siyasi fəaliyyəti

Afiyəddin Cəlilov 1989-1992-ci illərdə Naxçıvan Muxtar Respublikası Nazirlər Sovetinin sədri, Partiya Komitəsinin 1-ci katibi, Naxçıvan Muxtar Respublikası Ali Məclisinin sədri, Azərbaycan Respublikası Prezidentinin müşaviri olmuşdur. O, Naxçıvanda işlədiyi dövrdə Ermənistanın təcavüzü nəticəsində blokada şəraitində yaşayan Naxçıvan MR-in iqtisadi-sosial problemlərinin həlli, muxtar respublikada vətandaş həmrəyliyinin yaranması və sabitliyinin qorunub saxlanması sahəsində önəmli fəaliyyət göstərmişdi.

Parlamentdə

Afiyəddin Cəlilov 1992-ci ildən Azərbaycan Respublikası Milli Məclisi Sədrinin müavini olmuş, ölkənin dövlət müstəqilliyinin möhkəmləndirilməsində və onun daxili və xarici siyasətinin formalaşmasında fəal iştirak etmişdir. 1994-cü ildə Qara Dəniz İqtisadi Əməkdaşlıq Təşkilatı Parlament Assambleyasının vitse-prezidenti seçilmişdi. O, Azərbaycan SSR və Naxçıvan MSSR Ali Sovetinin (bir neçə çağırış), Naxçıvan MR Ali Məclisinin deputatı olmuşdur.

Bişkek protokolu

Afiyəddin Cəlilov 1994-cü il mayın 5-də Bişkekdə Bişkek protokolunun imzalanmasına Azərbaycan hakimiyyətindən göndərilmişdi. Həmin sənədi Azərbaycan Milli Məclisinin vitse-spikeri Afiyəddin Cəlilov, Ermənistan Milli Məclisinin sədri Babken Ararktsyan, DQEİ-nin üzvü, həmin günlərdə “DQR parlamentinin spikeri” kimi təqdim edilən Karen Baburyan, MDB ölkələri Parlamentlərarası Assambleyanın sədri Vladimir Şumeyko, Qırğızıstan Ali Sovetinin sədri Medetkan Şerimkulov, Rusiya Prezidentinin səlahiyyətli nümayəndəsi, Rusiya vasitəçilik missiyasının rəhbəri Vladimir Kazimirov və MDB ölkələri Parlamentlərarası Assambleya Şurasının katibliyinin rəhbəri Mixail Krotov imzalamalı idi.

Təklif olunan protokolun imzanalmasında rəsmi Bakıya məlumat verilmişdi ki, atəşkəsin imzalanması yalnız Azərbaycanla Ermənistan arasında olacaq. O zaman Rusiyanı bu prosesdə təmsil edən ATƏT-in Minsk Qrupunun həmsədri Vladimir Kazimirov imzalanmaya çıxardığı protokola qondarma "Dağlıq Qarabağ Respublikası"nın adını da əlavə etmişdir. Bunu gördükdən sonra Afiyəddin Cəlilov Bişkekdən birbaşa Heydər Əliyevə zəng vurub vəziyyət haqqında məlumat verdi. Heydər Əliyev də onun gecə geri dönməsini əmr etdi. Həmin gün Afiyəddin Cəlilov da protokolu imzalamadan Azərbaycana geri qayıtdı.

Ölümü

Bakıda Afiyəddin Cəlilovun məzarı

O, 1994-cü il sentyabrın 29-da Bakıda yaşadığı binanın blokunda sui-qəsd nəticəsində qətlə yetirilib. Afiyəddin Cəlilovun qətli ilə bağlı bu günədək müxtəlif versiyalar səsləndirilir.

Türkiyənin Azərbaycandakı səfirliyinin keçmiş mətbuat müşaviri Turqut Ərin fikrincə, Afiyəddin Cəlilovun ölümünün əsas səbəbi Azərbaycanın altı rayonunun ermənilərə verilməsinin sirrini bilməsi idi.

İrsi

Naxçıvan şəhərində 12 saylı orta məktəb onun adını daşıyır.

Ədəbiyyatda

İsa Nəcəfovun 2002-ci ildə nəşr olunmuş povesti Gecə yarısı qətl Afiyəddin Cəlilov ilə Şəmsi Rəhimovun qətlinə və 1994, 1995-ci il hadisələrinə həsr olunmuşdur.

Təltif və mükafatları

2 Şərəf nişanı ordeni və medallarla təltif olunmuşdur.

Həmçinin bax

• Şəmsi Rəhimov
• Rövşən Cavadov
• Məhəmməd Əsədov

Xarici keçidlər

• Görkəmli Naxçıvanlılar - Afiyəddin Cəlilov
• "Afiyəddin Cəlilovu da Hacı Məmmədov qətlə yetirib?" ( (azərb.)). azadliq.info. 2011-06-21. Arxivləşdirilib: [6] saytından 2015-01-16 tarixində. http://web.archive.org/web/20150118140942/http://www.azadliq.info/siyast/7315-afiyddin-clilovu-da-hac-mmmdov-qtl-yetirib.html. İstifadə tarixi: 2015-01-16.
• "MTN-nin sabiq müstəntiqi «bomba partlatdı»" ( (azərb.)). azadliq.info. 2011-08-06. Arxivləşdirilib: [7] saytından 2015-01-16 tarixində. http://web.archive.org/web/20150118142315/http://www.azadliq.info/siyast/7755-mtn-nin-sabiq-muestntiqi-lbomba-partlatdr.html. İstifadə tarixi: 2015-01-16.
• "Heydər Əliyev Surət Hüseynovu 1 milyard dollara aldı" ( (azərb.)). azadliq.info. 2011-08-07. Arxivləşdirilib: [8] saytından 2015-01-16 tarixində. http://web.archive.org/web/20150118142526/http://www.azadliq.info/siyast/7825-heydr-liyev-surt-hueseynovu-1-milyard-dollara-ald.html. İstifadə tarixi: 2015-01-16.