Rəna Ağabəyli
| Rəna Ağabəyli | |
|---|---|
| Rəna Ağaxan qızı Ağabəyli | |
| Doğum tarixi | |
| Doğum yeri | Gəncə |
| Atası | Ağaxan Ağabəyli |
| Elm sahələri | Genetika, Biologiya |
| Elmi dərəcəsi | Biologiya elmləri doktoru |
| Elmi adı | Professor |
Rəna Ağabəyli (3 yanvar 1942, Kirovabad) — Genetik, Biologiya elmləri doktoru, professor. [1][2]
Haqqında
[redaktə | mənbəni redaktə et]Rəna Ağaxan qızı Ağabəyli 1942-ci il yanvar ayının 3-də Gəncə şəhərində tanınmış ziyalı, Ümumittifaq Kənd Təsərrüfatı Elmlər Akademiyasının müxbir üzvü, professor Ağaxan Ağabəylinin ailəsində dünyaya gəlmişdir. 1965-ci ildə Azərbaycan Dövlət Universitetinin biologiya fakültəsini bitirmişdir.
1966-1969-cu illərdə Azərbaycan ЕА Botanika İnstitutunun aspiranturasında təhsil alarkən Moskva şəhərinə SSRİ Elmlər Akademiyasının Ümumi Genetika İnstitutuna ezam olunmuşdur. Müasir metodlara yiyələnərək böyük elmi təcrübə toplamış R.A.Ağabəyli 1972-cü ildə “Genetika” ixtisası üzrə “Yeni kompleksli kimyəvi mutagenlərin sitoloji və sitogenetik aktivliyinin tədqiqi” mövzusunda namizədlik dissertasiyasını uğurla müdafiə etmişdir.
1992-ci ildə “Antioksidantlar və antioksidant fermentlər mutasiya prosesinin tənzimlənməsində” mövzusunda doktorluq dissertasiya işini böyük müvəffəqiyyətlə müdafiə edərək biologiya elmləri doktoru alimlik dərəcəsini almışdır.
R.A.Ağabəyli 1972-cı ildən Azərbaycan EA Fizika İnstitutunun Fiziki-kimyəvi biologiya sektorunda böyük elmi işçi, 1983-1987-ci illərdə həmin sektorun elmi katibi vəzifələrində çalışmışdır. 1980-ci ildə SSRİ EA AAK-nın qərarı ilə o, baş elmi işçi (indiki dosent) adına layiq görülmüşdür. 1987-ci ildən etibarən onun elmi taleyi Botanika İnstitutuna bağlanmış və artıq 35 ildir ki, fasiləsiz olaraq bu elm ocağında aparıcı elmi işçi, eksperimental mutagenez qrupunun rəhbəri kimi müxtəlif vəzifələrdə çalışmış və hazırda o, İnstitutun “Geobotanika” şöbəsinin baş elmi işçisidir. 2005-ci ildə o, professor elmi adına layiq görülmüşdür.
R.A.Ağabəyli əksəriyyəti xaricdə dərc olunmuş 200-dən çox elmi əsərlərin, o cümlədən 3 monoqrafiya, 4 kitab və 8 müəlliflik şəhadətnamələri və patentlərin müəllifidir. 1984-2011-ci illər ərzində alimin Rusiya, Ukrayna, Gürcüstan, Moldova, ABŞ, Böyük Britaniya, İsveçrə, Finlandiya, Türkiyə, Almaniya, Fransa, İtaliya, Yunanıstan, Avstriya, Macarıstan, Bolqarıstan, Avstraliya, Yaponiya və bir sıra başqa ölkələrdə Mutagenez və Kanserogenez, Antimutagenez və Antikanserogenez, Bioantioksidantlar və digər mövzularda keçirilmiş nüfuzlu beynəlxalq konfrans və konqreslərdə təqdim etdiyi məruzələr xüsusi diqqətlə qarşılanmışdır.
Onun elmi rəhbərliyi altında 5 fəlsəfə doktoru dissertasiya işi müvəffəqiyyətlə müdafiə olunmuşdur.
R.A.Ağabəyli AMEA Botanika İnstitutunun Elmi Şurasının üzvüdür. 2009-cu ilə qədər Botanika İnstitutunun nəzdində fəaliyyət göstərən Müdafiə Şurasının üzvü olmuş, 2009-cu ildən isə Azərbaycan Respublikası Prezidenti yanında Ali Attestasiya Komissiyasının biologiya və kənd təsərrüfatı elmləri üzrə Ekspert Şurasının işinə cəlb olunmuş və hazırkı günədək orada ekspert kimi fəaliyyət göstərir. Alim Azərbaycan Botaniklər Cəmiyyətinin, 1997-ci ildən Ksenobiotiklərin Tədqiqi üzrə elmi cəmiyyətin (İSSX, ABŞ), 2000-ci ildən İnsan və Biosfer (MaB, YUNESKO) Azərbaycan Milli Komitəsinin üzvü, həmçinin həmin komitənin “Ekoloji sivilizasiya, Davamlı inkişaf, Ətraf mühit” illik nəşri və Gürcüstanda dərc olunan “Annals of agrarian science” jurnalının redaksiya heyətinin üzvüdür.
R.A.Ağabəyli AMEA rəhbərliyi tərəfindən AMEA Rəyasət Heyətinin Fəxri Fərmanına layiq görülmüşdür.[2]
Həmçinin bax
[redaktə | mənbəni redaktə et]İstinadlar
[redaktə | mənbəni redaktə et]- ↑ "AĞABƏYLİ Rəna Ağaxan qızı - Azərbaycan Milli Ensiklopediyası". 2022-08-09 tarixində arxivləşdirilib. İstifadə tarixi: 2021-11-23.
- ↑ 1 2 Azərbaycan qadını ensiklopediyası. Bakı, 2002, s. 24