Vaqif Qasımov

Vaqif Qasımov
Vaqif Əlicavad oğlu Qasımov
Doğum tarixi	8 iyun 1963
Doğum yeri	Padar, Hacıqabul rayonu, Azərbaycan SSR, SSRİ
Vətəndaşlığı	SSRİ→ Azərbaycan
Atası	Qasımov Əlicavad Zəbulla oğlu
Anası	Qasımova Durna Qulam qızı
Elm sahələri	mühəndis-riyaziyyatçı və proqramçı
Elmi dərəcəsi	texnika elmləri doktoru
Elmi adı	professor
İş yerləri	Azərbaycan Texniki Universiteti, Kompüter sistemləri və şəbəkələri, kafedra müdiri
Təhsili	Azərbaycan Neft və Kimya İnstitutu
Mükafatları	“Hərbi xidmətlərə görə” medalı Azərbaycan Respublikasının Milli Təhlükəsizlik Nazirinin əmrləri ilə müxtəlif medal və Fəxri Fərmanlar

Qasımov Vaqif Əlicavad oğlu — Azərbaycan Texniki Universiteti, Kompüter sistemləri və şəbəkələri, kafedra müdiri, Texnika Elmləri Doktoru, Professor. 8 iyun 1963-cü ildə Azərbaycan Respublikasının Hacıqabul rayonunun Padar kəndində anadan olmuşdur. 1978-ci ildə 12 №-li Padar 8 illik məktəbini, 1980-ci ildə isə Qarasu kənd orta məktəbini fərqlənmə ilə bitirmişdir.

Haqqında

1981-ci ildə M.Əzizbəyov adına Azərbaycan Neft və Kimya İnstitutunun (indiki Azərbaycan Dövlət Neft və Sənaye Universitetinin) “İstehsal proseslərinin avtomatlaşdırılması” fakültəsinə daxil olmuş, “Tətbiqi riyaziyyat” ixtisası üzrə təhsil almağa başlamışdır. Təhsildə xüsusilə fərqləndiyinə görə institutun “Tətbiqi riyaziyyat” kafedrasında laborant vəzifəsinə işə qəbul edilmişdir.Əlaçı tələbə olduğuna görə Vaqif Qasımov həmin dövrdə Ümummilli lider Heydər Əliyev tərəfindən həyata keçirilən məqsədli təhsil proqramı çərçivəsində təhsilini davam etdirmək üçün 1983-cü ildə İ.M.Qubkin adına Moskva Neft və Qaz Universitetinə göndərilmişdir. 1986-cı ildə həmin universitetin “Avtomatika və hesablama texnikası” fakültəsini “Tətbiqi riyaziyyat” ixtisası üzrə bitirərək mühəndis-riyaziyyatçı və proqramçı ixtisaslarına yiyələnmiş, informasiya texno-logiyaları sahəsində mütəxəssis kimi formalaşmışdır. Ali təhsilini başa vurduqdan sonra 1986-cı ildə milli kadr kimi Azərbaycana qayıdaraq, təyinat üzrə Azərbaycan Milli Elmlər Akademiyasında elmi fəaliyyətə başlamışdır. 1986-cı ildə Akademiyanın Fizika İnstitutunun Fiziki-kimyəvi biologiya bölməsində böyük laborant, 1987-90-cı illərdə Nəbatat İnstitutunun Biologiyada riyazi modelləşdirmə sektorunda kiçik elmi işçi vəzifələrində işləmişdir. 1990-cı ildən fəaliyyətini Azərbaycan Milli Elmlər Akademiyasının İnformasiya və Telekommunikasiya Elmi Mərkəzində (indiki İnformasiya Texnologiyaları İnstitutu) davam etdirmişdir. O, burada böyük elmi yaradıcılıq yolu keçərək, I dərəcəli mühəndis, aparıcı mühəndis, qrup rəhbəri vəzifələrində çalışmış, 1993-cü ildən 2000-ci ilədək isə informasiya sistemləri, kompüter şəbəkələri və informasiya təhlükəsizliyi problemləri ilə məşğul olan elmi-tədqiqat laboratoriyasına rəhbərlik etmişdir. Proqramçı mühəndis kimi bir çox dövlət və hökumət strukturlarında, banklarda və digər təşkilatlarda kompüter texnologiyalarının tətbiqi, informasiya sistemlərinin, məlumat bazalarının, kompüter şəbəkələrinin yaradılması və tətbiqi ilə nəticələnən praktiki layihələr həyata keçirmişdir. Azərbaycanda İnternet şəbəkəsinin ilk qovşağının yaradılması və sonradan genişlənməsi işində çox yaxından iştirak etmişdir. Həmin dövrdə Azərbaycan Milli Elmlər Akademiyasının elmi-tədqiqat institutlarını, respublikanın aparıcı universitetlərini və digər dövlət təşkilatlarını özündə birləşdirən akademik İnternet mərkəzinin yaradılmasında bilavasitə iştirak etmiş və bu mərkəzə rəhbərlik etmişdir.

Fəaliyyəti

V.Ə.Qasımov respublika və beynəlxalq bir çox layihələrdə yaxından iştirak etmişdir:

•1995-1998-ci illərdə Euromath – Avropa riyaziyyatçılarının kompüter şəbəkəsinin yaradılması layihəsi (EmNetNIS, Danimarka, Kopenhagen). Azərbaycan tərəfindən layihə əlaqələndiricisi kimi Moskva, Helsinki, Sankt-Peterburq, Pereslavl-Zalesski, Tbilisi və digər şəhərlərdə konfrans və işçi seminarlarda Azərbaycan Milli Elmlər Akademiyasını təmsil etmişdir. Onun rəhbərliyi altında Euromath şəbəkəsinin Azərbaycan hissəsi yaradılmış, layihə çərçivəsində server və digər avadanlıqlar alınmış, quraşdırılmış və Azərbaycan riyaziyyatçıları haqqında məlumat bazası yaradılmışdır.

•1997-2000-ci illərdə Azərbaycan Milli Elmlər Akademiyasının Rəyasət He-yətini, elmi-tədqiqat institutlarını və mərkəzlərini birləşdirən İnternet şəbəkəsinin yaradılması layihəsi. Onun rəhbərliyi və bilavasitə iştirakı ilə bir çox elmi-tədqiqat və ali təhsil müəssisələrində, eləcə də dövlət orqanlarında İnternet şəbəkəsinin ilk qovşaqları yaradılmışdır.

•1999-2000-ci illərdə “M.F.Axundov adına Azərbaycan Milli Kitabxanasında istifadəçilər üçün İnternet qovşağının yaradılması” layihəsi. Layihənin müəllifi və rəhbəri olmuşdur. Layihə üzrə Evraziya fondundan qrant alınmış, respublikada ilk dəfə olaraq kitabxana sistemində İnternet şəbəkəsinə qoşulmuş kompüterləşdirilmiş oxucu zalı yaradılmış və oxucuların ixtiyarına verilmişdir.

•1999-2000-ci illərdə “Transqafqaz respublikalarında informasiya işçilərinin yeni texnologiyalara uyğun regional ixtisasartırma kurslarının yaradılması” beynəlxalq layihəsi (Gürcüstan Kitabxanaçılar Assosiasiyası ilə birgə). Azərbaycan tərəfdən layihənin müəllifi və rəhbəri olmuşdur. Evraziya fondundan layihənin həyata keçirilməsi üçün qrant alınmış, M.F.Axundov adına Azərbaycan Milli Kitabxanasının, eləcə də digər aparıcı kitabxanaların onlarla kitabxanaçısının ixtisaslarının artırılması təmin edilmişdir.

•2000-ci ildə “Akademik şəbəkənin bazasında Azərbaycan Respublikasının ali təhsil sistemində şəbəkə infrastrukturunun genişləndirilməsi” layihəsi. Layihənin müəllifi və iştirakçısı olmuşdur. Layihənin həyata keçirilməsi üçün NATO-nun Elm Komitəsi tərəfindən qrant ayrılmışdır. Layihə üzrə respublikanın əksər elmi-tədqiqat institutlarını və universitetlərini özündə birləşdirən Azərbaycan Elmi-Tədqiat və Təhsil Müəssisələri Assosiasiyası (AzRENA) yaradılmışdır.

•1999-2000-ci illərdə Azərbaycanda İnternet üçün informasiya-axtarış siste-minin yaradılması layihəsi. Layihə çərçivəsində Azərbaycan Milli Elmlər Akade-miyasının kompüter şəbəkəsi bazasında respublikada İnternet üçün ilk informasiya-axtarış sistemi yaradılmış və istifadəyə verilmişdir.

1998-ci ildə “Açıq tipli kompüter şəbəkələrində informasiya təhlükəsizliyi sisteminin effektiv strukturunun qurulması və realizə edilməsi” mövzusunda namizədlik dissertasiyasını müdafiə edərək texnika elmləri namizədi alimlik dərəcəsi almışdır. 2005-ci ildə ona dosent elmi adı verilmişdir. 2008-ci ildə isə “Qlobal informasiya şəbəkələrində paylanmış strukturlu intellektual informasiya-axtarış sistemlərinin layihələndirilməsinin əsasları və tətbiqi” mövzusunda doktorluq dissertasiyasını müdafiə edərək texnika elmləri doktoru alimlik dərəcəsi almışdır. 2011-ci ildə Azərbaycan Respublikası Prezidenti yanında Ali Attestasiya Komissiyasının qərarı ilə ona “İnformasiya təhlükəsizliyi” ixtisası üzrə professor elmi adı verilmişdir. V.Ə.Qasımov elmi-tədqiqat fəaliyyəti ilə yanaşı pedaqoji fəaliyyətlə də məşğul olmuşdur. O, 1992-1996-cı illərdə Qərb Universitetində baş müəllim, 1998-2007-ci illərdə Azərbaycan Texniki Universitetində, 2007-2008-ci illərdə Bakı Dövlət Universitetində dosent vəzifələrində çalışmış, müasir informasiya texnologiyaları, informasiya təhlükəsizliyi, ali riyaziyyat və s. sahələrdə mühazirələr oxumuşdur. Onun yetişdirdiyi kadrlar dövlət və hökumət orqanlarında, aparıcı xarici təşkilatların Azərbaycan ofislərində, xaricdə müvəffəqiyyətlə fəaliyyət göstərirlər. 2000-ci ildən 2016-cı ilin sonunadək Milli Təhlükəsizlik Nazirliyinin (indiki Dövlət Təhlükəsizlik Xidməti) Heydər Əliyev adına Akademiyasında xidmət et-mişdir. Tədris şöbəsinin rəisi və fakültənin rəisi vəzifələrində işləmişdir. 2016-cı ildən 2019-cu ilədək Milli Aviasiya Akademiyasında “İnformasiya texnologiyaları” kafedrasının professoru vəzifəsində çalışmışdır. 2019-cu ilin mart ayından Azərbaycan Texniki Universitetinin “Kompüter sistemləri və şəbəkələri” kafedrasının müdiri vəzifəsində işləyir.2009-cu ildən Azərbaycan Respublikası Prezidenti yanında Ali Attestasiya Komissiyasının informatika sahəsi üzrə Ekspert şurasının üzvüdür. Hazırda informasiya təhlükəsizliyi, kriptoqrafiya, steqanoqrafiya, informasiya axtarışı və təhlili üsulları və alqoritmləri, paylanmış informasiya sistemləri, kompüter şəbəkələri, məlumat və biliklər bazaları, süni intellekt sistemləri, qeyri-səlis riyaziyyat və digər sahələrdə elmi tədqiqatlarını davam etdirir. ABŞ, Finlandiya, Almaniya, Türkiyə, Macarıstan, Rusiya, Ukrayna, Sloveniya, Litva, Gürcüstan və s. ölkələrdə 25-dən artıq beynəlxalq səviyyəli elmi-praktiki konfranslarda və simpoziumlarda elmi məruzələrlə çıxış etmişdir. O, 120-dən artıq elmi əsərin, o cümlədən 1 ixtiranın, 4 monoqrafiyanın, 12 dərslik və dərs vəsaitinin, 4 albom-kitabın, 6 tədris proqramının, 100-ə yaxın elmi məqalənin və tezisin müəllifidir. Əsərləri respublikanın ali təhsil müəssisələrində dərslik və dərs vəsaitləri kimi istifadə olunur. Onlarla elmi məqaləsi respublikadan kənarda, o cümlədən ABŞ, Rusiya, Uk-rayna, Macarıstan, Litva və digər ölkələrdə nüfuzlu elmi jurnallarda dərc olunmuşdur. Onun “İnformasiya təhlkəsizliyi: kompüter cinayətkarlığı və kiberterrorçuluq” adlı monoqrafiyası “İntellekt-2008” mükafatına layiq görülmüşdür.

Mükafatları

V.Ə.Qasımov fəaliyyəti dövründə bir sıra təltif və mükafatlar almışdır. Xidməti vəzifələrinin icrası zamanı xüsusilə fərqləndiyinə görə 2009-cu ildə Azərbaycan Respublikasının Prezidenti Cənab İlham Əliyevin Sərəncamı ilə “Hərbi xidmətlərə görə” medalı ilə, eləcə də Azərbaycan Respublikasının Milli Təhlükəsizlik Nazirinin əmrləri ilə müxtəlif medal və Fəxri Fərmanlarla təltif edilmişdir. Azərbaycan Respublikasının Prezidentinin Sərəncamı

Mənbə

Azərbaycan Texniki Universitetinin Rəsmi Saytı Arxivləşdirilib 2019-11-18 at the Wayback Machine