Xarabalıq yaşayış yeri (Culfa)

Xarabalıq yaşayış yeri — Orta əsr abidəsidir. О, Culfa rayonunun Ərəfsə kəndindən şimal-şərqdə Əlincəçayla Gəvikçayın qovşağından bir qədər yuxarıda yerləşir. Abidə şimal-qərbdə Gəvikçay, cənub-şərqdə isə Əlincəçayın axdığı dərin dərə ilə məhdudlaşır. Yaşayış yerinin sahəsi 1600 kv.m-dir. Onun şərq hissəsində uçub tökülmüş tikinti qalıqları aydın nəzərə çarpır. Lakin binalar tamamilə dağıdıldığından onların planını müəyyən etmək mümkün olmamışdır. Yaşayış yerinin böyük bir hissəsi şumlanaraq əkin sahəsi kimi istifadə edilmişdir. Lakin yaşayış yerinin şərq tərəfi nisbətən salamat qalmışdır. Bu hissədə orta əsrlər üçün xarakterik olan çəhrayı rəngli gil qab sınıqlarına təsadüf edilir. Yaşayış yerində mədəni təbəqə olduqca az saxlanmışdır. Bəzi yerlərdə onun qalınlığı 0,5 m-ə çatır. Yerüstü materiallar olduqca azdır. Toplanmış maddimədəniyyət nümunələri içərisində kasa və küpə tipli qabların sınıqlarına təsadüf edilir. Kasanın oturacağı diskşəkilli olub içəriyə doğru batıqdır. О, xaricdən yaxşı hamarlanmış, daxildən göy şirlə örtülmüşdür. Küpə tipli qabın gilinə iri qum qatılmış, pis bişirilmişdir. Divarların arasında bişməmiş təbəqə saxlanmışdır. Oturacağı xaricdən uzunsov çərtmələrlə naxışlanıb.