Albrext Dürer

Vikipediya, açıq ensiklopediya - ویکیپدیا ، آچیق انسایکلوپدیا

ALBREXT DÜRER
Doğum tarixi	21 may, 1471
Doğum yeri	Nürnberq, Almaniya
Ölüm tarixi	6 aprel, 1528
Ölüm yeri	Nürnberq, Almaniya

Albrext Dürer (21 may, 1471, Nürnberq-6 aprel, 1528, Nürenberq) - alman boyakarı, qravüraçı və incəsənət nəzəriyyəçisi, alman intibahının görkəmli nümayəndəsi.

[redaktə / تحریر] Həyatı

Albrext Dürer zərgər ailəsində dünyaya gəlmişdir. Naturanı öyrənmək məqsədilə yuxarı Reyn vilayətlərini gəzmiş (1490-1494), İtaliyada (1494-1495; 1505-1507) və Niderlandda (1520-1521) olmuşdur. Dürer boyakarlıq əsərlərində alman incəsənəti üçün yeni olan obrazlar strukturuna müraciət etmişdir ("Drezden mehrabı", təqr. 1496, Paumqartnerlər mehrabı, 1502-1504). "Kahinlərin təzimi" (1504), "Məryəm körpəsi ilə" (1512) və s. tablolarında italyan incəsənətinin təsiri güclüdür. Dürer 900-ə yaxın rəsm əsəri çəkmişdir. O, qravüra sahəsində də məhsuldar işləmiş, dünya qrafikasının şah əsərlərini yaratmışdır. "Apokalipsis" adlı ağac üzərində qravüra seriyasında (1498) dünyanın sonu barədə erkən xristian kəlamlarını antifeodal ideyalar ruhunda şərh etmişdir. Dərin fəlsəfi-humanist məzmunlu "Süvari, ölüm və iblis" (1513), "Müqəddəs İeronim" (1514), "Malxulya" (1514) qravüraları yaradıcılığının zirvəsidir. Xalq məişətindən səhnələr qravüralarında mühüm yer tutur ("Üç kəndli", təqr. 1497; "Rəqs edən kəndlilər", 1514). Dürer dünya incəsənətində məşhur portret ustalarındandır. Portretlərində obrazın xarakterindəki fərdi xüsusiyyətləri ustalıqla açıb göstərmişdir. İncəsənətin nəzəri məsələləri barədə bir sıra elmi əsəri var.