Zaur Cəfərov (polkovnik-leytenant)

Zaur Cəfərov
Şəxsi məlumatlar
Doğum tarixi	4 mart 1980
Doğum yeri	Kəlbəcər, Azərbaycan
Vəfat tarixi	10 oktyabr 2020 (40 yaşında)
Vəfat yeri	Tərtər, Azərbaycan
Dəfn yeri	İkinci Fəxri Xiyaban
Vətəndaşlığı	Azərbaycan
Təhsili	Heydər Əliyev adına Azərbaycan Ali Hərbi Məktəbi
Hərbi fəaliyyəti
Mənsubiyyəti	Azərbaycan Ordusu
Qoşun növü	Quru Qoşunları
Xidmət illəri	1997—2020
Rütbəsi	Polkovnik-leytenant
Döyüşlər	Aprel döyüşləri Tovuz döyüşləri Vətən müharibəsi  • Suqovuşan döyüşləri
Təltifləri

Zaur Cəfərov (tam adı: Zaur Cəfərov; 4 mart 1980; Kəlbəcər, Azərbaycan — 10 oktyabr 2020; Tərtər, Azərbaycan) — Azərbaycan Silahlı Qüvvələrinin polkovnik-leytenantı, Vətən müharibəsinin şəhidi.

Həyatı

Cəfərov Zaur Hüseyn oğlu 1980-ci il martın 4-də Kəlbəcər rayonunun Başlıbel kəndində ziyalı bir ailədə dünyaya göz açmışdır. İbtidai təhsilinə 1986-ci il şəhid Namiq Əbdüləliyev adına Başlıbel kənd orta məktəbində başlamışdır. 1993-cü il aprel ayının əvvəlləri erməni silahlı qüvvələri tərəfindən Kəlbəcər rayonunun işğal olunması nəticəsində məcburi olaraq ailəsi ilə birlikdə əvvəlcə Qax rayonuna, sonra isə Bakıya köçmüşdür. Orta təhsilini 1997-ci ildə Qaradağ rayonu Qızıldaş qəsəbəsində şəhid Azər Namazovun adını daşıyan orta məktəbdə başa vurmuşdur.

Hərbi illəri

Hələ 13 yaşındaykən Ata yurdu, Ana Vətəni Kəlbəcərin işğal olunması, köçkünlük həyatının çətinlikləri, 9 qohumunun Birinci Qarabağ müharibəsində şəhid olması, 49 qohumuna ermənilər tərəfindən mühasirəyə alınaraq 113 gün boyu ağır günlər yaşadılması, onlardan 18-nin ermənilərə dirəniş göstərərkən qətlə yetirilməsi, digər 9 nəfərinin qarlı yollarda şəhid olması, 19 nəfərin isə girov götürülməsi elə uşaq vaxtlarından Zaurda düşmənə nifrəti və hərbiyə marağı artırmışdı.

O, 2016-cı ildə vaxtsız dünyasını dəyişən Birinci Qarabağ müharibəsi veteranı, N saylı hərbi hissənin tibbi bölüyünün həkimi, ehtiyatda olan zabit, tanınmış həkim, ortoped, Tibb Elmləri üzrə Fəlsəfə doktoru, Azərbaycan Travmatoloqlar Cəmiyyətinin üzvü, Tibb Universitetinin dosenti, 1 saylı Şəhər Klinik Xəstəxanasının travmatoloq-cərrahı, şair, yazıçı, müəllim Sabir Mirzəyevin (Mahir Hacib) dayısı oğlu idi.

Təəccüblü deyil ki, orta təhsilini uğurla başa vuran Zaur Ali Hərbi Məktəbə daxil olmuşdur. Hərbi təhsilini 2001-ci ildə leytenant rütbəsi ilə bitirib. 2001-2002-ci illərdə Silahlı Qüvvələrin Təlim və Tədris Mərkəzində təkmilləşdirmə kursu keçib. Rumıniya və Türkiyəyə kurs və təlimlərə göndərilib. Ağır artilleriya üzrə ixtisaslaşmışdır. Xidmətinin böyük bir hissəsi Naxçıvan dağlarında keçmişdir. Burada keçirdiyi xidməti ərzində “qüsursuz xidmətə görə” və bir sıra mükafatlara layiq görülmüşdür.

Vətəninin darda olduğunu dərindən dərk edən və işğal altında olan torpaqları azad etmək fikrini ehtiyata buraxılmaqdan üstün tutan Zaur hərbi xidmətini davam etdirmək üçün 2014-cü ildə imtahan verərək yenidən SQ TTM-nə daxil olmuşdur. Təhsilini bitirdikdən sonra polkovnik-leytenant rütbəsinə yüksəlmişdir. Nümunəvi xidmətinə görə qısa bir müddət ərzində diviziya komandiri vəzifəsindən hərbi hissənin qərargah rəisi vəzifəsinə qədər yüksəlib.

Şəhadəti

Polkovnik-leytenant Cəfərov 2016-ci il Aprel döyüşləri və 2020-ci il Tovuz döyüşlərində öz əsgərləri ilə çiyin-çiyinə vuruşmuşdur.

Bir gün döyüşlərin şiddətli vaxtında xəbər alır ki, qardaşının tələbəsi Ələkbər Ələsgərov şəhid olub. Polkovnik-leytenantımız 22 yaşlı şəhid Ələkbər Ələsgərovun xatirəsini əbədiləşdirmək üçün ağır döyüşlərin getdiyi bir vaxtda düşmən tankını hərbi qənimət kimi ələ keçirib tankın üzərinə şəhidin adını həkk elətdirir və təsəlli üçün şəklini çəkib şəhidin ailəsinə göndərir və Ələkbərin qanının yerdə qalmadığını bildirir.

Zaur Cəfərov 27 sentyabr 2020-ci ildə başlayan vətən müharibəsində öz briqadası ilə çiyin-çiyinə vuruşurdu. Dostları Polad Həşimov və İlqar Mirzəyevin, bibisi oğlu Yalçın Mustafayevin qisasını almaq üçün dəridən-qabıqdan çıxırdı. Tərtər rayonunun Talış və Suqovuşan kəndlərinin və Murov dağ silsiləsinin işğalçılardan azad olunmasında böyük əməyi olmuşdur. Şəhadətindən 4 gün öncə oğlu və kiçik qardaşı ilə görüşən şəhidimiz ona dostlarının və bibisi oğlunun qisasını aldığını və tezliklə onları Kəlbəcərin Başlıbel kəndinə, öz dədə-baba yurduna aparacağını bildirmiş və dəfələrlə inanılmaz vəziyyətlərdən sağ çıxdığı üçün qurban kəsmələrini onlara ilk dəfədir ki, tapşırmışdır. Polkovnik-leytenant 2020-ci il oktyabrın 9-dan 10-a keçən gecə Ağdərə istiqamətində gedən şiddətli döyüşlər zamanı Ermənistan Silahlı Qüvvələrinin hücum cəhdinin qarşısını alarkən sərəncamında olan minik avtomobili ilə minaya düşərək qəhrəmancasına şəhid olmuşdur.

Oktyabrın 19-da polkovnik-leytenant Zaur Cəfərovun nəşi əvvəlcə valideynlərinin yaşadığı Bakı şəhəri Yeni Ramana qəsəbəsinə gətirilmişdir. Şəhidin cənazəsi Yeni Ramana qəsəbəsində izdihamla qarşılanmış, böyükdən-kiçiyə demək olar ki, hər kəs onun valideynlərinin yaşadığı əraziyə toplaşmışlar. Zaur həmin gün II Fəxri Xiyabanda, cəbhə dostları general-mayor Polad Həşimov və polkovnik İlqar Mirzəyevin məzarlarının sol tərəfində yaylım atəşi ilə təntənəli şəkildə torpağa tapşırılmışdır. Vida mərasimində Milli Məclisin deputatı Aqil Məmmədov, Milli Məclisin deputatı, Azərbaycan Mərkəzi Kooperativlər İttifaqı - "Azərittifaq"ın sədri, Azərbaycan Kooperasiya Universitetinin rektoru, iqtisad elmləri doktoru, professor Eldar Quliyev, Azərbaycan Hüquqşünaslar Konfederasiyasının İdarə Heyətinin üzvü, Xüsusi Olimpiya Komitəsinin İcraiyyə Komitəsinin üzvü və vitse-prezidenti, Azərbaycan Respublikası Milli Məclisinin İnsan Hüquqları Komitəsinin, İctimai birliklər və dini qurumlar  Komitəsinin və İntizam Komissiyasının üzvü, Avropa Şurası Parlament Assambleyasında Azərbaycan nümayəndə heyətinin üzvü Fazil Mustafa, Sabunçu rayon İcra Hakimiyyətinin başçısı Adil Vəliyev, Yeni Azərbaycan Partiyası Sabunçu rayon təşkilatının Sədr müavini Bəxtiyar Qasımov, Qafqaz Müsəlmanları İdarəsinin nümayəndəsi Şahin Həsənli (Hacı Şahin) və Kəlbəcər rayon İcra Hakimiyyətinin nümayəndəsi iştirak edib.

Şəhidin yas mərasimində atası Hüseyn Cəfərovdan götürülən video müsahibə zamanı onun qürurla səsləndirdiyi fikirlər ürəkləri daha da dağlayır:

"Zaman keçəcək, analar igid oğullar doğacaq, amma Qarabağ doğulmayacaq. Qarabağı can-qan bahasına geri qaytarmaq lazımdır!"

Təltifləri

Zaur Cəfərov Suqovuşan döyüşündə əvvəl

• (2005) — III dərəcəli "Qüsursuz xidmətə görə" medalı — Azərbaycan Silahlı Qüvvələrində 10 il xidmətə görə Azərbaycan Prezidentinin adından Müdafiə nazirinin əmri ilə təltif edilib;
• (2008) — "Azərbaycan Silahlı Qüvvələrinin 90 illiyi" yubiley medalı — Azərbaycan Silahlı Qüvvələrində 90 illiyinə görə Azərbaycan Prezidentinin adından Müdafiə nazirinin əmri ilə təltif edilib;
• (2010) — II dərəcəli "Qüsursuz xidmətə görə" medalı — Azərbaycan Silahlı Qüvvələrində 15 il xidmətə görə Azərbaycan Prezidentinin adından Müdafiə nazirinin əmri ilə təltif edilib;
• (2013) — "Azərbaycan Silahlı Qüvvələrinin 95 illiyi" yubiley medalı — Azərbaycan Silahlı Qüvvələrində 95 illiyinə görə Azərbaycan Prezidentinin adından Müdafiə nazirinin əmri ilə təltif edilib;
• (2015) — I dərəcəli "Qüsursuz xidmətə görə" medalı — Azərbaycan Silahlı Qüvvələrində 20 il xidmətə görə Azərbaycan Prezidentinin adından Müdafiə nazirinin əmri ilə təltif edilib;
• (2018) — "Azərbaycan Ordusunun 100 illiyi" yubiley medalı — Azərbaycan Silahlı Qüvvələrində 100 illiyinə görə Azərbaycan Prezidentinin adından Müdafiə nazirinin əmri ilə təltif edilib;
• (25.06.2020) — "İgidliyə görə" medalı — Azərbaycanın müstəqilliyi, ərazi bütövlüyünün qorunub saxlanılmasında xüsusi xidmətlərinə görə Azərbaycan Prezidenti İlham Əliyevin Sərəncamı ilə təltif edilib.

2020-ci il 25 iyun tarixində Azərbaycan Respublikası Prezidentinin 2127 №-li sərəncamı ilə Azərbaycan Respublikası Konstitusiyasının 109-cu maddəsinin 23-cü bəndini rəhbər tutaraq Azərbaycan Respublikasının müstəqilliyinin, ərazi bütövlüyünün qorunub saxlanılmasında xüsusi xidmətlərinə, öz xidməti vəzifələrini və hərbi hissə qarşısında qoyulmuş tapşırıqları yerinə yetirərkən fərqləndikləri üçün “İgidliyə görə” medalı ilə təltif edilmişdir.