Dövlət Bayrağı Meydanı

Dövlət Bayrağı Meydanı
Məlumatlar
Ölkə	Azərbaycan
Sahəsi	60 ± 1 ha
Xəritədə yeri
Vikianbarda əlaqəli mediafayllar

Dövlət Bayrağı Meydanı — Bakı şəhərinin Bayıl sahəsində yerləşən memorial abidə-istirahət parkı. Meydanın açılışı 2010-cu ilin sentyabrın 1-də keçirilmişdir. 2024-cü ildə yeni bayraq dirəyinin quraşdırılma prosesi aparılıb.

Tarixi

Bakıda Dövlət Bayrağı Meydanının yaradılması barədə sərəncam 2007-ci il noyabrın 17-də imzalanıb. Eyni zamanda, Dövlət Bayrağı Gününün təsis edilməsi haqqında sərəncam imzalanıb. Hər il 9 noyabr Azərbaycanda Dövlət Bayrağı Günü kimi qeyd olunur.

Dövlət Bayrağı Meydanının təməli 2007-ci il dekabrın 30-da Bakının Bayıl qəsəbəsində — Hərbi Dəniz Qüvvələrinin bazası yaxınlığında prezident İlham Əliyevin iştirakı ilə qoyulub.

2009-cu ilin oktyabr ayında Azərbaycan Respublikasının Prezidenti İlham Əliyev "Bakı şəhərində yerləşən Dövlət Bayrağı meydanında tikinti-quraşdırma və abadlaşdırma işlərinin sürətləndirilməsi üçün əlavə tədbirlər" haqqında sərəncam imzaladı. Meydanda tikinti-quraşdırma və abadlaşdırma işlərinin sürətləndirilməsi üçün Azərbaycan Respublikasının 2009-cu il üçün dövlət büdcəsində nəzərdə tutulmuş Prezidentin Ehtiyat Fondundan Bakı Şəhər İcra Hakimiyyətinə 10 mln. manat əlavə vəsait ayrıldı.

Meydan üçün seçilmiş yer dövlət bayrağının paytaxtın müxtəlif nöqtələrindən görünməsinə imkan yaradır.

Amerika Birləşmiş Ştatlarının "Trident Support" şirkəti tərəfindən hazırlanmış layihənin icrasını Azərbaycanın "Azenko" şirkəti yerinə yetirib. Ümumi ərazisi 60 hektar, yuxarı hissəsinin sahəsi 31 min kvadratmetr olan meydanda bütün infrastruktur yaradılıb. Xüsusi layihə əsasında reallaşdırılan tikinti işlərini xarici və yerli mütəxəssislər həyata keçiriblər.

Meydanda yerləşən Azərbaycan Respublikasının Dövlət Himni

Meydanda yerləşən Azərbaycan Respublikasının Dövlət Gerbi

Meydanda yerləşən Azərbaycanın xəritəsi

Meydanda qurulmuş Azərbaycan Respublikasının gerbi, dövlət himninin mətni və Azərbaycan xəritəsi qızıl suyuna salınmış bürüncdən hazırlanıb.

Meydanda Dövlət Bayrağı Muzeyi də yaradılıb.

I Bayraq dirəyi (2010–2017)

2010–2017-ci illərdə mövcud olmuş bayraq dirəyi

20000 m² ərazisi olan meydanda 2010-cu ildən 2017-ci ilədək ucaldılmış dayağın hündürlüyü 162 metr, bünövrəsinin diametri 3,2, bünövrənin üst hissəsinin diametri 1,09 metr olmuşdur. Qurğunun ümumi kütləsi 220 ton idi. Bayrağın eni 35 metr, uzunluğu 70 metr, ümumi sahəsi 2450 kvadratmetr, kütləsi isə təqribən 350 kiloqram idi. Ginnes dünya rekordları təşkilatı 2010-cu il mayın 29-da Azərbaycan dövlət bayrağı dirəyinin dünyada ən hündür bayraq dirəyi olduğunu təsdiq etmişdir.

II Bayraq dirəyi (2021-hal-hazırda)

2021-ci ildə Türkiyənin Çimtaş şirkəti Azərbaycan üçün yeni bayraq dirəyi hazırlamağa başladı.

Dövlət Bayraq Meydanında yeni dirək. avqust 2024

2024-cü ilin may ayından Bakıda dünyanın ən hündür bayraq dirək platformasının quraşdırılmasına başlanıldı. Dirəyin ümumi hündürlüyü 191 metrdir. Dirək əsasından yuxarıya qədər diametri 5,7 m-dən 2 m-ə qədər, çəkisi 230 ton ilə 13 ton arasında olan 9 polad konusvari boru seqmentindən və yuxarıda yerləşən fırlanan seqmentdən ibarətdir. 2024-cü ilin avqust ayından etibarən quraşdırılma yekunlaşıb və test məqsədilə ilk dəfə bayraq asılıb. Açılış müddətinə kimi bir neçə dəfə prosesin təkrarlanması nəzərdə tutulub. 28 sentyabr 2024-cü ildə test məqsədilə yenidən bayraq asılıb.

Dövlət Bayrağı Muzeyi

Dövlət Bayrağı Muzeyi

Muzey Azərbaycan Prezidentinin müvafiq Sərəncamı ilə inşa olunmuş və bu 2010-cu il sentyabrın 1-də Azərbaycanın paytaxtı Bakı şəhərində təntənəli açılış mərasimi keçirilmiş Dövlət Bayrağı Meydanında yaradılmışdır.

Prezident İlham Əliyevin təşəbbüsü ilə səkkizguşəli ulduz formasında yaradılmış muzey Dövlət Bayrağı Meydanında bayraq dirəyinin pyedestalının altında yerləşir.

Azərbaycanlı memar və dizaynerlərininlayihələri əsasında qurulan və tərtibatında müasir dizayn texnologiyalarından istifadə olunan muzeydə müxtəlif dövrlərdə Azərbaycan ərazisində mövcud olmuş dövlətlərin, xanlıqların, o cümlədən İrəvan xanlığının bərpa olunmuş bayraqları nümayiş olunur. Orada həmçinin XVII–XVIII əsrlərə aid bayraqların uc elementləri, gerblər, Azərbaycan Respublikasınınmüxtəlif illərdə qəbul olunmuş Konstitusiyabroşürları da vardır. Muzeydə poçt markaları, pul nişanlarının nümunələri, orden və medalları, Heydər Əliyevinrəhbərliyi ilə müstəqil Azərbaycan dövlətinin yaranması, formalaşması və inkişafını, Prezident İlham Əliyevin ölkəmizin tərəqqisi ilə bağlı fəaliyyətini əks etdirən çoxsaylı fotolar və sənədlər, nümayiş etdirilir.

Prezident İlham Əliyev muzeyin açılışında. 2010-cu il

Sərgi stendlərində Heydər Əliyevin və İlham Əliyev Prezident seçildikdən sonra andiçmə mərasimlərində öpdükləri dövlət bayraqları, Silahlı Qüvvələrin Ali Baş Komandanının bayrağı, Silahlı Qüvvələrin qoşun növlərinin döyüş bayraqları və mərasim geyimləri nümayiş olunur.

Dünyada bu cür nadir muzeylərdən biri olan Dövlət Bayrağı Muzeyində, həmçinin Ginnes dünya rekordları təşkilatının Azərbaycanın dövlət bayrağı dirəyinin dünyada ən hündür bayraq dirəyi olduğunu təsdiq edən sertifikatı, müxtəlif kitablar, fotoşəkillər, 1918–1920-ci illərdə Azərbaycan Xalq CümhuriyyətininTürkiyədəki səfirliyinin binası üzərində dalğalanmış bayraq da nümayiş olunur. Buradakı eksponatların çoxu ilk dəfə nümayiş etdirilir.

Muzeydə multimedia qurğusu da vardır

Poçt markası üzərində

2011-ci ilin noyabr ayının 9-da Bakı şəhərində Azərbaycan Respublikası Rabitə və İnformasiya Texnologiyaları Nazirliyinin "Azərmarka" şirkəti tərəfindən Azərbaycan Respublikasının Dövlət Bayrağı gününə həsr olunmuş poçt markası təqdim edilmişdir. Qiyməti 30 qəpik, tirajı isə 100000 ədəd olan həmin marka Azərbaycanın mininci poçt markası olunmuşdur. Markanın üzərində Dövlət Bayrağı Meydanının təsviri vardır.

Ədəbiyyat

1. Dövlət Bayrağı Meydanı. Bakı, 2010, s. 75.
2. Əhmədov Səbuhi, Məmmədov Vüqar. Azərbaycan Respublikasının Dövlət Bayrağı. Bakı, 2010, s. 156.

Mənbə

• Dövlət bayrağı sahəsi (Bakı)