Ecazkar qadın

Ecazkar qadın
ing. Wonder Woman
Ecazkar qadın. Rəssam: Cim Li.
Nəşriyyat	DC Comics
Yayım tarixi	"All Star Comics #8" (oktyabr, 1941)
Yaradıcı(lar)	Uilyam Molton Marston Harri Corc Piter (göstərilməyib)
Xüsusiyyətlər
Əsl adı	Femiskiralı Şahzadə Diana
Doğum yeri	Femiskira
Cinsiyyəti	qadın
Boyu	182sm
Çəkisi	59 kq
Göz rəngi	mavi
Saç rəngi	qara
Komiks bioqrafiyası
Kainat	yaxşı
Üzvlükləri	Ədalət Liqası
Partnyorları	Stiv Trevor Betmen Supermen Ecazkar qız Supergörl
Düşmənləri	Darksayd Dumsdey Breyniak Bizarro Leks Lyutor General Zod
Ləqəbləri	Dayana Prins
Gücləri	İnanılmaz güc, uçmaq, tez sağalmaq, reflekslər
Silahları	Həqiqət qamçısı, məhvedilməz qolçaqlar, uçan tiara, qılınc və qalxan

Ecazkar qadın (ing. Wonder Woman) — DC Comics tərəfindən nəşr edilən ABŞ komikslərində görünən uydurma superqəhrəman. Ədalət Liqasının təməl üzvlərindən olan Ecazkar qadın ilahə və amazonların səfiridir. Personaj ilk dəfə 8 oktyabr 1941-ci ildə "All Star Comics #8"-də debüt etmiş, 1 yanvar 1942-ci ildə ilk dəfə "Sensation Comics #1" üz qabığında təsvir edilmişdir. Vətəni olan Femiskira adasında Ecazkar qadının rəsmi titulu "Hippolitanın qızı, Femiskiralı Şahzadə Dayana"dır. İnsan cəmiyyətində yaşamağa başladıqdan sonra o, Dayana Prins adını götürür. Personaj həm də "Möhtəşəm Amazon", "Həqiqətin ruhu", "Femiskiranın çempionu", "Tanrı öldürən" və "Sevgi və müharibə ilahəsi" ləqəbləri ilə tanınır.

Ecazkar qadın ABŞ psixoloqu və yazıçısı Uilyam Molton Marston (təxəllüsü: Çarlz Molton) və rəssam Harri Corc Piter tərəfindən yaradılmışdır. Marstonun sevgilisi Oliv Birn və həyat yoldaşı Elizabet Hollvey Marston personaj üçün ilham mənbəyi olmuşlar. Marston erkən feministlərdən, xüsusilə Marqaret Senqer və onun "Qadın və yeni yarış" pyesindən təsirlənmişdir. Ecazkar qadın (Wonder Woman) başlığı DC Comics tərəfindən, 1986-cı il istisna olmaqla, fasiləsiz olaraq nəşr edilməkdədir.

Ecazkar qadının mənşə hekayəsinə əsasən o, anası Kraliça Hippolita tərəfindən gildən yaradılmış, Afrodita ona can vermiş, Yunan tanrıları isə superinsan gücləri hədiyyə etmişlər. Sonradan DC onun mənşəyini dəyişmişdir; yeni varianta görə Zevs və Hippolitanın qızı olan Ecazkar qadın xalası Antiopa və Menalippe tərəfindən böyüdülmüşdür.

1980-ci illərdə Ecazkar qadına əzələli görünüş bəxş edən rəssam Corc Perez onun amazon mənşəyini xüsusi vurğulamışdır. Ecazkar qadının uşaqlıqdan amazonlar tərəfindən məşq etdirilməsi onda ovçuluq və döyüş bacarıqlarının formalaşmasına səbəb olmuşdur. Ecazkar qadın, Həqiqət qamçısı, qırılmayan qolçaqlar və silah kimi istifadə etdiyi tiaradan ibarət silah cəbbəxanasına malikdir; köhnə hekayələrdə isə onun amazon texnologiyalarına əsaslanan bir neçə başqa silahları da vardır. Ecazkar qadın personajı İkinci Dünya müharibəsi dövründə yaradılmışdır; ilkin olaraq personaj Berlin-Roma-Tokio oxunda, həmçinin rəngarəng supercanilərlə döyüşdə təsvir edilirdi, lakin tədricən onun hekayələrində Yunan mifologiyasından olan personajlar, tanrılar və bədheybətlərə daha çox diqqət yetirilməyə başlayır. Əksər hekayələrdə Ecazkar qadının özünü xilas etməsindən bəhs edilir ki, bu da 1940-cı illərin komikslərində geniş yayılmış "çətin vəziyyətdə olan xanım" stereotipini qırırdı. Debütündən keçən dövr ərzində Ecazkar qadın amazonları məhv etməyə çalışan çoxsaylı düşmən ordusu toplamışdır ki, onların da arasına Ares, Leopard, Həkim Zəhər, Həkim Psixo, Sirseya, Giqanta, daha sonradan isə Veronika Keyl və Först-born daxil olmuşlar. Ecazkar qadın həm də tez-tez Ədalət Cəmiyyəti (1941-ci ildən etibarən) və Ədalət Liqasına (1960-cı ildən etibarən) həsr olunmuş komiks kitablarında görünür.

Müxtəlif medialara uyğunlaşdırıldığına görə, personaj populyar mədəniyyətin ən məşhur fiqurlarından biridir. 1971-ci ildə Qloriya Steynem personajı "Ms." Jurnalının üz qabığına yerləşdirmişdir; 1975–1979-cu illərdə yayımlanmış və Linda Karterin "Ecazkar qadın" teleserialının əsas qəhrəmanı olan personaj, həm də "Super dostlar" və "Ədalət Liqası" animasiya seriallarında iştirak etmişdir. Karterin iştirakı ilə personaj izləyicilərə təqdim edildikdən sonra, personaj müxtəlif oyuncaqlar və digər merçendayzinq məhsullarında təmsil olunmağa başlamış, 2009-cu ildə ona DC tərəfindən çəkilmiş və Keri Rasselin rol aldığı cizgi filmi həsr edilmişdir. Ecazkar qadını televiziyaya qaytarmağa çalışan NBC telekanalı 2011-ci ildə TV pilotu sifariş etmiş, bunun ardınca The CW telekanalı uğursuz layihə başlatmağa çalışmışdır. DC Genişləndirilmiş Kainatında Ecazkar qadın personajını Qal Qadot canlandırır. Qal Qadotun ifasında Ecazkar qadın ilk dəfə 2016-cı ildə "Betmen Supermenə qarşı: Ədalətin şəfəqi" filmində görünmüş, daha sonra ekranlaşdırılmış "Leqo film" personajın 75 illik tarixində ikinci animasiya filmi olmuşdur. 2 iyun 2017-ci ildə personaja həsr olunmuş ilk layv-ekşn filmi olan "Ecazkar qadın" təqdim edilmişdir.

Nəşr tarixi

Yaradılması

Ecazkar qadın ilk dəfə "Sensation Comics #1" nəşrinin üz qabığında debüt etmişdir.

25 oktyabr 1940-cı ildə Uilyam Molton Marston "Family Circle" jurnalına verdiyi müsahibədə komiks kitablarının böyük potensialını müzakirə edir. Bu müsahibə komiks naşiri Maks Geynsin diqqətini cəlb edir və o, Marstonu sonradan DC Comics adı altında birləşən National Periodicals və All-American Publications üçün təhsil məsləhətçisi vəzifəsinə təyin edir. Marston çoxdan yeni superqəhrəman yaratmağı arzulayırdı; Marstonun həyat yoldaşı Elizabet yeni qəhrəmanın qadın olmasını təklif edirdi.

O zaman artıq poliqrafı kəşf etmiş alim kimi məşhur olan Uilyam Molton Marston kobud güc və ya silahla deyil, sevginin gücü ilə qalib gələn superqəhrəman yaratmaq arzusunda idi. Marston ideyasını Geynsə deyir. Bundan sonra, ideyaları üzərində ciddi çalışan Marston Ecazkar qadını yaradır. O, personajı həmin dövrün qeyri-ənənəvi azad qadını kimi təqdim edir. Ecazkar qadının qolçaqlarını isə o, həmin dövrdə cütlüklə (Marstonlarla) poliamor münasibətdə olan və birlikdə yaşayan Oliv Birnin qolbaqlarından ilhamlanaraq çəkir. Marstonun imzası ilə Ecazkar qadın "All Star Comics #8"-də (üz qabığı tarixi dekabr/yanvar 1941/1942, çıxarılıb: oktyabr 1941) debüt edir.

Marstonun kəşf etdiyi qan təzyiqini ölçən sistolik aparat poliqrafın (yalan detektoru) kəşfində həlledici rol oynamışdı. Marstonun poliqrafla keçirdiyi təcrübələr göstərir ki, müəyyən hallarda qadınlar kişilərdən daha dürüst olurlar və bu onların daha effektiv işləməsinə imkan verir.

Marston Ecazkar qadını, cəmiyyəti idarə etməli olan (onun fikrincə) ideal sevgi lideri kimi dizayn etmişdi.

"Ecazkar qadın, mənim fikrimcə, dünyanı idarə etməli olan yeni qadın tipinin psixoloji təbliğatıdır" Marston yazır. "The American Scholar" jurnalının 1943-cü il nömrəsində Marston qeyd edir:

Bizim qadın arxetiplərimiz güc və qüvvə çatışmazlığı ilə üzləşdiyi müddətcə hətta qızlar da qız olmaq istəməyəcəklər. Qadın olmaq istəməyrkən onlar onlar həm də incə, itaətkar, sülhsevər və yaxşı da olmaqdan imtina edirlər. Qadınların gözəl xüsusiyyətlərinə onların zəifliyinə görə pis baxılır. Bunun aradan qaldırılmasınıın yeganə yolu isə Supermen kimi güclü və üstəlik gözəl və cazibədar olan qadın obrazının yaradılması idi.

Marston bondaj və submissiyanı "dəyərli alicənab təcrübə" kimi təqdim edir. Marston, Ecazkar qadının "Afrodita qanunu" ilə bağlı zəifliyindən yazaraq, onu "İtaət qolçaqları" ilə əlaqələndirir. Lakin, onun yaradıcılığı və ideyaları ilə bağlı hər şey aydın şəkildə izah edilmədiyindən vaxt keçdikcə bu fikirlər yazıçılar arasında fikir qarışıqlıqlarına səbəb olmuşdur.

Ecazkar qadına həsr edilmiş ilk müstəqil komiks xətti olan "Ecazkar qadın#1" nəşrinin üz qabığı, 1942.

Qızıl dövr

İlkin olaraq amazonlar arasında çempion olan Ecazkar qadın, təyyarəsi amazonların gizli adasında qəzaya uğramış ABŞ kəşfiyyatçı zabiti olan Stiv Trevoru "İnsanların dünyası"na qaytarır və nasistlərin cinayətləri və qəddarlıqları ilə mübarizə aparır.

Bu dövrdə Ecazkar qadın komanda katibəsi kimi Amerikanın Ədalət Cəmiyyətinə qoşulur.

Gümüş dövr

Gümüş dövründə, Robert Kanigerin yazıçılığı ilə digər bir çox personajlar kimi Ecazkar qadının da mənşə hekayəsi dəyişdirilir. Yeni mənşə hekayəsi personajın ellin və yunan mənşəyini gücləndirir: hər bir tanrının xeyir-duasını alan Dayana "Afrodita kimi gözəl, Afina kimi müdrik, Herakl kimi güclü və Hermes kimi sürətli" oldu.

1960-cı illərin sonunda Mayk Sekovskinin rəhbərliyi altında Ecazkar qadın insanların dünyasında qalmaq üçün amazonların aləmindəki səlahiyyətlərindən imtina edir. Ecazkar qadın Dayana Prins ləqəbindən istifadə etməyə başlayır. O, İ Çinq adlı köməkçi götürür və ondan döyüş sənəti, həmçinin silah istifadə etməyi öyrənir. Gücləri ilə yanaşı döyüş sənətini də istifadə edən Dayana casus hekayələrindən mifologiyaya kimi müxtəlif macəra hekayələrində iştirak edir. Onun hekayələrinin bu mərhələsi Böyük Britaniya casus trilleri "Qisasçılar"da Dayana Riqq tərəfindən canlandırılmış "Emma Pil" obrazına təsir etmişdir.

Bürünc dövr

1970-ci illərin əvvəllərində personaj öz köklərinə qaytarılaraq İkinci Dünya müharibəsi dövrü və Amerikanın Ədalət Cəmiyyəti komandası ilə işləməyə başlayır. Lakin bu, ehtimal ki, həmin dövrdə yayımlanan teleserialın məşhurluğu ilə bağlı idi, belə ki, serialda hadisələr İkinci Dünya müharibəsindən 1970-ci illərə keçirildikdən sonra, komikslərdə də hadisələrin dövrü yenidən dəyişdirilir.

Yeni dövrün başlaması ilə DC prezidenti Canet Xan Ecazkar qadının xarici görünüşünü təkmilləşdirməyi tapşırır. DC-nin 1977-ci ildə qəbul edilmiş loqosunun müəllifi olan rəssam Milton Qleyzer stilləşdirilmiş "WW" loqosunu dizayn edir, personajın korsajındakı qartalı əvəz edən bu loqo 1982-ci ildə təqdim edilir. Studiya hüsn-xəttçisi Todd Kleyn tərəfindən təqdim edilmiş, bir aylıq hüquqa malik loqo bir il yarım tətbiq edildikdən sonra Qleyzer studiyasının loqosu ilə əvəzlənir. 1985-ci ildə satışların aşağı düşməsindən sonra, Cerri Konvey tərəfindən yazılmış və Stiv Trevorun Ecazkar qadınla evlənməsini təsvir edən #329-cu buraxılışdan (fevral, 1986) sonra nəşr dayandırılır.

"Sonsuz dünyalarda böhran" krossoveri əsas DC personajlarının qırılmaz qarşılıqlı xəttini qaydaya salmaq üçün yazılmış, beləliklə Stiv Trevor və Ecazkar qadının Earth-Two kainatından gəlməsi bildirilmişdir ki, bununla da onların bütün keçmiş hekayə və uğurları silinmiş, beləliklə Ecazkar qadın prioritetə çevrilmişdir.

"Sonsuz dünyalarda böhran" krossoveri əsas DC personajlarının qırılmaz qarşılıqlı xəttini qaydaya salmaq üçün yazılmış, beləliklə Stiv Trevor və Ecazkar qadının Earth-Two kainatından gəlməsi bildirilmişdir ki, bununla da onların bütün keçmiş hekayə və uğurları silinmiş, beləliklə Ecazkar qadın prioritetə çevrilmişdir.

Müasir dövr

Ecazkar qadın, IV cild, #47 Harley's Little Black Book hekayə xəttində Harli Kuinin Ecazkar qadını öpməsi.

1985-ci ilin "Sonsuz dünyalarda böhran" seriyasından sonra Corc Peres, Len Veyn və Qreq Potter personajın mənşə hekayəsini yenidən yazaraq onu Femiskiranın xarici dünyaya sülh gətirmək üçün göndərilmiş emissarı və səfiri kimi təsvir edirlər. Peres Ecazkar qadının mənşə hekayəsinə, eləcə də digər hekayələrinə Qədim Yunan mifologiyasından bir çox tanrılar və digər personajları əlavə edir. Onun təqdim etdiyi personaj gildən yaranma hekayəsini geniş təqdim etdiyinə görə, Ecazkar qadının müasir hekayələrinin əsasında durmuşdur. Təqdimat tənqidçilər və oxucular tərəfindən müsbət qarşılanmışdır.

2010-cu ilin avqustunda (nəşr #600) Maykl Strajinski seriyanın yenidən yayılmasını öhdəsinə götürərək, Ecazkar qadının alternativ xronologiyasını təqdim etdi: həmin xronologiyada Cənnət adası tanrılar tərəfindən dağıdılmış, amazonlar isə dünyanın müxtəlif yerlərinə səpələnmişdirlər. Həmin xronologiyada Dayana Nyu-Yorkda böyümüş yetimdir. Bütün dünya Ecazkar qadının kimliyini və qəhrəmanlıqlarını unudub, o özü isə yaxşı xatırlamadığı keçmiş həyatını bərpa etməyə çalışır. Ölüm ilahəsi Morriqan Ecazkar qadının əsas düşməni kimi çıxış edir. Bu versiyada Ecazkar qadın Cim Li tərəfindən dizayn edilmiş yeni kostyumda təqdim olunur. Strajinski süjeti müəyyən edir və #605 nömrəyə kimi hekayələri yazmağa davam edir; daha sonra, #614 nömrəyə kimi Ecazkar qadın hekayələri yazıçı Fil Hester tərəfindən davam etdirilir.

DC Comics yeni nəsil oxucuların diqqətini cəlb etmək üçün 2011-ci ildə "The New 52" xətti ilə bütün personajlarının xəttini yeniləyir və beləcə Ecazkar qadın başlığının IV cildi hazırlanır. Brayan Azzarello və Kiff Çanq müvafiq olaraq personajın hekayə xətti və görüntüsü üzərində çalışmış və onu hiss olunacaq dərəcədə dəyişmişlər. Bu yeni xəttə Ecazkar qadın Marstonun orijinal kostyumuna bənzər kostyum geyinir, qılınc və qalxanla silahlanır və tamamilə fərqli mənşə hekayəsinə malikdir. Onun gildən yaradılması hekayəsi ləğv edilir və Hippolita və Zevsin normal doğuşlu övladı, yarımilahə olması göstərilir. Azzarello və Çanqın yenilikləri tənqidçilər tərəfindən alqışla qarşılansa da, personajın fanatları arasında fikir ayrılığına səbəb olmuşdur.

Ecazkar qadın, V cild, #1 (iyul, 2017) nəşrininin üz qabığında personaj Supermen və Betmenlə birlikdə təsvir edilmişdir.

"Harley's Little Black Book" (azərb. Harlinin kiçik qara kitabı‎) hekayələrində Ecazkar qadın və Harli Kuin Londonda qısa müddətə olsa da bir komandada çalışırlar. Buradan məlum olur ki, Harli uzun müddət Ecazkar qadının heyranı olub və onun təsiri altına düşüb. Cani üzərində qələbədən sonra Harli Ecazkar qadına yerli barlardan birinə getməyi və burada İngilis super komandasına qoşulmağı təklif edir. Barda olarkən Harli Həqiqət qamçısını oğurlayır, lakin onu həqiqət ya hərəkət oyunu üçün istifadə edir. Sonuncu olaraq Ecazkar qadının yuxulu Harli Kuini bardan çıxarması göstərilir, lakin əlavə səhifədə əlləri bağlanmış Harlinin Ecazkar qadını öpməsi təsvir edilir.

2016-cı ildə DC Comics "DC Rebirth" çərçivəsində bütün personajlarının xəttini yeniləyir və Ecazkar qadının Qreq Ruçka tərəfindən yazılmış iki aylıq xətti çıxarılır. Yeni seriyada bütün nəşrləri birləşdirən vahid süjet xəttindən istifadə edilmir; bunun əvəzinə hər kitabda iki fərqli süjet xətti təqdim olunur. Bu ənənə cüt saylı nömrələrdə "The Lies" (azərb. Yalanlar‎), tək saylı nömrələrdə isə "Year One" (azərb. Birinci il‎) başlıqları ilə davam etdirilir. Bu nömrələrdə təqdim edilən süjet xətləri əvvəlki "New 52" seriyasının süjetini effektiv şəkildə əks etdirir. "The Lies" süjet xəttinə görə, Ecazkar qadının əvvəlki nömrələrində təqdim edilmiş Dayananın Amazonların kraliçası və Müharibə tanrısı tərəfindən yaradılması qəddar cani tərəfindən formalaşdırılmış illüziyadır, bundan sonra Ecazkar qadın Femiskiraya qayıtmamışdır və qayıda bilməz. "Year One" süjet xətti isə Ecazkar qadının tamamilə yeni mənşə hekayəsini təqdim edərək onun necə Olimp tanrılarından güc və bacarıqlar almasını göstərir və personajı köklərinə qaytarır. "DC Rebirth" seriyasında Ecazkar qadın qırmızı plaş və yüngül zirehin əlavə edildiyi yeni görkəmdə təqdim edilir. Qamçı və qolçaqları ilə yanaşı Ecazkar qadın müntəzəm olaraq qılınc və qalxandan da istifadə etməyə başlayır. "Wonder Woman: Rebirth" rəssamı Liam Şarp personajın yeni silahlarının ona daha rahat hərəkət etməyə imkan verdiyini deyir. 2017-ci ilin iyulunda "Wonder Woman Annual vol. 5, #1"nəşrində Ecazkar qadın ənənəvi müttəfiqləri Betmen və Supermenlə birlikdə təsvir edilir.

Uydurma personaj bioqrafiyası

XX əsr

Mənşə

"All Star Comics #8"-də debüt edən Dayana böyük okeanın ortasında yerləşən və insanlardan gizlədilmiş Femiskira adasında amazonlar adlı qadınlar tayfası ilə birgə yaşayır. Kapitan Stiv Trevorun təyyarəsi Femiskira üzərində qəzaya uğrayır və Dayana yaralı və huşsuz olan Trevoru xilas edir. Sağalması üçün ona qulluq edən Dayana sonradan Stivə aşiq olur. Dayananın anası kraliça Hippolita amazonlar arasında müsabiqə keçirərək onlardan kimin daha güclü olduğunu müəyyənləşdirməyə çalışır. Qalibin Stiv Trevoru insanların dünyasına qaytaracağı və ədalət üçün mübarizə aparacağı qeyd edilir. Hippolita Dayanaya müsabiqədə iştirakı qadağan etsə də, o, üzünə maska taxıb kimliyini gizlədərək müsabiqəyə qatılır. Müsabiqənin qalibi olduqdan sonra Dayana kimliyini açıqlayaraq Hippolitanı təəccübləndirir. Kraliça qızını insanların dünyasına yola salmağa məcbur olur. Anası Dayananın yeni Ecazkar qadın roluna uyğun olaraq hazırladığı geyim və silahları ona bağışlayır.

Qızıl dövr

İlk dəfə ABŞ-yə gələn Ecazkar qadın orduda tibb bacısı kimi xidmətə başlayır. Dayana öyrənir ki, tibb bacılarından biri Cənubi Amerikada yaşayan həyat yoldaşının yanına getmək istəsə də, maddi çatışmazlığa görə arzusunu həyata keçirə bilmir. Dayana isə yaralı Stiv Trevora qulluq etmək üçün tibb bacısı kimliyinə ehtiyac duyur. Buna görə də, tibb bacısının maddi ehtiyacını qarşılayaraq əvəzində onun adını istifadə edir. Beləliklə Ecazkar qadın insanlar aləmində Dayana Prins adı ilə tanınmağa başlayır. Elə bu adla da orduda tibb bacısı kimi xidmət edir.

Bundan sonra Ecazkar qadının başına çoxlu macəralar gəlir və onların əksərində Stiv Trevor Dayananı tək qoymur. Bu dövrdə personajın ən çox toqquşduğu düşmənlər baronessa Pol von Günterin rəhbərlik etdiyi nasist hərbi birləşmələri, Mars kimi qəddar tanrılar və yarımtanrılar, Hiyləgər qraf, həmçinin Hipnota, Həkim Psixo və Çita kimi rəngarəng personajlar olmuşlar.

Gümüş dövrü

Gümüş dövründə Ecazkar qadının hekayəsi bəzi dəyişikliklərə məruz qalır. Onun İkinci Dünya müharibəsi ilə əlaqəli olan mənşə hekayəsi dəyişdirilir, güclərini tanrıların "gözəl Afrodita, müdrik Afina, güclü Herkules və sürətli Hermes" epitetlərinə uyğun olaraq xeyir-dua nəticəsində əldə etməsi göstərilir. Ecazkar qız və Ecazkar Totun ilkin nəzəriyyəsi də bu dövrdə meydana çıxır.

"Wonder Woman (vol. 1) #179" (noyabr, 1968) buraxılışında göstərilir ki, Dayana insanlar aləmində qala bilmək üçün super gücləri, titulu və kostyumundan imtina edərək anasına qaytarır. Bunun səbəbi o idi ki, bütün amazonlar digər ölçüyə keçirlər, Dayana isə səhvən mühakimə edilən Stivə kömək etmək üçün onlara qoşula bilmir. Bundan sonra Dayana Ecazkar qadın adını daşımır, əlbəyaxa döyüş üzrə ustad olan İ-Çinqdən dərs aldıqdan sonra supergüclərə malik olmayan Dayana Prins adı ilə cinayətkarlığa qarşı mübarizə aparır. Həmin dövrdə Dayana həm də dəbli geyimlər mağazası açır və kambinzonlar geyinir. Həmin dövrdə #202-ci nömrədən balayaraq ssenari yazılmasını Samuel Delani öhdəsinə götürür. Dealani əvvəlcə altı nömrədən ibrət süjet xətti yazmağı planlaşdırsa da, Ecazkar qadının güclərini və ənənəvi geyimini itirməsindən təəsüflənən Gloriya Steynemin tənqidindən sonra işdən azad edilmişdir.

Bürünc dövrü

"Wonder Woman Vol 1" #204-də gücləri, geyimi və Ecazkar qadın adı Dayanaya qaytarılır. Həmin nəşrdəcə İ-Çinq dəli snayperçi tərəfindən öldürülür. Daha sonra Dayana bacısı Nubiya ilə qarşılaşır. Hippolita Nubiyanı qara gildən hazırladığından o qaradərili olmuşdur.. Nubiya özünü "Üzən adanın Ecazkar qadını" elan edir və Dayananı duelə çağırır, döyüş heç-heçə başa çatır. Sonradan Nubiya da Dayananın macəralarında iştirak edir.

I cildin son nömrəsində Dayana və Stiv bir-birlərinə olan sevgini etiraf edir və evlənirlər.

Müasir dövr

Sonsuz Dünyalarda Böhran

"Sonsuz Dünyalarda Böhran" komiks xəttindən sonra DC Kainatının bütün hekayələri əsaslı şəkildə dəyişdirilir. Ecazkar qadının mənşəhi və hekayələri də əhəmiyyətli dərəcədə dəyişdirilmişdir. Bundan sonra Femiskiranın (Cənnət adasının yeni adı) insanlar dünyasında emissarı və səfiri olan Ecazkar qadının əsas vəzifəsi insanlar dünyasına sülh gətirməkdir. Bu dəfə Ecazkar qadının mənşə hekayəsində Yunan mifologiyasından olan müxtəlif tanrılar və ideyalar birləşdirilmişdi. Uşağı olmasını arzulayan Hippolita Femiskira sahillərinin gilindən qız fiquru hazırlamış, yunan tanrılar isə ona can vermişdilər. Xeyir-dua ilə bərabər tanrıların hər biri ona bir bacarıq vermişlər: Afrodita gözəllik, Demetra güc, Afina zəka, Hermes sürət və uçma bacarığı, Artemida ovçu baxışı və heyvanlarla ünsiyyət imkanı, Hestiya odla bacılıq və həqiqəti duyma bacarığı bəxş etmişdir. Dyananın döyüş metodları da dəyişdirilərək Supermen və Betmenin ən yaxşı döyüş bacarıqları əsasında yeni döyüş metodu formalaşdırılmış, həmçinin ehtiyac olacağı halda Ecazkar qadına cinayətkarı öldürmək imkanı verilmişdir. Personajın əvvəlki tarixçələri və o cümlədən Stiv Trevorla olan evliliyi ləğv edilmişdir. Trevor Dayanadan yaşca böyük olan bir kişi kimi təqdim edilmiş və sonradan Etta Kendi ilə evlənmişdir.

Tanrıların müharibəsi

"Wonder Woman Vol 2" #50-də bütün dünyaya özlərini bəyan edən amazonlar "Wonder Woman Vol 2" #51-də silsilə qətllər və müxtəlif artefaktların oğurlanmasında günahlandırılırlar. Amazonlar nəzarət altına götürülürlər, kraliça Hippolitanı tapmaq olmur, General Yedziniak isə Femiskiraya hücum edilməyə məcbur edilir. Bu hadisələr "Tanrıların müharibəsi" adlanan hadisələrin baş verməsinə gətirib çıxarır. Cadugər Serseya amazonlar tərəfindən törədilmiş qətllər və oğurluqların şahidi olduğunu bildirir, daha sonra isə Dayananı məhv edərək gilə döndərir. Sonradan Ecazkar qadın həyata qaytarılır, Donna Troyun köməkliyi ilə Serseya birdəfəlik məğlub edilir. Lakin, sonradan Serseya başqa cilddə geri qayıdır.

Hippolita və amazonlar demonik paralel dünyanın tələsinə düşdükdə, kraliça Ecazkar qadının ölümü haqqında görüntülər almağa başlayır. Qızının ölümündən qorxuya düşən Hippolita Dayananın daha Ecazkar qadın olmayacağı haqqında şayiə yayır, yeni Ecazkar qadının kim olacağını müəyyənləşdirmək üçün müsabiqə təşkil edir və beləliklə qızının mümkün taleyini dəyişdirməyə çalışır. Müsabiqənin finalına Dayana və Artemida qalır, Hippolitanın kiçik cadusu ilə Artemida qalib gəlir və Ecazkar qadın adının yeni daşıyıcısı olur. Artemida rəsmən Ecazkar qadın adının yeni daşıyıcısı olsa da, Dayana başqa kostyumda və öz gücü ilə cinayətkarlığa qarşı mübarizəsini davam etdirir. Sonradan Bəyaz sehrbazla döyüş zamanı Artemida həlak olur, beləliklə Hippolitanın Ecazkar qadının ölməsi ilə bağlı görməsi gerçəkləşir, lakin ölən Dayana olmur. Artemidanın son dəqiqələrində onun duel təklifini qəbul edən Dayana yenidən Ecazkar qadın adına sahib olur. Arteemida isə sonradan Rekviyem kimi geri qayıdır. Artemidanın ölümündən əvvəl Hippolita Dayanaya gördükləri haqqında danışır, bu anası ilə onun münasibətlərinin pozulmasına səbəb olur, Dayana onu xilas etmək üçün anasının amazonlardan birini qurban verməsini bağışlaya bilmir.

Dayananı döyüşə cəlb edən demon Neron onu öldürməyə nail olur. Olimp tanrıları ona ölümsüzlük və Həqiqət tanrısı rolunu təqdim edirlər, Dayana Olimp dağında yaşamağa başlayır; həmin dövrdə Ecazkar qadın rolunu Dayananın anası Hippolita yerinə yetirir. "Wonder Woman Vol 2" #136-da Dayana yerdəki insanların insanlarını müşahidə edib özünü saxlaya bilmədiyinə görə Olimpdən qovulur. Təcili olaraq Ecazkar qadın kimi roluna qayıtmaq istəyən Dayana ABŞ-də yaşamağa alışmış anasının müqaviməti ilə üzləşir. Hippolita qalaktikalar arası müharibədə öldüyünə görə onlar arasında döyüş baş vermir. Femiskira müharibə zamanı dağıdılır, lakin üzən adalar kimi bərpa edilir. Sonradan "Wonder Woman Vol 3" #8-də Serseya Hippolitanı dirildir.

OMAC layihəsi

"Sonsuz Böhran" hadisələrinə gətirib çıxaran hadisələrdən biri də "Wonder Woman (vol. 2)" #219-da Ecazkar qadının Supermenin şüurunu nəzarəti altına almış cani Maksvell Lordu öldürməsi olmuşdur. Maksvell Supermenin süşruna təsir edərək onu Betmeni öldürməyə məcbur edirdi. Ecazkar qadın Supermeni dayandırmağa çalışır, Lord isə (Ecazkar qadının şüuruna təsir edə bilmir) Supermenə təsir edərək Ecazkar qadının onun gözünə Luis Leyni öldürməyə çalışan Dumsdey kimi görünməsini təşkil edir. Bu zaman Supermen və Ecazkaq qadın arasında ölümcül döyüş baş verir. Supermenin boğazını tiarası ilə kəsərək vaxt qazanan Ecazkar qadın Lordu Həqiqət qamçısı ilə tutaraq Supermeni necə xilas etməyi soruşur. Qamçının təsiri ilə həqiqəti söyləməyə məcbur olan Lord yeganə yolun onun öldürülməsi olduğunu bildirir. Bundan sonra çıxış yolu qalmayan Ecazkar qadın Maksvell Lordu öldürür və Supermeni onun nəzarətindən azad edir. Bütün bu hadisələr onun xəbəri olmadan Qardaş gözü tərəfindən dünyünın bütün telekanallarında nümayiş etdirilir. İzləyicilər tam olaraq nə baş verdiyini başa düşmürlər və yalnız Ecazkar qadının Ədalət Liqası köməkçilərindən birini öldürdüyünü görürlər. Ecazkar qdın Supermen və Betmeni xilas etməyə çalışsa da, onun hərəkətləri silahdaşları ilə qarşıdurmaya səbəb olur və dostlarının gözümdə Ecazkar qadını soyuqqanlı qatilə çevirir.

Bir il sonra

"Sonsuz Böhran"ın sonunda Ecazkar qadın bir müddət kostyumlu superqəhrəman şəxsiyyətindən uzaqlaşır. Bu dövrdə yenidən Dayana Prins adını istifadə etməyə başlayan Dayana Metainsanlarla iş üzrə Departamentdə işləməyə başlayır. Yeni Ecazkar qadın olan Donna Troy Dayananın düşmənləri tərəfindən ələ keçirilir. Bacısını xilas etməyə çalışan Dayana Serseya və Herkuleslə qarşılaşır. Düşmənlərini məğlub edən Dayana Donna Troyu xilas edir və yenidən Ecazkar qadın adını daşımağa balayır. Serseya Dayananı cadulayır və adi insan formasında olduğu vaxt o, super insan güclərindən istifadə edə bilmir, yalnız Ecazkar qadın kimi həmin gücləri özünə qaytarır.

Dairə

"Dairə" süjet xəttinin əsasında Dayananın körpəliyi dövründə ona tələ quraraq aradan qaldırmağa çalışan dörd amazonun fəaliyyətindən bəhs edilir. Amazonlar – Mirto, Çaris, Filomela və Alkione "Dairə" adlı dəstədə birləşməklə Hippolitanın şəxsi təhlükəsizliyinə cavabdeh olmaqla həm də ona sadiqlikləri ilə seçilirdilər. Lakin, Hippolita qızının tərbiyəsi ilə məşğul olmağa başladıqda, "Dairə" uşağın böyüyərək bütün tayfa üçün təhlükə olacağından qorxuya düşür. Buna görə də, "Dairə" gildən hazırlanmış və can verilmiş körpəni öldürməyə qərar verir, lakin onların cəhdinin qarşısı alınır və "Dairə" üzvü olan dörd amazon həbsə atılır. Bir il sonra Kapitan Nasistin köməkliyi ilə həbsdən qaçmağa nail olan "Dairə" üzvləri əvvəl baş tutmamış planlarını yekunlaşdıraraq Dayananı öldürməyə çalışırlar. Mirto, Çaris və Pilomenanı məğlub edən Dayana, daha sonra, Alkione ilə döyüşmək istəsə də, o, qaçaraq özünü okeana atır və həlak olur. Digər üç amazon isə həbsə qaytarılır.

#600-cü nömrədə Ecazkar qadının Tanrılar tərəfindən yaradılmş əlavə hekayə xətti təqdim edilir: birada Femiskira dağıdılmış, amazonlar isə dünyanın müxtəlif hissələrinə səpələnmişdilər. Bu reallıqda yetim olan Dayana Nyu-Yorkda tək böyüyür və öz gücləri ilə problemlərini həll etməyə çalışır. Bütün dünya Ecazkar qadının varlığını unutmuşdur, o, özünün belə xatırlamadığı reallığı bərpa etməyə çalışır. Dayananın Ecazkar qadın kimi yaşadığı keçmiş və başına gələn macəralar yadından çıxmışdır, o keçmişini hissələrlə xatırlayır və bacarıqların bərpa etməyə çalışır. Ölüm ilahələrinin Morriqan adlı triosu Ecazkar qadının əsas düşməni kimi çıxış edir. Dayana uğurla qəddar ilahələrin tələsindən xilas olaraq hadisələri əvvəlki vəziyyətə qaytarmağa müvafiq olur.

XXI əsr

The New 52

2011-ci ilin sentyabrında DC Comics bütün əvvəlki hekayə xəttlərini yeniləyərək "The New 52" hadisələrinin nəşrinə başlayır. Digər mühüm dəyişikliklərlə yanaşı Ecazkar qadın indi köhnə paltarını xatırladan yeni paltar dəstində təsvir edilir, həmçinin yeni mənşə ekayəsinə malikdir. Bu yeni hekayə xəttində Dayana gildən hazırlanmış və tanrılar tərəfindən canlandırılm insan deyil. O, kraliça Hippolita və Zevsin övladı, yarımilahə kimi təqdim edilir. Onun orijinal mənşə hekayəsi isə belə izah edilir ki, Hippolita Dayananı Heranın qəzəbindən qorumaq üçün onun mənşəyi ilə bağlı yalan demişdir. Bu hekayə xəttində Dayana yeni "Müharibə tanrısı" titulu və rolunu götürür.

Yunan xəbər tanrısı Hermes Ecazkar qadının qəzəbli olan və körpəyə zərər yetirməyə çalışan Heradan müdafiəsini Zevsdən hamilə olan Zola adlı gənc xanıma həvalə edir. Ecazkar qadının yeni düşməni olan təbaşir kimi ağ dərili ilahə Strifenin (Böhrandan sonrakı dövrdə Ecazkar qadına qarşı mübarizə aparmış qarşıdurma ilahəsi Erisin yenilənmiş versiyası) meydana çıxmasından sonra Dayana Hippolita və Zevsin övladı olmasını öyrənir və valideynlərinin ciddi qarşıdurmadan sonra bir araya gəlməsindən xəbər tutur. Hippolita Dayananın əvvəlki mənşə hekayəəsinin yalan olmasını, onu, Zevsin bir neçə qanunsuz övladını oblayaraq öldürmüş Heranın qəzəbindən qorumaq üçün bu hekayəni uydurduğunu bildirir.

Ecazkaq qadının tanış olduğu yarı-qardaşı Lennoks Sendsmark mərmərə bənzər canlı daşa çevrilə bilir, ölümündən bir qədər əvvəl isə o, Ecazkar qızın (Kassi Sendsmark) atası olduğunu etiraf edir. Onun qatili olan Zevsin böyük varisi İlk doğulmuş "The New 52" seriyasında Ecazkar qadının ilk böyük supercani düşməni olur.

Ədalət Liqası, II cild, #12-nin üz qabığında Supermen və Ecazkar qadının öpüşməsi; Rəsam: Cim Li.

Hekayədə daha sonra, əsas fikir #6-cı nömrənin sonunda Zolanı oğurlayaraq cəhənnəmmdə gizlədən Aidin məğlub edilməsi üzərində cəmlənir. Amazonların oğlan övladları təqdim edilirlər, Dayana qardaşlarının necə dünyaya gəlməsini müəyyən etmək istəyərkən, amazonların dənizçiləri cəlb edərək onlardan hamilə qaldıqlarını və sonra onları öldürdüklərini öyrənir. Doqquz ay sonra doğulan qız uşaqları yüksək qiymətləndirilərək amazon tayfasına qəbul edilsələr də, oğlan uşaqlarından imtina edilirdi. Oğlan uşaqlarını ölümdən xilas etmək üçün Hefest amazonlara silah verir, əvəzində isə uşaqları onlardan alır.

Zolanı Aresin əlindən xilas etdikdən sonra, Ecazkar qadın onu Apollonun əlindən xilas etməyə çalışır. Belə ki, deyimə görə, Zevsin övladlarından biri Apollonun məhvinə səbəb olacaq, Apollon isə həmin uşağın Zolanın övladı olmasını düşünür. Hermesin atdığı lələyin ona toxunmasından sonra Ecazkar qadın uçma bacarığı qazanır, Hermes isə Zolanın övladını qaçıraraq Demetraya verir. Jurnalın qaranlıq tonlarda olan son səhifəsində qardan qalxan bir adamın dəbilqə götürərək yoxa çıxması göstərilir. Sonradan bəlli olur ki, bu adam Zevsin İlk doğulmuş adı ilə məlum olan oğludur. O, Olimp eləcə də digər dünyaları idarə etmək, həmçinin Dayana ilə evlənmək istəyir.

Sentyabrda çıxarılmış #0 nömrəli jurnalda Dayananın körpəliyi, həmçinin indi daha çox Müharibə adı ilə qeyd edilən müharibə tanrıssı Aresin himayəsi altında böyüməsindən bəhs edilir. Gümüş dövrünə aid tipik komiks nəqli formasında yazılmış nömrədə Dayananın uşaqlıq illəri diqqət mərkəzində saxlanır. Ares Dayananı xüsusi və böyük potensiala malik qız hesab etdiyindən onu şəxsən məşq etdirir. Dayana Aresdən mərhəmətin nə olmasını öyrənir. Bu, sonradan onun Aresin tapşırığını yerinə yetirməyərək Minotavrı öldürməkdən imtina etməsinə səbəb olur; bundan sonra Müharibənin gözündə o, kifayət qədər layiqli olmur. Sonradan Zevsin oğlu İlk doğulmuşla münaqişə zamanı Dayana Aresi öldürür və özü Müharibə tanrısı olur. Sonradan Dayana amazonlar arasında həm döyüşçü kraliça, həm də Müharibə tanrısı kimi tanınır. Azzarellonun seriyasının sonunda Ecazkar qadın İlk doğulmuşu öldürə bilir.

"The New 52" seriyasının tərkib hissəsi olaraq 2011-ci ildə nəşr edilmiş, Ceff Cons tərəfindən yazılmış və Cim Li tərəfindən çəkilmiş "Ədalət Liqası" jurnalında əsas qəhrəmanlardan biri kimi təsvir edilir. 2012-ci ilin avqustunda yayımlanmış "Justice League Vol 2" #12-də Ecazkar qadın Supermenlə öpüşür. 2013-cü ildə DC-nin təqdim etdiyi "Superman/Wonder Woman" seriyasında əsas diqqət onların ikisinin birlikdə mübarizə aparması və superçütlük kimi romantic əlaqələrinə yönləndirilir.

"Convergence" hadisələrindən sonra Ecazkar qadının kostyumu yenidən dəyişdirilir. O, Ecazkar qadının doppelqangeri kimi təqdim edilən Donna Troyla üzləşməli olur.

Earth 2

"The New 52" seriyasının "Earth 2" versiyası "Earth 2" #1 jurnalı ilə 2012-ci ildə təqdim edilmişdir. Həmin jurnalda "Earth 2" Ecazkar qadını xatirələr vasitəsiylə təqdim edilir. Ecazkar qadın Supermen və Betmenlə birlikdə beş il əvvəl Apkalips planetindən olan yadellilərə qarşı döyüşdə ölür. Bu Ecazkar qadın yunan yox, Qədim Roma tanrılarına ibadət edirdi, həmin tanrılar isə döyüşdə ölür. "Earth 2" Ecazkar qadınının erkən versiyası Apokalipslilərin hücumlarından əvvəl "Batman/Superman" komiks kitabında peqasus çaparkən təsvir edilir.

"Earth 2" #8-də (2013) Ecazkar qadının qızı Fyuri təqdim edilir. O, apokalpsli cani Steppenvolfa sədaqət göstərir.

DC Rebirth

2016-cı ildə DC Comics "DC Rebirth" seriyası ilə bütün əvvəlki komiks xəttlərini yenilədi.

Darksayd müharibəsindən sonra Ecazkar qadın ölüm ayağında olan Mirina Blekə danışır ki, Hippolita Dayananı doğarkən əkiz uşaqlar dünyaya gətirmişdir. Bu uşağın inanılmaz gücə malik Ceyson adlı oğlan olduğu qeyd edilir. Ecazkar qadın qarşısına onu tapmaq məqsədi qoyur. Həmin vaxt o, öz mənşəyi ilə bağlı həqiqətləri də üzə çıxarmağa çalışır, lakin keçmişi ilə bağlı iki versiya – Fleşpoint və "New 52" versiyalarını xatırlayır. O, Femiskiranı və amazonları tapa bilmir, Həqiqət qamçısı isə ona tabe olmur.

"Year One" hekayə xətti Diananın mənşə hekayəsi və Femiskirada həyatından bəhs edir. İdillik həyat yaşayan Dayana xarici dünyaya maraq göstərir və onun Cənnət adasından kənar həyatla ilk əlaqəsi qəza nəticəsində adaya düşmüş zabit Stiv Trevor vasitəsiylə baş tutur. ABŞ-yə gələn Dayana burada Etta Kendi və Barbara Enn Minerva ilə tanış olur. Həbsdə olarkən tanrılar heyvan cildində onu ziyarət edərək gec və bacarıqlar bəxş edirlər. O, öyrənir ki, müharibə tanrısı Ares insanlığı məhv etməyə çalışır. Ona arşı mübarizə aparan Dayana ən böyük qəhrəmanlardan birinə çevrilir və Ecazkar qadın adını götürür.

"Lies" hekayə xətti parallel inkişaf edərək Dayananın axtarışlarını təsvir edir. Olimp dağına qayıtmaq imkanını itirən Dayana kömək tapmaq üçün Barbara Enn Minerva və Çitanı izləyir. Çita ona kömək etməyə razılaşır, əvəzində isə Dayanadan tanrı Urzkartaqanı öldürməyə Minervanın cadusunu sona yetirməyə köməklik etməyi xahiş edir. İnsan cildinə qayıdan Minerva Ecazkar qadına Femiskiraya qayıtmağa kömək etməyə söz verir. Sonda Minerva başa düşür ki, Femiskira fiziki məkan olmayıb hisslərin ifadəsidir, buna görə də Ecazkar qadın və Stiv adanın axtarışı üçün yola düşürlər. Onların səfəri uğurlu olur və Ecazkar qadın anası, həmçinin amazonlarla görüşür, buna baxmayaraq Stiv narahatlıq hiss edir. Ecazkar qadın Həqiqət qamçısının köməkliyi ilə öyrənir ki, onun bütün xatirələri və Femiskiraya qayıtması yalan imiş və Stivlə adanı ilk dəfə tərk etdikdən sonra bir daha ora qayıda bilməmişdir. Bunları öyrənən Dayananın vəziyyəti ağırlaşır və Stiv onu psixiatriya xəstəxanasına yerləşdirir. Daha sonra səhv etməsi ilə bağlı reallığı qəbul edən Dayana xəstəxanadan çıxa bilir.

Xüsusiyyətləri

Marstonun xətti zamanı Dayana Prins Ecazkar qadının qarşılaşdığı tibb bacısının adı idi. Tibb bacısı Cənubi Amerikaya göndərilmiş həyat yoldaşını görmək istəyirdi, lakin buna maddi imkanı çatmırdı. Stivə qulluq etmək üçün (Dayana Prinsin çalışdığı hərbi hospitalda müalicə olunurdu) gizli identikliyə ehtiyacı olan Ecazkar qadın, xarici görünüşcə oxşarı olan Dayanaya həyat yoldaşının yanına getmək üçün pul verir və onun adını özünə ləqəb götürür. O, hərbi tibb bacısı kimi işləməyə başlayır və daha sonra Hava Qüvvələri katibəsi olur.

Dayana Prins şəxsiyyəti 1970-ci illərin əvvəllərində çıxarılmış komikslərdə daha aktual olmuş, bu kitablarda qəhrəman mistik gücləri olmadan Dayana adı altında cinayətkarlığa qarşı mübarizə aparmışdır. Şəxsiyyətini dəstəkləmək üçün o, geyim butiki saxlamışdır.

"Sonsuz Dünyalarda Böhran" xəttindən sonra müttəfiqləri də Dayana Prinsin hekayələrində mühüm rol oynamağa başlayırlar. Supermenin şüurunu nəzarət altına alaraq Betmeni öldürməyə çalışan supercani Maksvel Lordu öldürmək üçün Ecazkar qadın bütün dünyanı gəzməyə məcbur olur. Həqiqət qamçısı ilə Maksveli tutan Dayana ondan Supermenin şüurunu necə əvvəlki halına qaytarmağı soruşduqda, cani yeganə yolun onun öldürülməsi olduğunu bildirir və Ecazkar qadın Lordun boynunu qırır. İnsan öldürməyin verdiyi ağrıdan xilas olmaq üçün Amazon bir ilini sürgündə keçirir. İnsanlar arasına qayıtdıqda Dayana başa düşür ki, onun superqəhrəman həyatı insanlardan uzaqlaşmasına imkan vermir. Buna görə də o, Dayana Prins adı ilə Metainsanlarla iş üzrə Dövlət Departamentində işə başlayır. Cadugər Sirseya ilə döyüş zamanı cadunun təsiri ilə o, Ecazkar qadın güclərini itirir.

"New 52" kainatında, seriyanın müəllifi Drayan Azzarellonun müsahibələrindən birində qeyd etdiyi kimi, Ecazkar qadın gizli identikliyə malik deyildir. Lakin, yenidən Supermenlə görüşməyə başladığı vaxt o, yenidən Dayana Prins ləqəbindən istifadə edir və bu adla Klark Kentin yanında gəzir; məsələn yeni evə köçməsi münasibətilə Luis Leynin təşkil etdiyi qonaqlıqda o, özünü bu adla təqdim edir.

Şəxsiyyəti

Şahzadə Dayana həm Ecazkar qadın, həm də Dayana Prins kimliyinə hörmətlə yanaşır; onun epitetik adı – Amazon şahzadəsi – xasiyyəti ilə dixotomiya təşkil edir. O, döyüşdən və qarşıdurmadan çəkinməyən güclü, müstəqil xasiyyətə malikdir, lakin o həm də "qələmə üstünlük verən" güclü siyasətçi olmaqla daima sülh axtarışındadır. O, Ədalət Liqasının həm ən qəddar, həm də ən mərhəmətli üzvüdür; Birləşmiş Millətlərin Fəxri Səfiri və döyüşçü xalqın səfiri olması onu komandanın əvəzolunmaz üzvünə çevirir. Güclü bacarıqları, əsrlərlə davam edən məşqləri və kiçik cinayətdən böyük magik faciəyə kimi təhlükəni hiss etmək qabiliyyətinə görə Dayana demək olar ki, istənilən qəhrəman və ya cani ilə mübarizə aparmağa qadirdir.

Bir çox yazıçılar Dayananı müxtəlif şəxsiyyət və xarakterlərlə təsvir etmişlər; müəllifdən asılı olaraq o, qəddar döyüşçü, kövrək və ürəyi yumşaq səfir, bəzən isə saf və günahsız insan kimi göstərilmişdir. Dəyişilməyən yeganə şey onun xarakterinin dayağı olan insanlıq olmuşdur; Ecazkar qadın həmişə sevginin şəfqət bəxş edən gücünə inanmış, mərhəmətli və vicdanlı olmuşdur. Bu xüsusiyyətləri onun Ulduz yaqutları dəstəsinə daxil edilməsinə əsas vermişdir.

Yazıçı Geyl Simonenin Ecazkar qadın seriyası üzərində işi "IGN"in komiks şərhçisi Den Fillips tərəfindən alqışla qarşılanmış və qeyd edilmişdir ki, o, "Dayananı yardımsevər və cazibədar personaj kimi təqdim edir."

Aktrisa Qal Qadot Ecazkar qadını "idealist, təcrübəli, özünə inanan, hətta qorxunc qanlı döyüş vaxtı belə səmimi və açıq, güclü, böyük emosional intellektə malik qadın" kimi təsvir edir.

Qızıl dövrdə, Ecazkar qadın Amazon kodeksinə sadiq qalaraq hər kəsə, hətta misoqnitik şəxslərə belə köməyini əsirgəmir, qəhrəmanlıqlarına görə öyünmür; personajın mübahisəli yeni versiyası isə çıxış yolu qalmadıqda öldürməkdən çəkinmir ki, bunun da bariz nümunəsi, Ecazkar qadının Supermenin həyatını xilas etmək üçün Maksvell Lordu öldürməsidir.

Personajın "New 52" versiyası daha gənc olmaqla, daha tərs, romantik, sərt və özbaşınadır. Brayan Azzarello DC Comicslə video müsahibəsində bildirir ki, onlar personaj üçün "özünəinamlı", "impulsiv" və "təmiz ürəkli" insan xasiyyəti formalaşdırmışlar. Yazıçı personajın hissiyatlığını onun həm güclü, həm də zəif tərəfi kimi təqdim edir.

Personajın xarakterini göstərən ən yaxşı ifadələr Elizabet Hollavey Marston tərəfindən istifadə olunmuş "Böyük Afrodita!", "Böyük Hera!", "Mərhəmətli Minerva!", "Cəfakeş Safo!" mifoloji tərifləridir.

Alternativ versiyaları

Ölümündən sonra Dayana sadiqliyinə görə tanrılar tərəfindən təltif edilərək Həqiqət tanrısı elan edilir. Dayana, qısa müddətlik Olimp tanrısı dövründə yerdə Ecazkar qadın kimi anası Kraliça Hippolita tərəfindən əvəz edilmişdi. Dayanadan fərqli olaraq Ecazkar qadın adı Hippolita üçün Artemidaya xəyanətə və qızının ölümünə səbəb olmasına görə cəza kimi verilmişdi. Lakin, Hippolita adın verdiyi azadlıq və macəralardan zövq ala bilir. Dayana əsas silah kimi Ədalət qamçısından istifadə edirdisə, Hippolita böyük qılınca üstünlük verir.

Hippolitanın ilk Ecazkar qadın kimi təqdim edilməsi ideyasının müəllifi olan yazıçı Con Birn fikirlərini belə izah edir:

Mən fikirləşdim ki, Ecazkar qadının yeni xəttinin yazılması zamanı Corcun əsas səhvi personajın Cənnət adasını tərk edərkən cəmi 25 yaşında olduğunu göstərməsidir. Mən min illərlə yaşı olan personaj ideyasına (səhv etmirəmsə teleserialda belə göstərilmişdi) üstünlük verirdim. Bu baxımdan mən istərdim ki, Dayana İkinci Dünya müharibəsi zamanı Ecazkar qadın olsun, rebut zamanı isə bizim dövrümüzə gəlsin. Bu imkan olmadığından mən yeni yol tutaraq Hippolitanı Ecazkar qadın kimi təqdim etdim.

Ecazkar qadın olan Kraliça Hippolita 1940-cı illərdə Cey Qarriklə birlikdə zaman səyahəti missiyasına başlayır. Missiyadan sonra o, Amerikanın Ədalət Cəmiyyətinə üzv seçilir və həmin dövrdə səkkiz il müddətinə cəmiyyətin üzvü olaraq qalır. Komanda üzvləri onu Polli adlandırırlar. Həmin dövrdə onun Vəhşi Pişiklə romantik əlaqəsi olur. Protejesi Helenanın qızı olan Litanı (Hippolita onun xaç anası idi) görmək üçün Hippolita həm də keçmişə səyahət edir. Belə səfərlər AƏC/AƏL ilə bağlı tapşırıqlarla əlaqəli olaraq da həyata keçirilmişdir. Keçmişdən qayıtdıqdan sonra Hippoliya Ədalət Liqasında da Dayananın yerini tutur.

Hippolita yeni Ecazkar qadın rolu üçün sınaqdan keçirildiyi müddətdə Ecazkar qadın Bana-Miqdallı Artemida olmuşdur. Böhrandan əvvəlki və Sonsuz dünyalarda böhran davamlıqlarında müsabiqə nəticəsində Artemidaya qalib gələn Orana Ecazkar qadın olur. Orana ilk missiyası zamanı öldürülür. Ecazkar qadın adı daşıyanlar Nubiya, Kassandra Sendsmark və Donna Troy olmuşdur.

Qabiliyyətləri

Güc və bacarıqları

Dayana ustad atlet, akrobat, döyüşçü və strateq olmaqla, bir çox silahlı və silahsız qədim, həmçinin müasir döyüş növlərində, eyni zamanda Amazon döyüş sənətlərində məşq etmişdir. Bəzi versiyalarda anası, gələcək Ecazkar qadın olması üçün Dayananı Ecazkar qız kimi məşq etdirir. Başlanğıcdan onun Amazon qolçaqları ilə güllələri qaytarmağı və qızıl qamsını yaxşı istifadə etməsi təsvir edir. Betmen onu "ən yaxşı əlbəyaxa döyüşçü" adlandırır. Personajın müasir versiyası ehtiyac olduğu halda öldürücü gücdən də istifadə edir. "New 52" davamlığında onun güclü döyüş bacarıqlarının olmasının səbəbi uşaq ikən müharibə tanrısı Aresdən dərs alması ilə əlaqəlidir. Qızıl dövr Ecazkar qadını amazon bacıları kimi həm də psixologiya elmini bilmişdir.

Böhrandan əvvəl

Ecazkar qadın superinsan gücləri olmadan cinayətkarlığa qarşı mübarizə apararkən. Ecazkar qadın #189 nəşrinin (iyul, 1970) üz qabığı. Mayk Sekovskinin təsviri.

Qızıl dövr Ecazkar qadını Qızıl dövr Supermeni ilə müqayisə ediləcək gücə malik idi. Ecazkar qadın hətta qolçaqların köməyi olmadan belə 15.000 funt sıxma gücünə malik olmaqla, amazonları döyüşə ilhamlandırmaq üçün 50.000 funtluq yükü başı üstünə qaldırır. Hətta superqəhrəman gücləri sıfıra endirildiyi vaxtda belə, Ecazkar qadın həbsxana qapısını sındıraraq Stiv Trevoru azad etməyə kifayət edəcək qədər gücə malik idi. Ən erkən variantlarından birində Ecazkar qadın 97 km/h qaçaraq daha sonra binadan atılır və rahatlıqla ayaq döşəyi üzərinə enir.

Cənnət adasının Cavanlıq bulağından su içdiyinə görə o, adi insanlardan daha sürətlə sağalır. "Afrodita qanunu"na görə, Ecazkar qadın qolçaqlarını taxmaq üçün kişiyə versə güclərini itirəcək.

Marstonun parapsixologiya və metafizika ilə əlaqəli maraqlarına uyğun olaraq Ecazkar qadın həm də mental və psixi bacarıqlara malik olmuşdur. Əlavə Sensor Qavrayışı, astral proyeksiya, telepatiya (mental radio ilə və ya onsuz), orqanizmindəki elektrik üzərində nəzarət, amazonların beyin enerjisini əzələ enerjisinə çevirmək bacarığı bu bacarıqlar sırasına daxildir. Həkim Elektro tərəfindən elektron atomayzeri tərəfindən vurulduqdan sonra Ecazkar qadın ilk dəfə elektrik vurmasına qarşı həssaslığını itirmişdir; həmçinin məlum olmuşdur ki, o, bədəni ilə mental radio mesajları ötürə bilmir.

Ecazkar qadın (I cild) #105-də göstərilir ki, anası tərəfindən gildən yaradılan Dayanaya Yunan və Roma tanrıları (başqa adla Olimp tanrıları kimi tanınır) tərəfindən həyat bəxş edilir və buna görə də "Afrodita kimi gözəl, Afina kimi müdrik, Hermes kimi sürətli və Herkules kimi güclü" olur. Ecazkar qadının amazon məşqləri ona qismən telepatiya imkanları, dərin bilik və mağara adamı və marslıların dili də daxil olmaqla bütün dillərdə danışmaq imkanı bəxş edir. 1966–1967-ci illərdə Ecazkar qadına super nəfəs kimi yeni güclər əlavə edilir.

Komikslərin gümüş və bürünc dövrlərində Ecazkar qadının gücləri daha da artırılır. Böyük ehtiyac olduğu zaman qolçaqlarını çıxardığı halda Ecazkar qadın gücünü onlarla dəfə artıra bilir, lakin bu, onun berserk olmasına gətirib çıxarır. "Sonsuz dünyalarda böhran" hadisələrindən sonra bu güclər dəyişdirilmişdir.

Böhrandan sonra

Böhrandan sonrakı dövrdə Gümüş dövründə olduğu kimi Ecazkar qadının supergüclərinin ona Olimp tanrıları tərəfindən xeyir-dua olaraq bəxş edilməsi təsvir edilsə də, bəzi gücləri dəyişdirilmiş formada təsvir edilmişdi:

• Demetra əkinçilik və bərəkət ilahəsi olmaqla Dayanaya yerin ruhu olan Geyanın gücünü bəxş etməklə onu DC Kainatının ən güclü qəhrəmanlarından biri və ən güclü qadın superqəhrəmanı etmişdir. Bu gücünü istifadə etməklə Ecazkar qadın asanlıqla Supermen və Supergörlə qalib gələ bilir, lakin hazırda Dayana Zevsin qızı kimi təqdim edildiyinə görə onun supergücü birbaşa ilahi mənşəyi ilə əlaqələndirilir. Onun yerlə olan əlaqəsi planetdə olduğu müddətcə sürətlə sağalmasını təmin edir, lakin yuxarıda qeyd edildiyi kimi müasir nəşrlərdə personajın ilahi mənşəyi önə çəkildiyinə görə, bu bacarıq da həmin mənşə ilə əlaqələndirilir. Çox nadir hallarda ağır yaralanarkən Dayana sağalmaq və ya zəhərdən xilas olmaq üçün torpağa qarışa bilir, lakin bu, müqəddəs ritual olduğundan çox nadir hallarda həyata keçirilir.
• Afina müdriklik və müharibə ilahəsi olmaqla Dayanaya böyük müdriklik, intellekt və hərbi güc bəxş edir. Afinanın hədiyyəsi Dayanaya bütün dillərdə (o cümlədən yad planetlilərin dillərində) danışmaq bacarığı, çoxsaylı mürəkkəb sənətlər, elm və fəlsəfə, liderlik, hərbi strategiya, silahlı və silahsı döyüş sənətlərini istifadə etməyə imkan verir. Son dövrdə Afina şəxsi empatiyasını göstərmək üçün Ecazkar qadının baxışını öz baxışı ilə əlaqələndirmişdir.
• Artemida ovçuluq, heyvandarlıq və Ay ilahəsi olmaqla, Dayanaya ovçu baxışı, və heyvanlarla birlik bəxş etmişdi, yəni, Dayana dinazavrlar da daxil olmaqla bütün heyvanlarla danışa bilir. Ovçu baxışı Dayananı tam spektr gücləndirilmiş hisslər, o cümlədən teleskopik baxış və supereşitmə ilə təmin edir.
• Hestiya ocaq və ev ilahəsi olmaqla, Dayanaya alovla bacılıq bəxş etmişdir. Bu güc "həqiqət alovu"nu idarə etməyə imkan verir. Dayana qamçısı vasitəsiylə istənilən adamı həqiqəti söyləməyə məcbur edir. Bu bacarıq həm adi, həm də fövqəltəbii alovları Dayana üçün təhlükəsiz edir.
• Hermes cəldlik tanrısı olmaqla, Dayanaya superinsan gücü və uçmaq bacarığı bəxş etmişdir. O, işıq sürətinin yarısına bərabər sürətlə uçmağa qadirdir. Sürətlə hərəkət etmə bacarığına görə qolçaqları vasitəsiylə güllə, lazer və digər silahları dəf edə bilir. 2011-ci il buraxılışından sonra Ecazkar qadın təbii uçma qabiliyyətinə malik deyildir. Yalnız Hermes tərəfindən atılmış lələyin ona toxunmasından sonra Dayana həmin bacarığı əldə edir.
• Afrodita sevgi ilahəsi olmaqla Dayanaya gözəllik və ürək gözəlliyi bəxş etmişdir.

Tamamilə məğlubedilməz olmasa da, Dayana çoxlu zərb və ekstremal temperatura davamlıdır ki, bu da onu Supermenə tay edir, lakin böyük güc tətbiq edildiyi halda soyuq və ya alovlu silah onun dərisini deşməyə qadirdir. İlahi mənşəyinə görə Dayana müxtəlif sehr manipulyasiyalarına da davamlıdır.

Ecazkar qadın müxtəlif mifik aləmlərə astral səyahət edə bilir. Onun fiziki bədəni astral aləmdə baş verənlərə reaksiya verə bilir, orada baş verən hadisələr nəticəsində onun bədənində yaralar əmələ gələ və ya gücü arta bilir. O, meditasiya vasitəsiylə dünyanı tərk edərək başqa dünyalara səfər edir və Artemidanı Cəhənnəmdən xilas etmək üçün bir dəfə bu üsuldan istifadə etmişdi.

New 52 və Rebirth

2011-ci ildə DC komikslərinin yenidən buraxılmasından sonra Dayana yeni güclər əldə edir. Superinsan sürəti, davamlılıq, uzunömürlülük, sürətli sağalma və uçma kimi bacarıqlar Olimp tanrıları tərəfindəən hədiyyə edilmiş qabiliyyətlərə əlavə olundu. Bundan sonra Ecazkar qadın Herakldən daha güclü hesab olunur. Silah arsenalına əlavə olunmuş funksiyalardan biri qolçaqlarını çarpazlaşdırdığı zaman onların partlayış yaratmasıdır. Bu yeni bacarıqlar onun Hippolita və Zevsin qızı olması ilə əlaqələndirilmişdir. İndi onun qolçaqları olmadığı halda idarəolunmaz gücə malik olduğu hesab edilir. Bu gücünü Artemidaya qarşı döyüşdə istifadə edən Dayana qısa zamanda onu şüursuz hala gətirə bilir. İlahi gücünü istifadə etdiyi zaman onun geyimləri yanır və gözləri atasının gözləri kimi işıq saçır.

Müharibə tanrısına çevrildikdən sonra Dayana Aresin ilahi bacarıqlarına da sahib olur. Dayana heç vaxt müharibə tanrısı kimi tam gücünü nümayiş etdirməsə də, "Superman/Wonder Woman #5"-də göründüyü kimi Dayana əsgərlərlə telepatik əlaqəyə girir və bunu "Mən müharibəyəm.. Mən bütün əsgərləri tanıdığım kimi onlar da məni tanıyırlar" deyə izah edir.

"Rebith" seriyasından "Year One" xəttində bildirilir ki, Dayana insanların dünyasına gəldikdən sonra, Olimp tanrılarının hər biri heyvan cildində onu ziyarət edərək Dayanaya müxtəlif güc və bacarıqlar bəxş edirlər ki, ehtiyac olduğu zaman onlar özlərini büruzə versinlər. Dayana bu gücünü ilk dəfə Stiv Trevor, Etta Kendi və Barbara Enn Minervanın onu ziyarət etməsi zamanı qəfəsi sındırması zamanı hiss edir. Ticarət mərkəzinə səfər zamanı terrorist hücumunun qarşısını alarkən isə o, sürət, davamlılıq və uçma bacarığını kəşf edir.

Texnologiya

Dayana geniş silah cəbbəxanasına malik olsa da, onun ən məşhur silahları sarsılmaz qolçaqları və Ədalət qamçısıdır.

Zirehli geyimi

2014-cü il Nyu-York Komik-Kon Festivalında Ecazkar qadın kospleyi. Ecazkar qadın sinəsində qartal, tiarasında isə beşguşəli ulduzla təsvir edilmişdir.

Müxtəlif dövrlərdə Ecazkar qadının geyimləri dəyişsə də, onun qolçaqları, tiarası və beş guşəli ulduz simvolu dəyişilməz qalmışdır. İkinci Dünya müharibəsi dövründə ilk dəfə təqdim olunan Ecazkar qadının əynində vətənpərvər ətək, qartal və ABŞ bayrağının elementləri ilə bəzədilmiş qırmızı köynək var idi ki, bu da komiksin mənşəyini nümayiş etdirirdi. Sonrakı rəssamların əlavələri personajın klassik geyiminin tərkib hissəsinə çevrilmiş iç-içə WW hərfini xatırladan bəzəkli üst zirehi və rəssamlardan asılı olaraq gödəkliyi dəyişən qısa göy şort daxil idi. Digər rəssamlar illər ərzində Ecazkar qadının xarici görünüşü ilə təcrübələr edərək onu tamamilə ağ dəbli kambinzon, bayker geyimi, qara dəri şalvar və gödəkçə və müxtəlif döyüş paltarları geyindirmişlər. Müasir rəssamlar personajı daha çox qırmızı zirehli geyim və göy qladiator şortunda təsvir etməyə üstünlük verirlər.

Qızıl dövr

Ecazkar qadının ənənəvi geyimi Amerikan simvolizmini əks etdirməklə ulduz simvolu, sinəsində qızılı qartal təsviri, al qırmızı köynək, ağ kəmər və tünd mavi ulduz bəzəkli şort daxildir.

O, həmçinin bir cüt parlaq qırmızı sırğaya malikdir ki, onlar Venera planetinin kraliçası Desiradan mesaj almağa kömək edir.

Böhrandan əvvəl

Debütü zamanı Ecazkar qadın üzərində qızılı qartal təsviri olan qırmızı köynək, ağ kəmər, mavi ulduzlu külot və qırmızı və qızılı çəkmələr geyinirdi. Əvvəlcə o, ətəklə təsvir edilirdi; Elizabet Marston qeyd edir ki, "ətəyi çəkmək çox çətin idi və personajın başını çəkməkdən çox vaxt aparırdı." Bu geyim bütünlükdə ABŞ bayrağını əks etdirirdi, çünki İkinci Dünya müharibəsi dövründə debüt edən Ecazkar qadın ilkin olaraq amerikan ikonası kimi nəzərdə tutulmuşdu. 1942-ci ilin sonlarında Ecazkar qadının geyimi yüngül dəyişikliyə məruz qalır: külot qısa dar şortla, çəkmələr isə sandallarla əvəzlənir. Əvvəl onun kürəyi açıq təsvir olunsa da, 1950-ci illərin ortalarında Komiks Kodeks Hakimiyyətinin qəbul edilməsindən sonra onun geyiminə dəyişiklik edilərək daha qapalı forma yaradılmışdır ki, qanunvericiliyin tələblərinə cavab versin. 1960-cı illərin sonlarında Mayk Sekovskinin seriyası zamanı Dayana super güclərindən imtina edərək öz bacarıqları vasitəsiylə cinayətkarlığa qarşı mübarizə aparmışdır. Həmin dövrdə personaj müxtəlif kombinezonlar geyinirdi ki, onlardan da ən məşhuru ağ kombinezon idi.

1970-ci illərin əvvəllərində Sekovskinin seriyasının tamamlanmasından sonra Ecazkar qadın yenidən mifoloji köklərinə qaytarılır və ilkin geyiminin modernləşdirilmiş variantını geyinir. 1976-cı ildə onun ağ kəməri sarı kəmərlə əvəzlənir. Daha sonra rəssam Terri Dodson onun geyimini dəyişərək bretelsiz çimərlik geyiminə oxşar formaya salır.

Böhrandan sonra

"Sonsuz dünyalarda böhran"dan sonra 1987-ci ildə Corc Perez personajı rebüt edir. O, 1970-ci illərin geyiminə bənzər olan, lakin indi geniş qızılı kəmərlə tamamlanmış kostyum geyinir. Bu geyim Uilyam Messner-Loebin seriyasına (bu seriyada Ecazkar qadın Dayana yox Artemida olur) kimi davam edir. Artıq Ecazkar qadın olmayan Dayana isə Mayk Deodato tərəfindən çəkilmiş qara bayker kostyumu geyinir. Daha sonra Ecazkar qadının yazıçı və rəssam işini Con Birn öz öhdəsinə götürür və Ecazkar qadının (Loebin seriyasının sonunda Ecazkar qadın rolunda Artemidanı yenidən Dayana əvəz edir) geyimi yenidən dəyişdirilir: bu dəfə klassik geyimə emblemli kəmər əlavə edilir.

2005–2006-cı illərin "Sonsuz böhran" seriyasında personajın kostyumuna əsaslı dəyişiklik edilmir. Sinə zirehi kimi Ecazkar qadının kəməri də parlaq "W" loqosu ilə bəzədilir. Bu geyim 600-cü nəşrə kimi davam etdirilir – Cey Maykl Streçinskinin seriyası isə personajın görünüşünü kəskin şəkildə dəyişir. Ecazkar qadının Cim Li tərəfindən yenidən dizayn edilmiş geyimi qızılı və qırmızı üst geyimi, qara şalvar və sonradan əlavə edilmiş mavi xələt daxil idi.

Sonradan Gey Simone Ecazkar qadının geyimini yenidən Amazon kökləri ilə əlaqələndirir. III cilddə xatırlama zamanı göstərilir ki, Ecazkar qadın üçün geyim hazırlanmasını sifariş edən Hippolita Dayananın doğulması gecəsində səmanın görünüşünü xatırlayır; qırmızı ovçu ayı və mavi səma fonunda çoxlu ulduzlar, qartal simvolu isə Afinanın quş təsviri ilə əlaqələndirilir.

The New 52

DC komikslərinin "The New 52" xətti çərçivəsində yenidən nəşrində Ecazkar qadının geyimləri əsaslı olaraq dəyişdirilmişdir. Personajın orijinal bütöv geyimi qaytarılmış, qırmızı və mavi rənglər isə tünd qırmızı və mavi-qara rənglərlə əvəzlənmişdir. Kəmər və tiarasının rəngi isə qızıldan platin və ya gümüş rəngə dəyişdirilmişdir. Silahları sırasına qılıncla yanaşı qalxan əlavə edilmişdir. Aksesuarları sırasına "WW" motivli qol və boğaz zərgər nümunələri əlavə olunmuşdur. Onun geyimləri artıq parçadan hazırlanmırdı və yumşaq bronjileti xatırladırdı. Çəkmələri isə qırmızı yox, tünd göy rəngdə idi. Dəstə əvvəl qara şalvar daxil olsa da, sonradan ləğv edilmişdir.

2015-ci ilin "Konvergensiya" xəttindən sonra Dayana yeni zirehli geyimlə təsvir edilmiş, həmçinin klassik silahları və tiarası geri qaytarılmışdır.

DC Rebirth

"DC Rebirth" seriyası üçün Ecazkar qadının geyimi yenidən dəyişdirilərək "Betmen Supermenə qarşı" filmindəki Ecazkar qadın personajının geyiminə oxşadılmışdır: həmin geyim qızılı qartal təsvirli qırmızı üst geyimi, mavi dəri ətək, qırmızı çəkmə və qızılı dizliklərdən ibarətdir. Personajın tiarası isə qırmızı ulduzlu qızılı tiara kimi təsvir edilmişdir. Personaj həm də Supermenin xələtini xatırladan qırmızı xələt geyinir.

Ecazkar qadın filmi

Filmdə Ecazkar qadının tiarasında səkkizguşəli ulduz təsvir edilmişdir. Dizayner Lindi Hemminq və rejissor Petti Cenkins qeyd edirlər ki, Femiskira üçün nəzərdə tutulmuş hər bir dizayner işi bir məsələyə gətirib çıxarır: "Mən özüm orada necə yaşamaq istərdim? Onlar kişilər kimi zireh geyinməli deyillər. Bu fərqli bir şey olmalı idi. O həqiqi və real görünməli […] və qadınlar üçün cazibədar olmalı idi." Amazonlara hündürdaban çəkmələrin verilməsi qərarı haqqında soruşduqda isə Cenkins bildirir ki, "bu tamamilə arzunun gerçəkləşdirilməsidir […] mən bir qadın kimi istəyirəm ki, Ecazkar qadın Ecazkar qadın yaxşı döyüşməklə yanaşı həm də, çox gözəl və cazibədar olsun. Bu, kişilərin Supermeni praktik olmayan, lakin gözəl görünən böyük bədənlə təsvir etmələri kimidir. Bu insanları olmaq istədikləri qəhrəman kimi hiss etməyə məcbur edir. Və mənim beynimdə canlandırdığım qəhrəman həqiqətən də uzun ayaqlara malikdir." Bu ideya, Uilyam Molton Marstonun personajı cazibədar etmə fikrinə də uyğundur.

Gözəgörünməz təyyarə

Ecazkar qadının böhrandan əvvəlki dövrə aid hekayələri üçün gözəgörünməz təyyarə mühüm rol oynayırdı. Çünki "Sonsuz dünyalarda böhran"dan sonra Ecazkar qadının hekayəsinin yenidən yazılmasına kimi Dayana uça bilmirdi. Gümüş dövrü və həmin dövrdən sonra Ecazkar qadının gücləri tədricən daha da artırılır, ona külək dalğalarını istifadə etmək və qısa məsafələrə uçuş imitasiya etmək qabiliyyəti verilir, lakin bu qabiliyyətlər də məhdud idi, belə ki, küəlksiz sakit havada Ecazkar qadın uçuş qabiliyyətini itirirdi və yerin təsiri altına düşürdü. Buna görə də o, gözəgörünməz təyyarənin köməyinə ehtiyac duyurdu.

Gözəgörünməz təyyarə Dayana tərəfindən Cənnət adasında yaşadığı dövrdə yaradılmışdı. O, anasının Dayananın insanların dünyasına çıxması planına qarşı narahatlığını azaltmaq üçün bu təyyarəni kəşf etmişdi. Dayananın kəşf etdiyi təyyarə böyük surətlə uçmasına baxmayaraq səs salmır və insanların gözünə görünmür. İlkin komikslərdə təyyarə şəffaf təsvir olunurdu.

All-Star Comics #8 də daxil olmaqla Gözəgörünməz təyyarə ən erkən Ecazkar qadın komikslərində görünməyə başlamış, onun 3,200 km/s sürətlə uçması və göyqurşağı şüaları buraxması qeyd edilmişdir. Ecazkar qadın təyyarəni Vaşinqton şəhəri yaxınlığındakı tərk edilmiş fermanın anbarında gizlədir. Erkən hekayələrin bəzilərində Ecazkar qadın hərbçi geyimində Leytnant Prins adı ilə həmin fermaya gəlir. Böhrandan əvvəlki dövrdə istifadə edilmədiyi müddətdə təyyarə həmin fermada saxlanılır. Böhrandan sonrakı dövrdəki erkən hekayələrdə təyyarə saniyədə 64 km sürətlə uçur.

Qısa müddət sonra Ecazkar qadın təyyarəsini tiarası vasitəsiylə çağıra və oradan sallanan pilləkən vasitəsiylə təyyarəyə qalxa bilir. O, təyyarəni kosmik fəzada uçmaq üçün, həmçinin dəfələrlə Etta Kendi və Hollidey Göls, Stiv Trevor və başqalarını aparmaq üçün istifadə edir. 1950-ci illərdə təyyarə reaktiv raket kimi təsvir edilir və tez-tez Leytenant Prinsin ofisi yaxınlığında enir, o cəld hərbçi geyimindən azad olaraq raketə doğru qaçır. Oxucunun rahatlığı üçün təyyarə yarımşəffaf təsvir olunsa da, yazılardan onun tamamilə şəffaf və görünməz olması məlum olur.

Şahzadə Dayananın gücsüz dövrünə kimi Ecazkar qadın təyyarəni kosmik fəzada uçuş üçün istifadə edir. 1973-cü ildən sonra Ecazkar qadına superqəhrəman gücü qaytarılır və o, yenidən Gözəgörünməz təyyarəni istifadə etməyə başlayır, lakin bu dfə o, təyyarəni yerli uçuşlar üçün istifadə edir. Bir müddət Afrodita təyyarəyə işıq sürətindən daha böyük sürətlə uçmağa və qalaktikalar arası səyahətlər həyata keçirməyə imkan verir Qremlinlərin çalışqanlığı sayəsində təyyarə intellekt və nitq bacarığı da əldə edir. Təyyarə sevimli sahibəsi ilə yaxşı yola gedir və daima ona kömək etməyə çalışır. O, eyni zamanda Stiv Teylorla yaxşı yola gedir.

Tabelik qolçaqları

Dayananın gülləkeçirməz qolçaqları çempionluğundan sonra Eqidaya hədiyyə edilmiş Afinanın əfsanəvi qalxanının qalıqlarından hazırlanmışdır. Qolçaqlar Zevsin körpəliyi zamanı onu əmizdirmiş əfsanəvi keçi Amalfeyanın dərisi ilə üzlənmişdir. Bu zamana kimi məhv edilməmiş qolçaqlar istənilən zərbəni qəbul və dəf edərək Ecazkar qadının döyüş zamanı effektivliyini daha da artırmışdır. Dayana qolçaqları bir-birinə vuraraq elə güclü enerji axını yarada bilir ki, hətta Supermen kimi güclü bir varlığın belə qulaqlarından qan gəlməsinə səbəb olur. Sonradan Dayana qolçaqları vasitəsiylə Zevsin şimşəyini idarə etmək bacarığı da əldə edir. Zevs izah edir ki, qolçaqlar nə zamansa Eqidaya məxsus əşyadan hazırlandığından onlar hər zaman güc daşıyıcısı olmuş, lakin Dayana sonradan onların gücündən xəbər tutmuşdur. 2011-ci ildə personajın yenidən yazılmasından sonra bildirilir ki, Dayana Zevs və Hippolitanın qızıdır və qolçaqlar onun Zevsdən aldığı sərhədsiz gücü nəzarətdə saxlamağa xidmət edir. Hefest həmin qolçaqları modifikasiya edərək alınmış gümüşü metaldan Ecazkar qadına iki qılınc düzəltmişdir. Qırmızı ulduzla bəzədilmiş hər qılınc ehtiyac olduğu zaman şimşək işığı nəticəsində meydana çıxır və sonradan ehtiyac aradan qalxdıqda qolçaqların içinə qayıdır.

Dayananı belə qolçaqlarla təsvir etməyə Uilyam Molton Marstonu, köməkçisi və sevgilisi olmuş Oliv Birnin qolbağıları ilhamlandırmışdır.

Həqiqət qamçısı

"Ecazkar qadın" teleserialında eyniadlı personajı canlandırmış aktrisa Linda Karter, tabelik qolçaqları, həqiqət qamçısı və Ecazkar qadının tiarası ilə ağ ulduzlu şort, qırmızı və qızılı üst geyimində.

Həqiqət qamçısı və ya Hestiyanın qamçısı adlanan qızılı qamçı Hefest tərəfindən Geyanın zəncirindən hazırlanmışdı. Qızıl dövründə təqdim edilən orijinal qamçı ilkin olaraq "Afroditanın sehrli qamçısı" adlandırılırdı. Demək olar ki, məhvedilməz olan qamçı tutduğu insanı həqiqəti söyləməyə məcbur edir; "Identity Crisis" komiksində Yaşıl ox qamçını səhvən "Zevs tərəfindən hazırlanmış yalan detektoru" kimi təsvir edir. Qamçının parçalandığı nadir hallar Ecazkar qadının həqiqəti qəbul etməkdən imtina etdiyi Carhanpurdan Rama Xanla qarşılaşdığı və ya Met Vaqnerin kanonik olmayan "Batman/Superman/Wonder Woman: Trinity" üçlük seriyasında Bizzaro ilə qarşılaşdığı hallardır. Qızıl dövr ərzində qamçı tutulduğu insanın ağıl gücünü belə dəf edərək soruşulan istənilən mövzuda həqiqəti deməyə məcbur edirdi; bu, Kapitan Marvel kimi güclü iradəyə malik varlıqları belə məğlub etməyə köməkçi olur. Qamçını yaxşı idarə edən Dayana onu döyüş zamanı da istifadə edir.

Digər əşyalar

Formal döyüşlər zamanı Dayana qızılı qanadlı qızıl mərasim qılıncı, müdafiə plastinləri, sinəlik və qartal başı formalı dəbilqə kimi digər silahlardan da istifadə edir. Dayananın Hefest tərəfindən hazırlanmış sehrli qılıncı o qədər itidir ki, atom elektronlarını da kəsə bilir.

1950-ci illərin əvvəllərində Ecazkar qadının tiarası da kəsici silah kimi istifadə olunmuş, həmçinin o bumeranq kimi geri qayıdırdı. Tiara həm də Ecazkar qadını telepatik hücumlardan qoruyurdu, telepatik ötürmələri tutduğuna görə, Femiskiradakı amazonlar ulduz rubini vasitəsiylə Ecazkar qadınla əlaqə saxlaya bilirdilər.

Qızıl, gümüş və tunc dövrlərində Ecazkar qadın ağılla idarə oluna bilən və 4,800 km/saat sürətlə uçan gözəgörünməz və səssiz təyyarədən də istifadə edir. Gözəgörünməz təyyarənin xarici görünüşü zamanla dəyişmişdir; əvvəl o, propeller kimi təsvir edilirdisə, sonradan stels təyyarə formalı reaktiv təyyarə kimi göstərilir.

Qızıl dövründə Ecazkar qadın sahib olduğu ultrabənövşəyi şüa vasitəsiylə hətta odlu silahdan yaranmış ölümcül baş yarasını belə sağalda bilirdi. Dayana həm də, ona ehtiyacı olan adamların mesajlarını ala bildiyi mental radioya malik idi.

Ulduz sapfirləri komandasının müvəqqəti üzvü olduğu müddətdə Ecazkar qadın bənövşəyi sevgi üzüyünün gücündən də istifadə edə bilir. Üzüyün köməkliyi ilə o, kostyumunun formasını dəyişə, sərt enerjidən konstruksiyalar yarada və insana əsl sevgi nümayiş etdirə bilir. Qamçısının gücünü artırmaq üçün, bəzən üzüyün ötrürdüyü gücü qamçıya istiqamətləndirir.

Ədəbi və bədii tənqidi

İlahi gücə malik mərhəmətli döyüşçü olan Ecazkar qadın sülh və sevgini müharibə və şiddətə tərcih edir, çoxdan personajın simvoluna çevrilmiş bu təzad isə qadın haqqlarının genişləndirilməsinin gündəmə gətirilməsi və mübahisələrə səbəb olmuşdur. Erkən Ecazkar qadın hekayələrində çoxlu sayda bondaj səhnələrinə yer verilirdi ki, bu da tədqiqtçıları narahat edirdi.

Ecazkar qadın personaj olaraq gənc qızlar və oğlanlar üçün müsbət nümunə kimi yaradılmasına baxmayaraq, o, on illər ərzində komiks sənayesində hökm sürmüş qadınsevməzliklə mübarizə aparmağa məcbur olmuşdur. Məsələn, Ecazkar qadın Amerikanın Ədalət Cəmiyyətinin banilərindən biri olmuşdur. Bu siyahıya orijinal Fleş və Yaşıl fənər də daxildir. Ecazkar qadın təcrübəli lider olmaqla yanaşı, həm də onların arasında ən güclü olanı idi; lakin daha çox katibə kimi təqdim edilirdi. Bu, onun əksər Ədalət Liqası macəralarının çoxunda personajın gücünü itirməsi və əsir alınması da bununla əlaqədardır. 50–60-cı illərin komiks yazıçıları tez-tez Ecazkar qadının sevgi marağı kimi ABŞ ordusunun mayoru Stiv Trevoru təsvir edirlər. Hekayələrdə tez-tez Ecazkar qadının Trevorla evlənməyə ümid etməsi və arzulaması göstərilir.

"Empire" jurnalı Ecazkar qadını XX əsrin ən böyük komiks personajı adlandırmışdır. "Comics Buyer's Guide"ın Komikslərdə 100 ən seksual qadın siyahısında Ecazkar qadın altıncı yerdə qərarlaşmışdır. "IGN"in 2011-ci ilin mayında nəşr etdiyi "Bütün zamanların 100 ən böyük komiks kitabı qəhrəmanı" siyahısında Ecazkar qadın beşinci yerdə qərarlaşdırılmışdır.

Lakin, tənqidçilər heç də hər zaman Ecazkar qadını müsbət qəbul etməmişlər. Psixiatr Fredrik Vertam qalmaqallı "Günahsızların yoldan çıxarılması" adlı əsərində bildirir ki, Ecazkar qadının güclü və müstəqil olması onun lezbiyan olmasına yol açmışdır.

Mədəni təsiri və qəblu

Feminizm ikonu

Ecazkar qadın "Ms." jurnalının üz qabığında, 1972-ci il.

Feminizm ikonası və "Ms." jurnalının banisi Qloriya Steynem Ecazkar qadının orijinal güclərinin qaytarılmasında mühüm rol oynamışdır. Ən məşhur qadın superqəhrəmanın güclərinin əlindən alınaraq bəlada olan xanıma çevrilməsini qəbul etməyən Steynem, Ecazkar qadının təsvirini DC Comicsin də sahibi olan "Warner Communications"a məxsus "Ms." (1972) jurnalında yerləşdirərək, personaj haqqında ətraflı esse nəşr edir. Bundan sonra #204-cü nömrədə (yanvar–fevral 1973) Ecazkar qadının əvvəlki güc və bacarıqları qaytarılır.

1972-ci ildə ABŞ Ali Məhkəməsinin "Rou Ueydə qarşı" məhkəmə işində verdiyi qərardan bir neçə ay sonra elmi-fantastika yazarı Samuel R. Delaninin "Ms." Jurnalı üçün yazdığı hekayədə Ecazkar qadın abort klinikasını müdafiə edir, lakin Steynem Ecazkar qadının kostyumsuz təsvirinə qarşı çıxır və mübahisəli süjet xətti yayımlanmır.

Ecazkar qadın personajı yaradılarkən ilkin olaraq fiziki və zəka gücünü nümayiş etdirmək, yalnız kişilərə xas olmayan dəyərlər və etik atributların göstərilməsi ilə bütü yaşlardan olan çoxlu sayda qadınlara təsir etmək nəzərdə tutulmuşdu. "Ecazkar qadın, hazırda feministlərin meynstrimə çevirməyə çalışdıqları bir çox qadın mədəniyyəti dəyərlərini simvolizə edir: qadınların güclü və özünə inamlı olması, qadınlar arasında qarşılıqlı anlaşma və etibar, sülhpərvərlik və insan həyatına sevgi, kişilərin, gücün problemlərin həll edilməsi üçün yeganə çıxış yolu olduğu fikrinə qarşı mübarizə ideyasına qarşı mübarizə" deyə Steynem yazır.

Ecazkar qadının mənşəyi və psixoloji xasiyyətnaməsi arxasında duran səbəblər Uilyam Morton Marstonun təhsil, etik və mənəvi dəyərləri arasındadır. "Uilyam Marston qarşısına gənc oğlanlara qızların gücünü göstərən və Supermen qədər güclü olan feminist personaj yaratmaq məqsədi qoymuşdu" deyə Qledis Nayt 1870-ci illərdən bu günə kimi superqəhrəmanların bizə və cəmiyyətə təsirini izah edərkən qeyd edir.

Mark DiPaolo oxucularını Ecazkar qadınla tanış edərək onun "İkinci Dünya müharibəsi veteranı, feminizm ikonası və və seks simvol" olmasını qeyd edir. Ecazkar qadın müxtəlif filmlərdə görünsə də, ağ, qırmızı və mavi geyimləri, uzun və seksual ayaqları ilə tanınır, lakin əksər insanlar bilmirlər ki, o, müxtəlif yaş, cins, millət və irqlərdən olan insanların xarakterinə təsir etmiş, komiks və superqəhrəman tarixinin böyük hissəsidir. "Marston komiks personajı Ecazkar qadını güclü və seksual yaratmaqla, qadınları oyatmaq və onların gücünü nümayiş etdirməyə çalışmışdır."

Təsirli feminizm ikonası mirasını davam etdirməklə Ecazkar qadın 2015-ci ildə komiks seriyasında eynicinsli nigahın rəsmiləşddirilməsində iştirak etmiş ilk superqəhrəman olmuşdur.

21 oktyabr 2016-cı ildə BMT Baş katib əvəzçisinə həsr edilmiş mərasimdə Ecazkar qadın və aktirsalar Linda Karter və Qal Qadot BMT-nin xoşməramlı səfiri elan edilmişdir. Lakin, Ecazkar qadının "həddən artıq hissiyyatlı" olması və "BMT-nin personajın açıq seksual təsvirlərindən istifadə etməsi"nə qarşı petisiya nəticəsində iki ay sonra o, bu vəzifədən uzaqlaşdırılmışdır.

Pasifizm ikonu

Ecazkar qadının böyük dəstəkçisi və "Ms." Jurnalının redaktoru olan Qloriya Steynem qeyd edir ki, "Marston Ecazkar qadını balaca qızların qəhrəmanı və oğlan komikslərindəki güc nümayişinə alternativ kimi yaratmışdır." Ceyson Bedouer xuliqanlığa qarşı durmaq üçün beynəlxalq insidentə yaxın (dumanlı dağ aşırımları vasitəsiylə çoxlu sayda tanklar və silah-sursat keçirməyə çalışan adı çəkilməyən Rusiya generalının iştirakı ilə) hadisəni təsvir edir. "O, gülləni əks etdirərək generalı silahsızlaşdırır" deyə o, davam edir "əslində hekayədə o, heç nə etmir. Mən sadəcə fikirləşirəm ki, Ecazkar qadın ağıllıdır."

Nik Pamfri qeyd edir ki, Ecazkar qadın kişilər və qadınlar üçün ümid mayakı rolunu yerinə yetirir. Qrant Morrison qeyd edir ki, "Mən oturdum və fikirləşdim ki, mən bu qadını döyüşçü kimi görmək istəmirəm. Mən başa düşürəm onlar bunu nəyə görə edirlər və bütün bunlar nəyə görə baş verir, lakin bu, [Ecazkar qadının yaradıcısı] Ulyam Marstonun istədiyi bir şey deyil! Onun Ecazkar qadın üçün orijinal nəzəriyyəsi qan və maskulinliklə dolu komikslərə cavab kimi nəzərdə tutulsa da, Qal Qadotun son görüntülərinə baxın, orada yalnız kameraya yönəlmiş qılınc və qalxan diqqət çəkir. Marstonun Dayanası isə həkim, təbib və alim idi."

LGBT ikonu

"Sensation Comics #48"-də (2016) Ecazkar qadın Nyu-Yorkda iki xanım arasında eynicinsli nikahın rəsmiləşdirilməsində iştirak edir. "Mənim ölkəmdə yalnız qadınlar yaşayırlar. Bizim üçün bu gey evliliyi deyil. Bu sadəcə evlilikdir" deyə o, Supermenə müraciət edir.

Uiyam Marstoun erkən işləri sapfoik mətnaltı məzmunu ilə diqqət çəkirdi. Fredrik Vertam "Günahsızın yoldan çıxarılması" əsərində Ecazkar qadını Betmenin lezbiyan rəfiqəsi (Betmeni isə o, homoseksual hesab edir) adlandırır. Sonrakı on illər ərzində DC Comics nəşrlərindəki seksuallığı azaltmağa çalşmış, Ecazkar qadın yazıçıları isə personajın seksuallığına yalnız üstüörtülü işarələr etməklə kifayətlənmişlər.

DC-nin hazırkı "Rebirth" kanonu ilə paralellərə malik olan Qrant Morrisonun 2016-cı ildə nəşr edilmiş "Wonder Woman: Earth One" komiksində Ecazkar qadın sarışın qızın yanağından öpür.

Ecazkar qadın hiss edir ki, onun özünə "seksuallıq etiketi" asmasına ehtiyac yoxdur və o, insanları yalnız "kimliklərinə və xasiyyətlərinə görə sevir". "Yalnız qadınların yaşadığı dünyadan çıxdığına görə, insanların dünyasında lezbiyanlıq kimi qəbul edilən, onların aləmində natural normativlik kimi qəbul edilə bilərdi. Onun daşıyıcısı olduğu mədəniyyət heteronormativlikdən tamamilə azad olduğuna görə, onun üçün seksdə heç bir gender rolu yoxdur." Digər amazon İo ilə qarşılıqlı hisslərə malik olduğuna görə, Ecazkar qadın kvir və ya biseksual kimi təsvir edilmişdir.

2016-cı ildə çıxarılmış və illüstrasiyaları Avstraliya rəssamı Ceyson Bedouer tərəfindən çəkilmiş "Sensation Comics" #48-də Ecazkar qadın eynicinsli nikahın rəsmiləşdirilməsində iştirak edir. "Mənim ölkəmdə yalnız qadınlar yaşayırlar. Bizim üçün bu gey evliliyi deyil. Bu sadəcə evlilikdir" deyə o, Supermenə müraciət edir. Həmin ilin iyununda ABŞ Ali Məhkəməsinin 50 ştatda eynicinsli evlilikləri leqallaşdıran qərarından sonra Bedouer, DC Comicsin onun problemin həll edilməsinə yanaşmasını "fantastik" kimi qiymətləndirdiyini qeyd edir. "The Sydney Morning Herald" qəzetinə verdiyi müsahibədə o, deyir ki, redaktor "Bu çox gözəldir, bunu çox bəyənirəm! Bunu etməliyik! Lakin, bunun real olmasına ümid yoxdur!" bildirmişdir. "Dayananın kraliça anası belə nikahların həyata keçirilməsində itirak etmiş və ya icazə vermişdir." deyə Bedouer qeyd edir.

Ecazkar qadının mənşə hekayəsinin "Rebirth" seriyası ilə yenilənməsindən sonra 2016-cı ilin sentyabrında Qreq Ruçka personajın kanonik səviyyədə biseksual olmasını elan etmişdir. Ruçka qeyd edir ki, onun fikrincə Ecazkar qadın kvir olmalıdır və yalnız qadınlarla məskunlaşmış adada mütləq eynicinsli əlaqəyə malik olmuşdur. Bundan sonra Qrant Morrison tərəfindən personajın kanonik olmayan "Earth-One" versiyası yaradılmış, Ecazkar qadın yazıçısı Geyl Simon isə onu dəstəkləmişdir. Ruçka bildirir, Supermen üçün ədalət necə vacibdirsə, Ecazkar qadın üçün də razılıqlı seks o qədər vacibdir.

Ecazkar qadın rolunu canlandırmış aktrisa Qal Qadot personajın yenilənmiş seksual oriyentasiyasını müsbət qarşılamış və bunun yalnız qadınlarla məskunlaşmış Femiskira ilə əlaqələndirmişdir.

Digər mediada

DC Genişləndirilmiş Kainatı filmlərində Ecazkar qadın rolunu aktrisa Qal Qadot canlandırır. 2017-ci ildə çıxarılmış "Ədalət liqası" filmindən səhnə; soldan sağa: Akvamen, Ecazkar qadın və Kiborq.

1941-ci ilin dekabrında komiks kitablarında debüt etdikdən sonra, Ecazkar qadın müxtəlif uyğunlaşdırmalarda görünmüşdür. Bu formatlara televiziya şouları, video oyunlar və bədii filmlər daxildir.

Televiziya

Ecazkar qadın müxtəlif televiziya uyğunlaşdırmalarına malikdir ki, onlar arasında da ən çox diqqət çəkən 1974-cü il istehsalı olan "Ecazkar qadın" televiziya filmi və 1970-ci illərdə yayımlanmış "Ecazkar qadın" teleserialı olmuşdur.

Film

Personaj, birbaşa DVD-də yayımlanmış animasiya filmləri və "Lego film" (2014) kimi CGI kinoteatr animasiyalarında görünmüşdür. DC Genişləndirilmiş Kainatında Ecazkar qadın "Betmen Supermenə qarşı: Ədalətin şəfəqi" filmində (2016) debüt etmiş, daha sonra ona həsr edilmiş "Ecazkar qadın" (2017) filmi çıxarılmışdır. Daha sonra Ecazkar qadın 2017-ci ilin noyabrında çıxarılmış "Ədalət Liqası" adlı DCGK filmində iştirak etmişdir.

2017-ci ildə çıxarılmış "Professor Marston və Ecazkar qadın" filmi, Ecazkar qadın personajının müəllifi olan Uilyam Molton Marston, onun həyat yoldaşı olan psixoloq Elizabet Hollovey Marston və onların sevgilisi Oliv Birn arasında poliqam münasibətlərdən bəhs edir; filmdə yalan detektorunun kəşf edilməsi və professor Marstonun Ecazkar qadın personajının yaradılmasına ilhamlanması göstərilmişdir.

Xarici keçidlər

• Ecazkar qadın rəsmi saytı DC Comics.com-da
• Ecazkar qadının mənşə hekayəsi DC Comics.com-da
• AmazonArchives.com
• Wonder of Wonders
• Glen, Joshua. "Wonder-working Power". The Boston Globe. April 4, 2004.
• Jett, Brett. "Who Is Wonder Woman?", " (Əlyazma) (2009): 1–71.
• Jett, Brett. "Who Is Wonder Woman?--Bonus PDF", " (PDF) (2009): 1–17.
• Malcolm, Andrew H. "She's Behind the Match For That Man of Steel". The New York Times. February 18, 1992.
• Marston, William Moulton. Emotions Of Abnormal People. London: Kegan Paul, Trench, Trübner & Co, Ltd. 1928. ISBN 1406701165
• Rosenberg, Robin S. "Wonder Woman As Émigré — Why would Wonder Woman leave her idyllic existence on Paradise Island?", (məqalə) (2010).
• Rosenberg, Robin S. "Wonder Woman: Compassionate Warrior for Peace", (məqalə) (2013): 1–35.
• Valcour, Francinne. "Manipulating The Messenger: Wonder Woman As An American Female Icon", (dissertasiya) (2006): 1–372.

Komiks portalı   Fantastika portalı   Superqəhrəmanlar portalı   LGBT portalı   ABŞ portalı   Feminizm portalı