Günel Natiq

Günel Natiq
Günel Natiq qızı Natiq
Doğum tarixi	12 mart 1980(1980-03-12) (44 yaş)
Doğum yeri	Bakı, Azərbaycan SSR, SSRİ
Milliyyəti	azərbaycanlı
Təhsili	Bakı Slavyan Universiteti
Fəaliyyəti	jurnalist redaktor yazıçı publisist
Əsərlərinin dili	azərbaycanca
Janr	hekayə
Üzvlüyü	AJB (2005) AYB (2016)
Mükafatları	Prezident təqaüdçüsü (2019)

Günel Natiq (Günel Natiq qızı Natiq; 12 mart 1980, Bakı) — azərbaycanlı yazıçı, esseist, jurnalist, Azərbaycan Jurnalistlər Birliyinin (2005) və Azərbaycan Yazıçılar Birliyinin (2016) üzvü, Prezident təqaüdçüsü (2019).

Həyatı

Günel Natiq 1980-cı il martın 12-də Bakıda ziyalı ailəsində anadan olub. 2001-ci ildə Bakı Slavyan Universitetinin rus dili və ədəbiyyatı fakültəsini bitirib.

Fəaliyyəti

Jurnalist kimi fəaliyyəti

Azərbaycan Radiosunun tarixində ən gənc redaktor (17 yaşında) olan Günel Natiq radioya gəldiyi ilk illərdən orijinal üslubu, özünəməxsus ifadə tərzilə seçilib və öz dinləyici auditoriyasını qazanıb.

Azərbaycan Radiosunda məşhur "Qərib axşamlar" verilişinin müəllifidir. AzTV-nin rəsmi jurnalında "Qərib axşamlar" haqqında xüsusi reportaj (2011) hazırlanıb. "Qərib axşamlar" ilk illərdə qaçqın və köçkünlərin həyatına dair radio hekayələr formatında efirə verilib. Sonrakı illərdə proqramın formatı dəyişməsə də, qəhrəmanları dəyişib. Azərbaycan və dünya ədəbiyyatının seçilən imzaları Günel Natiqin bələdçiliyilə fərqli rakursdan təqdim edilib.

90-cı illərdən başlayaraq "Gündoğandan-günbatana" verilişinə müəlliflik edən Günel Natiq türkçülüyün təbliğində rol oynayan silsilə proqramlar (qədim türk tarixi, etnoqrafiyası, maddi-mənəvi abidələri haqqında) hazırlayıb.

2010-2012-ci illərdə özünü televiziya aləmində sınayıb. AzTV-də yayınlanan "Şəbəkə" proqramı incəsənət, rəssamlıq, xalq sənətkarlığı barədə fikirləri, təhlilləri, rəyləri özündə sığdırıb, tamaşaçılar tərəfindən maraqla qarşılandığından təkrar-təkrar nümayiş etdirilib.

2012-ci ildə Azərbaycan Radiosunda həm məzmunca, həm də formaca yeni veriliş dünyaya gəlib. "Söz naxışı" Günel Natiqin ən maraqlı layihələrindən biri kimi efir həyatı qazanıb. Verilişin hər sayı tədqiqat işi kimi incələnib. Sözlərin mifoloji kökü araşdırılıb, fəlsəfi nöqteyi-nəzərdən şərh edilib, elmi-estetik cəhətdən informasiya verilib. Həmin məqalələrin bəziləri qəzet və jurnallarda dərc edilib.

2021-ci ildə radioda yeni islahatlar dönəmində Günel Natiq yeni layihəsini təqdim edib. Sənət tarixində, bəşər tarixində iz salmış insanların sevgi hekayətlərini qələmə alan müəllif daim dəyişən dünyada sevgi ideallarının hər zaman sabit qalacağı fikrini önə çəkib. Eyni zamanda, layihənin məqsədi bu yarı gerçək, yarı əfsanə olan münasibətlərin bəşər mədəniyyətinə verdiyi dəyərlərə işıq salmaq, onun fonunda zaman, mühit, insan problemini aydınlığa qovuşdurmaqdır. Səhnələşdirilmiş radio formatda təqdim edilən "Əhməd Cavad və Şükriyyə", "Çingiz Aytmatov və Bübüsara", "Mirzə Cəlil və Həmidə xanım", "Lev Tolstoy və Sonya"nın sevgi hekayətləri də bu qəbildəndir.

Müasir dövrümüzdə dastanlaşan qəhrəmanların həyatı da "Roman kimi"nin taleyi ilə çulğaşıb. Vətən müharibəsində qəhrəmancasına həlak olmuş şəhid Fariz Həsənov və həyat yoldaşı Əzizə, eləcə də başqa bir igid Röyal Cəfərovla xanımı Firuzənin nəsillərə örnək olacaq hekayətləri də proqramın bələdçiliyilə yaddaşlara köçüb.

Publisistik məqalə, hekayə və povestləri "Azərbaycan", "Ulduz", "Yazı", "Bənövşə", "Ustad", "Ədəbi ovqat" jurnallarında, "Aydın yol", "Kaspi", "Ədəbiyyat qəzeti", "525-ci qəzet", "Ədalət", "Türküstan", "Referans" (Almaniya) və s. qəzetlərdə, müxtəlif ədəbiyyat saytlarında dərc edilib. Esse və hekayələri Türkiyə türkcəsinə çevrilərək qardaş ölkənin bir sıra jurnal, qəzet və saytlarında yayınlanıb.

Yazıçı kimi fəaliyyəti

2015-ci ildə hekayə, esse, portret yazılar və araşdırmalardan ibarət "Kağız gəmilər" kitabı işıq üzü görüb.

2019-cu ildə "Məhəbbət quşları" adlı hekayələr kitabı çapdan çıxıb. "Aktrisa", "Ayaqyalın gəzən rəssam", "Ömür", "Epidemiya", "Gözəl günlər naminə", "Yazarın intiharı", "Darıxmaq ağrısı" və s. hekayələri xüsusi rəğbət və müsbət rəy qazanıb.

2021-ci ildə "Azərbaycan" jurnalı və "Aydın yol" qəzetində yayınlanan məqalələrdən ibarət "Ədəbi talelər" kitabı çap edilib. Bu kitabda Günel Natiqin dünya yazarlarının həyatı və yaradıcılığı barədə araşdırma yazıları toplanıb. Ciddi axtarış və yaradıcılıq prosesindən keçən bu məqalələr nadir müsahibələrin, məktubların əsasında qələmə alınıb. Qəhrəmanları haqqında dolğun təəssürat yaratmaq üçün müəllif əsərlərdən bəzi fraqmentləri də öz tərcüməsində təqdim edib.

2015-ci ildən "Kulis" ədəbiyyat portalında köşə yazılarıyla çıxış edib. "Azərbaycan" jurnalının "Ədəbi talelər" rubrikasında silsilə məqalələr müəllifidir.

• Tərcüməçi Natiq Səfərovun qızıdır.

Kitabları

• Kağız gəmilər. Bakı: 2015
• Məhəbbət quşları. Bakı: 2019
• Ədəbi talelər. Bakı: 2021

Xarici keçidlər

• Günel Natiq Öykücülüğü Hakkında
• Günel Natiq. Bircə
• Günel Natiq. Epidemiya (hekayə)