525-ci qəzet

Vikipediya, azad ensiklopediya
Jump to navigation Jump to search
525-ci qəzet
Loqonun şəkli
Növ Gündəlik ictimai-siyasi qəzet
Format A3
Təsisçi "525" şirkəti
Baş redaktor Rəşad Məcid
Baş redaktor müavini Yusif Rzayev
Seyfəddin Hüseynli
Redaktor Aydın Bağırov
Yaranma tarixi 17 noyabr 1992 (28 il əvvəl) (1992-11-17)
Dil azərbaycanca
Qiymət 40 qəpik
Səhifə 16 (çərşənbə axşamı, cümə axşamı və cümə günləri)
24 (çərşənbə və şənbə günləri, rəngli)
Ünvan AZ1033. Bakı şəhəri, Əhməd Cəmil küçəsi 64/66
Şəhər Bakı
Ölkə Azərbaycan Azərbaycan
Tiraj 3500
525.az

525-ci qəzet — 1992-ci ildən etibarən Azərbaycan Respublikasında nəşr edilən qəzet.[1]"525-ci qəzet" Bakı Mətbuat Klubunun həmtəsisçisi, Azərbaycan Mətbuat Şurasının üzvüdür.

Tarixi[redaktə | mənbəni redaktə et]

"525-ci qəzet"in ilk sayının 1-ci səhifəsi

"525-ci qəzet"in ilk sayı 1992-ci il noyabrın 17-də — Milli Dirçəliş Günü nəşr olunub. Nəşrə həftəlik qəzet kimi başlayan "525-ci qəzet" 1996-cı ildən həftədə iki dəfə, 1999-cu ildən gündəlik mətbu orqan kimi fəaliyyət göstərir. Qəzet həftədə 5 dəfə — çərşənbə axşamı, cümə axşamı və cümə günləri A3 formatında 16, çərşənbə və şənbə günləri isə A3 formatında 24 səhifə işıq üzü görür. Qəzetin səhifələrində əsasən ölkədə və dünyada baş verən ictimai-siyasi, sosial-iqtisadi, elmi-mədəni hadisələrlə bağlı xəbərlər, idman, ədəbi-bədii mövzularda yazılar, şərh və analitik materiallar, müxtəlif ədəbi nəsilləri təmsil edən Azərbaycan şair və yazıçılarının, ədəbiyyat və elm adamlarının əsərlərindən nümunələr dərc olunur. Təsadüfi deyil ki, artıq neçə illərdir, Azərbaycanın tanınmış ziyalıları, ictimai-siyasi, elm, mədəniyyət və incəsənət xadimləri, o cümlədən, Xalq yazıçıları — Anar, Elçin, Kamal Abdulla, Afaq Məsud, Elmira Axundova, Xalq şairləri — Fikrət Qoca, Nəriman Həsənzadə, Ramiz Rövşən, Musa Yaqub, Sabir Rüstəmxanlı, tanınmış şair və yazıçılar — Vaqif Bayatlı Odər, Vaqif Bəhmənli, Seyran Səxavət, Aqil Abbas, Əli Əmirli, akademiklər — İsa Həbibbəyli, Rafael Hüseynov, Nizami Cəfərov, Teymur Kərimli, Muxtar İmanov, AMEA-nın müxbir üzvləri — Misir Mərdanov, Könül Bünyadzadə, Tehran Əlişanoğlu, elmlər doktorları — Vilayət Quliyev, Solmaz Rüstəmova-Tohidi, Aida Qasımova, Cahangir Məmmədli, Qəzənfər Paşayev, Nəsir Əhmədli, Qulu Məhərrəmli müntəzəm olaraq qəzetin səhifələrində öz yazıları, bədii əsərləri və məqalələri ilə çıxış edirlər. Azərbaycan Xalq Cümhuriyyəti dövrünün tədqiqatçısı, alim, mərhum professor Şirməmməd Hüseynov təxminən 20 il ərzində Azərbaycan tarixi üçün əhəmiyətə malik araşdırma yazılarını müntəzəm olaraq məhz "525-ci qəzet"də dərc etdirirdi. Müxtəlif illərdə onun təşəbbüsü ilə qəzetin səhifələrində Azərbaycan mətbuatının klassik nümunələrindən — "İrşad", "Həyat", "Azərbaycan" qəzetlərindən seçmələr də yer alırdı. Azərbaycan Xalq Cümhuriyyətinin 100 illiyi ərəfəsində "Azərbaycan" qəzetinin Cümhuriyyətin yaranmasının bir illiyinə həsr olunmuş sayı da bu nümunələrdən biri kimi "525-ci qəzet"in içərisində ayrıca qəzet kimi çap edilmişdi.

Kollektivi[redaktə | mənbəni redaktə et]

"525-ci qəzet"in baş redaktoru Rəşad Məcid

Yarandığı gündən yaradıcı, istedadlı gənclər üçün meydan olacağını vəd edən "525-ci qəzet" fəaliyyət göstərdiyi dövr ərzində bu vədinə sadiq qalaraq həmişə istedadlı qələm adamlarının yetişmələri, ilk qələm təcrübələrini qəzet səhifələrində dərc etdirmələri üçün maksimum imkan yaratmağa çalışıb. Təsadüfi deyil ki, bu illər ərzində "525-ci qəzet"də təcrübə qazanan onlarla gənc artıq peşəkar jurnalist kimi Azərbaycanda və xaricdə fəaliyyət göstərən ən müxtəlif media orqanlarında — qəzet, televiziya və informasiya agentliklərində rəhbər vəzifələrdə çalışırlar. Onların arasında bu gün tanınmış, müxtəlif dövlət mükafatları ilə təltif olunmuş, fəxri adlara layiq görülmüş neçə-neçə jurnalist də var. Hətta həmin gənclərin bir neçə nəfəri bu gün ayrı-ayrı hökumət və dövlət strukturlarında məsul vəzifələrdə fəaliyyət göstərirlər.

Bu gün "525-ci qəzet"də əsasən gənc jurnalistlər çalışır. Eyni zamanda, qəzetdə tanınmış qələm adamları da fəaliyyət göstərirlər. Qəzetin baş redaktoru Rəşad Məcid Əməkdar mədəniyyət işçisi, Azərbaycan Mətbuat Şurası İdarə Heyətinin üzvü, Azərbaycan Yazıçılar Birliyinin Gənclərlə iş üzrə katibidir. Qəzetin baş redaktorunun müavinləri tanınmış jurnalistlər — Əməkdar jurnalist Yusif Rzayev və Seyfəddin Hüseynli, redaktoru Əməkdar jurnalist Aydın Bağırovdur.

Yubiley tədbirləri[redaktə | mənbəni redaktə et]

2017-ci ilin noyabr ayında — "525-ci qəzet"in 25 illik yubileyi münasibətilə Bakı Dövlət Universiteti Jurnalistika fakültəsinin kafedra müdiri, professor Cahangir Məmmədlinin müəllifi olduğu ""525" — Zamanın sınağında" adlı irihəcmli kitab nəşr edilib. Kitabda "525-ci qəzet"in 25 illik fəaliyyəti geniş və hərtərəfli təhlil olunub, tanınmış media nümayəndələrinin, elm, ədəbiyyat, mədəniyyət xadimlərinin qəzetlə bağlı fikir və düşüncələri yer alıb.

Həmin il qəzetin 25 illik yubileyi münasibəti ilə Bakı Dövlət UniversitetindəAMEA-nın Nizami adına Ədəbiyyat İnstitutunda yubiley tədbirləri keçirilib. Azərbaycanın nüfuzlu pedaqoqları və elm adamları çıxışlar edərək qəzetin 25 illik fəaliyyəti ilə bağlı öz fikirlərini bildiriblər.

Akademik İsa Həbibbəyli qəzetin 25 illik yubileyi ərəfəsində qələmə aldığı ""525-ci qəzet" məktəbi" adlı yazısında qeyd edir:

" Azərbaycan mətbuatı tarixində böyük məktəb yaratmış məşhur "Molla Nəsrəddin" jurnalından və "Füyuzat" məcmuəsindən sonra "525-ci qəzet" də xüsusi jurnalistika məktəbi səviyyəsinə çata bilmişdir... Müstəqillik dövrü Azərbaycan mətbuatının "525-ci qəzet" mərhələsi mövcuddur. "525-ci qəzet"in 25 illiyi müstəqil mətbuatımızın keçdiyi məsuliyyətli yolun həm şərəfli salnaməsi, həm də etibarlı bələdçisidir... "525-ci qəzet" — müasir dövrün qəzetçilik məktəbidir. "525-ci qəzet" universal mətbuat formatının universitetidir. "525-ci qəzet"in — gündəlik hər sayı müasir jurnalistikanın dərsləridir.[2] "

İstinadlar[redaktə | mənbəni redaktə et]

Ədəbiyyat[redaktə | mənbəni redaktə et]

  • Cahangir Məmmədli. "525" — Zamanın sınağında. Bakı: "Zərdabi LTD", 2017.

Xarici keçidlər[redaktə | mənbəni redaktə et]