Göy Qurşağı (jurnal)
| "Göy Qurşağı" jurnalı | |
|---|---|
| Baş redaktor | Şəhla Qəmbərova |
| Növ | uşaq jurnalı |
| Format | A4 |
| Tiraj | 300 |
| Təsisçi | F.Köçərli adına Respublika Uşaq Kitabxanası |
| Təsis tarixi | 2006 |
| Qərargah | Azərbaycan, Bakı şəhəri, Səməd Vurğun 88 |
| Dil | Azərbaycan dili |
"Göy Qurşağı" jurnalı - uşaq və yeniyetmələrin maarifləndirilməsinə yönəlmiş dövri uşaq jurnalı.
Haqqında
[redaktə | vikimətni redaktə et]“Göy Qurşağı” uşaq jurnalı Firidun bəy Köçərli adına Respublika Uşaq Kitabxanasının təşəbbüsü ilə 2006-cı ilin mart ayından nəşr olunur. Jurnalın əsas məqsədi məktəblilərin dünyagörüşünü genişləndirmək, bilik səviyyəsini artırmaq və onların intellektual-mənəvi inkişafını dəstəkləməkdir. Nəşr uşaqların maariflənməsinə xidmət etməklə yanaşı, onların yaradıcılıq potensialının üzə çıxarılmasına və asudə vaxtlarının səmərəli təşkilinə töhfə verir.
32 səhifədən ibarət olan jurnal rəngarəng dizaynı və nəfis tərtibatı ilə seçilir və hər nömrəsi uşaqlar tərəfindən maraqla qarşılanır. Jurnalın məzmunu çoxşaxəlidir: burada yerli və xarici müəlliflərin əsərlərindən seçilmiş nümunələr, əlamətdar və tarixi günlər, milli və beynəlxalq bayramlar, görkəmli şəxsiyyətlər, tarixi hadisələr, kitabxanaya daxil olan yeni nəşrlər, eləcə də təhsil və mədəniyyət müəssisələri haqqında məlumatlar təqdim olunur.[1] Bununla yanaşı, jurnalda uşaqların qələmə aldıqları şeir və hekayələrə, çəkdikləri rəsmlərə geniş yer ayrılır ki, bu da onların yaradıcı təfəkkürünün inkişafını stimullaşdırır. Nəşrdə həmçinin məntiqi və interaktiv oyunlar, rəngləmə səhifələri, tapmacalar və müxtəlif əyləncəli rubrikalar təqdim olunur. Jurnalda yer alan materiallar azərbaycan, ingilis və rus dillərindədir.[2]
Redaksiya heyəti
[redaktə | vikimətni redaktə et]Jurnalın hazırkı baş redaktoru Respublika Uşaq Kitabxanasının direktoru, "Əməkdar mədəniyyət işçisi" Şəhla Qəmbərovadır. Müxtəlif illərdə jurnalın redaktə və nəşr prosesində Knyaz Aslan, Ülviyyə Gülməmmədova, Sərvinaz Adilqızı, Zahirə Dadaşova, Sevinc Nuruqızı, Aygün Mütəllimova və Aynur Turan iştirak etmişlər. Jurnalın korrektoru İlahə Quliyeva, bədii tərtibatçısı isə Aqil Tağıyevdir.[3]
"Körpəm" jurnalı (ilkin nəşr adı)
[redaktə | vikimətni redaktə et]“Körpəm” jurnalı 2006-cı ilin mart ayından nəşr olunmuş və həmin ilin oktyabr ayınadək bu adla çap edilmişdir. Jurnal ilk dəfə Azərbaycan Respublikası Mədəniyyət və Turizm Nazirliyinin dəstəyi ilə, Firidun bəy Köçərli adına Respublika Uşaq Kitabxanası və “Körpəm” Eksperimental Uşaq Teatrının birgə əməkdaşlığı çərçivəsində təsis edilmişdir. Nəşrin ilk dövrlərində formalaşan redaksiya heyətində müxtəlif yaradıcı və təşkilati vəzifələri yerinə yetirən əməkdaşlar təmsil olunmuşdur. Müxtəlif illərdə jurnalın fəaliyyətində “Əməkdar mədəniyyət işçisi” Fizurə Quliyeva (baş direktor və təsisçi), Arzu Soltan (baş redaktor), Sərvinaz Adilqızı (baş prodüser), Elşən Qurbanov (bədii tərtibatçı), Rafət Quliyev və İlkin Zeynalov (yayım menecerləri) iştirak etmişlər. [4] Bu heyətin fəaliyyəti jurnalın məzmununun formalaşdırılması, nəşr prosesinin təşkili və oxucu auditoriyasının genişləndirilməsində mühüm yer tutmuşdur. Jurnal uşaqların yaş xüsusiyyətləri və maraq dairələrinə uyğun zəngin rubrika sistemi ilə seçilmişdir. Nəşrdə “Körpəmin sualı”, “Qurman körpəm”, “Münəccim körpəm”, “Körpəmin Azərbaycan guşəsi”, “Körpəmin fantaziyası”, “Biləyən körpəm” və “Körpəmin yaradıcılığı” kimi rubrikalar yer almışdır. [5] Bu rubrikalarda maarifləndirici, əyləncəli, elmi-kütləvi və yaradıcılıq yönümlü materiallar dərc edilmişdir.